Hwìè nɔ̀mɔ̀ dyíin ɖò kɔ̃̀ mú ɓɛ́ wóɖóìn-nyɔ̀ ɓè ɓɛ́ìn waà dyú ɓè gbo kpáa ɓɛ́ wa ké fɔ̀nɔ̀-hwòɖò sɔ̀ìn ɖé dyɔún wɛ̃ ɓéɖéɛɛ mɔ̀, dyììn ɖé wa gbo-kpá-kpá mú ɓɛ́ wa ké dyí-poìn-poìn ɓèɔ̀ kpáná kɔ̃̀ún dyé. Ðɛ dyú ɓèɔ̀ dyé, ké wa wɔ̃́, ké wa cɛ̃ jè ɖé waà gɔ̃̀-jù-wùɖù ɓèɔ̀ mú ɖé dyí-poìn-poìnɔ̀ múɛɛ ɓɛ́ìn wa gbo kpáa, ɓɛ́ wa ké Jɛhova jè cɛ̃́, kè ɓɛ́ wa ké ɔ bũ̀in xwɛ̃́ìn mìɔ. (Dì 31:12, 13) Ɔ jù ké m̀ dyi wóɖóìn-nyɔ̀ jùìn, xwɛ̀ m̀ ɓɛ́ìn nì dyú ɓèɔ̀ gbo kpáa ɓɛ́ wa ké dyí-poìn-poìn ɓèɔ̀ kpáná kɔ̃ún dyé mìɔ kɛ́?

• Vɔ̃ kóɖó-kóɖó ɓɛ́ m̀ ké ɖé dyí-poìn-poìn ɓèɔ̀ mú nì ɖé kpóɖóún.—Wɛ́ 22:22

• Sè ɖé ti ɓó nyíɔún zaìn jè ɖé Kĩ́dɔ̃̀ Hɔ́ɔ̀ zɔ̃̀ hwɛ̀ dyí-poìn-poìnɔ̀ ké gbɔ dè mɔɔ ɔ ɖà mánáín hwɛ̀ ní.—Híì 10:25

• Dyéɛ jè gbo wɛ̃́ɛ́ ɓɛ́ xwéɖé-dùɔ̀ nyɔ ɖò-ɖò séín ké céè-ɖɛ̀ wa muà dɔ́ɔ́ kɔ̃in dèìn ɖé dyí-poìn-poìnɔ̀ múɛɛ ɖò ɓéɖé, kɛbì ɔ mɛ nì kpoún mɔɔ nɛɛ̀ kɔ̃ ní

• Kpá nì dyúɔ̀ gbo ɓɛ́ ɔ ké gɔ̃̀-jù-wùɖù ɖò ti dyéìn ɖé ɔ mìɔùn nììn wuɖu mú.—Máf 21:15, 16

• Cɛ̃ ɖɛín-ɖɛ̀ ɓá dyí-poìn-poìn ɓèɔ̀ kè ɖɛ ɓè m̀ cɛ̃́ ɖéɛɛ jè dyí

• Kpá nì dyú ɓèɔ̀ gbo ɓɛ́ wa ké nyuu-ɖɛ̀ ɓè mɔ̀, Kĩ́dɔ̃̀ Hɔ́ɔ̀ ɖoɓo-nyu-nyu kè dyí-poìn-kpòòɔ̀ nyɔ sùà ɓè gbo-wùɖù-wùɖù kɛɛ ɖò nyu

Ɓɛ́ m̀ ké nì dyú ɓèɔ̀ gbo kpá ɓɛ́ wa ké Jɛhova bũ̀in xwɛ̃́ìn nyɛɛ mɔ̀ kũ̀à vɛ̀nɛ̀ ɖò cá, ké ɔ ɓɛ́ìn nyɔ-wɔ̃-hɔ-kà nìɛ̀ tiɔ̀ ɖíɛ́ ɓè ɓaɖa. Kɛɛ, m̀ ɓɛ́ìn Jɛhova gbo-kpá-sɔ̃̀ɔ̀ hwòɖò kɔ̃ dèɛ̀.—Àzé 40:29.

DYÉ VÍÐÒ MƆ̀À, ƁÈ MƆ̀ WÓÐÓÌN-NYƆ̀ ƁÈƐƐ, ƁÈ DÈ JƐHOVA KÈ Ɔ KPÉƆ̀ HWÒÐÒ KƆ̃ KƐƐ DYI, NÌÍ, ƁƐ́ ƁÈ KÉ DYI-DIÈ-ÐƐ̀ ƁÈ KƆÀ ƁÓ DYÍƐƐ GƆ̃̀ JÙ:

• Ðɛ́ sa-sa nì ma Záà kè Ðéà bũ̀ nyuɛń nyɛ́?

  Nì gɔ̃̀-jù-wùɖùɔ̀

• Xwíníínɔ̀ nyɛ́ kɔ̃̀ jè wóɖóìn-nyɔ̀ ɓè mɛ gmɔ̀àìn ɖé Jɛhova gbo ɓó kpé jè kɛ́?

  Nì gɔ̃̀-jù-wùɖùɔ̀

• Hwìè nyɛ́ ɓè kɔ̃̀ mú Záà kè Ðéà dè ma Jɛhova hwòɖò kɔ̃ ɓɛ́ wa nyuu-ɖɛ̀ ké ma mú wóɖó kɛ́?

  Nì gɔ̃̀-jù-wùɖùɔ̀