1-2. Na cava e tukuna na agilosi ena ibulubulu? Cava e tukuna o Jisu?

ENA matakalailai ni ika16 ni Naisani, 33 G.V., ni se qai oti ga e rua na siga na kena maroroi na yago i Jisu ena ibulubulu, eratou gole yani eso tale na marama qaravi Kalou me ratou lai lumuta na yagona ena isaluwaki kei na ilumu boivinaka. Dua na ka nodratou lolosi ia eratou kidroa ni sa lala tu na ibulubulu! E qai tukuna e dua na agilosi ni sa vakaturi o Jisu, e kaya tale ga: “Sa liu i Kalili [o Jisu], dou na raici koya e kea.”—Maciu 28:1-7; Luke 23:56; 24:10.

² Ni ratou biubiu mai na ibulubulu, e rairai vei ratou o Jisu qai tukuna: “[Dou] lai tukutuku vei ratou na taciqu, me ratou lako yani i Kalili, eratou na raici au kina.” (Maciu 28:10) Vakasamataka mada, qori na imatai ni ka e via cakava o Jisu ni vakaturi oti, e macala gona ni via vakasavuya vei ratou nona tisaipeli eso na ivakaro bibi!

3-4. Eda kila vakacava ni ivakaro ena Maciu 28:19, 20 e sega ni baleti ratou ga na yapositolo? (Raica na iyaloyalo ena waqana.)

³ Wilika Maciu 28:16-20. Ni ratou lai sotavi Jisu na nona tisaipeli, e vakamatatataka na cakacaka bibi era na qarava na nona tisaipeli ena imatai ni senitiuri. Qori tale ga na cakacaka eda vakayacora tiko nikua. E kaya o Jisu: “O koya gona, ni lako moni vakavulici ira na lewe ni veivanua kece ga mera tisaipeli, . . . vakavulici ira mera muria na ka kece au vakarota vei kemuni.”

⁴ E vinakata o Jisu mera vunau na nona imuri. E vakaroti ira gona na nona imuri kece, sega ni o iratou ga na  11 nona yapositolo yalodina. Eda kila vakacava? O cei era tiko ena ulunivanua e Kalili ni vakarota o Jisu na veivakatisaipelitaki? O ratou ga na yapositolo? Nanuma na ka e tukuna na agilosi vei ratou na marama: “Dou na raici koya [e Kalili].” E kena irairai gona ni ratou tiko tale ga e keri na marama yalodina qori. Ia e sega ni o koya ga ya. E tukuna na yapositolo o Paula ni a rairai o Jisu “vei ira na 500 vakacaca na veitacini ena dua ga na gauna.” (1 Kor. 15:6) E yaco i vei qori?

5. Na cava eda vulica ena 1 Korinica 15:6?

⁵ E tiko na vuna vinaka eda kaya kina ni o Paula e vakaibalebaletaki ira tiko na tukuni ena Maciu wase 28 era sota kei Jisu e Kalili. Eda kila vakacava? Kena imatai, e levu na tisaipeli i Jisu era kai Kalili. E veiganiti gona mera sota ga ena ulunivanua e Kalili na ilala levu qori, sega ni dua na vale e Jerusalemi. Kena ikarua, sa sotavi ratou oti na 11 nona yapositolo o Jisu ena dua na vale e Jerusalemi. Ke nanuma me vakaroti ratou ga me ratou vunau qai veivakatisaipelitaki, ena cakava ga qori e Jerusalemi, ena sega ni tukuna me ratou lai sotavi koya i Kalili, wili kina o ratou na marama kei ira na kena vo.—Luke 24:33, 36.

6. Eda kila vakacava ni ivakaro ena Maciu 28:20 e baleti keda tale ga nikua? E muri tiko vakacava qori?

⁶ Dikeva na ikatolu ni vuna. O Jisu e sega ni vakaroti ira ga nona imuri ena imatai ni senitiuri mera veivakatisaipelitaki. Eda kila vakacava? Dikeva na itinitini ni nona veivakaroti o Jisu vei ira nona tisaipeli: “Au tiko vata kei kemuni ena veisiga kece me yacova na ivakataotioti ni veika vakavuravura.” (Maciu 28:20) Me vaka ga e tukuna o Jisu, dua na iwiliwili levu era sa veivakatisaipelitaki tiko nikua. Vakasamataka mada qo! Era papitaiso e veiyabaki e rauta ni 300,000 mera iVakadinadina i Jiova, mera tisaipeli i Jisu Karisito!

7. Na cava eda na vulica? Na vuna?

⁷ Levu na vuli iVolatabu era papitaiso sara. Ia eso era lomalomarua mera tisaipeli i Karisito. Era taleitaka na vuli, ia era sega ni toso mera papitaiso. Ke tiko nomu vuli iVolatabu, e macala ga ni o via vukei koya me muria na ka e vulica, me dua tale ga na tisaipeli i Karisito. Eda na vulica ena ulutaga qo na sala meda uqeta kina na lomadra noda gonevuli, mera toso tale ga vakayalo. Na cava meda veivosakitaka kina qori? Ni toso na gauna, ena rairai vinakati mo vakatulewataka ke veiganiti me tomani na vuli se mo tinia.

8. Na cava ena rairai dredre kina meda uqeta na lomadra noda vuli iVolatabu?

⁸ E vinakata o Jiova meda qaravi koya nida lomani koya. Me noda isausau gona meda vukei ira noda vuli iVolatabu mera kila ni o Jiova e kauaitaki ira yadua, e lomani ira tale ga vakalevu. Eda via vukei ira mera kila ni o Jiova e “tamadra na sega ni vakatamani qai nodra ivakatawa na yada.” (Same 68:5) Ni vakadeitaka o gonevuli ni lomani koya na Kalou, ena rawa ni uqeta sara ga na lomana, ena lomani Jiova vakalevu. Eso na gonevuli era sega ni vakila na loloma vakatama, e dredre gona mera raici Jiova me Tamadra dauloloma. (2 Tim. 3:1, 3) Ni o vakavulici ira ena iVolatabu, vakabibitaka na itovo talei i Jiova. Vukei ira mera kila ni noda Kalou dauloloma  e vinakata mera bula tawamudu, e tu vakarau tale ga me tokoni ira mera rawata qori. Na cava tale eda rawa ni cakava?

9-10. Na ivola cava meda vakayagataka nida caka vuli iVolatabu? Na vuna?

⁹ Vakayagataka na ivola “Na Cava Eda na Vulica ena iVolatabu?” kei na “Sala Meda Tiko ga Kina ena Loloma ni Kalou.” E vakarautaki sara ga na rua na ivola qo meda uqeta kina na lomadra noda gonevuli. Kena ivakaraitaki, e vulici ena wase 1 ni ivola Vulica ena iVolatabu na ulutaga: E kauaitaki keda na Kalou?, Rai ni Kalou me baleta na noda rarawa, kei na Rawa mo itokani i Jiova. Vakacava na ivola Tiko ga ena Loloma ni Kalou? Era vulica ena ivola qori na gonevuli na sala ena vinaka kina nodra bula nira muria na ivakavuvuli vakaivolatabu, mera toro voleka kina vei Jiova. Mo vakavakarau vinaka ena gauna kece ni vuli, veitalia ke o sa vakavulici ira oti eso ena ivola qo. Mo vakasamataka na ka ena ganiti gonevuli.

 ¹⁰ Ia kaya mada ke via kila o nomu gonevuli na ulutaga e vakamacalataki ena dua na ivola e sega ni tiko ena Teaching Toolbox. O rawa ni uqeti koya me qai wilika ga vakataki koya na ivola qori, me tomani ga na vuli ena ivola ni vuli vakatututaki sa cavuti oti mai.

11. Gauna cava me sa tekivu qai tini kina na vuli ena masu? O na vakabibitaka vakacava qori vua nomu gonevuli?

¹¹ Me tekivu na vuli ena masu. Ena vinaka me tekivu qai tini na vuli ena masu. Me caka qori ena kena gauna totolo duadua, de dua ena loma ga ni imatai ni vica na macawa sa wasoma kina na vuli. Meda vukei noda gonevuli me kila ni na matata ga vei keda na Vosa ni Kalou ena veivuke ni yalo tabu. Eso na dautukutuku era vakabibitaka na masu nira wilika na Jemesa 1:5, e kaya: “Ke dua vei kemuni e lailai vua na vuku, me kerea tiko ga vua na Kalou.” Oti era tarogi gonevuli, “Eda na kerea vakacava vua na Kalou na vuku?” De dua ena tukuna o gonevuli meda masu vua.

12. Ena yaga vakacava na Same 139:2-4 mo uqeti nomu gonevuli me vakavinakataka nona ivakarau ni masu?

¹² Vakavulici nomu gonevuli ena ivakarau ni masu. Vakadeitaka vua ni via rogoca o Jiova ni masu mai vu ni lomana. Vakamacalataka nida rawa sara ga ni talaucaka vei Jiova na lomada nida masu taudua, meda tukuna vua na veika ena rairai dredre meda tukuna vua e dua tale. Meda kua ni rere ni cakava qori ni sa kila oti tu o Jiova na noda vakanananu titobu. (Wilika Same 139:2-4.) Eda rawa ni uqeti noda gonevuli me kerei Jiova me vukei koya me vakadodonutaka na rai cala, me muduka tale ga nona itovo ca. Kena ivakaraitaki, kaya mada ke dua sa dede toka nona vuli, ia se taleitaka tiko ga eso na olodei e vu mai na sokalou butobuto. E kila ni cala, ia se taleitaka tiko ga eso na ka e caka kina. Uqeti koya me tukuna vakadodonu vei Jiova na nona rai, me kerea me vukei koya me taleitaka ga na ka e taleitaka na Kalou.—Same 97:10.

13. (a) Na cava meda sureti ira kina noda gonevuli ena soqoni ena gauna totolo duadua? (b) Eda vukei gonevuli vakacava me kua ni madua ni gole yani ena soqoni?

¹³ Sureti nomu gonevuli ena soqoni ena kena gauna totolo duadua. Na veika e rogoca ena soqoni o nomu gonevuli ena rawa ni uqeta na lomana, vukea tale ga nona toso. Vakaraitaka vua na vidio Na Cava e Caka ena Vale ni Soqoni? qai sureti koya mo drau veitomani. Ke rawa, mo vakarautaka na sala me gole yani kina. Ena vinaka me dau veiveisau na dautukutuku era tomani iko ena caka vuli iVolatabu. Ni o cakava qori ena kilai ira vinaka kina na lewe ni ivavakoso o nomu gonevuli, ena rairai sega tale ga ni madua ni gole yani ena soqoni.

14. Na cava ena uqeti gonevuli me toso vakayalo?

¹⁴ E noda isausau meda vukei noda gonevuli me toso vakayalo. (Efeso 4:13) Ni dua e vakadonuya me vuli iVolatabu, ena rairai kauaitaka tiko ga na sala e yaga kina vua. Ia ni tekivu me lomani Jiova vakalevu, ena rairai vakasamataka na sala me vukea kina eso tale kei ira na lewe ni ivavakoso. (Maciu 22:37-39) Ena gauna veiganiti, kua ni tu suka mo tukuna vua nida rawa ni cau meda tokona na cakacaka ni Matanitu ni Kalou.

15. Eda na vukei noda gonevuli vakacava ena ka me cakava ni basika na leqa?

 ¹⁵ Vakavulici nomu gonevuli ena ka me cakava ni basika na leqa. Kena ivakaraitaki, kaya mada ke dautukutuku bera ni papitaiso o nomu gonevuli, qai vakacudrui koya e dua ena ivavakoso. Ni mai vakamacalataka vei iko, mo kua ni veitovaki. Vakamacalataka ga vua na ivakavuvuli vakaivolatabu e rawa ni muria. E rawa ni vosota ga na tacida e vakacudrui koya, ia ke dredre, me lai raici koya me rau veitalanoa vinaka, me nona inaki me ‘vakabulai tacina.’ (Vakatauvatana Maciu 18:15.) Vukei nomu gonevuli me vakarautaka na ka me lai tukuna. Vakaraitaka vua na ivakavakayagataki ni JW Library^®, na iDusidusi ni Vakadidike ni iVakadinadina i Jiova kei na jw.org^®, ena vulica kina na ka me cakava ena leqa e sotava. Ke vulica rawa o nomu gonevuli na sala me walia kina na duidui ni se bera ni papitaiso, ena rawa ni vinaka nona veimaliwai ena ivavakoso ni papitaiso oti.

16. Ena yaga vakacava nomu sureta eso tale mera tomani iko ena vuli iVolatabu?

¹⁶ Sureta eso tale mera veitomani ena vuli, wili kina na ivakatawa ni tabacakacaka ni veisiko mai. Na vuna? Me ikuri ni veika vinaka sa cavuti oti mai, e rawa tale ga nira vukei nomu gonevuli eso na dautukutuku ena so na ka o sega ni kila vinaka sara. Kena ivakaraitaki, kaya mada ke saga vakavica o nomu gonevuli me muduka nona kana tavako ia e dredre tiko ga vua. Sureta e dua na dautukutuku a valuta rawa na leqa qori me tomani iko, de dua a sasaga tale ga vakavica me biuta na vakatavako. Ena rawa ni yaga vakalevu vua nomu gonevuli na nona ivakasala yaga na tacida qori. Ke o nanuma ni dredre mo caka vuli iVolatabu ni tiko e dua na tacida tagane matua, kerea vua me taura na vuli. Mo vakayagataka vinaka na kila e tiko vei ira na mataveitacini. Kua ni guilecava ni noda inaki meda vukei gonevuli me toso vakayalo.

17-18. Na cava mo vakasamataka ke o nanuma mo tinia e dua na vuli iVolatabu?

¹⁷ Ke sega ni cakava tiko o nomu gonevuli na veiveisau me toso vakayalo, o na rairai taroga, ‘Meu sa tinia na vuli?’ Ni o vakalewa tiko na ka mo cakava, mo vakasamataka na kena ituvaki o gonevuli kei na ka e rawata. Eso e taura na gauna nodra toso ni vakatauvatani kei na so tale. Mo taroga: ‘E sa veiganiti na toso e laurai tiko vua noqu gonevuli me salavata kei na kena ituvaki?’ ‘E sa tekivu “muria” tiko se cakava na veika e vulica?’ (Maciu 28:20) Ena rairai taura na gauna me mai tisaipeli e dua, ia e dodonu me cakava tiko na veiveisau.

 ¹⁸ Vakacava ke sa dede toka nona vuli iVolatabu e dua ia e sega ni raica vakabibi na veika e vulica? Vakasamataka na ituvaki qo: Sa vakaotia o nomu gonevuli na ivola Vulica ena iVolatabu, de dua se qai tekivu na ivola Tiko ga ena Loloma ni Kalou, ia se sega vakadua ni tiko ena soqoni, se na iVakananumi! E dau vakadaroya na vuli ena so ga na ka lalai. Ena ituvaki qori, ena vinaka mo drau veivosaki vakadodonu kei nomu gonevuli. *

19. Na cava o rawa ni tukuna ke dua e sega ni raica vakabibi nona vuli? Na cava tale ga mo vakasamataka?

¹⁹ O rawa ni taroga vua, ‘Na cava e vakadredretaka tiko mo dua na iVakadinadina i Jiova?’ De dua ena tukuna o nomu gonevuli, ‘Au taleitaka noqu vuli iVolatabu, ia au na sega ni iVakadinadina i Jiova!’ Ke va qori nona rai ni sa dede toka nona vuli iVolatabu, vakacava ena vakaibalebale ke tomani tiko ga nona vuli? Se, de dua sa na qai tukuna vei iko na ka e tarova tiko nona toso. Kena ivakaraitaki, e nanuma ni sega ni rawa ni vunau e veivale. Ni o sa kila nona rai, sa na qai rawarawa mo kila na sala mo vukei koya kina.

20. Ena yaga vakacava na Cakacaka 13:48 meda kila ke veiganiti me tomani na vuli?

²⁰ E ka ni rarawa ni so na gonevuli era vakataki ira na Isireli ena gauna i Isikeli. E tukuna o Jiova me baleti ira: “Raica! Era raici iko me vaka e dua na sere ni dodomo e lagata e dua e domo vinaka, salavata kei na ivakatagi vakawa e qiriti vakamaqosa. Era na rogoca na nomu vosa, era na sega ni muria.” (Isik. 33:32) Ena rairai dredre meda tukuna vua noda gonevuli nida na tinia na vuli. Ia e bibi meda kila ni “sa vakalekalekataki na gauna se vo.” (1 Kor. 7:29) Meda kua ni vakaoti gauna vei ira na vuli iVolatabu era sega ni toso, ia meda qarai ira na vakaraitaka na yalomalumalumu era via “muria na sala mera bula tawamudu kina.”—Wilika Cakacaka 13:48.

21. Na cava noda tikinivolatabu ni yabaki 2020? Ena uqeti keda vakacava?

²¹ E uqeti keda na noda tikinivolatabu ni yabaki 2020 meda vakavinakataka na ivakarau ni noda veivakatisaipelitaki. E tukuni kina eso na vosa e cavuta o Jisu vei ira na sotavi koya ena ulunivanua e Kalili: ‘Ni lako moni vakavulici ira mera tisaipeli, ni papitaisotaki ira.’—Maciu 28:19.