Peeji u hiihii u ijiir yase i sha Intanet la ka a lu a ungeren man uvidio mba i er ér ve doo mba ve lu Mbashiada mba Yehova ga, kpa kwagh u mimi a doo ve la. (Aer 13:48) Atôakaa a ka i due a mi la, ashighe kpishi ka i lu akaa a a lu sha abaver gayô akaa a ior ve lu lamen shin henen sha mi hen shighe la yô.

U er tom a akaa a sha peeji u hiihii u jw.org la shighe u u lu pasen kwagh nena?

• Zaan sha ijiir yase i sha Intanet la hanma shighe. Ver ishima sha kwagh u i sember duen a mi la, nahan hen er u er tom a mi u wasen or u nan soo u ungwan loho wase yô. (Aluer u soo u zuan a akaa agen a i sember veren yô, kighir ape i nger ér “Nenge Akaa Agen” la.) Aluer u ngu zan sha ijiir yase i sha Intanet la fele fele yô, u seer fan igbenda i he i pasen ior kwagh.

• Eren tom a uvidio man ngeren mba i duen a mi sha peeji u hiihii la u hiin iliam a ior. Akaa ne ka a wase se u fan kwagh u alaghga ior mba hen haregh wase vea lu henen shami la.

• Tesen ior akaa a i veren sha peeji u hiihii la. Tese nan atineakaa a i te iwanger sha mi yô, shi tese nan u keren kwagh sha ijiir i sha Intanet ne.

• Tindi nan a link. Ior mbagenev ka ve soo u lamen a vese ga, kpa ve lumun u zan sha ijiir yase i sha Intanet la. Nahan aluer or soo yô, de timbir u tindin nan a link i ma ngeren u i due a mi shin vidio i i ver sha peeji u hiihii la ga.