TƆƆ̄DUM DOODOO PYA NƐƐ KRAIST

Yerebah Nɛ Pya A Naa Gaa Si Lɔgɔ Tɔbari Kɔ Ba A Suāloo Nɛɛ A Bee Wa Dɛm

PLAY

Ekɔ a wee a agaloo ezue ue nɛ pya a naa gaa si lɔgɔ tɔbari ale pya a naa yiga bu bari nyɔɔbee o kɛɛrɛ kɔ ba naale egbaɛ̄tɔ̄ ni? Lo a wee a siraloo doo wo, nyɛŋiabu kɔ gbɛnɛ-edo pya a naa gaa bee si lɔgɔ tɔbari, gbaānage loo pya a naa bee yiga bu Bari, elua Pya Ekeebee Jɛhova anyaawo. Gbɛnɛ-edo sɔ̄, aba nu a wee lu ebɛɛ̄ kɔ i doo na eyerebah wa nɛ kɔ ba a muɛ pya nu a tɔgɛ kɔ Bari le.—Rom 1:20; 10:14.

SI EE VIDIO A KURA SUĀ KƆ PYA A NAA BEE ƐRƐ YIRA DAP SIKƐ̄ ƐRƐ YIRA!—PYA A NAA YIGA BU BARI, LƐƐ BUI AGARA EBIP A NYƆƆNƐ AMA:

Bu mɛ sīdee na nu a bee siraloo Tommaso a yerebah nɛ kɔ o ɛp kɔ o dabe zue ue nɛ pya a naa yiga bu Bari a?

O ture

Kɛ̄ o sere bahloo doo

Lo a le ziī nɛɛ kɔ a naa yigae kɔ Bari le, su kari le fɛgɛ ye kɔā ue nɛ sa tɔgɛ kɔ o ɛrɛe nia bu kɛ̄ nu ye tɔɔ̄loo doo le pya nu a kɛɛrɛ nyɔɔ ue ama. (2 Tim 2:24) Nyɔɔnɛ ye kɔnia pya ekobee ue lo etaɛ ye edā nu akiiloo. Aāloo kɛ̄ o ɛp nu doo, ekɔ etaɛ ye edā nu edoora kɔ gbɛnɛ-edo nɛɛ a yiga kɔ Nɛɛ Dɛmnu le ni? Lo a le wo, su pya kpa le pya vidio lo bɔŋanaloo Jɛhova ekwaa akiiloo ɛrɛ yira bu Nɛɛ Dɛmnu ye yeābah nɛ. Pya nwīekpo kpa a le doodoo Was Life Created? le The Origin of Life—Five Questions Worth Asking elua esu yerebu i Ekpo Tam Tɔgɛnu lokwa i dap nwaabah muɛ.

Lo alu kɔ a wee a agaloo enyɔɔnɛ nɛɛ a naa ɛrɛ yira bu Bari kɔnia yereue Baibol, o dapge bip ziī nɛɛ zue ue a ɛrɛ kari zuema ue kɔ a yerebah a nɛ ni? Nyɛŋiabu kɔ Jɛhova dap a yerebah nɛ kɔ o ina bu beenyiɛ pya nɛɛ alu esere loo dum a naatah—kereadoo ba naa bee yiga kɔ Nɛɛ Dɛmnu le tua sɔ̄.—Doonu 13:48.

KPA ENƆĀNU TƆƆ̄DUM LE TAM ZUE UE