BIHAINIM PASIN KRISTEN

Helpim Ol Man i No Gat Lotu Long Kisim Save Long Krieta

PLEI

Olsem wanem? Yu ting olsem ol man i no gat lotu bai i no putim yau long tok yu laik autim na dispela i pasim yu long autim tok long ol? Sapos yu ting olsem, orait tingim olsem ol man i no gat lotu—na tu ol man i no bilip long God—i kamap Witnes Bilong Jehova. Planti taim, ol i nidim liklik helpim long skelim ol evidens i soim olsem i gat God i stap.—Ro 1:20; 10:14.

WATSIM VIDIO TINGIM—OL MAN I NO GAT BILIP INAP BILIP!—OL MAN I NO GAT LOTU, NA BIHAIN BEKIM DISPELA ASKIM:

Olsem wanem stori bilong Tommaso i helpim yu long autim tok long ol man i no gat lotu?

Bekim

Rot bilong mekim

Sapos wanpela man i tok em i no bilip long God, soim gutpela pasin, bihainim gutpela tingting, na mekim olsem yu laik tru long save long tingting bilong em long dispela samting. (2Ti 2:24) Toktok wantaim em long wanpela topik we em bai amamas long en. Askim em sapos em i amamas long stori long ol evidens we i kirapim planti manmeri long bilip olsem i gat Krieta i stap. Sapos em i amamas, orait yusim ol pablikesen na vidio ol i wokim bilong helpim kain man olsem. Ol i putim tu buklet Was Life Created? na The Origin of Life—Five Questions Worth Asking long hap Ol Tul Bilong Skulim Man na bai em i isi long ritim.

Pastaim, ating yu bai tingting planti long stori long tok i tru wantaim wanpela husat i no bilip long God. Yu ken askim wanpela pablisa i save gut long autim tok long helpim yu. Tingim tu olsem Jehova inap helpim yumi long putim tok i go daun long bel bilong ol man i gat gutpela bel—maski long pastaim ol i no bilip olsem i gat God i stap.—Ap 13:48.