Epaaxina yoopacerya ya esaiti ahu enniphwanyaneya myaha ni iviidiyu, seiyo sipakiwe wiira saavareke murima ale ahikhanle Anamoona a Yehova. (Mit 13:48) Okhala wene enniruuha myaha aahiiso soohimmwa sinisuweliwa ni atthu anceene.

Munrowa orumeela sai epaaxina yoopacerya ya esaiti jw.org okathi woolaleerya?

• Muhipiseke otthukula esaiti eyo. Nvaheke ephoole myaha iyo sinikumiheriwa ni muupuweleke moota mukhanle anyu oorumeela wiira mmukhaliherye mutthu onsiveliwa ekeekhai. (Wiira moone itthu sikina saakumiheriwe khalai epaaxina eyo yoopacerya, muttapunye opuro oni “Veja Mais”.) Ohipisa oxukurya esaiti eyo, enimookhaliheryani okhalana moolumo masya a moota woopaceriha ovaanela.

• Murumeeleke iviidiyu ni myaha sikumiheriwe siri epaaxina yoopacerya wiira mpacerihe ovaanela. Myaha iyo pooti onikhaliherya osuwela itthu atthu a mmuttettheni mwahu anuupuwela aya.

• Nwooniheryeke atthu akina epaaxina yoopacerya. Muthanleke myaha sikumiheriwe ni mmooniheryeke moota okhanle awe oophwanya, myaha sinrowa omusivela musaitini mmo.

• Nvaheke elinkhi ya esaiti eyo. Atthu akina khivanaasivela ovaanela ni hiyo, masi anneemererya orumeela esaiti ahu. Tivonto mwaavaheke atthu ale anisiveliwa ekeekhai elinkhi ya epaaxina eyo yoopacerya, aahiiso elinkhi ya myaha wala iviidiyu siri epaaxina eyo.