KƐ́ÐƐ́Ì ÐEÍN-SÍ-KÀ CĨ́-CĨ́

Kpá Nyɔ Ɓè Se Ɓiè-Kpòò Ðò Mú Nìɛ Gbo Ɓɛ́ Wa Ké Waà Mɛ-Nyɔ̀ɔ̀ Dyí Dyuò

POƐ KŨ̀À GBO

Nì hwòɖò-dyùà ɖà kɔɖɔ ɖòò ɓɛ́ m̀ ké nyɔ ɓè se ɓiè-kpòò ɖò mú nìɛ Geɖepɔɔ-wùɖù gbo wáɖáà, sepoɛɖe m̀ poɛ̀n hwìɖìi kà ɓɛ́ wa se dyɛ̀ ɖùù tòɛ̀ muɛɛ̀? Ɔ dyi ná nììn, nìí, ɔ mɛ nì m̀ hwìɖìi kà nyɔ ɓè se ɓiè-kpòò mú nì ɓɛ́ wa ɖíɛ́ ɓè mɔ̀ nyɔ ɓè se Geɖepɔɔ jè jàà poɛɛ pàɖà ɖà Jɛhova Zàse ɓè jùɛ. Kánáá kɛɛ, ɖɛ wa mɔ́ teeɛ mɔ̀ wa gbo-kpá-kpá tííwè ɓɛ́ wa ké ɖɛ ɓè tɛ̀mɛ̀ìn kà ɓɛ́ Geɖepɔɔ nì kɛɛ múin gmɔìn.—Wó 1:20; 10:14.

DYÉ VÍÐÒ MƆ̀À, Ɔ MƐ NÌ M̀ HWÌÐÌI—NYƆ ƁÈ SE HWÌÐÌI-TAƁA-TABA ƁÉÐÉƐ ƁƐ́ÌN HWÌÐÌI-TAƁA-TABA ƁÉÐÉƐ!—NYƆ ƁÈ SE ƁIÈ-KPÒÒ ÐÒ MÚ NÌƐ KƐƐ DYI, NÌÍ, ƁƐ́ ƁÈ KÉ DYI-DIÈ-ÐƐ̀ KƆÀ ƁÓ DYÍƐƐ GƆ̃̀ JÙ:

Xwɛ̀ ɖɛ Tòmásò dyé ma dyíɛ nyu m̀ gbo kpáa ɓɛ́ m̀ ké nyɔ ɓè se ɓiè-kpòò ɖò mú nìɛ Geɖepɔɔ-wùɖù gbo wáɖá-wáɖá dya gmɔ̀ dyí-sɛ́ɖɛ́ìn-kà kɛ́?

Nì gɔ̃̀-jù-wùɖùɔ̀

Ɔ nyu-kà

Ɔ jù ké nyɔ ɖò dyi níin ɔ se Geɖepɔɔ jè jàà po ní, m̀ mɛ nɔ̀mɔ̀ kpeɖeín, ɓɛ́ nì wuɖu ké dyí ɓɛɖɛɛ̀ ɖé ɔ gbo, kè ɓɛ́ m̀ ké ɖɛ mɔ̀ ɔ hwìɖìi-poìn-ɖɛ̀ kè ka ɔ hwòɖò nyu nìɛ̀ ɓá ɖɛ ɓè nìà kɔ̃in wùɖùɛ̀n nyɛ jè dyíɛɛ jè gbo kɔ̃̀. (2Ti 2:24) Cɛ̃ ɖɛ ɓè ɓɛ́ wa mu dyɛ̀ ɔ hwìɖìi nɔ̀mɔ̀ùn wɛ̃ɛ jè. Ɔ mɔ́ ɖɛ nyu ké nyɔ pàɖà ɓè dyià Mɛ-nyɔ̀ ɖò jè jàà po kɛɛ jè cɛ̃ɛ dyiì? Ɔ dyi ná nììn, nìí, nyùìn céè-ɖɛ̀ ɓè kè víɖò ɓè ɓɛ́ wa nyu ɓó xwíníínà jèɛɛ kũ̀à mú. Bòɖòsóò ɓè mɔ̀à, Wa Mɛ Ma Fɛ̀ɛ̀? kè Dɛ̀ Fɛ̀ɛ̀ Sɔ̀ìn Nyɛ—Dyi-Diè-Ðɛ̀ Hm̀m̀ Ɓè Mɔ́ Dyi-Diè-Diè Kɛ ɖà ɖé à Ðɛ-Tɛ̀mɛ̀ìn-Gbɔ̀ɖɔ̀ɔ̀ mú nì ɓɛ́ wa da-dyé-dyé ké xwa fɛ̃́ìn.

Ðé ɖɛ dè gbɔ mú ní, m̀ ɓɛ́ìn fã̀à peɖeɛ ɓɛ́ m̀ ké nyɔ ɖò ɓɛ́ ɔ se Geɖepɔɔ jè jàà po kɛ jààɔ̀ jè gbo cɛ̃. Zɔ̀ìn wuɖu-wáɖá-nyɔ̀ hwɛ ɖɛ ɖò gbo-kpá-sɔ̃̀? Ɔ mɛ nì m̀ hwìɖìi ɖekè kà Jɛhova ɓɛ́ìn à gbo kpáa ɓɛ́ à ké nyɔ ɓè ɓɛ́ wa ɖà gã ɓó fɛ̀ɛ̀ dyé jèɛ hwòɖò dyi tóɛ—kɛbì wa mɛ se ma Geɖepɔɔ jè jàà po kĩ́ín nyɛ.—Àpɔ́ 13:48.

CĨ́-CĨ́ KÈ KŨ̀À DYÍ-POÌN-POÌN KŨ̀À-CÈÈ-ƉƐ̀