ILULUK UGWEM KUBỌK EBI EYI KARAIS

Tap Ubok Nyi Ebi Kpekisi Uwu Uriaak Ibe Eneriọọn̄ Ogwu Ororom Ema

FIT

Ire owuuk lek ijit ikpakpa ata etip inyi ebi kpekisi uwu uriaak mije okikeek ibe ke ema kpebegban̄ ni? Ire ikeya, riọọn̄ ibe ke owuwa ebi kpekisi uwu uriaak, ikerere ebi kpechieek ibe ke Awaji omaan̄, minikana Ebi Ata-Ikọ Jioba. Owuwa mgbọ, inu ema eweekbe ire sọnja ntap-ubọk isasa iwọlọ ikpọ inu okijeen̄ ibe ke Awaji ọmọ owa.—Rom 1:20; 10:14.

IKPỌ FIDIO RIỌỌN̄ IBE KE EBI KPEWUUK LEK IKAAN̄ ICHECHIEEK MEKỌT IKAAN̄!—EBI KPEKISI UWU URIAAK, MÈ IFỌỌK IDODO YI :

Ike owa ke mfufuk Tommaso osa itap ubọk inyi owu ibe okomun̄ ilolook ata etip isa inyi ebi kpekisi uwu uriaak me oniin̄ onwọnwọn?

Ufọọk-otu kwun̄

Ubọk obosa irọ

Ire ene itumu ibe ke ọmọ ikachieek me lek Awaji, jeen̄ ata ejit, iriọọn̄-inu mè ata ulọk me lek nkeek kan̄ ofolek inu ya. (2 Tim 2:24) Gọọk ọmọ kpa ibot usem echi ibokaan̄ ulọk me lek. Ire ene ya moma ikpakpa inu echi orọrọ ibe owuwa ene enechieek ibe ke ogwu orom omaan̄ ni? Ire ikeya, sa ikpa mè fidio echi eneen̄be isa inyi mbet lek ibot usem okup ikeya rọ mkpọ. Broshọ Was Life Created? mè The Origin of Life—Five Questions Worth Asking ire echi etapbe igbaalek me emen Okop Mkpọ Ikwaan̄ kiji inyi ekọt egwat lek ekemun̄.

Me adasi mgbọ, omokọt ikitet ukpook ikpakpa ata etip isa inyi ogwu ikachieekge me lek Awaji. Ire ikeya, ire omokọt ido gwun̄ ute ge orọriọọn̄ ubọk ekirọ ibe itap ubọk inyi owu ni? Riọọn̄ si ibe ke Jioba mokọt itap ubọk inyi eji ere ejit ebi ikakaan̄ ata ejit ikerere ebi me adasi mgbọ kpechieek ibe ke Awaji omaan̄.—Ikwaan̄ 13:48.

IKPA NKWEEN̄MKPỌ UGWEM MÈ IKWAAN̄ KIJI