1-2. Jesuh thlan ah vancungmi nih nu pawl kha zeidah a chimh hna, Jesuh nih zei bantuk lamhruainak dah a pek hna?

MAH HI AD 33, Nisan 16 zingka te ah a cangmi si. Pathian a dawmi nu cheukhat cu ngaihchia ngaiin thlan ah an kal. A luancia suimilam 36 hrawngah cuka hmun ah Bawipa Jesuh Khrih cu vui a si. Mithi ruak thuh awkah zihmui le sathau kha an i ken. Thlan an va phanh tikah thlan chungah zeihmanh an hmuh lo caah an khuaruah a har tuk. Mah tikah vancungmi nih nu pawl kha Jesuh cu thihnak in thawhter ṭhan a si cang i “Galili ram ah a rak kal chung cang; khika ah nan va hmuh lai” tiah a ti hna.—Matt. 28:1-7; Luka 23:56; 24:10.

² Nu pawl cu thlan in an kir hnuah Jesuh cu an sinah a lang i mah lamhruainak hi a pek hna: “Ka unau pawl kha Galili ah va kal u tiah va chim hna u law khika ah kan i hmu lai.” (Matt. 28:10) Jesuh nih a thawh ṭhan hnuah a hmasa bik thil a tuahmi cu a zultu pawl he i ton dingin a timhtuahmi kha a si. Mah an i tonnak ah a zultu pawl kha a biapi tukmi lamhruainak cheukhat a pek hna.

3-4. Matthai 28:19, 20 ah langhtermi nawlpeknak cu lamkaltu pawl ca lawngah a si lo tiah zeicah kan chim khawh? (A phaw hmanthlak zoh.)

³ Matthai 28:16-20 rel. Mah i tonnak ah a zultu pawl nih an tuah dingmi a biapimi rian kong kha Jesuh nih a chimh hna. Mah rian kha tuchan zongah kan ṭuan ve. Jesuh nih hitin a ti: “Cucaah khuazakip ah va kal u law miphun vialte kha ka zultu ah va ser hna u, . . . kaan fialmi vialte hna hi an zulh nakhnga va cawnpiak hna u.”

⁴ A zultu dihlak nih phungchim hna seh ti kha Jesuh nih a duh. Mah rian ṭuan awkah zumhfekmi lamkaltu 11 lawng kha  nawl a pe hna lo. Mah kha zeitindah kan hngalh khawh? Jesuh nih zultu siter dingin nawl a pek hna lioah Galili tlang ah a ummi cu lamkaltu pawl lawng an si maw? Vancungmi nih nu pawl sinah hitin a chimmi kha nan i cinken ko lai: “[Galili ah] nan va hmuh lai.” Cucaah mah lioah nu pawl zong an um ve. Asinain anmah lawng an si lo. Lamkaltu Paul nih Jesuh cu “a zultu zanga ring lo sinah khan voi khatte ah a lang” tiah a ti. (1 Kor. 15:6) Khoika ah dah?

5. Kuatkhat Korin 15:6 in zeidah kan hngalh?

⁵ Kuatkhat Korin 15:6 ah lamkaltu Paul nih a chimmi cu Matthai dal 28 ah langhtermi Galili ram ah i tonnak kong kha a cherhchanhmi a si tiah zumh awkah a ruang ṭha kan ngei. Mah cu zeidah a si? Pakhatnak, Jesuh zultu tam deuh cu Galili mi an si. Cucaah mi tampi he i ton awkah Jerusalem i pumpak an inn nakin Galili tlang ah i ton cu a fawi deuh lai. Pahnihnak, Jesuh nih a thawh ṭhan hnuah lamkaltu 11 kha Jerusalem i pumpak an inn ah a ton cang hna. Jesuh nih phungchim rian le zultu siternak rian kha lamkaltu pawl lawng fial a duh hna ahcun lamkaltu pawl, nu pawl le a dang pawl kha Galili ah si loin Jerusalem ah a ton khawh ko hna.—Luka 24:33, 36.

6. Zultu siter ding timi nawlpeknak cu tuchan he zong aa pehtlai ti kha Matthai 28:20 nih zeitindah a langhter, atu ah mi pawl nih mah nawlpeknak kha zeitindah an zulh?

⁶ A biapimi a kong pathumnak hi i cinken. Zultu siter ding timi Jesuh nawlpeknak cu kumzabu pakhatnak i Khrihfa hna ca lawngah a si lo ti kha zeitindah kan hngalh khawh? Jesuh nih a zultu pawl lamhruainak a pekmi hna kha mah bia in a donghter: “Nan sinah a zungzal in, caan dongh tiangin ka um lai.” (Matt. 28:20) Jesuh nih a chim bantukin atu ah mi tampi nih zultu siternak rian kha an ṭuan. Mah hi ruathmanh. Kum fatin mi 300,000 dengmang cu Jesuh zultu an hung si, tipil an ing i Jehovah Tehte an hung si. Mah cu khuaruahhar taktak a si.

7. Atu ah zei kong dah kan i ruah hna lai, zeicah?

⁷ Baibal a cawngmi mi tampi cu an ṭhangcho i tipil an ing. Asinain kanmah he hmaan tein Baibal a cawngmi cheukhat cu zultu si awkah a ṭihmi an lo men lai. Baibal cawnnak ah an i nuam nain tipil in awkah an ṭhangcho lo. Baibal cawnpiaknak a tuahmi na si ahcun na cawnpiakmi nih a hngalhmi a zulh nakhnga le Khrih zultu a hung si nakhnga bawmh na duh lai ti kha kan zumh. Hi capar ah Baibal kan cawnpiakmi kha Jehovah dawt awk le ṭhancho awkah zeitindah kan bawmh khawh timi kong kan i ruah hna lai. Mah kong kha zeicah kan i ruah a herh? Zeicahtiah a caan ah Baibal kan cawnpiak rih lai maw asiloah kan ngol lai dah ti kha biakhiahnak kan tuah a hau men lai.

8. A caan ah Baibal kan cawnpiakmi hna kha Jehovah dawt awkah bawmh cu zeicah a har?

⁸ Mi nih amah an dawt caah an biakmi kha Jehovah nih a duh. Cucaah kan hmuitinh cu Jehovah nih pumpak pakhat cio kha a zohkhenh hna i a dawt tuk hna ti kha Baibal kan cawnpiakmi hna nih an hngalhthiam nakhnga bawmh kha a si. “Ngakṭah le nuhmei” nih Jehovah kha an pa bantukin hmuh awkah bawmh kan duh hna. (Salm 68:5) Baibal na cawnpiakmi hna nih Pathian nih zeitluk in dah a dawt hna ti kha an hngalh tikah anmah zong nih Pathian kha an hun dawt ve lai. Baibal na cawnpiakmi cheukhat nih Jehovah kha dawtnak a ngeimi Pa bantukin hmuh awkah an i harh men lai. Zeicahtiah an pale nih an cungah dawtnak le siaherhnak an langhter lo caah a si. (2 Tim. 3:1, 3) Baibal cawnpiaknak na tuah lioah duh a nungmi Jehovah sining hna kha a hleiin chim. Baibal na cawnpiakmi hna kha dawtnak a ngeimi Pathian nih zungzal nunnak hmuhter a duh hna ti le mah hmuitinh an  phanh khawh nakhnga anmah bawmh awkah timhcia a si ti kha hngalhthiam awkah bawm hna. Zeidah kan tuah khawh rih?

9-10. Baibal cawnpiaknak kan tuah tikah zei cauk dah kan hman awk a si, zeicah mah cauk kha kan hman awk a si?

⁹ “Baibal Nih Zeidah A Kan Cawnpiak?” timi cauk le “Pathian Dawtnak Chungah Hmunh Khawh Ning” timi cauk kha hmang. A hleiin mah cauk hna cu Baibal kan cawnpiakmi hna an lung a suk khawh nakhnga kanmah bawmhnak caah ṭialmi an si. Tahchunhnak ah, a Kan Cawnpiak timi cauk ṭhen 1nak nih mah biahalnak hna i a phi kha a langhter: Pathian nih kan zawn a kan ruat maw asiloah zaangfahnak a ngei lomi maw a si?, Harnak kan ton tikah Pathian cu zeitindah a um?, Jehovah he i hawikomh khawh a si maw? Pathian Dawtnak Chungah Hmunh Khawh Ning timi cauk he aa tlaiin tah zeitin? Mah cauk nih Baibal a cawngmi kha Baibal phunglam zulhnak nih zeitindah a nunning a ṭhanchoter khawh i Jehovah he a naihter khawh deuh ti kha hngalhthiam awkah a bawmh lai. Midang he mah cauk kha nan rak  cawn cang hmanhah na cawnpiakmi hna nih an herhmi ningin na hman khawh nakhnga Baibal na cawnpiakmi kip caah naa timhtuah a hau.

¹⁰ Baibal na cawnpiakmi nih Cawnpiaknak Hriamnam ah aa tel lomi a kong pakhat kha hngalh a duh ahcun zeidah na tuah awk a si? A Kan Cawnpiak asiloah Pathian Dawtnak timi cauk in Baibal cawnpiaknak na pehzulh khawh nakhnga mah cauk hna kha amah tein rel awkah tha na pek khawh.

11. Baibal cawnpiaknak kha thlacamnak in zeitik ah dah kan thawk awk a si, mah cu a biapimi a si ti kha hngalhthiam awkah Baibal a cawngmi kha zeitindah kan bawmh khawh?

¹¹ Thlacamnak in Baibal cawnnak kha thawk. Hmaan tein Baibal cawnpiaknak thawk cangka in a si khawh ahcun thlacamnak in thawk le donghter cu a ṭha bikmi a si. Baibal kan cawnpiakmi kha Pathian thiang thlarau bawmhnak thawng lawngin Baibal cu hngalhthiam khawh a si ti kha a hngalh nakhnga kan bawmh a hau. Baibal cawnpiaktu cheukhat nih Jeim 1:5 kha an rel i Baibal cawnnak ah zeicah thla kan cam ti kha an fianter. Hitin a ti: ‘Fimnak a baumi nan um ahcun, Pathian sinah thla cam seh.’ Mah hnuah Baibal an cawnpiakmi hna kha hitin an hal hna: “Pathian sinah fimnak kha zeitindah kan hal khawh?” Baibal a cawngmi hna zong nih Pathian sinah thla kan cam awk a si ti kha an cohlan ve ko lai.

12. Baibal a cawngmi nih Jehovah sinah zalong tein thla a cam khawh nakhnga bawmh awkah Salm 139:2-4 kha zeitindah na hman khawh?

¹² Baibal na cawnpiakmi kha thlacam ning cawnpiak. Lungthin tak tein thla a cammi kha Pathian nih theih a duh ti kha hngalhter. Pumpak thlacamnak ah midang sinah kan chim ngam lomi thil kong le kan intuarnak kong hna kha Jehovah sinah chim khawh a si ti kha chim. Jehovah nih kan lungchungah a ummi kan ruahnak cu a hngalhcia dih cang ti kha philhhlah. (Salm 139:2-4 rel.) Cun Baibal kan cawnpiakmi kha a ṭha lomi ruahnak le ziaza hna thlen awkah Pathian sin bawmhnak hal ding zongin tha kan pek khawh. Tahchunhnak ah, Baibal a cawngmi pakhat nih Khrihfa hna nih kan i tel awk a si lomi puai ah tel a duh men lai. Mah cu a palh ti kha a hngalh, asinain mah puai he aa tlaimi thil cheukhat ah tel a duh rih. Jehovah sinah a intuarnak taktak kha chim awk le Pathian nih a duhmi lawng duh ve awkah a sinah bawmhnak hal dingin tha pe.—Salm 97:10.

13. (a) Baibal kan cawnpiakmi hna kha i pumh colh awkah zeicah kan sawm hna awk a si? (b) Baibal a cawngmi pakhat kha Biakinn ah aa nuamh deuh nakhnga zeitindah kan tuah khawh?

¹³ Baibal na cawnpiakmi kha i pumh colh awkah sawm. Pumhnak ah a theihmi le a hmuhmi nih Baibal na cawnpiakmi kha a lung a suk khawh i ṭhancho awkah a bawmh khawh. Biakinn ah Zei Hna Dah An Tuah? timi video kha piahpiak law na sinah i pumh dingin sawm. A si khawh ahcun aa pumh khawh nakhnga bawm. Baibal cawnpiaknak kalṭi awkah thawngthanhtu pawl sawm cu a ṭhami a si. Cuticun Baibal na cawnpiakmi cu Khrihfabu i midang he zong an hun i hngal lai i aa pumh tikah aa nuam deuh lai.

14. Baibal a cawngmi kha thlaraulei ṭhancho awkah zeinihdah a forh khawh?

¹⁴ Kan hmuitinh cu Baibal kan cawnpiakmi thlaraulei ah ṭhancho dingin bawmh kha a si. (Efe. 4:13) Mi pakhat nih kanmah he Baibal cawnṭi dingin a hna a tlak tikah Baibal cawnnak nih zeitindah ṭhatnak a ka pek lai ti kha a bikin hngalh a duh men lai. Asinain Jehovah a dawtnak a ṭhancho tikah Khrihfabu chungah a ummi hna i telin midang kha zeitindah ka bawmh khawh hna lai timi kong kha a hun ruah men lai. (Matt. 22:37-39) A caan a rem tikah Baibal na cawnpiakmi kha Pennak rianṭuannak caah thawhlawm pek awkah tinvo sung kan ngei ti kha chim.

15. Buaibainak a ton tikah ṭha tein lehrulh awkah Baibal kan cawnpiakmi kha zeitindah kan bawmh khawh?

 ¹⁵ Baibal na cawnpiakmi nih buaibainak a ton tikah zeidah a tuah awk a si ti kha cawnpiak. Tahchunhnak ah, tipil a ing rih lomi Baibal na cawnpiakmi pakhat nih Khrihfabu i unau pakhatkhat ruangah ka thin a hung tiah aan chimh hei ti u sih. Ahodah a hmaan asiloah ahodah a palh ti kha chim hlah, asinain a tuah awk a simi Baibal chimmi kong tu kha chim. Mah tikah unaupa kha a ngaihthiam khawh i thil sining kong kha a philh khawh. Asiloah cutin a tuah khawh lo ahcun ‘a unau ah lak khawh ṭhan’ ding timi hmuitinh he unaupa kha nem tein le dawtnak in bia a ruah awk a si. (Matthai 18:15 he tahchunh.) Baibal na cawnpiakmi kha a chim dingmi kong i timhtuah awkah bawm. Mah buaibainak tawnghtham khawh ning lam kha hngalh awkah JW Library^® app, Jehovah Tehte Hna i Baibal Hlathlainak Ca Lamhruainak le jw.org^® hman ning kha hmuhsak. Tipil a in hlanah midang he buaibainak tawnghtham ning kong kha a cawn ahcun tipil a in hnuah Khrihfabu i midang pawl he pehtlaihnak ṭha a ngei deuh lai.

16. Baibal cawnpiaknak kalṭi dingin thawngthanhtu dang sawm cu zeicah a ṭhat?

¹⁶ Nangmah he Baibal cawnpiaknak kalṭi awkah Khrihfabu i midang kha sawm hna, cun peng zohkhenhtu nih nan Khrihfabu aan tlawn hna tikah amah zong kha sawm ve. Zeicah? A hmasa ah a ruang a langhter cang bantukin thawngthanhtu dang nih Baibal na cawnpiakmi kha nangmah nih na bawmh khawh lomi lam in an bawmh khawh men lai. Tahchunhnak ah, Baibal na cawnpiakmi nih kuak zuk ngol awkah aa zuam nain atu le atu a zuk ṭhan hei ti u sih. Mah tikah kuak zuk ngol awkah voi tampi aa zuam hnuah a ngol khomi Jehovah Tehte pakhat kha Baibal cawnpiaknak ah kalṭi dingin na sawm. Baibal na cawnpiakmi nih theih a herhmi, hman awk a tlakmi ruahnak cheuhnak kha na sawmmi unau nih a pek khawh men lai. Hmuhtonnak a ngeimi mah unaupa hmaiah Baibal cawnpiaknak tuah kha na sia a rem lo ahcun amah kha na chimter khawh. Baibal cawnpiaknak kalṭi dingin midang na sawm hna tikah an hmuhtonnak in Baibal na cawnpiakmi cu ṭhatnak a hmu kho. Kan hmuitinh cu Baibal kan cawnpiakmi thlaraulei ah ṭhancho dingin bawmh a si ti kha philhhlah.

17-18. Baibal cawnpiaknak ngol awk a si maw, si lo timi kong he aa tlaiin biakhiahnak na tuah tikah zeidah na ruah awk a si?

¹⁷ Baibal na cawnpiakmi nih a nunning a thlen lo ahcun nangmahle nangmah ‘Baibal cawnpiaknak kha ka ngol awk a si maw?’ tiah i hal. Biakhiahnak na tuah hlanah Baibal na cawnpiakmi i a sining kha na ruah awk a si. Cheukhat cu an ṭhangcho colh nain cheukhat tu cu an ṭhangcho colh lo. Hitin i hal: ‘Baibal ka cawnpiakmi a ṭhancho ning cu duh sah tein a si maw?’ ‘A cawnmi ningin a ‘zul’ colh maw, asiloah zulh hram a thawkka maw a si’? (Matt. 28:20) Baibal  a cawngmi pakhat cu zultu si awkah caan saupi a rau men lai. Asinain a nunnak ah thlennak kha duhsah duhsah in a tuah awk a si.

¹⁸ Mi pakhat he caan tlawmpal chung Baibal kan cawng cang nain Baibal cawn a sunsak kha a langhter lo ahcun zeidah kan tuah awk a si? Mah thil sining kong hi ruathmanh. Baibal na cawnpiakmi he A Kan Cawnpiak timi cauk kha nan cawn dih, mah hnuah Pathian Dawtnak Chungah Hmun timi cauk kha nan thawk nain Baibal na cawnpiakmi cu Khrihfabu pumhnak ah aa pum bal lo i Ruahnolhnak hmanhah aa pum lo. Cun a biapi theng lomi thil ruangah Baibal cawnnak kha a caan a pe kho lengmang lo. Baibal na cawnpiakmi cu, cu bantukin a si ahcun amah he hlangfang tein bia nan i ruah awk a si. *

19. Baibal cawnnak a sunsak lomi pakhat sinah zeidah na chimh khawh, zeidah na ruah a hauh lai?

¹⁹ Hitin na halnak thawngin biaruahnak kha na thawk khawh, ‘Jehovah Tehte pakhat si awkah na caah a har bikmi thil cu zeidah a si?’ Hitin aan leh men lai, ‘Baibal cawn cu ka duh ko, asinain zeitikhmanh ah Jehovah Tehte pakhat cu ka si kho lai lo.’ Caan tlawmpal chung Baibal nan cawn hnuah cu bantuk ruahnak a ngeih rih ahcun Baibal cawnnak pehzulh awkah a ruang a um maw? Asinain Baibal na cawnpiakmi nih zeicah a ṭhancho lo ti kha a hmasa bik aan chimh men lai. Tahchunhnak ah, innkhat hnu innkhat ah phung ka chim kho bal lai lo tiah a ruah men lai. A intuarnak na hngalh tikah zeitindah ka bawmh lai ti kha ṭha deuh in na hngalhthiam khawh.

20. Lamkaltu 13:48 hngalhthiamnak nih Baibal cawnpiaknak kan tuah ti lai maw, tuah ti lai lo ti kha hngalh awkah zeitindah a kan bawmh khawh?

²⁰ Ngaihchiat awk ngai a simi cu Baibal a cawngmi cheukhat cu Ezekiel chan i Israel mi he an i lo. An kong he aa tlaiin Jehovah nih Ezekiel kha hitin a ti: “Annih caah cun awṭha ngai, hla dawh sak a thiam ngaimi, tingtang tum a thiammi ceo na si ko; na chimmi cu an ngaih lai, sihmanhsehlaw an tuah hrimhrim lai lo.” (Ezek. 33:32) Anmah sinah Baibal cawnnak kan ngol lai ti chim cu kan caah a har men lai. Asinain “caan hi tampi a taang ti lo.” (1 Kor. 7:29) A ṭhangcho lomi pakhat he Baibal cawnnak ngol cu a ṭha deuhmi a si. “Zungzal nunnak hmu dingah thim a simi hna” tu kha kawl hna dingin kan i zuam awk a si.—Lamkaltu 13:48 rel.

21. 2020 ca i kumcaang Baibal cu zeidah a si, mah cu zeicah aa tlak?

²¹ 2020 chungah kumcaang Baibal nih zultu siternak rian ah a thiam deuhmi si khawh ning kong kha ruah awkah a kan bawmh lai. Mah ah Galili tlang i a biapimi tukmi i tonnak ah Jesuh nih a chimmi bia cheukhat aa tel. Hitin a ti: ‘Cucaah va kal u law ka zultu ah va ser hna u; tipilnak va pe hna u.’—Matt. 28:19.