Ɔhʋanɩ ɔkʋ̃ mɔɔ ɩdɩ baaba paa mɔɔ awʋvʋlɔ kɔhʋla kɔwʋwa bo nnwuakula ma bekenyia Nyamɩnlɩ yɩ ɛkɛnɩ nɣɛlɛbɛ yɛ lɛ kɛɛ bɔkɔwʋwa bɛ ma bekenyia Kilisinyianɩ ayiyialɩyɛ zʋ mfasʋ. Mɔɔ nnwuakula nwʋ yɩ, mɔɔ bɛtɩ nɩɩ munwalɩyɛ mɔɔ bɛma wɔ dɩyɛzumanlɛ tʋ nɩ kɔhʋla kɔwʋwa bɛ ma bokozuma Gyehova yɩ nwʋ dɩyɛ na bɛaɣa bɛayɛ yɩ ɔhɔnwʋ. (Dit 31:​12, 13) Sɛ ɛdɩ ɔwʋvʋlɔ a, kɛ ɛkɛyɛ na wʋawʋwa wʋ nnwuakula ma bɛanyia dɩyɛzumanlɛ zʋ mfasʋ kezile a?

• Bɔ mmɔdɩnɩ kɛɛ ɔkɔhɔ dɩyɛzumanlɛ wɔ Kɩndɔm Hɔɔlʋ.—Ndw 22:22.

• Nyia mmɩlɩ ɛ nɩɩ mmeliyema bɔwɔ mmɩlɩ mɔ bɔhɔ dɩyɛzumanlɛ nɩɩ mmɩlɩ mɔ bɔbɔ.—Hib 10:25.

• Kila kɛɛ abusunwa yɩ nu enii bela lɛ buuku mɔɔ yesuma wɔ dɩyɛzumanlɛ tʋ nɩ be, kɛ ɩdɩ mɔɔ bedindimi anzɛnyɩɩ mɔɔ ɩwɔ foonu zʋ

• Bʋwa wʋ ɣa ma ɩva yɩzayɩ yɩ ndwokɔ ɩma munwalɩyɛ.—Mt 21:​15, 16.

• Kã yɛ dɩyɛzumanlɛ nɩɩ mɔɔ yesuma wɔ ɛkɛnɩ nɩ nwʋ odwokɔba

• Bʋwa wʋ nnwuakula ma bɛva bɔ nwʋ bowula Kɩndɔm Hɔɔlʋ yi eziyeziyelɛ nu na bɛ nɩɩ bɛzabɛ mɔɔ bɛ alʋbɔ hɔ anyunumi nɩ bɔwɔ nkɔmmɔ

Ide egyima ɛzɩzɩbɛ na wʋahʋla wʋawʋwa wʋ nnwuakula ma bɛaɣike Gyehova, na itwu mmɩlɩ be po a, sa ɩkʋla ɩyɛ sɩ paa. Naasʋ̃ ɔkɔhʋla ekenyia anwʋlazʋ kɛɛ Gyehova kɔwʋwa wʋ.—Ayɩ 40:29.

KILÁ VIDIYO MƆƆ ISE AWƲVƲLƆ, BƐVA BƆ NWƲ BEDIÃ GYEHOVA NƖƖ YƖ ANWƲZƖZƖBƐ ZƲ, NA AKƲ̃ YƖ NDWOKƆƔIZIALƐ EYIMMƆ BO MUNWA:

• Mɩnla ɔhawʋ yɛ ɛvɛlɩyɛ va dianlɩ Zack nɩɩ Leah zʋ a?

  Wu munwalɩyɛ

• Mɩnla ti mɔɔ ɩsɛ kɛɛ awʋvʋlɔ pɩbɛ anwʋzɩzɩbɛ wɔ Gyehova ɛkɛnɩ a?

  Wu munwalɩyɛ

• Mɩnla ahʋanɩ azʋlɔtʋ zʋ yɛ Zack nɩɩ Leah valɩ bɔ nwʋ dianlɩ Gyehova zʋ ma ɩwʋwalɩ bɛ a?

  Wu munwalɩyɛ