1, 2. ¿Chuqui tiʼ sube jiñi ángel jiñi xʼixicob yaʼ bʌ añob baqui tsaʼ mujqui Jesús, i chuqui tsaʼ subentiyob tiʼ tojlel Jesús?

WOLITO i sʌcʼan jiñi qʼuin 16 i chaʼan nisán ti jabil 33. Cheʼ bʌ ñumeñix jumpʼejl qʼuin yicʼot ojlil, junmojt xʼixicob muʼ bʌ i ñopob Dios wen chʼijiyemoʼ bʌ tsaʼ majliyob yaʼ baqui tsaʼ mujqui Jesús chaʼan miʼ bombeñob i bʌcʼtal Jesús ti xojocña bʌ perfume yicʼot cʼoʼol bʌ tsʼac. Cheʼ bʌ tsaʼ cʼotiyob yaʼ ti mucoñibʌl, tsaʼ toj sajtiyob i pusicʼal cheʼ bʌ tsiʼ qʼueleyob chaʼan jocholix. Juntiquil ángel tiʼ subeyob chaʼan tsaʼix chaʼ chʼojyi Jesús i tiʼ bej subeyob: «Woliʼ majlel i pijtañetla ti Galilea. Yaʼ mi caj laʼ qʼuel» (Mt. 28:1-7; Lc. 23:56; 24:10).

² Cheʼ bʌ jiñi xʼixicob woli (choncol) i cʌyob jiñi mucoñibʌl, Jesús tsiʼ lʌcʼtesa i bʌ tiʼ tojlelob i tsiʼ subeyob: «Cucula. Subenla quermanojob chaʼan miʼ majlelob ti Galilea. Yaʼ mi caj i qʼueloñob» (Mt. 28:10). Tiʼ sujm, añʌch chuqui ñuc bʌ i cʼʌjñibal mi caj i suben jiñi xcʌntʼañob i chaʼan come tsiʼ ñaxan chajpa ili tempa bʌ cheʼ tsaʼ chaʼ tejchi.

3, 4. ¿Chucoch mi la cʌl chaʼan jiñi mandar am bʌ ti Mateo 28:19, 20 mach jiñic jach tsaʼ subentiyob jiñi xucʼul bʌ apóstolob? (Qʼuele jiñi dibujo am bʌ tiʼ tejchibal).

³ (Pejcan Mateo 28:16-20). Ti jiñi tempa bʌ tsaʼ bʌ i chajpa Jesús, tiʼ tsictesʌbeyob jiñi xcʌntʼañob i chaʼan chuqui ti eʼtel (troñel) ñuc bʌ i cʼʌjñibal yom miʼ melob ti jiñi ñaxam bʌ siglo, lajal bʌ mi lac mel (chaʼlen) ili ora. Tiʼ subeyob: «Cucula cheʼ jini. Sutqʼuiñob ti xcʌntʼañob winicob xʼixicob tiʼ pejtelel pañimil. [...] Cʌntesanla chaʼan miʼ laj chʼujbiñob pejtelel chuqui tac tsac subeyetla».

 ⁴ Jesús yom chaʼan tiʼ pejtelel muʼ bʌ i tsajcañob miʼ chaʼleñob subtʼan. Ili mandar mach jiñic jach tsaʼ aqʼuentiyob jiñi 11 xucʼul bʌ apóstolob. ¿Chucoch cheʼʌch mi lac ñaʼtan? Come mach jiñic jach jiñi xucʼul bʌ apóstolob tsaʼ ajñiyob ti jiñi wits i chaʼan Galilea cheʼ bʌ Jesús tsiʼ yʌcʼʌ jiñi mandar chaʼan miʼ sutqʼuintel ti xcʌntʼan yambʌlob. Laʼ laj cʼajtesan chaʼan jiñi ángel tiʼ sube jiñi xʼixicob chaʼan mi caj i qʼuelob Jesús yaʼ ti Galilea. Jin chaʼan, miʼ mejlel lac ñaʼtan chaʼan ti jimbʌ ora tsiʼ tempayob i bʌ jaʼel xucʼul bʌ xʼixicob. Cheʼ jaʼel, jiñi apóstol Pablo tsiʼ yʌlʌ chaʼan Jesús «tsaʼ tsictiyi tiʼ wut ñumen ti joʼcʼal i chaʼbajcʼ [500] hermanojob cheʼ temel añob» (1 Co. 15:6). ¿Baqui?

5. ¿Chucoch miʼ mejlel lac ñop chaʼan 1 Corintios 15:6 woliʼ taj ti tʼan jiñi tempa bʌ tsaʼ bʌ ujti ti Galilea bajcheʼ miʼ yʌl Mateo capítulo 28?

⁵ Añʌch i sujmlel cheʼ mi lac ñop chaʼan tsaʼ bʌ i yʌlʌ Pablo ti 1 Corintios 15:6 jiñʌch woli (yʌquel) i taj ti tʼan jiñi tempa bʌ tsaʼ bʌ ujti ti Galilea muʼ bʌ i yʌjlel ti Mateo capítulo 28. ¿Chucoch cheʼ mi lac ñaʼtan? Ñaxam bʌ, come lʌcʼʌl tiʼ pejtelel jiñi xcʌntʼañob i chaʼan Jesús yaʼʌch chumulob ti Galilea. Jin chaʼan, yaʼ ti wits i chaʼan Galilea yaʼʌch baqui miʼ mejlel i tempʌntel yonlel wiñicob xʼixicob (quixtañujob), i mach ti jumpʼejlic otot ti Jerusalén. I chaʼpʼejlel, Jesús tsaʼix i tempa i bʌ yicʼot jiñi 11 apóstolob ti jumpʼejl otot yaʼ ti Jerusalén cheʼ bʌ tsaʼ chaʼ tejchi. Cheʼ jiñic jach i yapóstolob yom i yʌqʼueñob jiñi mandar chaʼan miʼ chaʼleñob subtʼan yicʼot miʼ sutqʼuiñob ti xcʌntʼan yambʌlob, tsaʼ mejli i mel yaʼ ti Jerusalén, i mach jiñic cheʼ miʼ subeñob jiñi apóstolob, jiñi xʼixicob yicʼot yambʌ xcʌntʼañob chaʼan miʼ tempañob i bʌ yaʼ ti Galilea (Lc. 24:33, 36).

6. ¿Bajcheʼ miʼ pʌs Mateo 28:20 chaʼan yom miʼ tsʼʌctiyel ili ora jiñi mandar cheʼ mi lac sutqʼuin ti xcʌntʼan yambʌlob, i bajcheʼ woliʼ jajqʼuel ili mandar?

⁶ Laʼ laj qʼuel i yuxchajplel i sujmlel cheʼ bʌ miʼ mejlel la cʌl chaʼan Jesús mach jiñic jach tsiʼ yʌqʼue jiñi 11 xucʼul bʌ apóstolob jiñi mandar chaʼan miʼ sutqʼuiñob ti xcʌntʼan yambʌlob. ¿Bajcheʼ miʼ lac ñaʼtan? Cojix bʌ tiʼ subeyob jiñi xcʌntʼañob i chaʼan jiñʌch iliyi: «Añon quicʼotetla tiʼ pejtelel ora cʼʌlʌl tiʼ jilibal pañimil» (Mt. 28:20). Cheʼ bajcheʼ tsiʼ yʌlʌ Jesús, cabʌl lac piʼʌlob woliʼ sutqʼuiñob i bʌ ti xcʌntʼañob ili ora. Ñaʼtancu iliyi: Ti jujumpʼejl jab, lʌcʼʌ ti 300 mil tsijib xcʌntʼañob i chaʼan Jesús miʼ chaʼleñob chʼʌmjaʼ bajcheʼ i testigojob Jehová.

7. ¿Chuqui mi caj lac tsajin, i chucoch?

⁷ Yonlel muʼ bʌ i chʼʌmob estudio miʼ cʼotel i chʼʌmob jaʼ. Pero an muʼto bʌ i wen ñaʼtañob mi yomʌch mi yochelob bajcheʼ xcʌntʼañob i chaʼan Cristo. Miʼ mulañob chuqui miʼ cʌñob, pero maʼañic miʼ cʼotel i chʼʌmob jaʼ. Miʼ mejlel lac ñop chaʼan jiñi muʼ bʌ i yʌqʼueñob estudio yomob i coltan chaʼan miʼ cʼʌñob tiʼ cuxtʌlel woli bʌ i cʌñob yicʼot miʼ yochelob ti xñoptʼan. Ti ili temaj, mi caj laj qʼuel bajcheʼ miʼ mejlel lac ñijcʌbeñob i pusicʼal jiñi muʼ bʌ la cʌqʼueñob estudio yicʼot mi laj coltañob chaʼan miʼ colelob tiʼ chaʼan bʌ Dios. ¿Chucoch i cʼʌjñibal chaʼan mi lac tsajin iliyi? Come mi caj i cʼotel i yorajlel lac ñaʼtan mi muʼto caj lac bej aqʼuen estudio jiñi lac piʼʌl.

8. ¿Chucoch wocolʌch mi la cubin chaʼan mi lac ñijcʌben i pusicʼal jiñi woli bʌ la cʌqʼuen estudio?

⁸ Jehová yom chaʼan jiñi wiñicob xʼixicob miʼ melbeñob i yeʼtel yicʼotob i cʼuxbiya. Jin chaʼan, laʼ laj coltan jiñi muʼ bʌ la cʌqʼueñob estudio i chʼʌmbeñob i sujm chaʼan Jehová miʼ cʼojoʼtañob yicʼot miʼ wen cʼuxbiñob. La com chaʼan miʼ qʼuelob Jehová bajcheʼ ‹i Tat jiñi mebaʼ alʌlob. I yaj Coltaya mebaʼ xʼixicob› (Sal. 68:5). Cheʼ baqui ora jiñi woli bʌ i chʼʌmob estudio miʼ cʼotel i qʼuelob ti ñuc jiñi i cʼuxbiya Dios tiʼ tojlelob, tajol miʼ mejlel i ñijcañob chaʼan miʼ ñumen cʼuxbiñob jaʼel. Pero an wocol bʌ miʼ yubiñob  chaʼan miʼ qʼuelob Jehová bajcheʼ juntiquil Tatʌl am bʌ i cʼuxbiya come jiñi i tatob maʼañic baʼ ora tsiʼ pʌsbeyob cʼuxbiya (2 Ti. 3:1, 3). Jin chaʼan, laʼ lac taj ti tʼan jiñi utsʼatax bʌ i melbal Jehová cheʼ mi la cʌcʼ estudio. Laʼ laj coltañob jiñi muʼ bʌ la cʌqʼueñob estudio i chʼʌmbeñob i sujm chaʼan jiñi lac Dios am bʌ i cʼuxbiya yom chaʼan miʼ tajob i cuxtʌlel mach bʌ añic miʼ jilel i chaʼan miʼ coltañob i tajob. ¿Chuqui yambʌ miʼ mejlel lac mel?

9, 10. ¿Chuqui ti jun tac yom mi laj cʼʌn chaʼan mi lac pʌs i chaʼan bʌ Biblia, chucoch jiñʌch tac yom mi laj cʼʌn?

⁹ Laʼ laj cʼʌn jiñi libro ¿Chuqui miʼ cʌntesañonla jiñi Biblia? yicʼot Chʌn ajñenla tiʼ cʼuxbiya Dios. * Ili jun tac chajpʌbil chaʼan miʼ coltañonla chaʼan mi lac ñijcabeñob i pusicʼal jiñi muʼ bʌ la cʌqʼueñob estudio. Jumpʼejl ejemplo, jiñi capítulo 1 ti jiñi libro Miʼ cʌntesañonla miʼ jacʼ ili cʼajtiya tac: ¿I wentajonbala Dios? ¿Bajcheʼ yubil miʼ yubin Dios cheʼ mi la quilan wocol? ¿Muʼ ba a mejlel ti sujtel tiʼ yamigo Jehová? Jiñi libro I cʼuxbiya Dios mi caj i coltan jiñi muʼ bʌ la cʌqʼuen estudio i chʼʌmben i sujm chaʼan cheʼ bʌ mi jacʼ jiñi principio tac am bʌ ti  Biblia miʼ coltan chaʼan wen miʼ ñusan tiʼ cuxtʌlel i chaʼan miʼ ñumen sujtel tiʼ yamigo Jehová. Anquese añix laj cʼʌñʌ jiñi chaʼpʼejl libro chaʼan mi la cʌcʼ estudio, yomʌch mi lac wen chajpan lac bʌ cheʼ mi lac ñaʼtan baqui tac yom coltʌntel jujuntiquil muʼ bʌ la cʌqʼuen estudio.

¹⁰ Pero laʼcu lac ñaʼtan chaʼan jiñi muʼ bʌ la cʌqʼuen estudio yom i cʌn yambʌ temaj maʼañic bʌ miʼ tʌlel ti jiñi lac jun tac muʼ bʌ laj cʼʌn lac pʌs i chaʼan bʌ Biblia. Chaʼan jiñi, miʼ mejlel lac suben chaʼan miʼ bajñel pejcan jiñi jun i cheʼ jiñi, miʼ mejlel lac bej pʌsben i chaʼan bʌ Biblia yicʼot jiñi libro tac tsaʼix bʌ lac taja ti tʼan.

11. ¿Baqui ora yom mi lac tech lac mel oración yicʼot jiñi muʼ bʌ la cʌqʼuen estudio, i bajcheʼ miʼ mejlel lac suben chucoch yom mi lac mel oración?

¹¹ Laʼ lac mel oración cheʼ mi lac tech la cʌcʼ estudio. ¿Baqui ora yom mi lac tech lac mel oración cheʼ mi la cʌcʼ estudio? Yom miʼ mejlel cheʼ bʌ miʼ ñumel chaʼpʼejl uxpʼejl semana lac teche la cʌqʼuen estudio juntiquil lac piʼʌl. Yom mi laj coltan i ñaʼtan chaʼan cojach tiʼ coltaya jiñi chʼujul bʌ espíritu miʼ mejlel lac chʼʌmben i sujm jiñi i Tʼan Dios. An hermanojob muʼ bʌ i tajob ti tʼan chucoch yom miʼ mejlel jumpʼejl oración cheʼ miʼ pejcʌbeñob Santiago 1:5, muʼ bʌ i yʌl: «Mi anto yom laʼ ñaʼtʌbal cʼajtibenla Dios». Ti wiʼil, miʼ cʼajtibeñob jiñi muʼ bʌ i yʌqʼueñob estudio: «Mi la com lac ñaʼtʌbal, ¿chuqui yom mi lac mel?». Tajol miʼ jacʼob chaʼan cheʼ miʼ mejlel oración.

12. ¿Bajcheʼ miʼ mejlel laj cʼʌn Salmo 139:2-4 chaʼan mi laj coltan jiñi muʼ bʌ la cʌqʼuen estudio chaʼan miʼ ñumen weñʼesan bajcheʼ miʼ pejcan Jehová ti oración?

¹² Laʼ laj cʌntesan i mel oración jiñi muʼ bʌ la cʌqʼuen estudio. Laʼ lac suben chaʼan Jehová yom i ñʌchʼtʌben i yoración muʼ bʌ i mel tiʼ pejtelel i pusicʼal. Laʼ lac tsictesʌben chaʼan miʼ mejlel lac jamben lac pusicʼal Jehová cheʼ mi lac suben bajcheʼ mi la cubin lac bʌ yicʼot chuqui tac maʼañic majqui yambʌ miʼ mejlel lac suben. Come tiʼ sujm, Jehová yujilix chuqui an ti lac pusicʼal. (pejcan Salmo 139:2-4). Cheʼ jeʼel, miʼ mejlel lac suben chaʼan miʼ cʼajtiben Dios chaʼan miʼ coltan i qʼuextan i pensar yicʼot i cʌy melbal tac mach i bʌ i tojelic. Laʼcu lac ñaʼtan chaʼan añix ora juntiquil lac piʼʌl an i cajel i cʌn i chaʼan bʌ Biblia i muʼto i mulan i mel jumpʼejl qʼuiñijel i chaʼan bʌ pañimil. Yujil chaʼan mach weñic, pero añʌch chuqui tac miʼ mulʌben jiñi qʼuiñijel. Laʼ lac suben ti uts bʌ tʼan chaʼan miʼ suben Jehová bajcheʼ miʼ ñoj ubin i bʌ yicʼot chaʼan miʼ cʼajtiben i coltaya ti wocol tʼan chaʼan miʼ cʼuxbin chuqui toj tiʼ wut (Sal. 97:10).

13. a) ¿Chucoch yom mi lac pʌy majlel ti ora ti tempa bʌ tac jiñi muʼ bʌ la cʌqʼuen estudio? b) ¿Chuqui miʼ mejlel lac mel chaʼan wen miʼ yubin i bʌ yaʼ ti Yotlel tempa bʌ?

¹³ Laʼ lac pʌy majlel ti ora ti tempa bʌ tac jiñi muʼ bʌ la cʌqʼuen estudio. ¿Chucoch? Come jiñi muʼ bʌ i mejlel i ñʌchʼtan yicʼot i qʼuel yaʼ ti tempa bʌ tac miʼ mejlel i cʼotel tiʼ pusicʼal yicʼot i coltan chaʼan miʼ colel tiʼ chaʼan bʌ Dios. Jin chaʼan, laʼ lac pʌsben jiñi video ¿Chuqui miʼ mejlel yaʼ ti i Yotlel Tempa bʌ? i laʼ lac pʌy majlel yaʼ ti tempa bʌ. I cheʼ mejloñʌchla, laʼ lac suben chaʼan mi caj lac ñumel lac pʌy. Muʼ bʌ i mejlel lac mel jaʼel jiñʌch cheʼ mi lac pʌy majlel yambʌ hermanojob cheʼ mi la cʌqʼuen estudio. Cheʼ bajcheʼ iliyi, jiñi woli bʌ la cʌqʼuen estudio mi caj i ñʌmʼan yicʼot jiñi hermanojob i maʼañix bajcheʼ yubil mi caj i yubin cheʼ miʼ majlel tiʼ tempa bʌ.

14. ¿Chuqui mi caj i yʌcʼ ti colel tiʼ chaʼan bʌ Dios jiñi muʼ bʌ la cʌqʼuen estudio?

¹⁴ La com bʌ jiñʌch cheʼ mi laj coltan jiñi muʼ bʌ la cʌqʼuen estudio chaʼan miʼ colel tiʼ chaʼan bʌ Dios (Ef. 4:13). Cheʼ baqui ora juntiquil miʼ chʼʌm jumpʼejl estudio, tajol jin jach miʼ ñaʼtan bajcheʼ mi caj i cʼʌjñibʌyel i chaʼan tiʼ bajñelil. Pero cheʼ baqui ora miʼ cʼotel i wen cʼuxbin Jehová, tajol mi caj i tech i ñaʼtan bajcheʼ miʼ mejlel i coltan jiñi yañoʼ bʌ, yaʼ bʌ ochemob jaʼel  jiñi añoʼ bʌ ti congregación (Mt. 22:37-39). Cheʼ jaʼel, cheʼ wen mi laj qʼuel, mach yomic mi lac ñajʌtesan lac suben jiñi woli bʌ la cʌqʼuen estudio chaʼan yom mi la cʌcʼ taqʼuin chaʼan jiñi eʼtel woli bʌ i mejlel chaʼan i Yumʌntel Dios.

15. ¿Chuqui miʼ mejlel lac mel chaʼan jiñi muʼ bʌ la cʌqʼuen estudio wen jach chuqui miʼ mel chaʼan jiñi wocol tac?

¹⁵ Laʼ laj cʌntesan jiñi muʼ bʌ la cʌqʼuen estudio chaʼan bajcheʼ yom miʼ lʌtʼ jiñi wocol tac. Laʼcu lac ñaʼtan: Juntiquil muʼ bʌ la cʌqʼuen estudio ochemix bajcheʼ xsubtʼan maxto bʌ chʼʌmʌlic i chaʼan jaʼ miʼ subeñonla chaʼan juntiquil hermano yaʼ ti congregación tiʼ sube maʼañic bʌ tsiʼ mulaj. ¿Chuqui mi caj lac mel? Maʼañic mi caj lac chʼʌm ti lac wenta lac tojʼesan jiñi wocol. Laʼ lac tsajin yicʼot jiñi muʼ bʌ la cʌqʼuen estudio chuqui miʼ yʌl jiñi Biblia. Miʼ mejlel lac suben chaʼan an chaʼchajp yom bʌ miʼ mel: Yom miʼ ñusʌben i mul jiñi hermano o, mi mach mejl i ñajʌtesan, miʼ mejlel i pejcan ti uts bʌ tʼan yicʼot cʼuxbiya chaʼan miʼ tojʼesan jiñi wocol yicʼot jiñi hermano (laja yicʼot Mateo 18:15). Laʼ laj coltan jiñi muʼ bʌ la cʌqʼuen estudio chaʼan miʼ wen ñaʼtan chuqui mi caj i yʌl. Laʼ laj cʌntesan i cʼʌn jiñi JW Library^®, jiñi Coltʌntel chaʼan estudio yicʼot jiñi jw.org^® chaʼan miʼ qʼuel bajcheʼ tac miʼ mejlel i tojʼesan jiñi i wocol. Cheʼ wen chajpʌbilix chaʼan bajcheʼ yom miʼ tojʼesan jiñi wocol tac cheʼ bʌ maxto chʼʌmʌlic i chaʼan jaʼ, mi caj i coltan chaʼan ñumen wen miʼ yajñel yicʼot jiñi hermanojob.

16. ¿Bajcheʼ miʼ coltañonla cheʼ mi lac pʌy majlel juntiquil hermano la cʌcʼ jumpʼejl estudio?

¹⁶ Cheʼ miʼ majlel la cʌqʼuen estudio juntiquil lac piʼʌl laʼ lac pʌyob majlel yambʌ hermanojob yicʼot jiñi superintendente i chaʼan circuito cheʼ bʌ miʼ cʼotel ti julaʼ yaʼ ti congregación. ¿Chucoch? Cheʼ bajcheʼ tac tsaʼix laj cʌlʌ yaʼ ti párrafo 13 come tajol jiñi yambʌ hermanojob an baqui tac miʼ mejlel i ñumen coltañob bajcheʼ joñonla. Laʼcu lac ñaʼtan chaʼan jiñi muʼ bʌ la cʌqʼuen estudio añix i wen chaʼle wersa i cʌy i ñucʼ jiñi cʼujts pero maʼañic an i cʌyʌ. Chaʼan jiñi, laʼ lac pʌy majlel juntiquil hermano añix bʌ i ñoj cʌyʌ i ñucʼ cʼujts anquese wocolʌch tsiʼ mʌlbe (jotbe). Tajol miʼ mejlel i yʌqʼuen wem bʌ ticʼojel tac. Mi mach comic la cʌcʼ jumpʼejl estudio cheʼ yaʼan la quicʼot juntiquil hermano o hermana cabʌlix bʌ chuqui yujil, laʼ lac suben chaʼan jin miʼ yʌcʼ. Mach yʌlʌyic majqui bʌ hermano, laʼ laj cʌn tiʼ tojlel chuqui yujil yambʌlob. Laʼ laj cʼajtesan chaʼan joñonla com laj coltan chaʼan miʼ colel tiʼ chaʼan bʌ Dios jiñi muʼ bʌ la cʌqʼuen estudio.

17, 18. ¿Chuqui yom mi lac wen ñaʼtan mi muqʼuixto caj lac bej aqʼuen estudio o maʼañix juntiquil lac piʼʌl?

¹⁷ Mi jiñi muʼ bʌ la cʌqʼuen estudio maʼañic woliʼ qʼuextan i melbal, yom mi laj cʼajtiben lac bʌ mi muqʼuixto caj lac bej aqʼuen estudio. Junchajp yom bʌ mi lac ñaʼtan jiñʌch bajcheʼ cʼamel miʼ chʼʌmben i sujm i chaʼan bʌ Biblia. An muʼ bʌ i jalijelob chaʼan miʼ qʼuextañob i melbal. Jin chaʼan, yom mi laj cʼajtiben lac bʌ: «¿Wolʌch ba i colel tiʼ chaʼan bʌ Dios jiñi muʼ bʌ cʌqʼuen estudio cheʼ bajcheʼ cʼamel miʼ mejlel i cʌn i chaʼan bʌ Biblia? ¿Wolix ba i tech i cʼʌn tiʼ cuxtʌlel chuqui woliʼ cʌn majlel?» (Mt. 28:20). Anquese juntiquil muʼ bʌ la cʌqʼuen estudio cʼunteʼ  woliʼ colel tiʼ chaʼan bʌ Dios, yom tsiquil miʼ cʼotel laj qʼuel chaʼan wolʌch i qʼuextan i melbal.

¹⁸ Pero ¿chuqui mi caj lac mel mi jiñi muʼ bʌ la cʌqʼuen estudio miʼ pʌs chaʼan tsʼitaʼ jach o yoque maʼañic miʼ qʼuel ti ñuc muʼ bʌ i yʌl jiñi Biblia? Laʼcu lac ñaʼtan iliyi. Jiñi muʼ bʌ la cʌqʼuen estudio tsaʼix i yujtesa jiñi libro Miʼ cʌntesañonla yicʼot tsaʼix i teche jiñi libro I cʼuxbiya Dios, pero maʼañic baʼ ora an ajñen ti tempa bʌ mi jiñicto tiʼ Cʼajtesʌntel i chʌmel Jesús. Cheʼ jaʼel, ti bele ora miʼ sʌclan i tʼan chaʼan maʼañic miʼ chʼʌm estudio. Mi cheʼ bajcheʼ jiñi, yom mi lac chaʼlen tʼan yicʼot. *

19. ¿Chuqui miʼ mejlel lac suben juntiquil maʼañic bʌ miʼ qʼuel ti ñuc chuqui woliʼ cʌn ti Biblia, i chuqui yom mi lac ñaʼtan?

¹⁹ Tajol miʼ mejlel lac tech lac suben ili cʼajtiya: «¿Chuqui tajol woliʼ mʌctañet chaʼan maʼañic maʼ sujtel tiʼ testigo Jehová?». Mi juntiquil añix bʌ ora an i cajel la cʌqʼuen estudio miʼ subeñonla chaʼan miʼ mulan i cʌn i chaʼan bʌ Biblia pero miʼ yʌl chaʼan maʼañic ba ora mi caj i sujtel tiʼ testigo Jehová, ¿yomto ba mi lac chʌn aqʼuen estudio? Tajol jiñi muʼ bʌ la cʌqʼuen estudio cojaxto mi caj i subeñonla chucoch maʼañic an i qʼuexta i melbal. Jumpʼejl ejemplo, tajol miʼ yʌl chaʼan maʼañic baʼ ora mi caj i mejlel miʼ yubin chaʼan miʼ ñumel ti subtʼan ti jujumpʼejl otot. Cheʼ miʼ cʼotel lac ñaʼtan bajcheʼ miʼ yubin i bʌ, mi caj i mejlel laj coltan.

20. ¿Bajcheʼ miʼ coltañonla Hechos 13:48, (TNM) chaʼan mi lac ñaʼtan mi muqʼuixto cajel lac bej aqʼuen estudio juntiquil lac piʼʌl?

²⁰ Chʼijiyem ti alol, pero an muʼ bʌ la cʌqʼueñob estudio lajaloʼ bʌ bajcheʼ jiñi israelitajob cheʼ tiʼ yorajlel Ezequiel. Jehová tiʼ sube ili xʼaltʼan tiʼ tojlelob: «Lajalet miʼ yʌlob bajcheʼ juntiquil muʼ bʌ i cʼʌyin wen utsʼat bʌ cʼay, yujil bʌ i ñijcʌntel música. Tiʼ pejtelelob miʼ lon ubiñob a tʼan, pero maʼanic miʼ melob chuqui maʼ wʌl» (Ez. 33:32). Tajol wocol mi la cubin chaʼan mi lac suben juntiquil lac piʼʌl chaʼan muqʼuix caj laj cʌy la cʌqʼuen estudio, pero maʼañix cabʌl i yorajlel (1 Co. 7:29). Jin chaʼan, mach lac sʌt i yorajlel am bʌ lac chaʼan chaʼan mi la cʌqʼuen estudio juntiquil lac piʼʌl maʼañic bʌ miʼ qʼuextan i melbal, ñumen wen cheʼ mi lac sʌclan jiñi muʼ bʌ i pʌsob chaʼan ‹yomob i taj i cuxtʌlel mach bʌ añic miʼ jilel› (Hechos 13:48, TNM).

21. ¿Baqui bʌ jiñi texto chaʼan 2020, i chuqui mi caj i coltañonla lac mel?

²¹ Jiñi texto chaʼan 2020 mi caj i coltañonla lac weñʼesan bajcheʼ mi lac sutqʼuin ti xcʌntʼan yambʌlob. Miʼ chʼʌm tilel tʼan tac tsaʼ bʌ i yʌlʌ Jesús yaʼ ti wits i chaʼan Galilea: «Cucula cheʼ jini. Sutqʼuiñob ti xcʌntʼañob winicob xʼixicob [...]. Aqʼuenla chʼʌmjaʼ» (Mt. 28:19).