1-2. Nji txani atxi vavasikati va nga gelwa ngu ngelozi? Ene Jesu apune a va gete txani?

I MIXO ya 16 ka Nisan wa 33 E.C. Ngu dikhodho, vavasikati ava va thavako Txizimu va teka nzila yawe yo ya dithithani aha ku nga ti vekilwe Mkoma Jesu Kristu. Se ku ti pindile ditshiku ni hafu a di vekilwe. Vona va ti lava ku ya thela mafura ka mmidi wakwe, se mbimo yi va nga hoka va xamate ngutu ngu kuwona to dithitha i ti diphanga! Se va to wona ngelozi, yi va gela ti to Jesu a wusilwe ka vakufa, yi tshumela yi txi kha yona: “Kambe a na mi thangela kuya Galileya. Mi na ya mu wonela kona.”—Mat. 28:1-7; Luka 23:56; 24:10.

² Mbimo yi vavasikati va nga khukha dithithani, Jesu apune a va yete eya va gela tiya: “Tsulani mi ya gela vanathu ti to ve tsula Galileya, va na ya ni wonela kona.” (Mat. 28:10) Ahawa, txo khata atxi Jesu a txi mahako msana ka kuwuswa kwakwe, ngu e manana ni vagondiswa vakwe ti to e va ninga sileletelo sa lisima!

3-4. Ngu kutxani hi txi womba to txirumo atxi txi ku ka Matewu 28:19, 20 txi si ningwi vapostoli dwe? (Wona mfota wa kapa.)

³ Lera Matewu 28:16-20. Mbimo yi Jesu a nga manana ni vagondiswa vakwe Galileya, ene a va gete ngu mthumo wa lisima awu va nga ti fanete ve wu maha ngu mbimo yoneyo, i ku wona wu hi wu mahako ni nyamsi. Jesu a ti khene: “Ngu toneto tsulani mi txi ya phindula vamatiko votshe ve maha vagondiswa vangu, . . . mi txi va gondisa kuvekisa totshe tiya ni nga mi leleta tona.”

 ⁴ Jesu a lava ti to vagondiswa vakwe ve txhumayela. Txirumo txiya kha txi gela 11 wa vapostoli vakwe vo thembeka basi. Hi ti zivisa kutxani? Ina mbimo yi Jesu a nga womba txirumo txo ya maha vagondiswa, va di mmangoni ka Galileya ku ti ko va ni vapostoli dwe? Khumbula ati ngelozi yi nga gela vale vavasikati: “Mi na ya mu wonela [Galileya].” Se vavasikati vo thembeka va ti fanete ku va ho ka mtshangano wonewo. Kambe hi nga toneto dwe. Mpostoli Paulo a kombisa ti to Jesu “a ti wonekisile ka vanathu vo pinda mtxhanu wa mazana, ngu txikhati tximwetxo.” (1 Vak. 15:6) A ti wonekisile hani?

5. Ngu sihi sivangelo so kholwa ti to 1 Vakorinto 15:6 yi kombetela ka mtshangano wa Galileya awu wu nga wombwa ka Matewu 28?

⁵ Hi ni txivangelo txo pfala txo pimisa ti to Paulo a ti pimisa dona ditshiku dile da Galileya di ku ka Matewu 28. Ngu kutxani? Txo khata, wungi wa vagondiswa va Jesu va ti zumba Galileya. Se ka mmango wa Galileya, hahanze ka mti wo kari wa Jerusalema, ti ndi na hehuka kutshangana vathu vo tala. Txa wumbidi, msana ka ku va a di wusilwe, Jesu se a ti mananile ni vapostoli vakwe va 11 ka mti wo kari wa Jerusalema. Itiku Jesu a txo lava kuruma vapostoli vakwe dwe kumaha vagondiswa, nga a di va gete kona Jerusalema, i si nga kugela vona ni vale vavasikati ni vamwani ti to ve ya tshangana Galileya.—Luka 24:33, 36.

6. Matewu 28:20 yi ti kombisisa kutxani ti to txirumo txa Jesu txa thuma ni nyamsi? Vathu va txi engisisa kutxani txirumo txonetxo?

⁶ Wona sivangelo siraru sa lisima. Txirumo txa Jesu txo maha vagondiswa txi si gwiteli ka Makristu aya ma nga ti hanya ngu mbimo yoneyo. Hi ti zivisa kutxani? Mapswi o gwita a txirumo txonetxo ngu awa: “Ni ni nanu yotshe mbimo kala kugumani ka mafu.” (Mat. 28:20) Nga ha Jesu a nga womba ngu kona, konkuwa ku ni vathu vo tala ava va mahako vagondiswa. Alakanya ngu tiya! Kona mu ka 300.000 wa vathu va bhabhatiswa dilembe ni dilembe kota Tifakazi ta Jehovha se ve maha vagondiswa va Jesu. Eto ngu ditshuri ta xamalisa!

7. Hi na bhula ngu txani? Ngu kutxani?

⁷ Kutala ka va va gondako Bhiblia va txitxa ve za ve bhabhatiswa. Kambe ku ni vamwani vo va thava ku va vagondiswa. Va gonda kambe kha va mahi txilo ti to ve bhabhatiswa. U txi gondela m’thu, ha tsaniseka ti to u navela ku m’vhuna ti to e thumisa ati a ti gondako ni ku e maha m’gondiswa wa Jesu. Ka msungo wuwa hi na bhula ngu ti to hi nga m’vhunisa kutxani awu hi gondako nayo ku e randa Jehovha ni kuthumisa ati a ti gondako. Ngu kutxani hi txi bhula ngu mhaka yoneyo? Nguko yimwani mbimo ti lava hi wona to ha leka mwendo ha simama hi gonda ni m’thu kani.

8. Ngu kutxani mbimo yimwani ti txi karata kuvhuna sigondo sathu kuranda Jehovha?

⁸ Jehovha a lava to vathu ve mthumela nguko va mu randako. Se txikongomelo txathu ngu vhuna wu hi gondako nayo e pfisisa to Jehovha wa khatala ngutu ngu ngene ni ku wa mu randa ngutu. Hi lava ti to e wona Jehovha kota “tate wa sikulungu ni mvhikeli wa tinoni.” (Mas. 68:5) Mbimo yi ava u gondako navo va wonako lirando la Txizimu kwawe, va na khata ku txi randa ni vona. Vamwani ti nga va nemelela kuwona Jehovha kota Tate nguko vatate vawe vo va veleka va nga mbi va kombisa lirando. (2 Tim. 3:1, 3) Se mbimo yi u tsimbitisako txigondo, junyatisa tifanelo to tsakisa ta Jehovha. Vhuna va u gondako navo ve pfisisa ti to Txizimu txathu txa lirando txi lava ku va ninga wutomi wo mbi guma, ni ku  txi emete ku va vhuna ve za ve ti kota kumana wutomi. Hi nga maha txani timwani?

9-10. Ngu yahi mabhuku aya hi ma thumiselako kutsimbitisa sigondo ngu ona? Ngu kutxani?

⁹ Thumisa mabhuku aya ma ku “Bhiblia yi nga hi gondisa txani?” ni “Continue a Amar a Deus.” Mabhuku onewo ma mahetwe ku hi vhuna kuhokelela timbilu ta va hi gondako navo Bhiblia. Ngu txikombiso, ndima 1 ya dibhuku di di ku Yi nga hi gondisa yi xamula siwotiso siya: Ina Txizimu txa khatala ngu vathu?, Txizimu txi ti pfisa kutxani mbimo yi hi xanisekako?, ni txi txi ku Ina ti nga koteka ti to u va mngana wa Jehovha? Se adi di ku Continue a Amar a Deus ko? Dibhuku donedo di na va vhuna kupfisisa nzila yo thumisa matshina a milayo ya Bhiblia ni kutshukwatisa wutomi wawe ni ku ve tshuketa hafuhi ni Jehovha. Hambi se u di gondile ni vamwani mabhuku onewo, khateta u lulamisela kwati u txi lava ku ya gonda ni mmwani, u na wonisisa silaveko sa txigondo txako.

¹⁰ Hambi keto, alakanya ngako awu u gondako nayo a txi thuka e tsakiswa ngu  mhaka yo kari ayi yi ku ka dibhuku adi di nga mbi patwa ka Farameti yo Gondisa. U nga mkuzeta ku ya tilerela dibhuku donedo se awe u simama u tsimbitisa gondo ngu mabhuku aya ma nga wombwa msana.

11. Hi nga khata kumaha mkombelo hi txi gonda ni m’thu mbimo muni? Ni ku hi nga khatisa kutxani?

¹¹ Khata gondo ngu mkombelo. Ndinene kukuluveta mi khata kutula ni kuvhala gondo ngu mkombelo, ngu mtolovelo ka mavhiki o khata kutsimbitisa txigondo. Ti lava hi vhuna wu hi mu gondelako e pfisisa to kha na ku sikota kupfisisa Bhiblia na a sa vhunwa ngu moya wa Txizimu. Vahuweleli vamwani va khata mhaka ya mkombelo ngu kulera Jakobe 1:5, ayi yi ku khene: “Se ngako mmweyo wanu a txi pwata wutxhari a na wu kombele ka Txizimu.” Se muhuweleli a nga wotisa txigondo, “Hi nga wu kombelisa kutxani wuzivi wa Txizimu?” Txigondo txi na tekela kutumela to hi fanete hi maha mkombelo ka Txizimu.

12. Ngu kuthumisa Masalmo 139:2-4 u nga txi vhunisa kutxani txigondo txako ti to txi tshukwatisa mikombelo ya txona?

¹² Gondisa txigondo txako kumaha mkombelo. Tsanisekisa txigondo txako to Jehovha wa ti lava kuengisa mikombelo ya txona yo khukhela mbiluni. Mtxhamuseli ti to ka mikombelo yathu ya txihunjani, hi nga gela Jehovha ta mbiluni kwathu, to nem hi nge geli m’thu. Phela Jehovha wa ti wona ta mbiluni kwathu. (Lera Masalmo 139:2-4.) Hi nga kuzeta txigondo txathu to txi kombela Jehovha e txi vhuna kuleka mialakanyo ni simaho so biha. Ngu txikombiso, ti nga maha m’thu a txi dhunda mibuso ayi yi si faneliko ka Makristu. Ene wa tiziva ti to ti bihile, kambe a ngadi a txi mahanyana ta tidotho ka ona masiku ale. Mkuzete kugela Jehovha ati a ti pfisako tona ni ku mu kombela e m’vhuna kuranda ati ti dhundwako ngu Jehovha dwe.—Mas. 97:10.

13. a) Ngu kutxani hi di fanete hi kuluveta kuramba sigondo sathu mitshanganoni? b) Hi nga mahisa kutxani ti to txigondo txi si thavi mitshanganoni?

¹³ U nga swele kuramba txigondo txako mitshanganoni. Ati txigondo txako txi nga tipfako mitshanganoni, ti nga txi kuzeta kuthumela Jehovha ni ku txi vhuna kukula ngu didhawa da moya. Mkombe vhidhiyo yi yi ku Kumahwa txani Nyumbani ya Mfumo?, se ngu manza mambidi m’rambe ku mi tsula motshe. Loko ti txi koteka, mthembise ku ya mu teka. Ndinene kuramba vahuweleli vo hambana-hambana u tsula navo ka txigondo txako. Toneto ti na maha to txigondo txi zivana ni vamwani dibanzani, ni ku txi na mbi thava mbimo yi txi ku mitshanganoni.

14. Nji txani txi no kuzeta txigondo txathu kukula ngu didhawa da moya?

¹⁴ Txikongomelo txathu ngu vhuna txigondo txathu txi kula ngu didhawa da moya. (Vaef. 4:13) Ngako m’thu a txi tumela kugonda Bhiblia, ti nga maha a txi tsakela to gondo yi m’vhuna. Kambe mbimo yi a yako a txi randa Jehovha, a na khata kualakanya nguko a nga va vhunisa kutxani vamwani, kupata ni va se i ku siro sa dibanza. (Mat. 22:37-39) Ngako mkhanjo wu txi tuleka, u nga leke ku m’gela ngu lungelo yo seketela Mfumo ngu miningelo.

15. U nga txi vhunisa kutxani txigondo txako ti to txi xamula kwati ngako ku txi humelela txikarato?

¹⁵ Gondisa txigondo txako nzila yo lulamisa txikarato ngako txi txi humelela. Ngu txikombiso, ti nga maha txigondo txako mwendo muhuweleli wu a nga mbi bhabhatiswa e kugela to a henyisilwe ngu mwanathu dibanzani. Hahanze ko mu gela to i mani a ku ni mnando, u fanete ku mu txhamusela ati Bhiblia yi ti wombako ngu mhaka yoneyo. Ene a nga mu  divalela mwanathu mwendo kudivala mhaka yoneyo. Se ngako a si lavi kuleka mhaka yi pinda, a nga womba-womba nayo ngu wunene ni ngu lirando ngu txikongomelo txo ‘hanyisa mwananu.’ (Fananisa ni Matewu 18:15.) M’vhune ti to e ti lulamisela ati a no ya womba. M’kombe kuthumisa JW Library^®, Guia de Pesquisa para Testemunhas de Jeová, ni jw.org^® kasi ku e gonda tinzila ti a nga ti thumisako kasi kuwonisana ni txiemo txo nga toneto. A txi ziva tinzila toneto na a si se bhabhatiswa, ti na m’vhuna ti to eva ni wuxaka wa wunene ni vanathu dibanzani ni loko se a di bhabhatisilwe.

16. Ngu kutxani i di ta tinene kuramba vamwani u txi ya tsimbitisa txigondo?

¹⁶ U txi ya tsimbitisa txigondo, ramba vahuweleli vamwani va dibanzani mwendo muwoneleli wa txigava a txi mi endela. Ngu mhaka muni? Kuengetela ka ti ti nga wombwa msana, vahuweleli vamwani ti nga maha ve sikota kuvhuna txigondo txako ka ti awe u tandekako. Ngu txikombiso, he mahi nga txigondo txako txi zama kuleka kudhaha, kambe txa tandeka makhambi o tala. U nga ramba awu nene a nga khala kuhumelelwa ngu to fana na a txi ngadi a txi gonda ditshuri. Ti nga maha muhuweleli eneyo e ningela sialakanyiso asi si lavekako ti to si vhuna txigondo txako. Ngako u txi thava kutsimbitisa txigondo u di ni mwanathu awu a ku ni wusikoti ngutu, kombela ene ti to e tsimbitisa. Ngako u txi ramba vamwani u txi ya tsimbitisa txigondo, awu u gondako nayo a nga wuyelwa ngutu ngu wusikoti wawe. U nga divali, txikongomelo txathu ngu vhuna awu hi gondako nayo ti to e kula ngu didhawa da moya.

17-18. U fanete u alakanya ngu txani mbimo yi u mahako txisungo txo emisa gondo?

¹⁷ Ngako txigondo txako txi si txitxi mahanyelo, ti nga maha u ti wotisa tiya: ‘Ina ni fanete kuema kutsimbitisa txigondo? Na u si se maha txisungo, u fanete u alakanya ngu wusikoti wa m’thu ni m’thu. Hambiku vamwani va si sweliko kutxitxa wutomi wawe, vamwani va swela. Tiwotisi tiya: ‘Ina txigondo txangu txa txitxa ngu kuya ngu txiemo txa txona?’ ‘Ina txi khatile “kuxayisa” mwendo kuthumisa ati txi ti gondako?’ (Mat. 28:20) Ti nga teka mbimo ti to m’thu e maha mgondiswa. Kambe ene a fanete e txitxa wutomi wakwe kudotho-kudotho.

¹⁸ Hi nga maha txani ngako ku txi pinda mbimo hi txi gonda ni m’thu kambe a si kombisi ti to gondo yi ni lisima kwakwe? Wona mhaka yiya: Txigondo txako se txi hetile dibhuku di di ku Ati yi hi gondisako, ti nga maha adi khatile dile da Continue a Amar a Deus, kambe kha khali kukanda mitshanganoni, nem hambi ka Txialakanyiso! Futhi wa thuka a si gondi ngu sivangelo so mbi pfisiseka. Ti di zumbisile  tiya, u nga jika-jiki, bhula ni txigondo txako. *

19. U nga maha txani ka m’thu awu a wonekako nga kha yi ningi lisima gondo ya Bhiblia? U fanete u alakanyisisa ngu txani?

¹⁹ U nga khata ngu ku m’wotisa tiya: “U wona to nji txani txi nga kuvhalelako ku u va Fakazi ya Jehovha?” Ti nga maha txigondo txi womba tiya: ‘Na tsaka ngu kugonda, kambe kha ni na mbi za ni di mahile Fakazi ya Jehovha!’ A txi mahisa eto msana ko va ku di pindile mbimo yo kari a txi gonda, i tshuku mi ema. Hambi keto, ti nga maha txigondo txako txi womba txivangelo txa kona. Ngu txikombiso, ti nga maheka a txi thava kutsimbila ngu mti ni mti e txhumayela. U txi ziva sivangelo sa kona, ti na kuhehukela ku m’vhuna.

20. Dibhuku da Mithumo 13:48 di hi vhunisa kutxani kuwona to i mani wu hi no simama hi gonda nayo?

²⁰ Dikhombo da kona, sigondo simwani si fana ni Vaisrayeli va mbimo ya Ezekhiyele. Wona ati Jehovha a nga gela Ezekhiyele ngu vona: “Se wona taku, kwawe u fana ni ndando ya lirando, ndando ya wule a ku ni dipswi do pfisiseka, a tshambiselako di txi kugwesa; nguko va ma pfa mapswi ako, aniko kha ma thumi ta txilo.” (Eze. 33:32) Ti nga thuka ti hi karatela kugela m’thu ti to gondo yi na ema. Hambi keto, “txikhati txi komile.” (1 Vak. 7:29) Hahanze ko heta mbimo yo tala hi txi tsimbitisa txigondo atxi txi si vekiko mihando, ti lava hi ya ka va va kombisako ti to va ni “fanelo ya wutomi wo mbi guma.”—Lera Mithumo 13:48.

21. Yi khene txani ndimana yathu ya dilembe ya 2020? Yi na hi vhuna kumaha txani?

²¹ Ka dilembe da 2020, ndimana yathu ya dilembe yi na hi vhuna kuzama kutshukwatisa wusikoti wathu wo maha vagondiswa. Yona, nja mapswi aya Jesu a nga ma womba mbimo yi a nga ti womba-womba a di mmangoni ka Galileya a txi khene: “Ngu toneto, tsulani mi txi ya . . . , maha vagondiswa vangu, mi va bhabhatisa.”—Mat. 28:19.