KU HANYA SWANGA VAKRISTE

Pfuna Vhanu Lava Nga Liki Na Wukhongoti Akuva Va Tiva Mutumbuluxi

PLAY

Xana u ke u va ka xiyimu xa kuva u nga mu zrezreli mhunu wa ku kala a nga khongeli hi ku yanakanya leswaku a nga txhuka a nga ku yingeli? Loko swi ke swi ku humelela dzrimuka leswaku ku ni vhanu vanyingi lava a va nga khongeli ku patsra ni lava a va nga kholwi ka Xikwembu Nkulukumba, lava ndzrulukiki Timboni ta Yehovha. Ntalu wavu ve djula mpfunu wutsrongo akuva va kambisisa wumboni bya leswaku Xikwembu Nkulukumba hakunene a kone.—Ro 1:20; 10:14.

HLALELANI VHIDIYU LEDZRI LIKI DZRIMUKA—LAVA KALAKA VA NGA NA LIPFUMELO VA NGA SWI KOTA KU VA NA DZRONE!—VHANU LAVA KALAKA VA NGA KHONGELI, MI GAMA MI HLAMULA XIVUTISO LEXI LANDZRELAKA:

Xana u dondzra yini ka mfambu wa Tommaso mayelana ni ku zrezrela vhanu lava kalaka va nga khongeli?

Nhlamulo

U nga swi yentxisa kuyini

Loko mhunu a ku a nga kholwi ka Xikwembu Nkulukumba, kombisa wunene, khanela hi ndlela ya xitxhavu nakone mu kombi leswaku wa zron’weka hi leswi a swi pimisaka ni ndlela leyi a ti twaka ha yone hi mhaka leyo. (2Tm 2:24) Khanela hi timhaka leti ti taka mu nyonxisa. Xana a nga va a tiyimisele kuva mi kambisisa wumboni lebyi tiyisekisaka vanyingi leswaku ku ni mutumbuluxi? Loko a tiyimiselile, tizrisa mabuku ni mavhidiyu lama vulavulaka hi mhaka leyo. A mabroxura ya ku fana ni ledzri liki Xana Swilo Leswi Hanyaka Swi Lo Tumbuluxiwa? ni ledzri liki A Origem da Vida — Cinco Perguntas Que Merecem Resposta, kutani ma kumeka ka switizro swa ku dondzrisa ha swone akuva swi hi nabyalela ku ma tizrisa.

A ku sunguleni swi nga ha ku txhavisa ku pimisa hi ku bulisana ni mhunu lweyi a kalaka a nga kholwi leswaku Xikwembu Nkulukumba a kone. Ha yini u nga kombeli mpfunu ka muzrezri lweyi a nga ni mfambu? Tlhela u dzrimuka leswaku Yehovha a nga ku pfuna akuva u khumba timbilu ta vhanu lava nga ni ku tiyimisela ku patsra ni lava a ku sunguleni a va nga kholwi leswaku yene a kone.—Min 13:48.

XIBUKWANA XA NTLHANGANU WA WUTOMI NI WUTIZRELI