Ko e peesi tefito ʻetau uepisaití ʻoku fakaʻaliʻali ai ʻa e ngaahi kupu mo e ʻū vitiō ʻoku faʻu ke fakamānako ki he kakai loto-totonú. (Ngā. 13:48) ʻOku faʻa fakamamafaʻi ai ʻa e ngaahi kaveinga ʻoku ʻohake ʻi he ngaahi ongoongó pe ko e meʻa ʻoku fakakaukau mo talanoaʻi ʻe he kakaí.

ʻE lava fēfē ke ke ngāueʻaki ʻa e peesi tefito ʻo e jw.org ʻi hoʻo ngāue fakafaifekaú?

• Vakaiʻi maʻu pē ʻa e uepisaití. Tokanga ki he meʻa ʻoku lolotonga fakaʻaliʻalí pea fakakaukau ki he founga te ke ngāueʻaki nai ia ke tokoniʻi ha tokotaha mahuʻingaʻia. (Ke maʻu ʻa e ngaahi fakamatala kehe naʻe toki fakaʻaliʻali ʻi he peesi tefitó, lomi ʻi he “Sio ki he Meʻa Lahi Ange.”) Ko hono ʻiloʻi ʻa e meʻa fakamuimui taha ʻi he uepisaití te ne tokoniʻi koe ke ngāueʻaki maʻu pē ʻa e meʻa foʻou ʻi he ngāue fakafaifekaú.

• Ngāueʻaki ʻa e ngaahi kupu mo e ʻū vitiō ʻoku fakaʻaliʻali ʻi he peesi tefitó ke kamataʻi ha fetalanoaʻaki. Ko e fakamatala ko ení ʻe lava ke ne fakahaaʻi mai kiate kitautolu ʻa e meʻa ʻoku fakakaukau nai ki ai ʻa e kakai ʻi he feituʻu ngāué.

• Fakahaaʻi ki he kakaí ʻa e peesi tefitó. Fakamamafaʻi ʻa e ngaahi kaveinga pau pea fakahaaʻi ki he tokotahá ʻa e founga ke maʻu ai ʻa e ngaahi fakamatalá ʻi he uepisaití.

• Vahevahe ha link. ʻOku toumoua nai ʻa e kakai ʻe niʻihi ke talanoa mata ki he mata mo kitautolu, ka ʻoku nau loto-lelei ke ʻaʻahi ki heʻetau uepisaití. Ko ia ʻoua ʻe toumoua ke ʻoatu ki he faʻahinga mahuʻingaʻiá ha link ki he peesi tefitó pe ko ha kupu pau pe vitiō ʻoku fakaʻaliʻali ʻi ai.