1-2. Aha do na ihatahon sada malekat bani naboru na roh hu kuburan ni Jesus, anjaha aha do na iparentahkon Jesus bani sidea?

BANI sogod ni ari 16 Nisan 33 M, laho ma sakalompok naboru hu kuburan ija bangkei ni Jesus itanom dua ari na salpu. Pusok tumang do uhur ni sidea. Sihol do homa sidea mambahen rium-riuman ampa minak na misbou hu bangkeini. Hape dob das ijai, tarsonggot ma sidea halani lang dong be bangkei ni Jesus. Roh ma sada malekat mangkatahon anggo Jesus domma ipagoluh. Nini use, “Lobeianni do nasiam laho hu Galilea, anjaha ijai ma idahon nasiam ia.”​—Mat. 28:1-7; Luk. 23:56; 24:10.

² Dob misir sidea hun kuburan ai, roh ma Jesus manjumpahkon naboru-naboru ai. Anjaha iparentahkon ma bani sidea, “Laho ma nasiam patugahkon bani susianku, ase laho sidea hu Galilea. Ijai ma idahon ni sidea ahu!” (Mat. 28:10) Jadi dob ipapuho Jesus, sihol do ia mambere tugas na ponting tumang bani susianni. Halani ai ma ase ipatumpu ia sidea.

3-4. Mase boi ihatahon parentah na isurat bani Mateus 28:19, 20 marlaku bani ganup susian ni Jesus? (Tonggor ma gambar sampul.)

³ Basa Mateus 28:16-20. Sanggah martumpu ganup susianni, ibere Jesus ma bani sidea sada tugas na ponting tumang na maningon ihorjahon. Janah tugas ai do homa na ihorjahon hita ronsi sonari. Jesus mangkatahon, “Laho ma hanima, podahi hanima ma sagala bangsa ase gabe susianku sidea . . . Ajari hanima ma sidea mangkorjahon sagala na dob hutitahkon bennima.”

⁴ Jesus sihol ase ganup susianni laho marbarita lang pitah  na 11 apostelni ai. Hunja ibotoh hita? Sanggah ibere Jesus tugas ai i Dolog i Galilea, lang pitah na 11 apostelni ai na roh hujai. Dingat ma na ihatahon malekat bani naboru nongkan ai, “I [Galilea] ma idahon nasiam ia.” Tontu dong do homa naboru-naboru ai ijai. Leganni ai, ongga do homa ihatahon apostel Paulus “ipataridahkon [Jesus] do dirini sahali bani lobih lima ratus sanina”. (1 Kor. 15:6) Nantigan ma ai?

5. Parlajaran aha ma na boi dapot hita humbani 1 Korint 15:6?

⁵ Hatorangan na ihatahon si Paulus bani 1 Korint 15:6, tontu patugahkon aha na masa bani Mateus bindu 28. Hunja ibotoh hita ai? Na parlobei, bahatan do susian ni Jesus ai halak Galilea. Tontu rahanan do sidea martumpu i sada dolog marimbangkon i sada rumah. Na paduahon, dob Jesus ipapuho ongga do ia pajumpah pakon 11 apostelni i sada rumah i Jerusalem. Porini pitah 11 apostelni dassa na iparentahkon laho marbarita janah mangurupi halak gabe susianni, tontu domma ibere ia tugas ai ijai. Anjaha lang pala ipindo ia apostelni, naboru ai, pakon na leganni laho hu Galilea manjumpahisi.​—Luk. 24:33, 36.

6. Humbani Mateus 28:20, hunja ibotoh hita anggo parentah ni Jesus marlaku ronsi sonari, janah sonaha buei halak mandalankon parentah ai?

⁶ Parentah na ibere Jesus nongkan ai sedo pitah hubani susianni bani abad na parlobei. Hunja ibotoh hita ai? Dob ibere Jesus parentah ai, nini use, “Sai na hasomananku do hanima ganup ari, ronsi roh ujung ni dunia on.” (Mat. 28:20) Songon na ihatahon Jesus, bahat do halak sonari na mandalankon parentah ai. Tiap tahun, dong hira-hira 300.000 halak na ra mangihutkon Jesus anjaha ididi gabe Saksi Jahowa.

7. Aha ma na laho iulas hita, janah mase?

⁷ Bahat do halak na marlajar Bibel mambahen hamajuon janah ididi. Tapi dong do piga-piga na mabiar. Marosuh do sidea marlajar Bibel, tapi lang ra sidea ididi gabe Saksi Jahowa. Tontu ganup hita sihol mangurupi parlajar Bibelta ase mandalankon aha na iparlajari sidea janah mangihutkon Jesus. Bani artikel on, iulas hita ma sonaha hita boi mangurupi sidea ase mangkaholongi Jahowa janah mambahen hamajuon. Mase ponting iulas hita on? Halani sipata maningon itimbangi hita do, ai porlu do manoruskon parlajaran Bibel atap lang.

8. Mase sipata lang urah mangurupi parlajar Bibelta laho mangkaholongi Jahowa?

⁸ Jahowa sihol ase halak mangidangi-Si halani holong. Jadi porlu ma iurupi hita parlajar Bibelta mambotoh parduli anjaha holong tumang do Jahowa bani sidea. Sihol do homa hita ase sidea mangidah Jahowa songon ‘Bapa bani na tading maetek, anjaha Panguhum bani na mabalu’. (Ps. 68:6) Anggo iahapkon parlajar Bibelmu holong tumang do Jahowa hu bani, tontu gabe holong ma uhurni hubani Jahowa. Tapi sipata ra do lang urah bani piga-piga parlajar Bibel mangahapkon na sisonai halani lang bujur bapani hu bani. (2 Tim. 3:1, 3) Anggo sonai, sanggah marlajar Bibel ham pakonsi, ajarhon ma sifat-sifat ni Jahowa hu bani. Urupi ma ia mambotoh anggo Jahowa sihol ase ia mandapot hagoluhan sisadokah ni dokahni janah sirsir do Ia  mangurupisi. Leganni ai, aha ope na boi ibahen ham?

9-10. Publikasi na ija do na maningon igunahon hita bani parlajar Bibelta?

⁹ Gunahon ma buku “Aha do na Iajarhon Bibel Hubanta?” ampa “Cara agar Tetap Dikasihi Allah”. Haduasi buku on ibahen laho mangurupi parlajar Bibel ase mangkaholongi Jahowa. Umpamani, bani pasal 1 buku Na Iajarhon Bibel, dong balos ni sungkun-sungkun on: Ai parduli do Naibata hubanta?, Sonaha pangahap ni Naibata mangidah sitaronon ni manisia?, ampa Ai boi do nasiam gabe hasoman ni Jahowa? Dob ai, sanggah manggunahon buku Dikasihi Allah, iurupi ma parlajar Bibel ase boi lambin dohor bani Jahowa anjaha mandalankon prinsip ni Bibel bani goluhni. Hassi pe domma ongga salosei igunahon ham buku on bani parlajar Bibelmu, tapi sanggah igunahon ham use buku on pakon na legan, totap ma dear mambahen persiapan ase boi ham mangurupisi domu bani haporluanni.

¹⁰ Aha do na porlu bahenonmu porini parlajar Bibelmu marosuh mangulas sada  topik hape topik ai iulas bani publikasi na legan, sedo bani publikasi na dong bani Alat laho Mangajarhon Bibel? Ojur ma ase ibasa ia sandiri publikasi ai. Jadi boi ma itoruskon nasiam marlajar manggunahon buku na ipatugah nongkan ai.

11. Attigan do boi ipungkah hita martonggo pakon parlajar Bibelta, janah sonaha hita mangurupi sidea ase mangarusi ponting tumang do ai?

¹¹ Pungkah ma parlajaran marhitei tonggo. Dobkonsi piga-piga minggu ham marlajar Bibel pakon sasahalak, dear do anggo ipungkah janah itutup nasiam parlajaran ai marhitei tonggo. Urupi ma parlajar Bibel mambotoh pitah marhitei pangurupion ni tonduy na pansing do hita boi mangarusi Hata ni Naibata. Piga-piga sanina botou manggunahon Jakobus 1:5 laho patorangkon mase maningon martonggo sanggah marlajar. Ijai ihatahon, “Anggo adong i tongah-tongah nasiam na hurangan bani [hapentaran], ipindo ma ai hubani Naibata.” Dob ibasahon ayat ai, isungkun ia ma parlajar Bibelni, “Aha ma na maningon ibahen hita ase mandapot hapentaran?” Somalni ihatahon sidea do maningon martonggo.

12. Sonaha ham boi manggunahon Psalmen 139:2-4 laho mangurupi parlajar Bibelmu ase ra patugahkon pangahapni bani Jahowa?

¹² Ajari ma parlajar Bibelmu martonggo. Papos ma uhurni anggo Jahowa sihol manangihon tonggoni. Patorang ma sanggah martonggo ia sahalaksi, boi do ipatugah ia bani Jahowa aha pe na lang ra ipatugah ia bani halak na legan. Patorang ma iarusi Jahowa do sonaha pangahapni. (Basa Psalmen 139:2-4.) Ojur ma ia mangindo pangurupion ni Jahowa ase boi mambahen hamubahon ibagas pingkiran ampa parlahou. Umpamani, ra do dihut ope ia bani ari raya na lang sosok bani halak Kristen. Hassi pe domma ibotoh ia lepak do ai, tapi marosuh ope ia manrayahon ai. Ojur ma ase ipatugah ia sonaha pangahapni pasal ai bani Jahowa janah mangindo ase ia iurupi mangkaholongi aha na ihaholongi Jahowa.​—Ps. 97:10.

13. (a) Mase maningon iontang hita parlajar Bibelta hu partumpuan? (b) Ase ulang maila ia roh hu partumpuan, aha ma na maningon bahenonmu?

¹³ Ontang ma parlajar Bibelmu hu partumpuan. Aha na ididah janah itangar ia ijai boi mangojur ia ase mangidangi Jahowa. Patuduh ma video Aha do na Masa i Balei Harajaon? Dob ai, ontang ma ia ase roh hu partumpuan. Anggo boi alop ham ma ia. Dob ai, dear do homa anggo margantih hasomanmu sanggah marlajar Bibel pakonsi. Anggo sonai ibahen ham, gabe bahat ma hasomanta i kuria na itanda ia. Jadi, sanggah roh ia hu partumpuan, lang be maila pangahapni.

14. Aha do na mangurupi parlajar Bibel boi mambahen hamajuon?

¹⁴ Maningon iurupi hita do parlajar Bibel laho patoguhkon parhasomananni pakon Jahowa. (Ep. 4:13) Sanggah sasahalak marlajar Bibel, ra do nini uhurni marguna do parlajaran ai bani dirini sandiri. Tapi, lambin banggal holongni bani Jahowa, lambin tarojur ma ia mangkaholongi halak na legan tarmasuk ma sanina botounta i kuria. (Mat. 22:37-39) Dob ai anggo sosok pangahap ni ham patugah ma bani, sada hasangapon do banta mambere sumbangan laho mangurupi horja parambilanon.

15. Sonaha hita mangurupi parlajar Bibel sanggah dong parsalisihanni?

¹⁵ Ajari ma parlajar Bibelmu sonaha pasaloseihon parsalisihanni. Bayangkon ma  parlajar Bibelmu domma gabe parbarita na lape ididi. Isaritahon ia dong sanina atap botou na mambahen borit uhurni. Aha ma na laho bahenonmu? Ulang patugah ise na sintong atap na salah. Tapi, patugah ma bani sonaha ia boi mangihutkon prinsip ni Bibel laho pasaloseihon ai. Anggo boi, isasap ia ma hasalahanni hasoman ai. Tapi anggo lang tarbahen ia, ojur ma ase ijumpahi ia hasoman ai ase boi sidea mardear use. (Bandingkon Mateus 18:15.) Urupi ma ia ase mamingkirhon aha do dearni na laho sihatahonon. Patuduh ma sonaha manggunahon aplikasi JW Library^®, Panduan Riset untuk Saksi-Saksi Yehuwa, atap jw.org^®. Anggo domma ilatih ham ia sonai paima ididi, tontu lambin urah ma ia marhasoman pakon sanina botou i kuria dobkonsi ia ididi.

16. Mase dear anggo margantih hasomanmu sanggah mambahen parlajaran Bibel?

¹⁶ Margantih ma arahkon hasomanmu sanggah mambahen parlajaran Bibel, atap boi do homa iboan ham sintua kaliling sanggah roh ia hu kuriamu. Mase? Sobali alasan na dob ipatugah nongkan ai, sidea boi mangurupi parlajar Bibelmu. Ra do lape ongga ham mangahapkon situasi na iahapkon parlajar Bibelmu ai. Umpamani, marusaha do ia maronti manginsop, hape lalab lang boi. Jadi, ontang ma sahalak Saksi na ongga sonai, tapi marhasil do ujungni. Holi boi ma ipatugah ia hu bani sonaha carani ase lang be manginsop. Anggo pangahapmu hurang pas do ham mambobahon parlajaran bani panorang ai, pindo ma hasoman na marpangalaman ai na mambobahon. Jadi, anggo margantih hasomanmu sanggah marlajar Bibel pakonsi, gabe boi ma homa ia marlajar humbani pangalaman ni sanina botou. Dingat ma, mangurupi ia patoguhkon parhasomananni pakon Jahowa do tujuanta.

17-18. Paima parontihon parlajaran Bibel, aha ma na maningon ipingkirhon ham?

¹⁷ Porini parlajar Bibelmu lalab lang mambahen hamajuon, sungkun ma dirimu, ‘Ai maningon huparonti do parlajaran on?’ Tapi, paima mambahen haputusan paruhurhon ma sonaha situasini. Dong do parlajar Bibel na dokahan mambahen hamajuon marimbangkon na legan. Jadi, pingkirhon ma, ‘Ai situasini do na mambahen ia lang maju?’ ‘Ai ra do ia “mangkorjahon” atap mandalankon aha na iparlajarisi?’ (Mat. 28:20) Ra, porlu do bahat panorang bani sasahalak ase boi gabe Saksi Jahowa. Hassi pe sonai, maningon adong do parubahan na ibahen ia.

¹⁸ Sonaha anggo parlajar Bibelmu lang mangkargai aha na dob iparlajari, hape domma dokah ia marlajar? Umpamani, domma salosei iparlajari nasiam buku Na Iajarhon Bibel, janah domma imulai nasiam marlajar manggunahon buku Dikasihi  Allah, tapi lape ongga ia roh hu partumpuan. Gari hu Acara Borngin Pardingatan pe lape ongga ia roh. Dob ai, gati do homa dong sidalianni ase lang marlajar. Anggo sonai do situasini tangkas ma patugah ham pasal ai hu bani. *

19. Aha ma namin na ihatahon ham bani parlajar Bibel na lang maju, janah aha do na maningon iparuhurhon ham?

¹⁹ Boi do isungkun ham ia, ‘Hira-hira aha do na manlanglangi ham gabe Saksi Jahowa?’ Ra do balosni, ‘Marosuh do ahu marlajar Bibel, tapi lang ra ahu gabe Saksi Jahowa.’ Anggo sonai do balosni, ai dong do gunani anggo itoruskon ham marlajar Bibel pakonsi? Tapi ra do adong parlajar Bibel na patugahkon aha na mambahen ia lang maju. Umpamani, ra do pangahapni lang barani ia marbarita hun rumah hu rumah. Anggo domma iarusi ham pangahapni, gabe urah ma ham mangurupisi.

20. Sonaha Lahoan 13:48 mangurupi hita laho mamutuskon porlu do manoruskon marlajar Bibel atap lang?

²⁰ Bahat do parlajar Bibel na songon halak Israel bani panorang ni si Hesekiel. Pardiateihon ma aha na ihatahon Jahowa hubani si Hesekiel pasal sidea, “Tongon, songon sipandoding sipamalas-malas uhur do ho bani sidea, silurlur sora ampa na pandei marhusapi, ai itangihon sidea do na hinatahonmu, tapi seng ihorjahon sidea ai.” (Hes. 33:32) Ra do lang urah pangahapmu laho mangkatahon maronti marlajar pakon halak sisonai. Tapi dingat ma “pondok mando panorangni”. (1 Kor. 7:29) Jadi, rahanan ma igunahon hita panorang laho mangindahi halak na patuduhkon anggo ia “marosuh manjalo hasintongan na parohkon hagoluhan sisadokah ni dokahni”.​—Basa Lahoan 13:48 humbani surat partoruh. *

21. Aha do ayat tahunan 2020, janah aha ma na iojur hubanta?

²¹ Sadokah tahun 2020, ayat tahunan mangojur hita ase lambin pandei mangurupi halak gabe susian ni Jesus. Ai ma na ihatahon Jesus sanggah pajumpah pakon susianni i dolog i Galilea, “Laho ma hanima, podahi hanima ma sagala bangsa ase gabe susianku sidea, anjaha didi hanima ma sidea.”​—Mat. 28:19.