MÄ MꞌU̱IHU̱ NGU YÄ KRISTIANU

Fatsꞌi dä bädi de Äjuä nuꞌu̱ yä jäꞌi hinte ne dä bädi de yä relijion

YʼO̱DE DE GÄ

¿Rꞌabu̱ hixkä ne xkä predikabi nꞌa de nuꞌu̱ yä jäꞌi hinte ne dä bädi de yä relijion ngeꞌä gi mbeni ge hingä ma dä ne dä yꞌo̱xꞌäꞌi? Mu̱ gi thogi njabu̱, beni ge rꞌa de nuꞌu̱ mä kuhu̱ mä mꞌe̱tꞌo himi ho dä bädi de yä relijion o nixi mi kamfri Äjuä. Rꞌa de geꞌu̱, ho̱nse̱ mi japä mꞌe̱di nꞌa tu̱i rä mfatsꞌi pa xä hyandi te mä prueba ja ge Äjuä xa mäjuäni ꞌmu̱i (Ro 1:20; 10:14).

HYANDIHU̱ RÄ BIDEO BENI: TOꞌO DÄ NE DÄ ZA DÄ ME̱ꞌTSI RÄ JAMFRI—NUꞌU̱ YÄ JÄꞌI HINTE NE DÄ BÄDI DE YÄ RELIJION. MꞌE̱FA THÄDIHU̱ NUNÄ RÄ NTꞌANI:

¿Hanja nupꞌäꞌi ri mfeni näꞌä bi thogi rä ku Tommaso pa gi predikabi nuꞌu̱ yä zi jäꞌi hinte ne dä bädi de yä relijion?

Rä mpengi

Hanja dä za gi ja

Mu̱ gi tini nꞌa rä jäꞌi näꞌä hingi kamfri Äjuä, ꞌñudi rä ñhojäꞌi ꞌne rä tꞌekꞌei. Ora dä xiꞌi näꞌä mbeni ꞌne senti, jamäsu näꞌä mää (2Ti 2:24). Ñä kongeꞌä de nuꞌu̱ yä asunto di ho. Mu̱ gi handi ge näꞌä jäꞌi ꞌmu̱i dispuesto dä yꞌo̱de te mä prueba ja ge hää ꞌmu̱i Äjuä, nuꞌmu̱ dä hogi gi usa nuꞌu̱ yä mfatsꞌi xä hyoki rä hnini Äjuä. Por ejemplo yä foyeto ¿Es la vida obra de un Creador? ꞌne El origen de la vida. Cinco cuestiones dignas de análisis. Nuya yä foyeto ya bi ꞌmo̱ꞌtse habu̱ enä «Kit de enseñanza» pa nguntꞌä gä tinihu̱.

Zäi ge rꞌabu̱ gi tsu gi predikabi nꞌa rä jäꞌi näꞌä hingi kamfri Äjuä. Mu̱ gi thogi njabu̱, dä za gi yꞌapäbi rä mfatsꞌi nꞌa rä ku näꞌä gi handi ge xa pädi dä ꞌñudi. ꞌNehe beni ge rä Zi Dada Jeoba dä za dä maxꞌäꞌi gi tso̱mbäbi ha yä koraso yä zi jäꞌi, asta nuꞌu̱ hingi kamfri ge ꞌmu̱i Äjuä (Hch 13:48).