KERECƐNW KA ƝƐNAMAYA
Bangebagaw, aw y’aw deenw dɛmɛ u ka hakilitigiya sɔbɛ sɔrɔ
Bangebagaw be se k’u deenw dɛmɛ cogo fisaman minw na ka hakilitigiya sɔbɛ sɔrɔ, u la dɔ ye k’u dɛmɛ ka nafa sɔrɔ kafo ka lajɛnw na. Aw deenw be min ye, u be min lamɛn ani u be lakalita minw kɛ lajɛn na, o be se k’u dɛmɛ ka Jehova lɔn ani k’u magwɛrɛ a la kosɔbɛ (Deter. 31:12, 13). N’i ye bangebaga ye, i be se k’i deen dɛmɛ cogo di walisa a ka nafa sɔrɔ bɛrɛbɛrɛ lajɛnw na?
-
Aw y’aw seko bɛɛ kɛ walisa ka to ka taga lajɛnw na Masaya Boon na.—Zab. 22:23.
-
Ka kɔn lajɛnw ɲɛ ani lajɛnw bannin kɔ, aw ye wagati ta ka baro kɛ ni balimaw ye.—Eburuw 10:25.
-
Aw bena kalan kɛ gafe minw kɔnɔ lajɛn tuma na, i janto ko i ka denbayamɔgɔ kelen kelen bɛɛ be n’u ye, a mana kɛ a papiyelaman wala tablɛti kan.
-
I deen dɛmɛ walisa a ka se k’a ka lakalitaw kɛ a yɛrɛ kumacogo la.—Mat. 21:15, 16.
-
Kuma ɲuman fɔ lajɛnw koo la ani a yira ko an be kalan minw sɔrɔ yen, o kɔrɔtanin lo kosɔbɛ.
-
I deenw dɛmɛ u k’u niin don kafo ka baara dɔw la i na fɔ Masaya Boon ladonko. Mɔgɔkɔrɔba minw be aw ka kafo kɔnɔ, i deenw dɛmɛ fana u ka to ka kumaɲɔgɔnya kɛ n’u ye.
Ka se k’i deenw dɛmɛ u k’u magwɛrɛ Jehova la, o tɛ ɲɛ jijaliba kɔ. A yɛrɛ be se ka kɛ i ɲɛɛ na ko a ka gwɛlɛ kojugu. Nka i be se k’i jigi la Jehova kan walisa a k’i dɛmɛ.—Ezayi 40:29.
VIDEWO NIN FILƐ: BANGEBAGAW, AW Y’AW JIGI LA JEHOVA KAN K’A KA DƐMƐ SƆRƆ. O KƆ, ƝININGALI NUNU JAABI:
-
Sigɛn tun ye nɔɔ juman lo to Zack ni Leah kan?
-
Mun na a kɔrɔtanin lo bangebagaw ka Jehova deli walisa ka fanga sɔrɔ?
-
Zack ni Leah y’u jigi la Jehova kan cogo di walisa ka se k’u ka kunkanbaara dafa?
