1-2. Ni enki eki marayika yagambire abakazi aha kituro ca Yesu, kandi shi Yesu we akabagambira kukora ki?

HATI turi omu kasheshe, aha biro 16 Nisani omu mwaka gwa 33 B.Y. Abakazi abari kutina Ruhanga, bine obusaasi bwingi, baza aha kituro eki Yesu Kristo yaba azikirwemu; hati hahwa amashaha gari kukira ahari 36. Bahika aha kituro bari kwenda kusiga omutumbi gwa Yesu amajuta, konka bashanga kirimu busha! Marayika yagambira abo bakazi ku Yesu azokire omu bafire, kandi yayongeraho ati: ‘Nayija kubabandiza Galilaaya. Oko ni yo muramurebe.’—Mat 28:1-7; Luka 23:56; 24:10.

² Abakazi ku baruga aha kituro, Yesu yabahika hihi rero yabagambira ati: ‘Mugende, mugambire bagenzi bange baze Galilaaya, oko ni yo barandebere.’ (Mat 28:10) Nikirebeka Yesu ayine obuhabuzi bw’omugasho obu ari kwenda kuha abegi beye, ni yo nshonga yabanza kukora entebekanisa y’okubugana abegi beye bwanyima y’okuzoka!

3-4. Ahabw’enki turi kugira ngu ekiragiro ekiri omuri Matayo 28:19, 20 tikirahirwe entumwa za Yesu kusha? (Reba ekishushani aha kishembeso.)

³ Shoma omuri Matayo 28:16-20. Aha ruterane oru Yesu yagizire n’abegi beye, akabagambira omurimo ogu babire barije kukora kandi ni go murimo ogu turi kukora n’erizoba. Akagira ati: ‘Ni ahabw’eco mugende omu mahanga gona, muhindure abantu abegi, nimubegesa korobera byona ebi nabaragire.’

⁴ Yesu nayenda ngu abakurasi beye bona baburire. Ogu murimo taraguhire entumwa zeye 11 eziri kwesigwa  kusha. Eco nitukimanya tuta? Konka shi, entumwa zeye ni bo bonka abu yahire ekiragiro c’okuhindura abantu abegi? Yijuka eki marayika yagambire abakazi: ‘Nimwija kumureba omuri Galilaaya.’ Nikirebeka, abakazi b’abesigwa na bo bakaba bari aha ruterane. Konka eco tico conka. Entumwa Paulo akagamba ku Yesu ‘yayeyorekire hamwe abishemwe abari kukira 500.’ (1 Kor. 15:6) Nkahe?

5. Ni enki eki turi kwegera omu bigambo ebiri omu 1 Bakorinso 15:6?

⁵ Twine enshonga zihikire z’okutekateka ngu Paulo akaba ari kugamba aha ruterane rw’omuri Galilaaya oruri kugambwa omuri Matayo ekicweka ca 28. Ni ziha nshonga? Ey’okubanza, abegi ba Yesu abingi bakaba bari ab’omuri Galilaaya. Obwe rero omushozi gwa Galilaaya hatari omu nju y’omuri Yerusaalemu gukaba guri omwanya murungi g’okuteraniramu abantu bingi. Eya kabiri, Yesu ku yaherize kuzoka akabugana abegi beye omu nju omuri Yerusalemu. Kuri Yesu yabire ari kwenda kugambira abegi beye bonka kuburira n’okuhindura abantu abegi, akaba arakibagambirire omuri Yerusalemu omu mwanya g’okugambira abakazi n’abandi bantu ngu babuganire Galilaaya.—Luka 24:33, 36.

6. Ebigambo ebiri omuri Matayo 28:20 nibyereka bita ku ekiragiro c’okuhindura abantu abegi kiri kutukwataho n’omuri obu bwire, kandi shi ni bata oku abantu bari kucorobera?

⁶ Yetegereze endijo nshonga ya kashatu. Ekiragiro c’okuhindura abantu abegi, Yesu tarakihire Abakristo b’omu kinyigana c’okubanza bonka. Eco nitukimanya tuta? Yesu akahendera obuhabuzi obu yahire abakurasi beye n’ebigambo ebiri kugira ngu: ‘Ndi hamwe nimwe ebiro byona okuhisya obu ensi egi erihwaho.’ (Mat 28:20) Nk’oku Yesu yakigambire, abantu bingi nibahindura abantu abegi omuri obu bwire. Kitekatekeho! Abantu abari kuhika aha 300,000 nibabatizibwa buri mwaka baba Abahamya ba Yehova kandi na bo baba abegi ba Yesu Kristo!

7. Ni enki eki twaza kushwijuma, kandi ahabw’enki?

⁷ Abantu bingi abari kwega Bibuli nibakura bahika aha kubatizibwa. Konka, nikirebeka ku abamwe abari kwega n’itwe Bibuli bari kuremwa kugira entunguka. Nibakunda kwega, konka batina kubatizibwa. Twena abine abegi ba Bibuli, nituba turi kwenda kubakwasa kuta omu bikorwa ebi bari kwega ngu na bo babe abakurasi ba Kristo. Omuri eki kicweka twaza kushwijuma ebi turi kubasa kukora ngu tuhike abegi aha mutima, n’oku turi kubasa kubakwasa kukura omu by’omwika. Ahabw’enki tushemerire kukegaho? Ahabw’okuba hine obu turi kusharamu kureka kumwegesa.

8. Ahabw’enki kiri kubasa kutugumira kuhika abegi bitu aha mutima?

⁸ Yehova nayenda ngu abantu bamuhereze ahabwa rukundo eyi bamwinire. Obwe rero, entego yitu ni okwereka abegi bitu ku Yehova ari kubafaho buri omwe, kandi ku nabakundira kimwe. Nituba turi kwenda kubakwasa kumanya ku Yehova ari ‘Ishe w’efuzi kandi omucwi w’emanja w’abafakazi.’ (Zab 68:5) Abegi bawe ku bari kureba oku Ruhanga ari kubakunda, nikibakora aha mutima kituma na bo bakizaho kumukunda. Hine obu abegi abamwe kiri kubagumira kureba Yehova nk’omuzire oyine rukundo ahabw’okuba abazire babo tibaraberekire rukundo eya buzima. (2 Tim 3:1, 3) Waba ori kwegesa Bibuli, gamba aha mitwarize ya Yehova kandi oyisindagirize.  Kwasa abegi bawe kumanya ku Ruhanga ari kwenda ngu batunge amagara agatahwaho, kandi ku ari kuba ayetegwire kubakwasa. Ni enki ekindi eki turi kubasa kukora?

9-10. Ni biha bitabo ebi turi kukoresa omu kwegesa abantu Bibuli, kandi ahabw’enki?

⁹ Koresa ebitabo “Bibuli netwegesa ki?” na “Mwerindire omu Kukunda kwa Ruhanga.” Ebi bitabo bikahandikwa kugira ngu bitukwase kuhika abegi bitu aha mutima. Ecokureberaho: Omu kicweka c’okubanza c’omu kitabo Bibuli netwegesa ki, nikigarukamu ebi bibuzo: Mbehi Ruhanga natufaho ninga ni ensharizi?, Ruhanga nayehurira ata yareba abantu bari kubonabona?, n’ekiri kugira ngu: Mbehi nobasa kuba munywani wa Yehova? Kandi shi ekitabo Okukunda kwa Ruhanga? Nikikwasa omwegi kushoborokerwa ku okugendera aha misinge ya Bibuli kiri kutuma yabaho ashemerirwe kandi akagira obunywani burungi na Yehova. N’obu orabe wayegire ebyo bitabo byona n’abandi, guma otebekanise ge waza kwegesa omwegi,  kandi otekateke munonga aha bi ari kwetenga.

¹⁰ Ni enki eki ori kubasa kukora, omwegi wawe yakubuza ekibuzo konka kiri omu kindi kitabo eki tutari kwegesezamu Bibuli? Nobasa kumushaba kweshomesa eco kitabo, rero mugumizamu kwegera omu bitabo ebi turi kwegesezamu Bibuli ebi twaba twagambireho.

11. Ni ryari obu tushemerire kutandika kandi tukahendera n’okushaba twaba turi kwegesa, kandi shi ni bata oku turi kubasa koreka omwegi omugasho g’okushaba?

¹¹ Tandika ecegeso n’okushaba. Ni ec’omugasho munonga, kutandika kandi tukahendera n’okushaba, hatakahwire obwire buringwa tutandikire kwega. Tushemerire kwereka abegi bitu ku omwika oguri kwera ari go gurabakwase kushoborocerwa Ekigambo ca Ruhanga. Ababurizi abamwe nibashobororera abegi omugasho g’okushaba bari kubashomera omuri Yakobo 1:5, ahari kugira ngu: ‘Konka omuri imwe ku harabe harimu obuzirwe obwenge abushabe Ruhanga.’ Bwanyima omwegesa nabuza omwegi ngu: “Ni bata oku ori kubasa kushaba Ruhanga obwenge?” Omwegi nahika ari kumugaruka ku ni okushaba Ruhanga.

12. Ni bata oku ori kubasa kukoresa Zaaburi ya 139:2-4 ngu okwase omwegi wawe kumanya kushaba?

¹² Yegesa omwegi kushaba. Muhamize ku Ruhanga ari kwenda kuhurira eshara zeye ezirugire aha mutima. Mushobororere ku turi kubasa kugambira Yehova byona ebituri aha mutima; tumugambira enyehurira zitu ezi tutari kubasa kugambira ondijo muntu wena. Ijuka ku Yehova ari kumanya ebitekateko byitu. (Shoma omuri Zaaburi ya 139:2-4.) Nambwenu nitubasa kuhiga abegi bitu kushaba Ruhanga ngu abakwase kuhindura emitekatecere yabo etahikire n’okureka ebintu bibi. Reka tugambe ngu omwegi omazire obwire ari kwega acayekwatanisa omu biro bikuru ebyine obukomoko omu bapagani. Namanya ku kitahikire, konka nabwe acabikunzire! Muhige kubigambira Yehova atabimusherekire kandi amushabe amani g’okukora ebi ari kukunda.—Zab 97:10.

13. (a) Ahabw’enki tushemerire kweta abegi kwija omu nterane juba? (b) Ni enki eki turi kubasa kukora ngu omwegi ahurire atine obwoba yayija omu nterane?

¹³ Yeta omwegi wawe kwija omu nterane juba. Ebi omwegi wawe ari kwerebera kandi akahurira omu nterane nibimukwata aha mutima kandi bituma yakizaho kwenda kukorera Yehova. Mwereke Vidiyo eri kugira ngu Omu nju y’Abahamya ba Yehova nihakorerwamu enki?, bwanyima omwete mugende hamwe. Caba kiri kubasika, omukwatire emotoka. Ni kirungi kweta ababurizi abatari bamwe ngu mwegese omwegi wawe muri hamwe. Ku orakikore basyoya omwegi wawe namanyira abandi b’omu kibina kandi ku arije omu nterane nahurira atine obwoba.

14. Ni enki ekiri kukwasa omwegi kukura omu by’omwika?

¹⁴ Entego yitu ni okukwasa omwegi ngu atunguke omu by’omwika. (Efe 4:13) Omuntu yayikiriza kwega Bibuli naba ari kwenda ngu emukwase we aha bweye. Konka oku ari kukizaho kukunda Yehova, ni ko ari kutandika kutekateka oku ari kubasa kukwasa abandi, harimu n’abari omu kibina. (Mat 22:37-39) Kandi twareba buri obwire burungi, otatina kugambira omwegi eby’okuha esente z’okushagika Obukama.

15. Ni bata oku turi kubasa kukwasa omwegi okugarukamu ge hagira owamugwisa kubi?

 ¹⁵ Yegesa omwegi eki ari kubasa kukora yabugana ebizibu. Reka tugire ngu oyine omwegi otakabatizibwe rero yakugira ngu hine omugwisize kubi omu kibina. Omu mwanya g’okumugambira oshobize, nobasa kumwereka eki Bibuli eri kugamba eki ashemerire kukora. Nabasa kusasira ogo mwenetata ninga amuhika omu muringo gwa rukundo ayine entego y’‘okubona mwenishe.’ (Geranisa n’ebiri omuri Matayo 18:15.) Kwasa omwegi wawe kubanza yatebekanisa ebi arije kugamba. Omwereke oku ari kubasa kukoresa JW Library^®, ekitabo c’okucondozamu n’orubuga rwa jw.org^®, omukwase kutunga ebi ari kubasa kukora yahikwaho embera zigumire. Oku oramumanyize atakabatizibwe, ni ko arije kutura hamwe n’abandi omu kibina omu businge, na bwanyima y’okubatizibwa.

16. Ahabw’enki kiri kirungi kweta abandi baburizi ngu mugende hamwe kwegesa omwegi wawe?

¹⁶ Yeta abandi b’omu kibina ninga omureberezi ori kutayayira ebibina yaba abatayayire, mugende hamwe kwegesa omwegi. Ahabw’enki? Ahabw’okuba abandi baburizi nibabasa kuha omwegi wawe obuhabuzi obu iwe ori kuba otakamuhire. Reka tugire ngu omwegi wawe akagezaho kureka kuresa konka yaremwa. Nobasa kweta ondijo mwenetata owabugine ezo mbera kandi akazisingura kugira ngu muze kumwegesa muri hamwe. Omuburizi mugenzi wawe nabasa kumuha obuhabuzi obu ari kwenda kuhurira. Waba otari kubasa kwegesa omwegi hariho mwenetata omanyirire, nobasa kumushaba abe ni we owayegesa. Wakora basyoya omwegi wawe nakizaho kugasirwa n’obuhabuzi bw’abandi. Yijuka ngu, entego yitu ni okukwasa omwegi kutunguka.

17-18. Ni enki eki oshemerire kutekatekaho otakemerize omwegi wa Bibuli?

¹⁷ Omwegi wawe yaba atari kutunguka, hine obu ori kubasa kwebuza ngu, ‘Mbehi nshemerire kureka kumwegesa?’ Otakakikozire, banza otekateke aha bushoborozi bw’omwegi wawe. Abamwe nibabasa kumara obwire buringwa batakatungukire konka abandi batunguka juba. Yebuze ngu: ‘Mbehi omwegi wange ari kwereka ku natunguka mporampora?’ ‘Mbehi yatandikire kuta omu nkora ebi ari kwega?’ (Mat 28:20) Omwegi nabasa kumara obwire buringwa atakatungukire, konka nabwo ashemerire kuba ari kukora empinduka.

¹⁸ Ni enki eki turi kubasa kukora twayegesa omuntu obwire buringwa konka atereke ngu nasima ebi ari kwega? Reba eki cokureberaho: Reka tugire ngu omwegi wawe yamazire kwega ekitabo Bibuli netwegesa ki, nangwa yatandikire n’okwega Okukunda kwa Ruhanga, konka takijagaho omu  nterane n’obu hakuba aha Kijusyo! Nakira n’okuremwa kwega atine enshonga z’omugasho ezamuzibira. Yaba kiri kisyoya, oshemerire kuganira na we otari kumushereka. *

19. Ni enki eki oshemerire kugambira omuntu otari kugira entunguka, kandi shi ni enki eki oshemerire kubanza watekatekaho?

¹⁹ Nobasa kutandika ori kumubuza ngu: ‘Ni enki eki ori kutekateka ngu nikija kukuremesa kuba Omuhamya wa Yehova?’ Nabasa kugarukamu ngu: ‘Ninkunda ebi muri kunyegesa, konka tindi kwenda kuba Omuhamya wa Yehova!’ Yaba ni ko ari kutekateka kandi ayegire obwire buringwa, hariho enshonga eri kutuma wareka kumwegesa. Konka omwegi wawe nabasa kukugambira ekiri kutuma atatunguka. Ecokureberaho: Nabasa kuhurira atari kubasa kuburira aha nju n’enju. Ku oramanye ekiri kumuzibira, ni bwo orabase kumuyamba.

20. Ni bata oku ebiri omu Byakozirwe 13:48 biri kubasa kutukwasa kumanya yaba tushemerire kureka kwegesa omwegi?

²⁰ Ekiri kushasha ni oku abegi abamwe bari nk’Abaisraeli b’omu bwire bwa Ezekieli. Yehova akakoresa Ezekieli yabagambira ngu: ‘Kandi reba! Iwe ahari bo ori nk’ori kweshongora eceshongoro kirungi n’iraka rirungi natera ge enanga; ahabw’okuba nibahurira ebi ori kugamba, konka batari kwija kubikora.’ (Ezk 33:32) Okugambira omwegi wa Bibuli ku twaza kureka kumwegesa nikibasa kutugumira. Konka, oyijuke ku ‘hasigire ebiro bice.’ (1 Kor 7:29) Omu mwanya g’okumara obwire bwitu turi kwegesa omwegi otari kutunguka, tushemerire kuronda ondijo muntu ori kwereka ku ashemerire ‘amagara agatahwaho.’—Shoma omu Byakozirwe 13:48.

21. Ecahandikirwe c’omwaka gwa 2020 nikigamba ngu enki, kandi shi ahabw’enki kiri kukora?

²¹ Ecahandikirwe c’omwaka gwa 2020, nikija kutukwasa kuta omutima aha ku turi kubasa kuboneza omurimo gwitu g’okuhindura abantu abegi. Kirimu ebigambo ebi Yesu yagambire aha mushozi gwa Galilaaya, ebiri kugira ngu: ‘Ni ahabw’eco mugende, muhindure abantu abegi nimubabatiza.’—Mat 28:19.