1-2. Kai si ikataken malekat man diberu-diberu sanga idahi kalak e kuburen Jesus? Janah perentah kai si ibereken Jesus man kalak e?

BAS tanggal 16 Nisan 33 Masehi, sanga erpagi-pagi si lampas, lit piga-piga diberu si keleng atena Dibata lawes ku kuburen Jesus, janah sedih kel iakap kalak e. Paksa si e, nggo lebih 36 jam dekahna Jesus ikuburken. Itama diberu-diberu e atena rempah-rempah ras minak ku daging Jesus. Tapi, seh kenca kalak e bas kuburen Jesus, sengget kel kalak e perban kuburen e nggo kosong! Ikataken sada malekat man diberu-diberu e maka Jesus nggo ipekeke. Kenca si e, nina malekat e, “Gundari sangana ia i bas perdalanen ku Galilea ngelebei kena. Jumpa jah kari kena.”​—Mat. 28:1-7; Luk. 23:56; 24:10.

² Kenca lawes diberu-diberu e arah kuburen ndai, Jesus si nggo ipekeke reh ndahi kalak e janah iberekenna perentah enda: “Laweslah, kataken man senina-seninaku gelah lawes kalak e ku Galilea, i je me kari idahna aku.” (Mat. 28:10) Emaka, si pertama ilakoken Jesus kenca ipekeke eme iaturkenna sada perjumpan ras pengikutna. Pasti ipesehna atena perentah si seh kel pentingna man kalak e!

3-4. Engkai maka banci sikataken perentah si lit bas Matius 28:19, 20 labo ngenca ibereken man rasul-rasul? (Nen gambar bas sampul majalah enda.)

³ Baca Matius 28:16-20. Bas perjumpan si iaturken Jesus, ikatakenna pendahin penting kai si nandangi ilakoken pengikutna bas abad pertama. Pendahin e seri ras pendahin si sangana silakoken gundari. Nina Jesus, “Emaka, laweslah, banlah kalak i bas kerina bangsa jadi murid-muridku, . . . ajarlah kalak e ngelakoken kerina si nggo kuperentahken man kena.”

 ⁴ Ate Jesus gelah kerina pengikutna erberita. Labo man 11 rasulna saja ngenca iberekenna perentah e. Kai buktina? Sanga ibereken Jesus perentah guna ‘erban murid’ i das deleng i Galilea, nterem kalak i je, labo rasul-rasulna ngenca. Janari siteh? Cuba perdiateken kai nina malekat ndai man diberu-diberu e, “Jumpa [i Galilea] kari kena.” Emaka mbelin kemungkinenna, diberu-diberu si setia e pe lit ka bas perjumpan ndai. Tapi, arah bukti si deban banci siteh maka perentah e pe ibereken Jesus ka man kerina pengikutna.

5. Engkai maka kita tek perjumpan si imaksudken Rasul Paulus bas 1 Korinti 15:6 eme perjumpan si lit bas Matius pasal 28?

⁵ Ikataken Rasul Paulus maka ‘icidahken Jesus dirina man lebih 500 kalak pengikutna si sangana radu pulung i bas sada ingan.’ (1 Kor. 15:6) Mbelin kemungkinenna, si imaksudken Paulus eme perjumpan i Galilea si icatat bas Matius pasal 28 ndai. Lit dua alasenna. Si pertama, kenca Jesus ipekeke, nggo jumpa ia ras 11 rasulna bas sada rumah i Jerusalem. (Luk. 24:33, 36) Adi perentah Jesus guna erberita ras ‘erban murid’ man kalak e saja ngenca, situhuna banci saja nge iberekenna perentah e bas rumah ndai. La perlu isuruhna rasul-rasul e, diberu-diberu, bage pe murid-murid si debanna lawes njumpai ia i Galilea. Si peduaken, teremen pengikut Jesus kalak Galilea. Emaka, perban perjumpan e iban ras kalak si bage teremna, pasti nukahen adi e iban i das sada deleng i Galilea, labo bas sada rumah i Jerusalem.

6. Kai si ikataken Matius 28:20 si mbuktiken maka perentah guna ‘erban murid’ arus idalanken seh asa gundari? Janah kai si ilakoken nterem kalak guna matuhisa?

⁶ Arah bukti si deban banci ka siteh maka perentah Jesus guna ‘erban murid’ labo iberekenna man 11 rasulna saja ngenca. Kenca ibereken Jesus perentah e, nina, “Katawari pe aku tetap ras kena seh ku kedungen jaman enda.” (Mat. 28:20) Emaka, perentah Jesus e labo ngenca iberekenna man pengikutna bas abad pertama. Bagi si ikataken Jesus, gundari pe nterem kalak si sangana ‘erban murid.’ Cuba ukuri: Tiap tahunna, menam 300.000 kalak si iperidiken jadi Saksi Jahwe janah jadi murid Kristus. Luar biasa kel enda!

7. Kai si man bahasenta? Janah ngkai?

⁷ Enterem kalak si erlajar Pustaka nggo berhasil ngubah kegeluhenna janah dungna iperidiken. Tapi, lit piga-piga kalak si banci saja la nggit jadi murid Kristus aminna pe nggo ratur ia erlajar Pustaka ras kita. Meriah ukur kalak e erlajar, tapi la ibanna perubahen janah la iperidiken. Adi lit sangana kalak si erlajar Pustaka ras kam, pasti isampatindu atendu ia gelah idalankenna kai si nggo ipelajarina janah dungna jadi murid Kristus. Bas artikel enda, sibahas kari uga carana gelah Kata Dibata banci kena ku pusuh kalak si erlajar, janah uga carana nampati ia gelah keleng atena Jahwe ras maju secara rohani. Engkai maka perlu sibahas kerna si enda? Perban mon-mon, banci saja arus siban keputusen kerna siterusken nge pelajaren e ntah lang.

8. Engkai maka mon-mon la menukah nampati kalak si erlajar Pustaka gelah keleng atena Jahwe?

⁸ Ate Jahwe silayani Ia perban keleng ateta Ia. Emaka, sisampati ateta kalak si erlajar Pustaka gelah iangkaina maka keleng kel ate Jahwe ia janah tuhu-tuhu iperdiatekenNa ia. Ateta gelah itehna maka Jahwe e “bapa kalak melumang dingen ngkawali diberu balu-balu.” (Msm. 68:6) Adi nggo  igejapken kalak si erlajar e maka keleng kel ate Dibata ia, mbelin kemungkinenna e kena ku pusuhna janah mulai ka keleng atena Jahwe. Banci saja lit kalak si erlajar Pustaka si mesera iakapna mbayangken Jahwe e Bapak si perkeleng, perban bapakna sendiri pe la perkeleng janah la ermediate. (2 Tim. 3:1, 3) Emaka, sanga lit kalak si erlajar Pustaka ras kam, rusurlah bahasndu kerna sifat-sifat Jahwe si luar biasa. Sampati ia gelah iangkaina maka Dibata e perkeleng, merhat kel Dibata ia nggeluh si rasa lalap, janah nggit Dibata nampati ia ndatkenca. Kai nari si banci ilakokenndu?

9-10. Buku kai saja si arus sigunaken i bas nampati kalak erlajar Pustaka? Janah kai alasenna?

⁹ Gunakenlah buku “Kai Nina Pustaka si Badia?” ras buku “Carana Gelah Tetap Ikelengi Dibata.” Duana buku e khusus iban guna nampati kita gelah banci siban Kata Dibata kena ku pusuh kalak si erlajar. Contohna, bas pasal 1 buku Nina Pustaka, banci siteh jawapen arah penungkunen-penungkunen enda: Dibata nge erbanca  manusia susah? Uga nge perasan Dibata ngidah manusia susah? Banci nge kita jadi teman Jahwe? Adi buku Tetap Ikelengi Dibata nampati si erlajar Pustaka gelah iangkaina maka pedah Pustaka e erguna adi idalanken. Misalna, banci ia reh rembakna ras Jahwe janah kegeluhenna reh ulina. Banci jadi nggo rusur igunakenndu buku-buku e nampati kalak erlajar Pustaka. Amin gia bage, perlu denga ibanndu persiapen si mehuli sope erlajar. Alu bage, banci isesuaikenndu pelajaren e ras kai si iperluken tiap kalak si erlajar.

¹⁰ Tapi, banci saja merhat kalak si erlajar e meteh kerna sada topik si lit bas publikasi si deban, tapi la ibahas bas duana buku ndai. Mungkin banci isuruhndu gelah ibacana sendiri publikasi e gelah banci iterusken kena pelajaren alu buku Nina Pustaka ntah buku Tetap Ikelengi Dibata.

11. Ndigan nge perlu simulai ras sidungi pelajaren Pustaka alu ertoto? Janah kai si banci silakoken gelah iangkai kalak si erlajar pentingna ertoto?

¹¹ Ertotolah lebe ope denga erlajar. Kenca nggo imulai erlajar Pustaka, penting kel gelah pelajaren e imulai ras idungi alu ertoto. Adi banci, mis banndu bage. Arus sisampati kalak si erlajar gelah itehna maka kesah si badia ngenca si banci nampati kita ngangkai Kata Dibata. Piga-piga si ngajar Pustaka nggunaken Jakup 1:5 guna njelasken pentingna ertoto. Nina ayat e, “Adi lit i bas kena si kurang pentar, teruslah ia mindo man Dibata.” Kenca si e, nungkun si ngajar e man kalak si erlajar, “Uga carana gelah banci sidat kepentaren bas Dibata nari?” Banci saja nggit si erlajar e ertoto man Dibata.

12. Uga carana nggunaken Masmur 139:2-4 i bas nampati kalak si erlajar gelah iturikenna isi pusuhna man Jahwe bas toto?

¹² Ajarilah kalak si erlajar Pustaka carana ertoto. Kataken man bana maka merhat kel Jahwe megiken totona si ipesehna alu bulat ukur. Kataken ka man bana maka kai pe banci iceritakenna man Jahwe bas toto, termasuk si la atena iceritakenna man kalak si deban. Ingetlah maka situhuna nggom iteh Jahwe kai si lit bas pusuhta. (Baca Masmur 139:2-4.) Banci ka isuruhndu kalak si erlajar e mindo penampat Jahwe sanga iusahakenna ngubah cara rukurna si salah bage pe gelah ula nai ilakokenna kebiasanna si la mehuli. Misalna, kalak si erlajar e meriah denga akapna ngerayaken Natal. Situhuna itehna perayan e salah perban rehna arah kebiasan kafir. Banci isuruhndu gelah iceritakenna perasanna e man Jahwe bas toto. Suruh ka ia mindo penampat Jahwe gelah ciga atena nandangi kai si ciga ate Jahwe.​—Msm. 97:10.

13. (a) Engkai maka arus mis siundang kalak si erlajar ku perpulungen? (b) Kai si banci silakoken gelah meriah iakap si erlajar sanga reh ku perpulungen?

¹³ Mislah undang kalak si erlajar reh ku perpulungen. Bas perpulungen, banci ibegina janah idahna kai saja si erban ia tertarik, si erban kena ku pusuhna, ras si nampati ia erban perubahen. Banci putarkenndu video Kai si Ilakoken i Bale Kerajan? janah undang ia ku perpulungen. Adi cocok, kataken man bana gelah ilegindu ia. Sanga erlajar Pustaka kam ras ia, ganti-gantilah baba temanndu. Adi bage banndu, reh teremna itandaina turang senina bas runggun, janah sanga reh ia ku perpulungen banci saja meriah iakapna.

14. Adi kalak si erlajar Pustaka nggo keleng atena Jahwe, tersuruh ukurna ngelakoken kai?

¹⁴ Sanga lit si erlajar Pustaka ras kita, tujunta eme nampati ia gelah maju secara rohani. (Ep. 4:13) Sanga lit si mulai erlajar,  banci saja si rusur iukurina eme kai gunana pelajaren e man bana. Tapi kenca reh belinna kekelengenna man Jahwe, banci saja mulai iukurina uga cara nampati kalak si deban, termasuk turang senina bas runggun. (Mat. 22:37-39) Adi nggo cocok waktuna, ula kam sangsi mpebetehken man si erlajar kerna mere sumbangen. Kataken maka e sada kehamaten man banta guna ndukung dahin Kerajan.

15. Uga carata nampati kalak si erlajar ndungi masalahna alu cara si tepat?

¹⁵ Ajarilah kalak si erlajar cara ndungi masalahna. Misalna, lit kalak si erlajar Pustaka ras kam si nggo jadi perberita si lenga iperidiken. Ikatakenna man bandu maka lit si erban kitik ukurna bas runggun. Ula kataken man bana ise si benar ras ise si salah. Tapi, banci ingetkenndu ia maka menurut Pustaka, lit dua pilihen. Si pertama, banci ipilihna ngelupaken kesalahen e. Si peduaken, adi mesera iakapna ngelupakenca, banci manjar-anjar icakapkenna kerna si e ras kalak si erban kitik ukurna gelah erdame. (Bandingken ras Matius 18:15.) Sampati ia gelah itehna kai kari si man katankenna. Banci ka ajarindu ia nggunaken JW Library^®, Panduan Riset untuk Saksi-Saksi Yehuwa, bage pe jw.org^® gelah itehna cara ndungi masalahna. Adi ope iperidiken nggo itehna cara ndungi masalahna ras kalak si deban, reh nukahna akapna pagi rembak ras turang senina bas runggun kenca iperidiken.

16. Kai gunana adi sibaba perberita si deban sanga ngajari kalak kerna Pustaka?

¹⁶ Babalah perberita si deban sanga ngajar Pustaka, janah babalah pertua keliling sanga reh ia ku runggunndu. Ndai nggo sibahas piga-piga alasen ngkai maka perlu ganti-ganti sibaba temanta. Tapi lit ka alasen si deban. Perberita si deban banci saja mereken penampat si la banci sibereken man kalak si erlajar ras kita. Misalna, lit kalak si erlajar si nggo lalap iusahakenna ngadi ngisap, tapi terus ia gagal. Babalah perberita si pernah bage pengalamenna. Banci saja ibereken perberita e pedah-pedah si erguna si iperluken kalak si erlajar ndai. Adi kurang iakapndu beluhndu ngajar Pustaka perban temanndu kalak si nggo erpengalamen, pindolah ia si ngajar paksa si e. Adi iundangndu perberita si deban gelah ikut ia ngajar, pengalamen perberita e banci mpegegehi kalak si erlajar. Ingetlah, tujunta eme nampati kalak si erlajar e gelah maju secara rohani.

17-18. Kai nge si perlu ipertimbangkenndu sope ipengadindu atendu kalak si erlajar?

¹⁷ Adi kalak si erlajar Pustaka ras kam la erban perubahen, perlu iukurindu ipengadindu nge pelajaren e ntah lang. Sope erban keputusen, perlu ipertimbangkenndu kengasupen si erlajar e. Lit piga-piga kalak ndekah maka banci maju. Cuba ukurindu: ‘Menurut keadanna, ibanna nge perubahen si masuk akal?’ ‘Mulai nge idalankenna  kai si ipelajarina?’ (Mat. 28:20) Aminna pe ndekah, arusna kalak si erlajar terus erban perubahen.

¹⁸ Kai si arus silakoken adi kalak si erlajar Pustaka nggo ndekah erlajar tapi la iergaina kai si ipelajarina e? Cuba bayangkenndu enda: Kalak si erlajar Pustaka ras kam nggo dung ipelajarina buku Nina Pustaka, janah banci saja nggo ka mulai ipelajarina buku Tetap Ikelengi Dibata. Tapi, lenga pernah ia reh ku perpulungen janah lenga ka pernah reh ku acara Peringeten. Rusur ka ibatalkenna erlajar perban alasen-alasen sepele. Adi bage, cubalah terus terang kam ngerana ras ia. *

19. Kai si banci ikatakenndu man kalak si la ngergai kai si ipelajarina? Janah arah jawapenna, kai si perlu ipertimbangkenndu?

¹⁹ Tangtangna banci sungkunndu ia, “Kai nge si erbanca maka mesera iakapndu jadi Saksi Jahwe?” Banci saja nina, “Situhuna la ateku jadi Saksi Jahwe, saja meriah kuakap erlajar.” Adi sempat bage nina padahal ia nggo ndekah erlajar, padin pengadindu saja ia erlajar. Tapi, penungkunenndu e pe banci erban ia terus terang nceritaken kai nge si erbanca maka lalap lenga banna perubahen. Misalna, banci saja mesera iakapna erberita arah rumah ku rumah. Kenca itehndu uga perasanna, banci tehndu uga carana nampati ia.

20. Kai si banci sipelajari arah Perbahanen Rasul-Rasul 13:48 i bas erban keputusen kerna mpengadi ntah lang kalak si erlajar?

²⁰ Si sedihna, lit piga-piga si erlajar bali bagi kalak Israel bas jaman Esekiel. Perdiateken kai si ikataken Jahwe man Esekiel kerna kalak e, “Kam bali akapna ras sekalak perkolong-kolong si mejile sorana rende, ngendeken ende-enden ate ngena, janah beluh ka pe ngkuit kulcapi. Ibegina kerina katandu, tapi sada kal pe la iikutkenna.” (Esek. 33:32) Banci saja la siakap ntabeh mpengadisa ia erlajar. Tapi ingetlah, “waktuna kentisik nari ngenca.” (1 Kor. 7:29) La kita nggit mpekeri waktuta nampati kalak si la maju. Ateta ndarami kalak si “pusuh ras perbahanenna ngaloken kebenaren guna kegeluhen si rasa lalap.”​—Baca Perbahanen Rasul-Rasul 13:48.

21. Kai ayat tahunenta bas tahun 2020? Janah ngkai maka e cocok?

²¹ Ayat tahunen 2020 banci nampati kita ngukuri uga carana gelah reh beluhna kita ‘erban murid.’ Emaka, mbera-mbera lalap siinget kata-kata Jesus i bas perjumpan si penting i das deleng i Galilea: ‘Laweslah, banlah kalak jadi murid-muridku, peridikenlah kalak e.’​—Mat. 28:19.