BYAFWAINWA KWIKALA BENA KILISHITU

Kwashai Bantu Balengulula bya Bupopweshi Kuyuka Mulenga Wabo

JIZHAI

Nanchi mumvwa moyo kusapwila bantu balengulula bya bupopweshi na mambo a kuchiina’mba kechi bakonsha kwimuteleka nenyi? Inge ibyo, mwafwainwa kuyuka’mba bantu balengulula bya bupopweshi ne boba baitabila kuba’mba bintu byaishilekotu bine bakonsha kwikala Bakamonyi ba kwa Yehoba. Javula bakebatu kwibabula bintu bicheche bya kwibalengela kushiinwa’mba Lesa koaji.—Lo 1:20; 10:14.

TAMBAI VIDYO WA KUBA’MBA VULUKAINGA KUBA’MBA —BANTU BABULA LWITABILO BAKONSHA KWIKALA NA LWITABILO!—BANTU BALENGULULA BYA BUPOPWESHI, APA BINO MUKUMBULE ANO MEPUZHO:

Bintu byapichile mulongo Tommaso bimutundaika byepi kusapwila bantu balengulula bya bupopweshi?

Nembaipo mukumbu wenu

Byo Mwafwainwa Kuba

Inge muntu waamba’mba kechi waitabila mwi Lesa ne, mwafwainwa kumutekenya, kumukumbula na jiwi jakooka, kumumwesha’mba mwamuta muchima ne kumusanchila pa byo akukumbula. (2Ti 2:24) Kabiji ambainga pa mitwe yo atemwa. Nanchi wakasuluka kwamba pa bintu blengela bavula kwiatabila’mba Mulenga koaji nyi? Inge ibyo, ingijishai mabuku ne mavidyo aamba pa uno mutwe. Buloshuwa wa kuba’mba Was Life Created? ne wa kuba’mba The Origin of Life—Five Questions Worth Asking beabika pa mabuku o twingijisha mu mwingilo wa kusapwila pa kuba’mba kitupelelenga kwiataana.

Inge mwaumvwa moyo kwisamba na muntu wabula kwitabila mwi Lesa, bulai musapwishi wapijilwa kwimukwasha. Kabiji vulukainga kuba’mba Yehoba naye wakonsha kwitukwasha kufika bantu bakeba kufunda bukine pa muchima, nangwa kya kuba kimye kitanshi kechi baitabijile’mba Lesa koaji ne.—Byu 13:48.

MUTANCHI WA KUPWILA KWA BWIKALO NE MWINGILO WETU WA BWINA KILISHITU