CHRISTIANFO ASETSENA

Boa Nkorɔfo A Wɔnngye Nyankopɔn Nndzi No Ma Wombohu Ɔbɔadze No

BƆ

Aso ɔyɛ a, ɔyɛ wo dzen dɛ ibedzi hɔn a wɔnnkɔ asɔr biara anaa wɔnngye Nyankopɔn nndzi no dase? Sɛ dɛm a, ɔnodze hyɛ no nsew dɛ hɔn mu pii abɛyɛ Jehovah Adasefo. Mpɛn pii no, ɔyɛ a dza wohia ara nye dɛ obi bɔboa hɔn ma wɔahwehwɛ dase a ɔkyerɛ dɛ Nyankopɔn wɔ hɔ.—Ro 1:20; 10:14.

HWƐ VIDEO A WƆATO DZIN KAA DƐ HƆN A WONNYI GYEDZI NO BOTUM ENYA GYEDZI!—HƆN A WƆNNYƐ NYAMESOMFO NO, NA YI ASƐMBISA A ODZI DO YI ANO:

Sɛ ihyia hɔn a wɔnnkɔ asɔr biara anaa wɔnngye Nyankopɔn nndzi wɔ asɛnka mu a, Tommaso n’asɛm no besi dɛn aboa wo ma eedzi hɔn dase?

Wo mbuae

Mbrɛ ebɛyɛ no

Sɛ obi ka dɛ ɔnngye Nyankopɔn nndzi a, mma nnka biribi a ɔbɛhaw no, mbom no nya noho abotar na bisa no siantsir a ɔtse nka dɛm no. Mma mmbɔ n’asɛm no nngu. (2Ti 2:24) Enye no mbɔ ndzɛmba a n’enyi gye ho ho nkɔmbɔ. Bisa woho dɛ, Aso n’enyi bɛgye ho dɛ menye no bosusu dza ɔboaa binom ma wɔbɛgyee dzii dɛ Ɔbɔadze bi wɔ hɔ no ho? Sɛ dɛm dze a, fa nwoma nye video ahorow bi a asafo no esiesie no boa hɔn. Yɛdze nwomaba a wɔato dzin Was Life Created? nye The Origin of Life—Five Questions Worth Asking no aka hɛn Edwindadze Etsitsir A Yɛdze Kyerɛkyerɛ no ho mbrɛ ɔbɛyɛ a no hwehwɛ rennyɛ dzen.

Bi a ahyɛse no, ɔbɛyɛ dzen ama wo dɛ enye obi a ɔnngye Nyankopɔn nndzi bɔbɔ Bible mu nkɔmbɔ. Sɛ dɛm a, ibotum ebisa ɔdawurbɔfo bi a noho akokwaa ma ɔaaboa wo. Afei so, kaa dɛ, hɔn a wɔnngye Nyankopɔn nndzi no, hɔn mu binom wɔ hɔ a wɔwɔ akoma pa, na Jehovah botum aboa hɛn ma yɛaka asɛm no ma wɔaka hɔn akoma.—Adw 13:48.

ASƐNKA NYE ASETSENA NHYIAMU DWUMADZI NWOMA