GBẸZAN KLISTIANI TỌN
Jehovah Nọ Whlẹn Ayimajainọ Lẹ
Mímẹpo wẹ nọ blawu to whedelẹnu. Ehe ma zẹẹmẹdo dọ mí ma do yise to Jehovah mẹ. Jehovah lọsu tlẹ dọ dọ emi blawu. (Jen 6:5, 6) Ṣigba etẹwẹ lo, eyin mí nọ to awubla mẹ whẹwhẹ kavi to ojlẹ lẹpo mẹ?
Nọ lẹhlan Jehovah dè nado biọ alọgọ. Dagbemẹninọ mítọn to apọ̀nmẹ podọ to numọtolanmẹ-liho nọ duahunmẹna Jehovah taun. Eyin mí to ayajẹ mẹ, e nọ yọnẹn. Eyin mí sọ to awubla mẹ, e nọ yọnẹn. E nọ mọnukunnujẹ linlẹn po numọtolanmẹ mítọn lẹ po mẹ to gigọ́ mẹ. (Slm 7:9b) Humọ, Jehovah nọ dọ mítọn bo gán gọalọna mí to whenue mí to awubla mẹ kavi whenue apọ̀ ṣì mí.—Slm 34:18.
Nọ basi hihọ́na ayiha towe. Numọtolanmẹ agọ̀ lẹ gán bẹpla ayajẹ po sinsẹ̀n-bibasi mítọn po. Enẹwutu, e na yọ́n dọ mí ni basi hihọ́na ahun mítọn, yèdọ gbẹtọ homẹ tọn mítọn.—Hwh 4:23.
PỌ́N VIDEO LỌ LEHE MẸMẸSUNNU MÍTỌN LẸ TO VIVI JIJỌHO TỌN DÙ DO MAHOPỌNNA APỌṢIMẸ, ENẸGODO NA GBLỌNDO NA KANBIỌ HE BỌDEGO LẸ:
-
Afọdide voovo tẹlẹ wẹ Nikki ze gando apọṣimẹ etọn go?
-
Naegbọn Nikki wá mọdọ e na yọ́n dọ emi ni dín alọgọ dotozọ́nwatọ lẹ tọn?—Mt 9:12
-
Aliho tẹlẹ mẹ wẹ Nikki dohia te dọ emi deji dọ Jehovah na gọalọna emi?
