MÄ MꞌU̱IHU̱ NGU YÄ KRISTIANU
Dadahu̱, ri bätsihu̱ ꞌnehe dä za dä nja yä mfädi
Pa gi fatsꞌi nuꞌu̱ ri bätsi dä ñhani näꞌä rä mfädi bi ehe de Jeoba, hyandi mu̱ nuꞌu̱ di benefisia xä ñho de näꞌä tꞌudi ha yä mhuntsꞌi. Näꞌä o̱de ha yä mhuntsꞌi, näꞌä handi ꞌne näꞌä mää ora di komenta, geꞌä ma dä matsꞌi dä konose mänꞌa xä ñho Jeoba ꞌne dä yꞌo̱tꞌe rä amigo (Dt 31:12, 13). ¿Hanja dä za gi fatsꞌi nuꞌu̱ ri bätsi dä benefisia mänꞌa xä ñho de yä mhuntsꞌi?
-
Yꞌo̱tꞌe ntsꞌe̱di po gi ntinihu̱ ha rä Ngu de gä Mhuntsꞌi (Sl 22:22).
-
Animäbi nuꞌu̱ ri bätsi dä ñäui yä zi ku änte ꞌne ꞌme̱fa de rä mhuntsꞌi (Heb 10:25).
-
Ora gi ntinihu̱ ha yä mhuntsꞌi, asegura ge kada nꞌa de nuꞌu̱ ri bätsi di hñä näꞌä rä imformäsio ha rä telefono o de gä he̱ꞌmi.
-
Fatsꞌi nuꞌu̱ ri bätsi dä ñhoki pa dä uni yä komentario ko yä noyase̱ (Mt 21:15, 16).
-
Ñä xä ñho nzäntho de yä mhuntsꞌi ꞌne de näꞌä tꞌudi.
-
Animäbi nuꞌu̱ ri bätsi dä ja rä limpiesa ha rä Ngu de gä Mhuntsꞌi ꞌne dä mplatika ko nuꞌu̱ yä zi ku ya yä zi däta jäꞌi.
Dadahu̱, zäi ge rꞌabu̱ ma dä jaꞌähu̱ xä ñhei gi tede ri bätsihu̱ ha rä ꞌñuu Jeoba. Pe benihu̱ ge mu̱ gi hñutsꞌihu̱ de ri partehu̱, Jeoba hingä ma dä hye̱kꞌäse̱hu̱ (Is 40:29).
HYANDIHU̱ RÄ BIDEO DADAHU̱, RÄ ZI DADA JEOBA MA DÄ RꞌAꞌÄHU̱ RÄ TSꞌE̱DI. MꞌE̱FA THÄDIHU̱ NUYA YÄ NTꞌANI:
-
¿Hanja mi afektabi rä nzabi näꞌä medinthäti po̱ni ha rä bideo?
-
¿Por hanja yä dada pe̱ꞌtsi te dä yꞌapäbi rä Zi Dada Jeoba ge dä umbäbi rä tsꞌe̱di?
-
¿Te bi me̱fi näꞌä medinthäti pa bi hyombäbi rä mfatsꞌi rä Zi Dada Jeoba?
