1-2. San wan engel taigi den uman di be go na a geebi fu Yesesi? San Yesesi taigi den uman ya?

NA A mamanten fu 16 Nisan aini a yali 33, wantu uman di be abi lesipeki gi Gadu be go anga ala buduufu na ati na a geebi pe den be beli Masaa Yesesi Kelestesi tu dei pasa. Den be e go fu poti sumee switi fatu na a dede sikin fi en. Di den doo, den dyombo di den si taki a geebi be leigi. Wan engel taigi den uman ya taki Yesesi be weki baka. Den taigi den tu taki: „A de a pasi e go a Galileya. Wi o si en ape.”​—Mat. 28:1-7; Luk. 23:56; 24:10.

² Di den uman komoto na a geebi, Yesesi seefi kon a den, neen a taigi den taki: „U go taigi den baala fu mi taki den mu go a Galileya. Den o si mi ape” (Mat. 28:10). A musu de taki a wantu pelensipali sani Yesesi be wani taigi den bakaman fi en, bika a fosi sani di a du baka di a weki baka, a kai a kai den kon a wan.

3-4. Saide u sa taki a ná den apostel wawan Yesesi be taigi den sani di sikiifi a Mateyesi 28:19, 20? (Luku a fowtow a fesise fu A Wakititolen.)

³ Leisi Mateyesi 28:16-20. Di Yesesi kon makandaa anga den bakaman fi en, a taigi den sowtu pelensipali wooko den be o du. Na aseefi wooko ya wi e du te anga now. Yesesi taki: „U mu go a sama fu ala kondee, da u meke den toon mi bakaman, . . . leli den fu den du ala den sani di mi taigi u.”

⁴ Yesesi wani ala den bakaman fi en peleiki. A ná den  11 apostel fi en wawan a be gi a wooko ya. Fa u du sabi a sani ya? We, di Yesesi taigi den bakaman fi en na a mongo a Galileya taki den mu peleiki, a ná den apostel fi en wawan be de ape. Yu e membee ete san a engel be taigi den uman? A be taigi den taki: „Wi o si en [a Galileya].” Neen meke u sa biibi taki den umansama di be de bakaman fu Yesesi a ten de, be kon na a komakandaa ya tu. Boiti dati, apostel Pawlesi taki Yesesi be „meke moo enke 500 baala di be de makandii si en” (1 Kor. 15:6). Pe den moo enke 500 sama ya be kon makandaa?

5. Fa u du sabi taki a fu aseefi komakandaa fu Mateyesi 28 Pawlesi be e taki a 1 Korentesama 15:6?

⁵ A fu aseefi komakandaa di sikiifi a Mateyesi kapitel 28 Pawlesi be e taki a 1 Korentesama 15:6. Saide u sa taki a sani ya? We, gaanse fu den bakaman fu Yesesi a Galileya den be e tan. Neen meke a be o moo makiliki fu kon makandaa anga wan gaan kulu sama a wan mongo a Galileya, moo enke fu kon makandaa anga den a wan sama osu a Yelusalem. Wan taa sani a taki baka di Yesesi weki baka, a be kon makandaa anga den 11 apostel fi en kaba aini wan osu a Yelusalem. Efu a den 11 apostel wawan Yesesi be wani gi a wooko fu peleiki, a Yelusalem a be o taigi den a sani ya. A á be o kai den apostel, den uman di be go na a geebi, anga den taa bakaman fi en fu go miti en a Galileya.​—Luk. 24:33, 36.

6. Fa Mateyesi 28:20 e soi taki aini a ten ya seefi u mu yeepi sama fu toon Yesesi bakaman? San e soi taki sama e du a sani di Yesesi be taki aini a ten fu u?

⁶ Meke u luku du fu dii sani. A ná den Kelesten fu a ten fu den apostel wawan Yesesi be gi a wooko fu meke sama toon en bakaman. Fa u du sabi a sani ya? Baka di Yesesi taigi den bakaman fi en taki den mu peleiki, a taigi den tu taki: „Mi o de anga u te enke a kaba fu a goontapu doo” (Mat. 28:20). Aini a ten ya a omen sama e yeepi taawan fu toon Yesesi bakaman leti enke fa a be taki a fesi. Pakisei a sani ya: Ala yali a wan sani fu 300.000 sama e dopu, da den e toon Yesesi bakaman.

7. San wi o luku aini a artikel ya? Saide wi o luku a sani ya?

⁷ A omen sama di e sutudeli Beibel e dopu bakaten. Ma son sama di e sutudeli Beibel anga wi e feele fu toon wan bakaman fu Yesesi. Den lobi sutudeli a Beibel, ma den nai meke moiti du san den leli fu den sa dopu. Ala u wani yeepi den sutudi fu u fu du den sani di den e leli, fu den sa toon wan bakaman fu Kelestesi. A artikel ya o soi u fa u sa yeepi den sutudi fu u fu lobi Yehofa. A o soi u tu fa u sa yeepi den fu go a fesi. Saide u mu sabi den sani ya? Bika son leisi wi abi fu luku efu u mu tapu fu sutudeli Beibel anga wan sama.

8. Saide a á makiliki son leisi fu yeepi den sutudi fu u fu lobi Yehofa?

⁸ Yehofa wani u dini en fu di u lobi en. Neen meke a wooko fu wi a fu yeepi den sutudi fu u fu si taki Yehofa e booko en ede anga den tuutuu, taki a lobi den. U mu yeepi den fu si taki Yehofa de enke ’wan dda gi den pikin di ná abi dda moo. Ai yeepi den uman di man dede’ kaba tu (Ps. 68:5). Te den sutudi fusutan taki Gadu lobi den, denseefi o bigin lobi en tu. Kande a o taanga gi son sutudi fu  si Yehofa enke wan Dda di lobi den, fu di den dda á be lobi den (2 Tim. 3:1, 3). Te yu e sutudeli anga en, i sa poti pakisei a den moo pelensipali manii fu Yehofa. Yeepi den sutudi fi i fu fusutan taki Gadu wani den libi fu teego. Soi den taki Gadu de kabakaba fu yeepi den fu fende a libi ya. San u sa du moo?

9-10. Anga sowtu buku u mu sutudeli anga sama? Saide anga den buku ya u mu sutudeli anga sama?

⁹ Wooko anga a „San Bijbel kan leri wi?” anga „Meki Gado tan lobi yu” buku. Den buku ya meke fu yeepi den Beibelsutudi fu u fu lobi Yehofa. Kapitel 1 fu a Leri wi-buku e piki den akisi ya: A Gadu e meke ogii miti sama? Fa Gadu e fii te ai si fa sama e pina? Anga, I poi toon Yehofa mati? A Gado lobi-buku o yeepi den fu si fa a wooko di den e wooko anga den leli fu Beibel, o yeepi den fu abi wan moo bun libi anga fu toon wan moo bun mati fu Gadu. Winsi anga omen sama yu e sutudeli aseefi buku, toku ala yuu te  yu e go a wan fu den sutudi, i mu seeka bun. A sani ya o yeepi i fu sabi san na a moo bun fasi fa i sa yeepi ibiiwan fu den sutudi fi i.

¹⁰ San i mu du efu wan Beibelsutudi wani sabi wan sani di á sikiifi aini den buku di wi e koboloiki fu leli sama? I sa gi en taanga-sikin fi enseefi go leisi a buku di e taki fu a sani di a wani sabi, da i go doo anga a buku di yu e sutudeli anga en.

11. On ten u mu bigin begi anga wan Beibelsutudi? Fa u sa soi a sutudi taki a pelensipali fu begi te wi e sutudeli Beibel?

¹¹ Begi fosi i bigin sutudeli anga a sama. Baka te i bigin sutudeli anga wan sama yu á mu daaidaai fu bigin, anga fu tapu a sutudi anga begi. A moo bun fu bigin du a sani ya aini den fosi wiki di i bigin sutudeli anga a sama. U mu yeepi a sutudi fu fusutan taki na a santa yeye wawan poi yeepi u fu fusutan a Wowtu fu Gadu. Son peleikiman e leisi Yakowbesi 1:5 gi den sutudi fu soi den saide wi e begi te wi e sutudeli Beibel anga sama. A sikiifi ape taki: „Efu iniiwan fu wi e mankei koni, da meke a tan begi Gadu.” Baka dati den e akisi a sutudi taki: „Fa u sa akisi Gadu fu a gi u koni?” Somen fu den sutudi e piki taki a te wi e begi wi o man akisi Gadu a sani ya.

12. Fa i sa koboloiki Psalm 139:2-4 fu yeepi wan sutudi fu begi moo bun?

¹² Leli a sutudi fi i fa a mu begi. Soi en taki Yehofa wani yee san de neen ati. Soi en tu taki te u wawan e begi, u sa taigi Yehofa ala san de a wi ati. U sa taigi Yehofa sani di wi á taigi nawan taa sama. Holi a pakisei taki Yehofa sabi ala san wi e pakisei. (Leisi Psalm 139:2-4.) U sa gi a sutudi fu u taanga-sikin fu begi Gadu fu yeepi en fu kengi a fasi fa ai denki anga a fasi fa ai tyai enseefi. Meke u taki yu e sutudeli wan pisiten kaba anga wan sama, ma yu e si taki a lobi wan fesa di komoto a falisi biibi. Winsi fa a sabi taki a fesa ya á bun, tokuso a lobi son sani fu a fesa. I sa gi en taanga-sikin fu a taigi Yehofa pilisisi fa ai fii, da a begi en fu a yeepi en fu lobi den sani di Gadu lobi, anga fu buuse den sani di Gadu e buuse.​—Ps. 97:10.

13. (a) Saide wi á mu daaidaai fu kai den sutudi fu u fu kon a komakandaa? (b) Fa u sa yeepi den sutudi fu u fu sen á kisi den tumisi te den kon a komakandaa?

¹³ Ná daaidaai fu kai a sutudi fi i fu kon a komakandaa. Den sani di a sutudi fi yu e yee a den Kelesten komakandaa sa gi en taanga-sikin fu dini Yehofa. Den sa yeepi en tu fu go a fesi. Soi en a felon di den e kai San e pasa aini wan Kownukondee zaal? Baka dati da i kai en fu kon a komakandaa anga i. Efi i man, i sa yeepi en fu doo na a Kownukondee zaal. A bun fu e go anga taa peleikiman na a sutudi. A sani ya o yeepi en fu sabi wantu sama fu a kemeente, da te a kon a komakandaa, sen ná o kisi en tumisi.

14. San sa yeepi wan Beibelsutudi fu go a fesi?

¹⁴ U wani yeepi a sutudi fu u fu go a fesi (Efe. 4:13). Te sama bigin sutudeli Beibel anga u, a den wini di den o fende fu a sutudi den e moo pakisei. Ma te den moo lobi Yehofa, da den e bigin luku fa den sa yeepi taawan di á sabi Yehofa ete. Den e luku tu fa den sa yeepi den baala anga sisa aini a kemeente (Mat. 22:37-39). I sa suku wan bun yuu tu fu soi a  sutudi fi i taki a sa gi moni fu holibaka gi a Kownukondee wooko.

15. Fa u sa yeepi u sutudi fu sabi san a mu du te a abi polobelema?

¹⁵ Leli a sutudi fi i san a mu du te a abi wan polobelema. Meke u taki yu abi wan sutudi di e peleiki kaba, ma a á dopu ete. Efu a taigi i taki wan sama aini a kemeente du wan hati sani anga en, yu á mu taigi en sama abi leti anga sama ná abi leti, ma soi en san Beibel e taki. A sa gi en baala efuso sisa paadon, ma efu a si taki a ná o poi fika a taki, da a sa go taki anga a sama a wan lesipeki fasi. Te a go taki anga en, a mu meke moiti fu ’wini en baala’. (Luku Mateyesi 18:15 tu.) Yeepi i sutudi fu sabi san a mu taki fosi a go na a sama. Soi en fa a sa koboloiki a JW Library^® app, a buku Ondrosuku Bijbel moro fini​—Gi Yehovah Kotoigi, anga jw.org^®, te a wani sabi fa a mu losi wan polobelema. Efu a sabi fa a mu du den sani ya fosi a dopu, a sani ya o yeepi en fu libi bun anga den baala anga sisa aini a kemeente baka te a dopu.

16. Saide a bun fu tyai taa peleikiman go a den sutudi fu u?

¹⁶ Kai taa peleikiman aini a kemeente anga a kelen-owluman fu go anga yu a den sutudi fi i. Saide? Te yu e go anga taa peleikiman na a sutudi, den sa yeepi a sutudi tu anga sani di iseefi á be o man yeepi en. Meke u taki a sutudi fi i meke moiti omen leisi fu tapu anga somoko, ma a á fende wini. I sa kai wan Kotoigi di be e somoko fosi fu go anga i na a sutudi. Kande den sani di a o taigi en a sani di a sutudi be abi fanowdu fu wini a feti di ai feti fu tapu anga a somoko. Efu sen e kisi i fu sutudeli anga a sutudi fi i te i go anga wan sama di abi moo ondoofeni, i sa akisi a baala efuso sisa ya fu sutudeli anga a sama a leisi de. A sutudi fi yu o fende wini fu a ondoofeni di a baala efuso sisa abi. Holi a pakisei taki a moo pelensipali sani, a fu yeepi a sutudi fu a go a fesi.

17-18. San i mu holi a pakisei te yu e luku efi i mu tapu wan sutudi?

¹⁷ Efu a sutudi fi i nai go a fesi, da i mu akisi iseefi taki: ’Mi mu tapu a sutudi?’ Fosi i tapu a sutudi, i mu holi a pakisei san a sutudi poi du, anga san a á poi du. Son sama abi moo ten fanowdu fu go a fesi. Neen meke i mu akisi iseefi taki: ’A sutudi fu mi e go a fesi pikinso te mi luku san a man du anga san a á man du?’ ’Ai bigin du wantu fu den sani di ai leli?’ (Mat. 28:20) Ai teke ten fu wan sutudi toon Yesesi bakaman, ma tokuso a mu e go a fesi pikinpikin.

¹⁸ Ma san u mu du efu wan sama di e sutudeli wan pisiten kaba nai si a sutudeli di ai sutudeli enke wan pelensipali  sani? Meke u taki a sutudi fi i kaba sutudeli a Leri wi-buku, neen a bigin sutudeli a Gado lobi-buku, ma noiti a kon a wan komakandaa. A Membeefesa seefi a á kon wan dei. Son leisi ai meke pikinpikin sani tapu en fu sutudeli. Efu a so a sutudi fi i de, a be o bun fu taki kiin anga en. *

19. San i sa du te i si taki wan sama nai si a sutudeli di ai sutudeli Beibel enke wan pelensipali sani? San i mu holi a pakisei?

¹⁹ Kande i sa akisi en taki: ’San i si enke na a moo gaan sani di sa tapu i fu toon wan Yehofa Kotoigi?’ Kande a sutudi o taki: ’Mi ná abi toobi fu sutudeli Beibel, ma noiti mi o toon wan Yehofa Kotoigi!’ Efu a so ai denki ete baka di a sutudeli Beibel wan hii pisiten, da a moo bun fu tapu a sutudi. Ma kande a sutudi taigi i fu a fosi leisi san e tapu en fu go a fesi. Kande ai feele fu go peleiki osu fu osu. Efu a taigi i san e holi en a baka, a o moo makiliki gi i fu yeepi en.

20. Fa a sani di sikiifi a Toli 13:48 sa yeepi u fu sabi efu u mu tapu wan sutudi?

²⁰ A tyali taki son sutudi de enke den Islayelisama fu a ten fu Eseikiyeli. Yehofa be taigi Eseikiyeli fu den sama ya taki: „Den e si yu enke wan sama di e singi lobisingi, enke wan sama di tongo moin, wan sama di sabi pingi pokusani di meke enke gitali. Den o yee san yu e taki, ma nawan fu den o du san i taki” (Eseik. 33:32). Kande ai taanga gi u fu taigi wan sama taki u ná o sutudeli anga en moo. Ma „a ten di fika á langa moo” (1 Kor. 7:29). Pe fu u lasi ten e sutudeli Beibel anga wan sama di nai go a fesi, a moo bun fu suku sama di soi taki den „ati bun fu fende a teego libi”.​—Leisi Toli 13:48.

21. San na a tekisi fu a yali 2020? San a tekisi ya o yeepi u fu du?

²¹ A tekisi fu a yali 2020, o yeepi u fu meke moiti fu go a fesi anga a wooko di wi abi fu yeepi sama fu toon Yesesi bakaman. Den sani di sikiifi aini a tekisi ya, a wantu fu den sani di Yesesi be taki na a pelensipali komakandaa di a be holi anga den bakaman fi en a wan mongo a Galileya. A be taki: Go a sama fu ala kondee, meke den toon mi bakaman, da u dopu den.​—Mat. 28:19.