Ọtonrhọ iwẹbsaiti ọwan o vwo irhomu-ẹmro ọrhẹ ividio imemerhen ra kwaphiẹrhọ fọkiẹ ihworho ri vwe rhiẹ Iseri Jehova. (Ac 13:48) Ọgbọ buebun, iyẹnrẹn ra haphia uvuẹn iwẹbsaiti na o sekpahen oborẹ ọ phia yanghene oborẹ ihworho e roro ji ta kpahan.

Marhẹ ene ru ha ọtonrhọ iwẹbsaiti na ruiruo uvuẹn owian aghwoghwo na?

• Rhe ni iwẹbsaiti na sua ọke ephian. Rha djokarhọ ekwakwa ekpokpọ ra haphia uvuien, ji roro kpahen oborẹ wu ne ru ha aye ha userhumu rẹn eri dje omamerhomẹ phia. (Ne wu mẹrẹn iyẹnrẹn ekpokpọ erọrọ ra ji haphia uvuẹn ọtonrhọ iwẹbsaiti na, hiẹn riẹ “Mẹrẹn Riarorhọ.”) We rhe riẹ iwẹbsaiti na ọke ephian, ọnọ ha userhumu wẹn rhe irhomu-ẹmro ekpokpọ wu na sabu ha ruiruo uvuẹn owian aghwoghwo na.

• Ha irhomu-ẹmro ọrhẹ ividio sansan ra haphia uvuẹn ọtonrhọ iwẹbsaiti na tuẹn ẹmro eghwoghwo rhọ. Ọkezẹko, iyẹnrẹn enana uvuẹn iwẹbsaiti na ina sabu ha userhumu rẹn ọwan vwẹruọ oborẹ ihworho uvuẹn ekogho ọwan e roro kpahan.

• Dje ọtonrhọ iwẹbsaiti na rẹn Ihworho. Hunute irhomu-ẹmro sansan ri havwiẹ ji dje rẹn aye oborẹ aye ine ru mẹrẹn irhomu-ẹmro na.

• Dje ilinki urhomu-ẹmro na vwe ihworho. Ihworho ezẹko i vwa guọlọ lele ọwan tẹmro erhe bru aye nya-a, ọrẹn aye i vwo omwemẹ aye ine riẹ iwẹbsaiti ọwan. Omarana, gba damoma rhe dje ilinki irhomu-ẹmro ọrhẹ ividio sansan uvuẹn ọtonrhọ iwẹbsaiti na vwe eri dje omamerhomẹ phia.