Saa ɛkɔ jw.org home page ne anzɛɛ mɔlebɛbo foa ne azo ala a, ɛbanwu edwɛkɛ nee vidio ngakyile mɔɔ ahonlekpalɛma anye balie nwolɛ la wɔ ɛkɛ. (Gyi 13:48) Ɔta ɔyɛ edwɛkɛ adile mɔɔ finde amaneɛbɔlɛ nu, mɔɔ menli ɛlɛdwenle nwolɛ anzɛɛ bɛlɛka nwolɛ edwɛkɛ la.

Kɛ ɔkɛyɛ na wɔava foa ɛhye wɔali gyima wɔ daselɛlilɛ nu ɛ?

• Ta kɔ wɛbsaete ne azo. Nea edwɛkɛ adile mɔɔ finde “Mɔɔ Wɔ Ɛke” foa ne la na nea kɛzi ɛbava wɔaboa awie mɔɔ ɔ nye die edwɛkɛ ne anwo la. (Amaa wɔanwu edwɛkɛ adile gyɛne mɔɔ vindele foa ɛhye abo kenlensa ye la, tinli “Dɔɔnwo Wɔ Ɛke” azo.) Saa ɛta ɛkɔ wɛbsaete ne azo a, ɔbamaa wɔanyia edwɛkɛ adile fofolɛ mɔɔ ɛbava wɔali gyima wɔ daselɛlilɛ nu la dahuu.

• Fa edwɛkɛ nee vidio ngakyile mɔɔ finde foa ɛhye abo la bɔ adwelielilɛ bo. Edwɛkɛ ɛhye mɔ bahola aboa yɛ yeamaa yɛanwu mɔɔ menli mɔɔ wɔ yɛ azɛlɛsinli ne anu la ɛlɛdwenle nwolɛ la.

• Fa jw.org home page ne anzɛɛ mɔlebɛbo foa ne kile menli. Twe adwenle kɔ “Kpa Edwɛkɛtile Mɔɔ Ɛ Nye Die Nwo La” foa ne azo na kile ahenle kɛzi ɔbanyia edwɛkɛ adile ngakyile mɔɔ ɔ nye die nwo la.

• Fa link nwa. Menli bie mɔ ɛngulo kɛ bɛ nee yɛ bɛali adwelie noko bɛlɛ ɛhulolɛ kɛ bɛbahɔ yɛ wɛbsaete ne azo. Ɔti mmatwenlehwenle ɛ bo aze kɛ ɛbava home page ne, edwɛkɛtile titili bie anzɛɛ vidio bie mɔɔ finde ɛkɛ ne la anwo link wɔanwa awie mɔɔ ɔ nye die nwolɛ la.