1-2. (1) Pasowalan no coyoh ko papina a fafahiyan to maanan hani? (2) Pasowalan ni Yis cangra to maanan hani?

ITINI papacem no saka 33 miheca no Nisan Folad 16 romiˈad, o papinaay mararomay ko falocoˈ a fafahiyan romakatay i lalan. Maedeng ˈayaw no cecay ira ko kalitosa romiˈad, oya mapatayay a tireng ni Yis mitelian i tadem, o tatayra cangra a minengneng, sapisipasipaw to fangsisay a simal toya tireng ni Yis. Tahira cangra macekiday, awaayto ko maan i tadem! Iraay ko cecay coyoh pasowalay cangraanan patikolayto maˈorip ci Yis sanay, somowalayho: “Wa iˈayaw namo cingra tayra i Kalili. O mamaˈaraw namo cingra itira.”—Matay 28:1-7; Luka 23:56; 24:10.

² Miliyas to koya papina fafahiyan to tadem i, tayraay ci Yis a miˈaraw cangraanan, pasowal cangraanan: “Pasowalen ko salikaka ako, katayra i Kalili, o mamaˈaraw nangra kako itira.” (Matay 28:10) Patikol maˈorip ci Yis tangsolay misaˈopo to nisawawaan, samanen iraay ko kalimlaan a demak ningra to papasowalen cangra.

3-4. O limoˈot ni Yis i Matay 28:19, 20 hano mafanaˈ kita cowa ko tarokos aca ko pasowalan hani? (Nengnengen ko papotal coka.)

³ ˈOsien ko Matay 28:16-20. Masaˈopo ko nisawawaan i Kalili i, palimoˈotan ni Yis cangra midemak to kalimlaan a ˈinorong, o midemakan ita anini a ˈinorong konini. Sanay ko sowal ni Yis: ‘Kalingad kamo, palanisawawaan no mako ko polong no kasafinawlan, . . . o kihcod a limoˈot ako tamowanan, pasifanaˈen cangra a midofdof.’

⁴ O limoˈot ni Yis cowa ko 11 aca a tarokos ko pasowalan, tokel  ningra polong a mikotoday cingraanan a tamdaw o mamalingad a mitosil. Hano mafanaˈ kita hani? Tiya palimoˈoten ni Yis i Kalili a lotok ko nisawawaan malingad a mitosil i, cowa ko tarokos aca ko itiraay, samanen tiya patikolan ni Yis a maˈorip a romiˈad, pasowalan no coyoh ko papina fafahiyan: “Itini Kalili wa maˈaraw namo cingra.” Oniya papina fafahiyan maedeng mitooray to limoˈot a tayra i Kalili. Roma i, sanay ko sowal no tarokos ci Pawlo, kinacecayay ‘paˈaraway ci Yis i mataˈlifay ko lima soˈot a salikaka.’ (1 Korinto 15:6) Oniya mataˈlifay ko lima soˈot a tamdaw icowaay a masaˈopo hani?

5. Hano mafanaˈ kita to malecaday a demak ko maˈoningay i 1 Korinto 15:6 ato Matay 28 fedengan hani?

⁵ O misowalan ni Pawlo a kitiraan itiniay i Kalili, o malecaday misowalan i Matay 28 fedengan a demak. Hano haenen ko sowal hani? Saka cecay, o ˈalomanay a nisawawaan ni Yis o Kalili a tamdaw, mansa itini i lotok no Kalili a misaˈopo to ˈalomanay tamdaw, mikikakaay ko kangaˈay itini lomaˈ no tamdaw. Saka tosa, ano maharekayto ci Yis i ikor no patikol maˈorip a masasoˈaraw to tarokos i Yirusalim, ano o tarokos aca ko mamalingad a mitosil, maedeng papalimoˈoten ningra cangra itiya, cowato ko mamitahidang cangraanan ato roma tamdaw tayra i kalili a miˈaraw cingraanan kira.—Luka 24:33, 36.

6. (1) O limoˈot ni Yis i Matay 28:20 hano pasayniay i aniniay a nisawawaan a somowal hani? (2) Anini, o padamaay to tamdaw malo Krisciyang a demak samanay ko kacowat hani?

⁶ O limoˈot ni Yis cowa ko saka 1 aca hahekalan a nisawawaan ko pasowalan, samanen itini sapihererek a sowal ningra sanay: ‘Toniya kihcod a romiˈad, tahira ka hererekan noniya lekakawa, kalacafayen ako kamo.’ (Matay 28:20) ˈAlomanay tamdaw anini midofdofay to limoˈot ni Yis, misaˈicel a padama to tao malo nisawawaan ni Yis. To mihecahecaan 30 emang ko micadaay to paputisem a tamdaw malo Krisciyang, malo Misawacayay Tamdaw ni Yihofa, tada kasemeranto konini!

7. Toniya lalakaw mamilengo to maanan hani? Misamaanay?

⁷ Padadotocay macakat ko ˈalomanay pacekiwan to Fangcalay Cudad, salikor micadaay to paputisem, kawra o roma a tamdaw maolahay malacafay kitaanan a minanam, kawra cowa ka makahi malo Krisciyang. Ano misikayay kiso to cecay pacekiwan to Fangcalay Cudad, makalimay sapadamaaw to pacekiwan mitoor to mananamay a midemak, malo nisawawaan ni Yis. Oniya lalakaw wa milengo sasamaan kita mitemer to falocoˈ no pacekiwan, padama cangraanan a macakat. Hano kalimlaan konini hani? Samanen itini roma pakayraan, o mamisaˈosi kita to papahanhanen ko cecay a pacekiwan hokira.

8. O roma tamdaw hano pasangaran maolah to Kawas hani?

⁸ Tokel ni Yihofa pakayniay kaolah ita Cingraanan ko nokapidoko. Mihaenay o pacekiway a singsi papadamaen ko pacekiwan o pinengneng ci Yihofaan ‘o Wama no pakoyoc, o midipotay to maponengay,’ cipinang to tangongolay ko olah ni Yihofa cangraanan, tada ciharatengay cangraanan. (ˈOlic 68:5) Ano matanam no pacekiwan ko olah no Kawas, wa matemer ko falocoˈ, tano olah a patikol to olah. Kawra, pasangaran nanay ko roma tamdaw palo sidaˈitay a Wama ko pinengneng to Kawas, samanen cowa ka tahatanam cangra to olah no wama. (2 Timoti 3:1, 3) Mihaenay ano misikay to pipacekiw i, ceriden milengo ko makapahay a capeling ni Yihofa, padama to pacekiwan a mihapinang, oya matomesay  to olah a Kawas mitokelay cangraanan tahadaˈoc a maˈorip, makahiyay padama cangraanan malaˈosi koniya patosokan. Cowa konini aca, wa ngaˈayho kita misamaan ko hademak hani?

9-10. Misikay to pacekiwan i, ngaˈay sakadademaken ko maanan mitepangan cudad hani? Misamaanay?

⁹ Tano “Mamananam Ita ko Manan Nai Fangcalay Cudad?” ato “Samaan Materek i Olah no Kawas” misikay to pacekiwan. Oniya tosa cudad papadama kitaanan mitemer to falocoˈ no pacekiwan. Tinakoen: Mamananam Ita ko Manan Nai Fangcalay Cudad saka 1 fedengan papacaˈof to: Misemsem ko tamdaw, o mipalifetay ko Kawas to tamdaw han? Misemsem ko tamdaw i, samaanay ko harateng no Kawas? Wa ngaˈay kita malo widang ni Yihofa han? Roma i, Materek i Olah no Kawas a cudad papadama to pacekiwan cipinang, ano misakadademak cingra to safalod no Fangcalay Cudad, wa lipahak ko kaˈorip, matongal ko piingid ci Yihofaan. Ano maharekayto kiso tanoniya tosa cudad a misikay to pacekiwan, kalimlaan ko pisaday i ˈayaw no pacekiw, mihaen  ngaˈ matatodong ko pipasifanaˈ to saali no pacekiwan.

¹⁰ Ano sakafanaˈaw ko pacekiwan to cecay salicay, kawra o milengoay toniya salicay a mitepangan, awaay masadak i Sapasifanaˈ a Lalosidan, mihaenay i, ngaˈay pakalaloken cingra miˈosi toniya lalakaw, kiso i, itini pisikay to pipacekiw padadotoc a milengo to, Mamananam Ita ko Manan Nai Fangcalay Cudad a cudad anca Materek i Olah no Kawas a cudad.

11. (1) Hacowa misatapang ko singsi malacafay to pacekiwan a mitolon hani? (2) Sasamaan ko singsi padama to pacekiwan mihapinang to kalimlaan ko mitolonay hani?

¹¹ ˈAyaw no malalengo mitolonho. Ano miceridayto minanam ko pacekiwan, sangaˈayay kahenay mitolon i pisatapangan anca i kahererekan a micekiw. Padamaen ita ko pacekiwan mihapinang dengan o sadama no fangcalay saocor ngaˈ cipinang cingra to Kimad no Kawas. O roma singsi miˈosiay to Yakop 1:5 a sinael sanay: ‘O cima namo cangoˈotay to taneng, ka padadotoc a micangacang to Kawas.’ Ikor licayen ko pacekiwan: “Ano sakairaaw no taneng ita i, wa samaan ko hademak ita hani?” Mihayay ko pacekiwan to kalimlaan ko mitolonay.

12. Sasamaan kiso misakadademak to ˈOlic 139:2-4 pakalalok to pacekiwan mifowah to na falocoˈan a mitolon?

¹² Pasifanaˈen ko pacekiwan samaanen mitolon. Pasowalen ko pacekiwan, ci Yihofa makalimay mitengil to nai falocoˈay a sowal ningra, itini tekedan a pitolon i, ngaˈayay mifowah to falocoˈ a pasowal ci Yihofaan. Cowa kakahi cingra a pasowal to tao alatek, kawra ngaˈayay itini satolon pasowal ci Yihofaan, samanen cipinangay ci Yihofa to ikemoday no falocoˈ ita a harateng. (ˈOsien ko ˈOlic 139:2-4.) Ngaˈay pakalaloken ita ko pacekiwan micangacang to sadama ni Yihofa a misalof to mararaway a harateng ato nanaman. Ano halafinayto ko pacekiwan a mikingkiw i, kawra mirienangayho cingra to mararaway a lisin no pihakelongan, mafanaˈay cingra o mararaway konini, maolahayho to hatiniay a demak. Mihaenay i, pakalaloken ita cingra pakayni i satolon pasowal to na falocoˈan no niyah, micangacang to sadama no Kawas ˈinteh to tatiihay a demak.—ˈOlic 97:10.

13. (1) Hano kalikien mitahidang ko pacekiwan mirienang to saˈopo hani? (2) Sakaecaaw ka mangodo ko pacekiwan a mirienang to saˈopo, samaan ko hademak ita hani?

¹³ Kalikien mitahidang ko pacekiwan mirienang to saˈopo. O maˈaraway matengilay no pacekiwan i kasaˈopoan, wa mitemer to falocoˈ pakalalok cingraanan a macakat. Ngaˈayay paˈarawen cingra to Samaanay ko Saˈopo Itini Hongti Kitakit Kasaˈopoan? Sanay kamotoˈay ika, fanekfek a mitahidang cingraanan malacafay tisowanan a mirienang, ano ngangaˈay i, cadaen cingra tayra i kasaˈopoan. Tahidangen ko roma salikaka mirienang to picekiw namo, mihaen wa adihay ko kafanaˈan ningra a tamdaw, mirienang sato saˈopo ecato ka mangodo cingra.

14. O pacekiwan wa hacowa ciharateng to sapadamaaw to tao hani?

¹⁴ O palinian ita i, padama to pacekiwan macakat. (Ifiso 4:13) Salakat makalim ko tamdaw minanam to Fangcalay Cudad, alatek sapilifokaw cingra to sapadama no Fangcalay Cudad, kawra matongalto ko olah ningra ci Yihofaan i, alatek sapadamaaw cingra to tao, mahawpay ko kasakopang a salikaka. (Matay 22:37-39) Itini matatodongay a tatokian, ngaˈayay pasowalen ko pacekiwan, wa ngaˈay cingra pakayni i pipakiyaho a midama to tayal no Hongti Kitakit.

15. Samanen ita padama ko pacekiwan minanam a misaysay to pasangaray hani?

¹⁵ Padama to pacekiwan minanam a misaysay  to pasangaray. O pacekiwan iso, ano macakat malo cowaho picada to paputisem a mitosilay, cecay romiˈad pasowal cingra tisowanan, iraay ko pakararaway cingraanan a salikaka. Aka misawkit kiso to o cima ko matatodongay mararaway, pasowalen cingra to safalod no Fangcalay Cudad, ato sododen ko tao, ano pasangaray cingra a misodod, kilimen koya pakararaway cingraanan a salikaka masasowal, misaˈicel a ‘milifok’ toya salikaka. (Nengnengen ko Matay 18:15 ato roma pihongyak.) Kalacafayen ko pacekiwan minanam to sasamaan a somowal, misakadademak to JW Library^® app, ato Pirorodan to Mitepangan Cudad no MTY (Misawacayay Tamdaw ni Yihofa) anca lalakaw no wangcan no jw.org^®. Itini ˈayaw no micada to paputisem ko pacekiwan mafanaˈto a misaysay to lacongis i kalalaˈed no tamdaw, ikor no micada to paputisem, wa madoloto a mararihaday to salikaka i kasakopang.

16. Tahidangen ko salikaka mirienang to kalalengo, iraay ko maanan haepoc hani?

¹⁶ Tahidangen ko salikaka ato kasakilac kantok mirienang to kalalengo. Hano kalimlaan mihaen to demak hani? Cowa ko kafanaˈ aca no pacekiwan to kasakopangay a tamdaw, itini roma pakayraan wa ngaˈay padama ko salikaka to pacekiwan, oniya sapadama cowa ko mamadangar iso alatek. Tinakoen, ano kinapinaay pasokiyaw ko pacekiwan iso a misawad to tamako, ngaˈayay tahidangen iso ko iraay ko malecaday nalifetan a salikaka mirienang to kalalengo namo, paladaˈ to malaˈosiay a nalifetan i pacekiwan. O mitahidangan iso o mafanaˈay a pasifanaˈ a salikaka, mangodo kiso i ˈaˈayaw ningra misikay i, ngaˈayay papisikayen cingra. Ano samaanto, o kalimlaan a patosokan ita o papadama to pacekiwan a macakat, tahidangen iso ko tao mirienang a malalengo, o tataˈangay ko haepoc no pacekiwan.

17-18. Misimsim to papahanhanen ko pacekiwan i, haharatengen ko maanan hani?

¹⁷ Ano aeca:sa ka cakat ko pacekiwan, wa misimsim kiso to papahanhanen cingra a pacekiw. Aka mapawan, cowa ka lecalecad ko inaneng no tamdaw, o roma tamdaw misaaliay to adihayay toki ngaˈ mafalicay. Ngaˈayay haratengen iso ko laenoay salicay: “O pacekiwan ako itini madangaray no niyah a demak palidliday a macakat hokira? Mihadakay cingra to ˈicel ‘midofdof,’ anca misakadademak to mananamay a sifanaˈ no Fangcalay Cudad hokira?” (Matay 28:20) O roma pacekiwan manaˈonay ko kacakat, kawra kalimlaan i, padadotocay cingra a mafalic.

¹⁸ Ano halafinayto minanam ko pacekiwan, kawra cowa pisaareteng to cacekiwen, sasamaanto hani? Ano maharekayto cingra minanam to Mamananam Ita ko Manan Nai Fangcalay Cudad? Wa Mananam a cuadad, anca maharekayto miˈosi to Samaan Materek i Olah no Kawas a cudad, kawra co:waho pirienang to saˈopo, ano Piharatengan to Kapatay ni Yis a Saˈopo  cowa ka pirienang, mararidho misawad a malalengo. Ano mahaenay i, sasongilaˈen iso a masasowal ko pacekiwan! *

19. O pacekiwan ano cowa pisaareteng minengneng to minanaman, ngaˈayay licayen cingra to maanan hani? Ikor misimsim to maanan hani?

¹⁹ Ngaˈayay licayen iso ko pacekiwan: “Malo Misawacayay Tamdaw ni Yihofa, pakayni kisowanan o sataˈangayay a saconged o maanan?” Pasowal cingra to micaraay cingraanan a lalangian alatek, tinakoen matalaway pakalomalomaˈ a mitosil, ano mafanaˈto kiso to lalangian i, wa cipinang to sasamaan a padama cingraanan. Kawra ano halafinayto ko pacekiwan a minanam, pasowalsa ‘maolahay kako milengo to Fangcalay Cudad, kawra cowa ko mamalo Misawacayay Tamdaw ni Yihofa,’ ano mahaenay i, o sasongilaˈen iso a miharateng papahanhanen a pacekiw cingra hokira.

20. Misimsimto papahanhanen ko pacekiwan i, o Dmak 13:48 papadama kitaanan to maanan hani?

²⁰ Ka adayayan i, o roma pacekiwan malecaday to lintaday ni Icikil a Israil tamdaw. Pakayni toniya tamdaw, sanay ko sowal ni Yihofa ci Icikilan: “Matiya o midatokay, o romadiway, o palipahakay a pakatawa to finawlan a nengnengen nangra kiso. Lipahak cangra a mitengil to sowal iso. Nikawrira, caay pidoedo cangra.” (Icikil 33:32) Pasowal to pacekiwan to papahanhanen a pacekiw cowa ko madoloay, kawra aka mapawan, ‘cowato ka hakowa ko toki.’ (1 Korinto 7:29) Ano papadadotoc a pacekiw to cowa ka cakat a tamdaw, ka pisaˈicel a mikilim to ‘iraay ko matatodongay ko waywayan ngaˈay milifok to tahadaˈocay ˈorip a tamdaw’ ko ngaˈay.—ˈOsien ko Dmak 13:48.

21. O maanan ko 2020 miheca a pakamihecaay sinael hani? Midotim toniya sinael padama kitaanan to maanan?

²¹ 2020 miheca a pakamihecaay sinael: Kalingad kamo, palanisawawaan no mako ko polong no kasafinawlan, mipaputisem cangraanan. (Matay 28:19) Oniya sinael itiniay ci Yis i lotok no Kalili palimoˈot to polong a Krisciyang. Ano midotim kita toniya sinael, mamatongal ko kangaˈay a padama to tamdaw malo nisawawaan ni Yis.