Li ta slikebal jpajinatik ta Internet ta jw.org te ta jtatik mantaletik xchiʼuk videoetik ti jaʼ sventa xkʼot ta yoʼonton krixchanoetik ti oy ta yoʼontonik mantale (Ech 13:48). Te chvinaj mantaletik ti chlokʼ ta notisiaetik o li kʼusi tsvul-o yoʼonton krixchanoetike.

¿Kʼuxi xuʼ jtunestik ta cholmantal li slikebal jpajinatik ta jw.org?

• Kʼelilano li kʼusitik chlokʼ ta jpajinatike. Kʼelo ti bu chal: «Li kʼusitik mas kʼelbile», vaʼun nopo kʼuxi xuʼ xatunes li ta cholmantale (mi chakʼan chakʼel li yan mantaletik ti mas yichʼoj kʼelel li ta slikebal jpajinatike, akʼbo klik ti bu chal: «Kʼelo mas»). Te chata mantaletik ti xuʼ skoltaot ta cholmantale.

• Sventa xalikes aloʼile, tuneso li mantaletik xchiʼuk videoetik ti te chvinaj ta slikebal jpajinatike. Xuʼ skoltaot sventa xavakʼ venta li kʼusi mas tsvul-o yoʼonton krixchanoetike.

• Akʼo ta ilel li slikeb jpajinatike. Akʼo ta ilel junantik mantaletik xchiʼuk kʼuxi ta sabel mas skʼoplal li ta jpajinatike.

• Tako batel junuk enlase. Oy buchʼutik ti mu skʼan xchiʼinutik ta loʼile, pe lek xaʼiik x-ochik ta jpajinatik. Jaʼ yuʼun, takbo batel junuk enlase sventa junuk mantal o junuk video ti te oy li ta slikebal jpajinatike.