1-2. Nemene la hna qaja hnene la angela kowe la itre föe ka itronyi ngöne la hua i Iesu, nge nemene la hnei Iesu hna qaja koi nyudren?

 AME lo 16 Nisan 33 M.K., hnene la itre föe ka nyihlue i Akötresie hna tro e hmahmakany kowe la hua i Iesu. Traqa ha koi 36 lao hawa ne meköle nyidrëti e cili. Kola ajane hnene la itre föe troa köle hnei oel la ngönetrei nyidrë. Ngo nyudreni a öhne laka, pëhë aliene la hua! Önine la ketre angela koi nyudren ka hape, ase hë amele Iesu qa hna mec. Öni angeic: “Tro pa i nyidrëti hë e Galilaia. Nge tro nyipunieti a iöhnyi me nyidrë e cili.”—Mat. 28:1-7; Luka 23:56; 24:10.

² Kola tro hnene la itre föe nge nyudreni a öhnyi Iesu kola traqa koi nyudren, me hape: “Tro jë, nge qaja ju kowe la itre trejin me eni laka, loi e tro angatr a tro Galilaia, nge tro hë angatr e cili a iöhnyi me eni.” (Mat. 28:10) Ame la pane ewekë hnei Iesu hna kuca thupene la hna amele nyidrëti hmaca, tre, ene la troa icasikeu memine la itretre drei nyidrë. Maine jë, nyipiewekë catre la itre hna amekötin hnei nyidrëti hna troa hamën koi angatr!

3-4. Pine nemene matre tha koi ange aposetolo hmekuje kö la hna amekötin ngöne Mataio 28:19, 20? (Wange ju la pane iatr.)

³ E jë la Mataio 28:16-20. Ame ngöne la icasikeu cili, hnei Iesu hna qaja la huliwa hna troa eatrën hnene la itretre drei nyidrë, ene la huliwa hne së hna hane kuca enehila. Öni Iesu: “Qa ngöne lai, tro jë nyipunie, nge inine jë la nöjei atr qa ngöne la nöjei nöj . . . Ini angatre jë troa trongëne lo nöjei ewekë hnenge hna amekötine koi nyipunie.”

 ⁴ Iesu a ajane tro la itretre drei nyidrëti a cainöj. Tha hnei nyidrëti kö hna hamën la huliwa celë koi ange aposetolo hmekuje hi. Nemene la ka anyipicine lai? Hapeu, ange aposetolo hi la ka sine lo icasikeu hune la wetr e Galilaia, lo Iesu a hamën la hna amekötine celë? Önine lo angela kowe la itre föe: “Tro nyipunieti a iöhnyi me nyidëti [e Galilaia].” Haawe, kolo lai a amamane laka, hnene fe la itre föe hna sine la icasikeu cili. Ngo hetre ketre ewekë. Öni Paulo aposetolo ka hape, hnei Iesu hna “aca mama pi kowe la ala 500 nge hetre munëne lao trejin.” (1 Kor. 15:6) Ekaa?

5. Nemene la hna ini së hnene la tusi 1 Korinito 15:6?

⁵ Hetre itre ewekë ka anyipicine laka, Paulo e celë a qaja lo icasikeu hna kuca e Galilaia, lo hna qaja ngöne Mataio mekene 28. Ame la hnapan, alanyimu thene la itretre drei Iesu ka traqa qa Galilaia. Celë hi matre, hna icasikeu hune la wetr ngo tha ngöne kö la ketre uma e Ierusalema ke, tru catr hnei atr. Ame la hnaaluene kepin ke, thupene la kola amele nyidrëti hmaca, hnei Iesu hna icasikeu memine la ala 11 lao aposetolo, ngöne la ketre uma e Ierusalema. Maine hnei Iesu ju hna upe hmekuje hi la itre aposetolo, tro nyidrëti a ithanata koi angatr e Ierusalema, ngo tha e Galilaia kö.—Luka 24:33, 36.

6. Thenge la Mataio 28:20, pine nemene matre thatraqa së mina fe enehila la hna amekötin troa cainöje trootro, nge nemene la aqane tro sa trongën la hna amekötin celë?

⁶ Hane hi la hnaakönin kepin. Ame lo hna amekötin hnei Iesu ka hape, troa cainöje trootro, tre, tha thatraqane hmekuje kö la itre pane Keresiano. Hnei Iesu hna nyipune la itre hna amekötin, me hape: “Ini a ce me nyipunie ngöne la nöjei drai asëjëihë uti hë la pune la fene hnengödrai.” (Mat. 28:20) Tune lo hna qaja hnei Iesu, alanyimu la itre ka cainöje trootro enehila. Pane mekune jë! Traqa koi 300 000 la itre ka xomi bapataiso e nöjei macatre, me thel troa xötrethenge Iesu Keriso!

7. Nemene la hne së hna troa ce wang, nge pine nemen?

⁷ Alanyimu la itre hnainin ka kökötre trootro utihë la angatr a xomi bapataiso. Ngo, hetre itre xan ka xou troa hane cainöj. Angatr a madrin troa ini tus, ngo tha kökötre kö angatr utihë la xomi bapataiso. Easë asë hi a ajane tro la itre ka ini tusi me easë a trongëne la itre hnei angatr hna inin, me xötrethenge Keriso. Tro la tane mekun celë a amamane la aqane tro sa ketr la hni ne la itre hnainin, me xatua angatr troa hnimi Iehova. Pine nemene matre ka nyipiewekë la tane mekun celë? Celë hi ka troa xatua së troa axeciën maine tro palakö sa ini tus memine la ketre atr.

8. Pine nemene matre jol e itre xaa ijin troa ketr la hni ne la ketre atr?

⁸ Iehova a ajane tro sa hnimi Nyidrë me nyihlue i Nyidrë. Hnëqa së troa xatuane la itre hnainin troa trotrohnine laka, Iehova a wangatrun me hnimi së, easë isa ala caas. Tro sa xatua angatr troa goeë Iehova tune la “Tetetroti ne la nöjei neköeng, me ate amekötine la nöjei sine fö.” (Sal. 68:5) Maine tro angatr a öhn la etrune la ihnimi Akötresieti koi angatr, tro lai a ketr la itre hni angatr me acatrene la ihnimi angatr koi Akötresie. Ame koi itre xan, jole troa goeë Iehova ceitu me ketre Kem ka ihnim. Maine jë, tha hna hnimi angatre kö hnene la sipu keme i  angatr. (2 Tim. 3:1, 3) Ame la easa ini tus memine la ketre atr, loi e tro sa amamane la itre thiina ka lolo i Iehova. Tro fe sa amamane koi angatr laka, Iehova a ajane tro angatr a mel epine palua. Nge Nyidrëti a ajane troa xatua angatr troa kapa la mele cili. Nemene la itre xaa nyine tro sa kuca?

9-10. Nemene la lue itus nyine tro sa ini tusi ngön, nge pine nemen?

⁹ Troa huliwane la itre itus, “Nemene La Hna Ini Së Hnei Tusi Hmitrötr?” me “Lapa Huti Ju Ngöne La Ihnimi Akötresie.” Hna kuca la lue itusi celë matre troa xatua së troa ketr la hni ne la itre hnainin. Ame ngöne la mekene 1 ne la itus Hna Ini Së, tre, kola sa la itre hnying celë: Akötresieti kö a hane meku së maine ka iakötrë pena Nyidrë?, Tune kaa Akötresie ngöne la easa akötr?, nge Ijije kö tro sa hane nyi sinee i Iehova? Ketre tune fe la itus Lapa Huti Ju Ngöne La Ihnimi Akötresie. Ej a xatuane la hnainin troa trotrohnine la enyipiewekëne la troa trongëne la itre trepene  meköti ne la Tusi Hmitrötr, matre mele madrin me easenyi catr koi Iehova. Ngacama anyimua inine hë së la lue itusi celë me itre xan, ngo loi e tro palahi sa hnëkë hnyawa, matre troa hamë ini thenge la aja ne la hnainin.

¹⁰ Ngo tune kaa e kola ajane troa porotrikëne la mekun hna qaja e hnine la ketre itusi kö? Maine jë, tro sa ithuecatre koi angeic troa ketre sipu e la itus, nge tro kö sa sisedrëne la ini tusi ngöne lo la lue itus.

11. Eu la ijine tro sa thith ngöne la easa ini tus, nge nemene la aqane tro sa amamane la enyipiewekëne la thith kowe la hnainin?

¹¹ Troa nyiqane la ini tus jëne la thith. Loi e tro sa nyiqane me nyipune la ini tusi hnene la thith. Tro sa amamane kowe la hnainin laka, tro sa trotrohnine la Tusi Hmitrötr, e hna xatua së hnene la uati hmitrötre i Akötresie. Ame la itre trejin, angatr a xom la Iakobo 1:5, matre troa amamane la enyipiewekëne la thith. Kola hape: “Maine ketre thei nyipunie a aja inamacan, loi e tro pala hi angeic a sipo Akötresie.” Thupene lai, angatr a hnyingëne kowe la hnainin ka hape, “Nemene la aqane tro sa sipo inamacane koi Akötresie?” Tro hë angeice lai a trotrohnine la enyipiewekëne la thith.

12. Thenge la Salamo 139:2-4, nemene la aqane tro sa xatuane la itre hnainin troa thithi koi Iehova qa kuhu hni?

¹² Troa inine la hnainin troa thith. Tro sa amamane koi angeic ka hape, Iehova a ajane troa dreng la itre thith hna kuca qa kuhu hni. Ame la easa thithi caas, ijije hi tro sa fe la hni së koi Iehova, me qaja koi Nyidrëti la itre mekun hne së hna xouene troa qaja kowe la ketre atr. Atre kö Iehova la itre aliene hni së. (E jë la Salamo 139:2-4.) Ketre, loi e tro sa ithuecatre kowe la hnainin troa sipo ixatua thei Akötresie, matre troa saze la itre mekun me itre aqane ujë i angeic. Pane mekune jë laka, ketre hnainin a ajane troa atrune la ketre feet ka ifeketh memine la hna qaja hnei Tusi Hmitrötr. Atre hi angeic ka hape ka ngazo, ngo angeic a madrine la itre feet cili. Loi e tro sa ithuecatre koi angeic troa qaja koi Iehova la aliene hni angeic, me sipo Nyidrëti troa xatua angeic troa hnimi Nyidrëti hmekuje hi.—Sal. 97:10.

13. (a) Pine nemene matre loi e tro sa canga könëne la itre hnainin kowe la itre icasikeu? (b) Nemene la nyine tro sa kuca matre tha tro kö a xou hnene la hnainin troa sine la itre icasikeu?

¹³ Troa canga könëne la hnainin kowe la itre icasikeu. Tro la itre icasikeu a thue aja koi angeic troa nyihlue i Iehova me acatrene la lapaune i angeic. Amamane jë la video Ka Tune Kaa La Itre Icasikeu Hun? nge könë angeice jë troa ce tro me easë ngöne la hna icasikeu. Maine ijij, loi e tro sa trothei angeic kowe la hna icasikeu. Loi e tro fe sa ce tro memine la itre xaa trejin matre troa ini tusi me angeic. Tro hë angeice lai a atre la itre xaa trejin ne la ekalesia, nge pëhë xoue angeic troa sine la itre icasikeu.

14. Nemene la ka troa xatuane la ketre hnainin troa kökötr ngöne la nyipici?

¹⁴ Easë asë hi a ajane troa xatuane la hnainin troa kökötr. (Efe. 4:13) Ame la ketre atr a nyiqane ini tusi me easë, maine jë angeic a mekun la itre manathith. Ngo ame hë la kola kökötr la ihnimi angeic koi Iehova, angeice fe hë a mekun la aqane troa xatuane la itre xan, tune fe la itre  trejin ne la ekalesia. (Mat. 22:37-39) Maine ijij, loi e troa qaja kowe la hnainin la enyipiewekëne la troa sajuëne la huliwa ne la Baselaia, me kuië ahnahna.

15. Nemene la aqane tro sa xatuane la ketre hnainin ngöne la kola traqa la itre jol?

¹⁵ Troa amamane kowe la hnainin, la nyine troa kuca ngöne la itre jol. Pane mekune jë laka, tro la ketre atr ka ini tusi me easë a qaja ka hape, hna akötrë angeic hnene la ketre trejin ne la ekalesia. E cili, tha tro kö sa ce xöle me ketre. Loi e tro pe sa amamane koi angeic la hna qaja hnei Tusi Hmitrötr. Maine jë tro angeic a canga nue la ngazo ne lai trejin. Ngo maine thatreine kö angeice nue la ngazo, loi e tro sa ithuecatre koi angeic troa ithanata amenyikeny kowe la trejin, me thele troa ‘mele la trejin.’ (Wange ju la Mataio 18:15.) Loi e tro fe sa xatuane la hnainin troa hnëkëne la nyine troa qaja. Tro sa amamai angeic la aqane troa ithel ngöne la application JW Library^®, memine la boroshür, Nyine Thele Mekune Ne La Itretre Anyipici Iehova, memine la sit jw.org^®. Maine tro angeic a canga thele tingeting memine la itre trejin qëmekene troa xomi bapataiso, tro ha hmaloi koi angeic troa hetre nyipi sinee e hnine la ekalesia.

16. Nemene la thangan e tro sa hëne la itre xaa trejin troa ce tro me easë troa ini tusi memine la ketre atr?

¹⁶ Troa ce tro memine la itre xaa trejin troa kuca la ini tus, tune la atre thupëne la sirkoskripsio. Pine nemen? Ijije hi tro la itre xaa trejin a hamë ixatua kowe la hnainin, ngöne la ketre götrane hne së hna thatrein. Pane mekune jë laka, kola thel hnene la hnainin troa triji sixa, ngo anyimua kei angeic. Könëne jë la ketre trejin ka elë hune la jol cili troa sine la ini tus. Ijije hi tro la trejin a xatuane la hnainin. Maine tha ajane kö së troa kuca la ini tus qëmekene la ketre trejin trahmany, loi e tro sa sipo nyidrë troa xomiuijine la ini tus. Maine tro sa ce tro memine la itre xaa trejin troa kuca la ini tus, tro hë la hnainin a kepe eloin qa ngöne la hnei angatr hna melën. Ame la aja së, tre, troa xatuane la hnainin troa kökötr ngöne la nyipici.

17-18. Nemene la nyine tro sa pane mekun qëmekene troa nue la ini tusi së memine la ketre atr?

¹⁷ Maine pëkö ewekë ka saze ngöne la mele ne la hnainin, loi e tro sa isa hnying ka hape, ‘Tro kö ni a nue la ini tusi celë?’ Qëmekene troa axecië mekun, loi e tro sa pane mekun la pengöne la atr. Ame itre xan, tre, ka canga kökötr, ngo hmitre pë hë koi itre xan. Isa hnyinge jë ka hape: ‘Hapeu, ka lolo kö la aqane kökötre ne la hnainin?’ ‘Angeice kö a nyiqane “trongëne” la itre hnei angeic hna inin?’ (Mat.  28:20) Ngacama ka hmitre la aqane kökötre ne la ketre atr, ngo nyipiewekë tro angeic a saze aqane mel.

¹⁸ Ngo, tune kaa e tha nyipiewekëne kö la ketre atr la ini tusi angeic, ngacama ka hekö hë? Pane mekune jë laka, ase hë së inine la itus Hna Ini Së me Lapa Huti Ju Ngöne La Ihnimi Akötresie, ngo tha hane kö angeic sine la itre icasikeu, ketre tune fe la Drai Ne Amekunën! Ketre, angeic a triane la ini tus ngo pë pe nyipi kepin. E cili, loi e tro sa ithanata hnyawa koi angeic. *

19. Nemene la nyine tro sa qaja kowe la ketre atr ka tha nyipiewekëne kö la ini tusi angeic, ngo nemene la nyine tro sa pane mekun?

¹⁹ Loi e tro sa pane hnyingë angeic ka hape, ‘Nemene la ewekë ka jol koi epun troa saze, matre troa ketre hlue i Iehova?’ Maine jë tro angeic a sa ka hape, ‘Madrine catre ni troa ini Tusi Hmitrötr, ngo tha tro kö ni a hane Temoë Iehova!’ Maine celë hi aqane sa i angeic, ngacama ka hekö hë angeic ini tus, maine jë, ka loi e troa nue la ini tus. Ngo maine pena, tro angeic a qaja koi së la ka sewe angeic troa kökötr. Maine jë, angeic a xou troa cainöj ngöne la itre hnalapa trootro. Haawe, ijiji së hi troa xatua angeic.

20. Nemene la aqane xatua së hnene la tusi Itre Huliwa 13:48, qëmekene troa axeciën e troa nue la ini tus memine la ketre atr?

²⁰ Ame la itre xaa hnainin, tre, ceitui angatre hi memine la angetre Isaraela ngöne la hneijine i Ezekiela. Hnei Iehova hna qeje angatr koi Ezekiela, ka hape: “Hana wang, eö a tune koi angate la nyima ka lolo ne la ate ka loi nine, nge ateine hnyawa la inyima; ke angat’ a denge la ite tenge ewekë i ’ö, ngo tha kuca pe it’ ej.” (Ezek. 33:32) Maine jë, jole koi së troa qaja kowe la ketre atr ka hape, easa troa nue la ini tusi angeic. Ngo, “hohopatre pe hi la ijin.” (1 Kor. 7:29) Tha tro kö sa aluzi traem memine la itre atr ka wangacone la ini tusi angatr. Loi e tro pe sa thele la “itre ka hmalahnine troa kapa la mele ka pë pun.”—E jë la Itre Huliwa 13:48.

21. Nemene la topik ne la macatre 2020, nge nemene la aqane troa xatua së?

²¹ Kola troa xatua së hnene la topik ne la macatre celë, troa maca ngöne la hna cainöj. Kolo itre trengewekë i Iesu ngöne la icasikeu hune la wetr e Galilaia, ka hape: “Tro jë nyipunie a inine la itre atr . . ., me bapataiso angatr.”—Mat. 28:19.