Skip to content

Yi xósɛxweta ɔ jí

XÓTA NǓKPLƆNKPLƆN TƆN 1

Mi Yì, Bo Kplɔ́n Nǔ Mɛ lɛ nú Ye Ni Huzu Ahwanvu

Mi Yì, Bo Kplɔ́n Nǔ Mɛ lɛ nú Ye Ni Huzu Ahwanvu

XÓTA XWÈ 2020 TƆN TƆN: Hǔn, mi yì, bo kplɔ́n nǔ mɛ lɛ nú ye ni huzu ahwanvu, lobo bló baptɛm nú ye.—MAT. 28:19.

HAN 79 Kplɔ́n Ye Bonu Ye Ni Lidǒ

XÓNUSƆ́ÐÓTE *

1-2. Etɛ wɛnsagun ɖé ka ɖɔ nú nyɔnu lɛ ɖò yɔdo Jezu tɔn kɔn? Xó tɛ Jezu ɖesu ka ɖɔ nú ye?

AYITÉHƆNNU Nisáan sín azǎn 16gɔ́ xwè 33 H.M. tɔn wɛ. Nyɔnu ɖěɖee wǔ kú tawun bɔ ye lɛ́ yí wǎn nú Mawu é ɖé lɛ ɖidó yɔdo Jezu tɔn kɔn. È ɖi cyɔ Aklunɔ Jezu Klisu tɔn é ɔ, ganxixo 36 jɛji bló wɛ é ɖè nɛ. Ye hɛn nǔsáwu wǎnɖagbenɔ kpo célu kpo yì fí e è ɖi i ɖó é bo na sá nú cyɔ ɔ, amɔ̌, é kpaca ye ɖɔ yɔdo ɔ ɖò vɔ̌! Wɛnsagun ɖé ɖɔ nú nyɔnu lɛ ɖɔ Jezu ko fɔ́n, bo ɖɔ gɔ́ na ɖɔ: É “jɛ nukɔn nú mi xwè Galilée; finɛ wɛ mi na mɔ ɛ ɖè.—Mat. 28:1-7; Luk. 23:56; 24:10.

2 Ee nyɔnu lɛ gosin yɔdo ɔ kɔn é ɔ, Jezu ɖesu sɛkpɔ́ ye bo ɖɔ nú ye ɖɔ: “Mi yì, bo ɖɔ nú nɔví ce lɛ ɖɔ ye ni yì Galilée; finɛ wɛ ye na mɔ mì ɖè.” (Mat. 28:10) Jezu na ko ɖó xó taji ɖé lɛ bo na ɖɔ nú ahwanvu tɔn lɛ, ɖó kplé enɛ wɛ nyí nǔ nukɔntɔn e é bló ɖò fínfɔ́n sín kú tɔn gudo é.

MƐ̌ MƐ̌ E JEZU KA ÐEGBE NA?

Hwenu e Jezu xò gò mɛsɛ́dó lɛ kpo mɛ ɖevo lɛ kpo ɖò Galilée ɖò fínfɔ́n sín kú tɔn gudo é ɔ, é ɖegbe nú ye ɖɔ ɖɔ ye ni “yì bo kplɔ́n nǔ akɔta lɛ bǐ, bonu ye ni huzu ahwanvu” emitɔn (Kpɔ́n akpáxwé 3 kpo 4gɔ́ ɔ kpo)

3-4. Etɛwu mǐ ka sixu ɖɔ ɖɔ é kún nyí mɛsɛ́dó lɛ kɛɖɛ wɛ gbeɖiɖe e ɖò Matie 28:19, 20 mɛ é kan ó? (Kpɔ́n ɖiɖe e ɖò akpa ɔ jí é.)

3 Matie 28:16-20. Ðò kplé e Jezu bló xá ahwanvu tɔn lɛ ɖò xwè kanweko nukɔntɔn ɔ mɛ é hwenu ɔ, é dó zǒgbe azɔ̌ taji ɖé jí nú ahwanvu tɔn lɛ ɖɔ ye ni wà. Azɔ̌ ɖokpo ɔ wà wɛ mǐ ɖè ɖò égbé. Jezu ɖɔ: “Hǔn, mi yì bo kplɔ́n nǔ akɔta lɛ bǐ, bonu ye ni huzu ahwanvu ce. . . . Mi kplɔ́n nǔ ye, bonu ye ni setónú nú nǔ e un kplɔ́n mi lɛ bǐ.”

4 Jezu jló ɖɔ mɛ e nɔ xwedó emi lɛ é bǐ ni jla wɛn ɔ. Gbeɖiɖe enɛ fó ɖó mɛsɛ́dó tɔn gbejinɔtɔ́ 11 lɛ kɛɖɛ jí ǎ. Nɛ̌ mǐ ka sixu kú dó enɛ jí gbɔn? Mɛsɛ́dó Jezu tɔn lɛ kɛɖɛ wɛ ɖò Galilée só ɔ jí hwenu e Jezu ɖegbe ɖɔ è ni kplɔ́n nǔ mɛ lɛ bonu ye ni huzu ahwanvu é à? Lɛ̌ flín nǔ e wɛnsagun ɔ ɖɔ nú nyɔnu lɛ é: “[Galilée] wɛ mi na mɔ ɛ ɖè.” Hǔn nyɔnu gbejinɔtɔ́ enɛ lɛ lɔ sixu ko ɖò kplé enɛ tɛnmɛ. Amɔ̌, é ka ko vɔ ǎ.

5. Etɛ 1 Kɔlɛntinu lɛ 15:6 ka kplɔ́n mǐ?

5 Mɛsɛ́dó Pɔlu ɖexlɛ́ ɖɔ Jezu “sɔ́ éɖée xlɛ́ nɔví ɖò Klisu mɛ afɔwe kanweko (500) jɛji zɛɛn.” (1 Kɔ. 15:6) Ðò fitɛ? Mǐ ɖó hwɛjijɔ ɖagbe gegě bo sixu lin ɖɔ kplé e è bló ɖò Galilée bɔ Matie wemata 28gɔ́ ɔ kɛnu d’ewu é wɛ ɖò linlin mɛ nú Pɔlu. Hwɛjijɔ tɛ lɛ? Nukɔntɔn, ahwanvu Jezu tɔn lɛ gegě nyí Galiléenu. Enɛ wu ɔ, é bɔwǔ bɔ è na bló kplé ɖé xá mɛ gegě ɖò só ɖé jí ɖò Galilée hú ɖɔ è ni bló ɖò xwé mɛɖé tɔn gbè ɖò Jeluzalɛmu. Wegɔ́, hwenu e Jezu fɔ́n sín kú gudo é ɔ, é bló kplé ɖé xá mɛsɛ́dó tɔn 11 lɛ ɖò xwé mɛɖesunɔ tɔn ɖé gbè ɖò Jeluzalɛmu hwɛ̌. Nú mɛsɛ́dó lɛ kɛɖɛ wɛ Jezu jló na ɖɔ na ɖɔ ye ni yì kplɔ́n nǔ mɛ lɛ bonu ye ni huzu ahwanvu ɔ, Jeluzalɛmu wɛ é na ko bló mɔ̌ ɖè; é ɖò dandan ɖɔ é ni byɔ Mɛsɛ́dó lɛ, nyɔnu lɛ, kpo mɛ ɖevo lɛ kpo ɖɔ ye ni kplé ɖó Galilée ǎ.—Luk. 24:33, 36.

6. Nɛ̌ Matie 28:20 ka xlɛ́ ɖɔ è na xwedó gbeɖiɖe e ɖɔ ɖɔ è ni kplɔ́n nǔ mɛ lɛ bonu ye ni huzu ahwanvu é égbé gbɔn? Nɛ̌ gbɛtɔ́ lɛ ka ɖò tónú sè nú gbeɖiɖe enɛ wɛ gbɔn dìn?

6 Kpɔ́n hwɛjijɔ taji atɔngɔ́ elɔ. Gbeɖiɖe Jezu tɔn e ɖɔ ɖɔ è ni kplɔ́n nǔ mɛ lɛ bonu ye ni huzu ahwanvu é fó ɖó Klisanwun xwè kanweko nukɔntɔn ɔ tɔn lɛ jí ǎ. Nɛ̌ mǐ ka wà gbɔn bo tuùn? Jezu sú ta nú nǔ e é kplɔ́n ahwanvu tɔn lɛ é kpo xógbe elɔ lɛ kpo: “Un ɖò kpɔ́ xá mi tɛgbɛ bɛ́sín dìn kaka yì jɛ gbè e gbè gbɛ̀ ɔ na vɔ dó é.” (Mat. 28:20) Lee Jezu ɖɔ gbɔn é ɔ, mɛ gegě ɖò alɔ ɖó ɖò azɔ̌ enɛ mɛ wɛ dìn. Lin tamɛ kpɔ́n kpɛɖé! Ðò xwè ɖokpo ɖokpo mɛ ɔ, ɖibla yì gbɛtɔ́ 300 000 wɛ nɔ bló baptɛm bo nɔ huzu Kúnnuɖetɔ́ Jehovah tɔn lobo nɔ lɛ́ nyí ahwanvu Jezu Klisu tɔn!

7. Etɛ jí mǐ ka na ɖɔ xó dó dìn? Etɛwu?

7 Mɛ e ɖò Biblu kplɔ́n wɛ lɛ é nɔ yì nukɔn bo nɔ bló baptɛm. É ɖò mɔ̌ có, é cí ɖɔ mɛ e ɖò Biblu kplɔ́n xá mǐ wɛ ɖò gbesisɔmɛ lɛ é ɖé lɛ nɔ xò nǔ kpɔ́n dó ahwanvu huzuhuzu wu. Nǔ e kplɔ́n wɛ ye ɖè lɛ é nɔ víví nú ye, amɔ̌ ye nɔ yì nukɔn bá bló baptɛm ǎ. Enyi a ɖò Biblu kplɔ́n xá mɛɖé wɛ ɔ, mǐ kúdeji ɖɔ a jló na d’alɔ ɛ bɔ é na zán nǔ e é kplɔ́n lɛ é, bo na wá huzu ahwanvu Klisu tɔn ɖé. Xóta elɔ na ɖɔ xó dó lee mǐ sixu d’alɔ nǔkplɔntɔ́ mǐtɔn bɔ é na yí wǎn nú Jehovah bo na lɛ́ yì nukɔn ɖò gbigbɔ lixo gbɔn é wu. Etɛwu mǐ ka ɖó na ɖɔ xó dó xóta enɛ jí. Ðó hweɖelɛnu ɔ, é sixu byɔ ɖɔ mǐ ni ɖó nǔ nǔkplɔnkplɔn xá mɛɖé nu alǒ gbɔ.

NǓ XÓ Ɔ NI BYƆ AYI MƐ NÚ NǓKPLƆNTƆ́ TOWE

8. Etɛwu é ka sixu vɛwǔ hweɖelɛnu bɔ mǐ na d’alɔ Biblu kplɔntɔ́ mǐtɔn lɛ bonu ye na yí wǎn nú Jehovah?

8 Jehovah jló ɖɔ gbɛtɔ́ lɛ ni sɛn emi ɖó ye yí wǎn n’i wu. Enɛ wu ɔ, nǔ e gbé mǐ na nya é wɛ nyí ɖɔ mǐ ni d’alɔ nǔkplɔntɔ́ mǐtɔn lɛ bonu ye na mɔ nǔ jɛ mɛ ɖɔ Jehovah nɔ kpé nukún dó ye mɛ ɖokpo ɖokpo wu tawun bo lɛ́ yí wǎn nú ye ɖesu. Mǐ jló na d’alɔ ye bɔ ye na nɔ kpɔ́n Jehovah dó mɔ “tɔ́ nú tɔ́cyɔvǐ lɛ, bo nyí xɛnyaɖomɛjitɔ́ nú asúkúsi lɛ.” (Ðɛh. 68:6) Enyi Biblu kplɔntɔ́ towe lɛ tuùn lě dò Mawu yí wǎn nú ye sɔ é ɔ, ye sixu jɛ wǎn yí nú é lɔ jí. É sixu vɛwǔ nú nǔkplɔntɔ́ ɖé lɛ bɔ ye na nɔ kpɔ́n Jehovah dó mɔ Tɔ́ wanyiyinɔ ɖé ɖó tɔ́ yeɖesunɔ tɔn nɔ ɖè wanyiyi xlɛ́ ye ǎ. (2 Tim. 3:1, 3) Enɛ wu ɔ, enyi a ɖò nǔ kplɔ́n xá mɛɖé wɛ hǔn, nɔ tɛɖɛ̌ jijɔ Jehovah tɔn e dɔn mɛ lɛ é jí. D’alɔ nǔkplɔntɔ́ towe lɛ nú ye ni tuùn ɖɔ Mawu wanyiyinɔ mǐtɔn jló ɖɔ ye ni mɔ gbɛ̀ mavɔmavɔ, bo ka lɛ́ ɖò gbesisɔmɛ bo na d’alɔ ye bɔ ye na kpé nǔ enɛ wu. Nǔ ɖevo tɛ mǐ ka sixu lɛ́ bló?

9-10. Enyi mǐ ɖò Biblu kplɔ́n xá mɛ lɛ wɛ ɔ, wema tɛ lɛ mǐ ka ɖó na zán? Etɛwu?

9 Nɔ zán wema “Etɛ Biblu ka Sixu Kplɔ́n Mǐ?” kpo “Lee A Na Hɛn Hwiɖée Ðò Wanyiyi Mawu Tɔn Mɛ Gbɔn É” kpo. Nǔ titewungbe e wu è sɔnǔ nú wema enɛ lɛ é wɛ nyí ɖɔ ye na d’alɔ mǐ bɔ mǐ na bló bɔ nǔ e kplɔ́n nǔkplɔntɔ́ mǐtɔn lɛ wɛ mǐ ɖè é na byɔ ayi yetɔn mɛ. Ði kpɔ́ndéwú ɔ, wemata 1tɔn wema Kplɔ́n Mǐ ɔ tɔn na xósin nú nǔkanbyɔ elɔ lɛ: Mawu ka nɔ kpé nukún dó mǐ wu à? alǒ É nyí adakaxotɔ́ wɛ à?, Nɛ̌ wuvɛ̌ e gbɛtɔ́ lɛ nɔ mɔ é ka nɔ cí nú Mawu?, kpo A ka sixu nyí xɔ́ntɔn Jehovah tɔn à? kpo. Bɔ etɛ ka ɖò wema Hɛn Hwiɖée Ðò Wanyiyi Mawu Tɔn Mɛ mɛ? Wema enɛ na d’alɔ nǔkplɔntɔ́ ɔ bɔ é na tuùn lee nǔgbododó Biblu tɔn lɛ zinzan sixu bló bɔ gbɛzán tɔn na kpɔ́n te bɔ é na lɛ́ sɛkpɔ́ Jehovah d’eji gbɔn é. Enyi a na bo tlɛ ko kplɔ́n wema enɛ lɛ xá mɛ ɖevo lɛ hǔn, nɔ sɔnǔ ganji nú nǔkplɔnkplɔn ɖokpo ɖokpo, bo nɔ hɛn hudo tawun tawun nǔkplɔntɔ́ lɛ tɔn dó ayi mɛ.

10 Mǐ ni ɖɔ ɖɔ nǔkplɔntɔ́ ɖé jló ɖɔ mi na ɖɔ xó ɖó kpɔ́ dó xóta e ɖò wema ɖé mɛ é jí, amɔ̌, wema ɔ ka ɖò Azɔ̌wanúgbá Mɛkplɔnkplɔn Tɔn mǐtɔn mɛ ǎ. A sixu byɔ ɛ ɖɔ é ni xà wema ɔ éɖokponɔ, enɛ ɔ, mi na lɛ́ gbɛkan dó nǔkplɔnkplɔn mitɔn nu ɖò wema e xó mǐ ɖɔ wá yì dìn lɛ é mɛ.

Nɔ xoɖɛ hwɛ̌ cobo bɛ́ nǔkplɔnkplɔn ɔ (Kpɔ́n akpáxwé 11gɔ́ ɔ)

11. Hwetɛnu mǐ ka ɖó na jɛ ɖɛ xò jí ɖò Biblu kplɔnkplɔn ɖé hwenu? Nɛ̌ mǐ ka sixu d’alɔ nǔkplɔntɔ́ lɛ bɔ ye na tuùn nǔ e wu enɛ ɖò taji é gbɔn?

11 Nɔ xoɖɛ hwɛ̌ cobo bɛ́ nǔkplɔnkplɔn ɔ. Enyi a jɛ Biblu kplɔ́n xá mɛɖé jí hǔn, é na nyɔ́ ɖɔ a ni nɔ bɛ́ nǔkplɔnkplɔn ɔ kpo ɖɛ kpo bo nɔ lɛ́ fó kpo ɖɛ kpo. É na nyɔ́ hugǎn ɖɔ a ni yawǔ jɛ mɔ̌ wà jí. Mǐ ɖó na d’alɔ nǔkplɔntɔ́ lɛ bɔ ye na tuùn ɖɔ gbigbɔ mímɛ́ Mawu tɔn kɛɖɛ jɛn sixu d’alɔ mǐ bɔ mǐ na mɔ nukúnnú jɛ Xó Tɔn mɛ. Mɛ e nɔ kplɔ́n Biblu mɛ é ɖé lɛ nɔ tinmɛ nǔ e wu mǐ nɔ xoɖɛ dó bɛ́ nǔkplɔnkplɔn ɔ é, bo nɔ xà Jaki 1:5, é ɖɔ: “Enyi nǔnywɛ hwedó mɛɖé ɖò mi mɛ hǔn, ni byɔ Mawu nú é na na ɛ.” Enɛ gudo ɔ, nǔkplɔnmɛtɔ́ ɔ nɔ kanbyɔ nǔkplɔntɔ́ ɔ ɖɔ “Nɛ̌ mǐ ka sixu byɔ nǔnywɛ Mawu gbɔn?” Nǔkplɔntɔ́ ɔ sixu yí gbè ɖɔ mǐ ɖó na xoɖɛ sɛ́dó Mawu.

12. Nɛ̌ a ka sixu zán Ðɛhan 139:2-4 dó d’alɔ Biblu kplɔntɔ́ ɖé bɔ é na vo dó ɖɔ xó nú Jehovah ɖò ɖɛ mɛ gbɔn?

12 Kplɔ́n lee è nɔ xoɖɛ gbɔn é nǔkplɔntɔ́ towe. Vɔ̌ ganjɛwu na ɛ ɖɔ Jehovah jló na sè ɖɛ e é nɔ xò kpo ayi bǐ kpo lɛ é. Tinmɛ n’i ɖɔ ɖò ɖɛ mǐɖesunɔ tɔn lɛ mɛ ɔ, mǐ sixu ɖɔ nǔ e ɖò ayi mǐtɔn mɛ lɛ é bǐ nú Jehovah, kaka jɛ wuvɛ̌ e mǐ ma ba na ɖɔ nú mɛɖebǔ ǎ lɛ é jí. Nǔgbo ɔ, Jehovah ko tuùn linlin e ɖò ayi gɔngɔn mǐtɔn mɛ lɛ é. (Xà Ðɛhan 139:2-4.) Mǐ sixu lɛ́ dó wusyɛn lanmɛ nú nǔkplɔntɔ́ mǐtɔn lɛ ɖɔ ye ni byɔ Mawu ɖɔ é ni d’alɔ ye bonu ye na huzu linlin masɔgbe lɛ bo ɖu ɖò nǔwalɔ nyanya lɛ jí. Mǐ ni ɖɔ ɖɔ mɛ e ko ɖò Biblu kplɔ́n wɛ nú hwenu ɖè é kpó ɖò wǎn yí nú xwè e gosin pagáwun lɛ gɔ́n é ɖé wɛ. É tuùn ɖɔ é kún nyɔ́ ó, amɔ̌ é ka kpó ɖò vivǐ xwè ɔ sín akpáxwé ɖé lɛ tɔn ɖu wɛ. Dǒ wusyɛn lanmɛ n’i ɖɔ é ni ɖɔ lee nǔ cí n’i tawun é nú Jehovah. Ðɔ n’i ɖɔ é ni savo nú Mawu ɖɔ é ni d’alɔ ɛ bonu é na yí wǎn nú nǔ e Mawu yí wǎn na lɛ é kɛɖɛ.—Ðɛh. 97:10.

Ylɔ̌ Biblu kplɔntɔ́ towe wá kplé lɛ (Kpɔ́n akpáxwé 13gɔ́ ɔ)

13. (a) Etɛwu mǐ ka ɖó na nɔ yawǔ ylɔ́ nǔkplɔntɔ́ mǐtɔn lɛ wá kplé lɛ jí? (b) Nɛ̌ mǐ ka sixu bló gbɔn bɔ nǔkplɔntɔ́ ɖé na vo cí nǔ ɖɔ xwégbe wɛ é ɖè ɖɔhun ɖò kplé lɛ jí?

13 Yawǔ ylɔ́ Biblu kplɔntɔ́ towe wá kplé lɛ. Nǔ e nǔkplɔntɔ́ towe sè bo mɔ ɖò kplé lɛ jí é sixu byɔ ayi mɛ n’i bo na lɛ́ d’alɔ ɛ b’ɛ na yì nukɔn. Xlɛ́ ɛ video Nɛ̌ Nǔ lɛ ka Nɔ Yì Gbɔn Ðò Kpléxɔ Axɔ́suɖuto ɔ Tɔn ɖé Mɛ? bo lɛ́ ylɔ́ ɛ kpo akpakpa sɔ́ mɛ kpo ɖɔ é ni wá. É nyɔ́ bló hǔn, d’alɔ ɛ bonu é na sɛ̀ tɛn wá. Enyi a nɔ kplá wɛnjlatɔ́ vovo lɛ yì nǔkplɔnkplɔn ɔ tɛnmɛ ɔ, é na nyɔ́ tawun. Enɛ na zɔ́n bɔ é na tuùn mɛ ɖevo lɛ ɖò agun ɔ mɛ, bo na lɛ́ vo cí nǔ ɖɔ xwégbe wɛ é ɖè ɖɔhun hwenu e é na wá kplé mǐtɔn lɛ é.

NƆ D’ALƆ NǓKPLƆNTƆ́ Ɔ BONU É NI YÌ NUKƆN ÐÒ GBIGBƆ LIXO

14. Etɛ ka sixu sɔ́ akpakpa nǔkplɔntɔ́ ɖé bɔ é na yì nukɔn ɖò gbigbɔ lixo?

14 Nǔ e gbé nya wɛ mǐ ɖè é wɛ nyí ɖɔ mǐ na d’alɔ Biblu kplɔntɔ́ mǐtɔn lɛ bɔ ye na yì nukɔn. (Efɛ. 4:13) Enyi mɛɖé yí gbè bo na kplɔ́n Biblu ɔ, lee nǔkplɔnkplɔn ɔ na hɛn lè wá n’i gbɔn é wɛ sixu ɖu ayi mɛ n’i jɛ nukɔn. Amɔ̌, enyi wǎn e é yí nú Jehovah é ɖò jijɛji wɛ ɔ, é sixu jɛ tamɛ lin dó lee é na d’alɔ mɛ ɖevo lɛ gbɔn é wu jí, kaka jɛ mɛ e ko ɖò agun ɔ mɛ lɛ é jí. (Mat. 22:37-39) Ðɔ nú nǔkplɔntɔ́ towe ɖò hwenu e é nyɔ́ bló dó é ɖɔ wǔjɔmɛ wɛ é nyí ɖɔ è ni nɔ gudo nú azɔ̌ Axɔ́suɖuto ɔ tɔn ɖò akwɛzinzan linu.

Kplɔ́n Biblu kplɔntɔ́ towe lee é sixu wà nǔ gbɔn hwenu e tagba lɛ wá xwetɔ́n é é (Kpɔ́n akpáxwé 15gɔ́ ɔ)

15. Nɛ̌ mǐ ka sixu d’alɔ Biblu kplɔntɔ́ ɖé b’ɛ na nɔ ɖeɖɛ tagba e sixu wá xwetɔ́n lɛ é ganji gbɔn?

15 Kplɔ́n Biblu kplɔntɔ́ towe lee é sixu wà nǔ gbɔn hwenu e tagba lɛ wá xwetɔ́n é. Mǐ ni ɖɔ ɖɔ Biblu kplɔntɔ́ towe e nyí wɛnjlatɔ́ bo ma ko bló baptɛm ǎ é ɖɔ nú we ɖɔ mɛɖé ɖò agun ɔ mɛ bo wà nǔ nyi dò dó emi. Ma nɔ mɛɖé jí ó, loɔ, tinmɛ nǔ e Biblu ɖɔ é ɖó na bló é n’i. É sixu sɔ́ hwɛ kɛ nɔví ɔ bo wɔn nǔ e jɛ é. Abǐ, nú é ma sixu bló mɔ̌ ǎ ɔ, é ɖó na ɖɔ xó xá ɛ kpo xomɛnyínyɔ́ kpo kpodo wanyiyi kpo bonu fífá na nɔ ye tɛntin. (Sɔ́ jlɛ́ dó Matie 18:15 wu.) D’alɔ nǔkplɔntɔ́ towe bonu é ni sɔnǔ nú nǔ e é na ɖɔ é. Xlɛ́ ɛ lee é sixu zán JW Library ®, Anademẹwe Dodinnanu Tọn Na Kunnudetọ Jehovah Tọn lẹ kpo jw.org® kpo gbɔn bo na dó tuùn ali e nu é na ɖeɖɛ tagba ɔ ɖè lɛ é. Bǎ e mɛ è kplɔ́n ɛ jɛ nukɔn nú baptɛm tɔn b’ɛ nɔ ɖeɖɛ tagba lɛ ɖó é ɔ, bǎ enɛ mɛ wɛ é na vo bo nɔ ayǐ xá mɛ e ɖò agun ɔ mɛ lɛ é ɖó.

16. Etɛwu é ka nyɔ́ ɖɔ a ni ylɔ́ wɛnjlatɔ́ ɖevo lɛ nú ye ni gɔ́ nú we ɖò nǔkplɔnkplɔn ɖé tɛnmɛ?

16 Nɔ ylɔ́ mɛ ɖevo e ɖò agun ɔ mɛ lɛ é ɖɔ ye ni wá nɔ nǔkplɔnkplɔn ɔ tɛnmɛ; a sixu lɛ́ ylɔ́ nukúnkpénuwutɔ́ lɛdo tɔn lɔmɔ̌ hwenu e é na wá é. Etɛwu? Gɔ́ nú hwɛjijɔ e ko wá yì lɛ é ɔ, wɛnjlatɔ́ ɖevo lɛ sixu d’alɔ nǔkplɔntɔ́ towe ɖò ali e nu hwɛ ma sixu kpéwú ɖè ǎ é ɖé lɛ. Ði kpɔ́ndéwú ɔ, nǔkplɔntɔ́ ɖé sixu ɖò tintɛnkpɔn wɛ bá jó azɔ nunu dó, bo ka ko hwe d’ewu azɔn nabi ɖé. Byɔ Kúnnuɖetɔ́ e vlafo ɔ, azɔn gegě wɛ é ko hwedó nǔwalɔ enɛ jijodó wu, b’ɛ wá kpa ɛ é ɖé ɖɔ é ni kplá we yì nǔkplɔnkplɔn ɔ tɛnmɛ. Kúnnuɖetɔ́ hatɔ́ towe ɔ sixu ɖè wě tawun tawun e Biblu kplɔntɔ́ ɔ ɖó hudo tɔn é ɖé lɛ xá ɛ. Enyi a ma sixu vo ɖò nɔví nǔwukpétɔ́ ɖé nukɔn bo kplɔ́n nǔ xá mɛ ɔ ǎ hǔn, byɔ ɛ ɖɔ éyɛ ni kplɔ́n nǔ xá Biblu kplɔntɔ́ ɔ gbè enɛ gbè. Ðebǔ wɛ é na bo nyí ɔ, ɖu lè nǔ e mɛ ɖevo lɛ ko mɔ kpɔ́n é tɔn. Flín ɖɔ nǔ e nya wɛ mǐ ɖè é wɛ nyí ɖɔ nǔkplɔntɔ́ ɔ ni yì nukɔn ɖò gbigbɔ lixo.

UN ÐÓ NA ÐÓ NǓKPLƆNKPLƆN Ɔ TE WƐ À?

17-18. Etɛ jí a ka ɖó na lin tamɛ dó hwenu e a ɖò dida kpɔ́n wɛ ɖɔ emi na ɖó nǔkplɔnkplɔn xá mɛɖé te alǒ gbɔ à jí é?

17 Enyi Biblu kplɔntɔ́ towe ma ɖò nukɔn yì wɛ ganji ǎ ɔ, a sixu jɛ kinkanbyɔ hwiɖée jí ɖɔ, ‘Un ɖó na ɖó nǔkplɔnkplɔn ɔ te wɛ à?’ Enyi a ɖò ninɔmɛ ɔ gbéjé kpɔ́n wɛ ɔ, a ɖó na zé ayi ɖó nǔwukpíkpé mɛ ɔ tɔn lɛ jí. É nɔ byɔ hwenu ɖò mɛɖé lɛ sí cobɔ ye na yì nukɔn; é ka nɔ nyí mɔ̌ nú mɛ ɖevo lɛ ǎ. Kanbyɔ hwiɖée ɖɔ: ‘Nǔkplɔntɔ́ ce ka ɖò nukɔn yì wɛ sɔgbe xá ninɔmɛ tɔn à?’ ‘É ka ko jɛ “tónú sè” nú nǔ e kplɔ́n wɛ é ɖè lɛ é jí à?’ (Mat. 28:20) Nǔkplɔntɔ́ ɖé sixu yì nukɔn kpɛɖé kpɛɖé, amɔ̌, é ɖó na yì nukɔn ɖó bǎ e jɛxa é mɛ.

18 Amɔ̌, enyi mǐ ko ɖò nǔ kplɔ́n xá mɛɖé wɛ nú táan ɖé, bɔ mɛ ɔ ma nɔ kéya nú nǔ e kplɔ́n wɛ é ɖè lɛ é ǎ ɔ, etɛ mǐ ka ɖó na wà? Kpɔ́n ninɔmɛ elɔ: Nǔkplɔntɔ́ towe ko fó wema Kplɔ́n Mǐ ɔ, bo tlɛ sixu ko bɛ́ Hɛn Hwiɖée Ðò Wanyiyi Mawu Tɔn Mɛ, amɔ̌, é ka wá kplé lɛ ɖokpo lě vɔ́vɔ́ kpɔ́n ǎ, kaka jɛ Flǐn jí! Bɔ nǔɖe ma sín nǔɖe nu kpowun ɔ, é nɔ sún nǔkplɔnkplɔn ɔ. Ðò ninɔmɛ mɔhun mɛ ɔ, a ɖó na ɖɔ xó jɔ xó nú nǔkplɔntɔ́ ɔ. *

19. Mɛ e é cí ɖɔ é kún kéya nú Biblu kplɔnkplɔn tɔn ó é ɔ, etɛ a ka sixu ɖɔ n’i? Etɛ lɛ jí a ka ɖó na lin tamɛ dó?

19 A sixu bɛ́ gbɔn lě, ‘Enyi a huzu Kúnnuɖetɔ́ Jehovah tɔn ɔ, etɛ ka na vɛwǔ nú we hugǎn bɔ a lin?’ Biblu kplɔntɔ́ ɔ sixu ɖɔ, ‘Un yí wǎn nú Biblu kplɔnkplɔn, amɔ̌, un ka na huzu Kúnnuɖetɔ́ Jehovah tɔn gbeɖé ǎ!’ Enyi linlin enɛ wɛ é nɔ ɖó dìn e é ko kplɔ́n nǔ nú táan ɖé é ɔ, hwɛjijɔ ɖé ka tíìn, bɔ è na zɔn d’ewu, bo kpó ɖò nǔ kplɔ́n xá ɛ wɛ à? Ðò alɔ ɖevo mɛ ɔ, é sixu nyí azɔn nukɔntɔn e nǔkplɔntɔ́ towe ɖò nǔ e ɖò dindɔn ɛ dó gudo wɛ é ɖɔ nú we wɛ é nɛ. Ði kpɔ́ndéwú ɔ, é sixu nɔ mɔ ɖɔ emi kún sixu jla wɛn gbɔn xwégbe xwégbe gbeɖé ó. Dìn e a tuùn nǔ e lin wɛ é ɖè é ɔ, a sixu mɔ nǔ jɛ nǔ e na d’alɔ ɛ é mɛ hugǎn.

Ma gú hwenu dó ɖò nǔ kplɔ́n xá Biblu kplɔntɔ́ e ma ɖò nukɔn yì wɛ ǎ é ó (Kpɔ́n akpáxwé 20gɔ́ ɔ)

20. Nɛ̌ nǔ e mǐ mɔ jɛ Mɛsɛ́dó 13:48 mɛ é ka d’alɔ mǐ, bɔ enyi mǐ na kpó ɖò nǔ kplɔ́n xá mɛɖé wɛ alǒ gbɔ ɔ, mǐ na tuùn gbɔn?

20 É blawǔ ɖɔ Biblu kplɔntɔ́ ɖé lɛ cí Izlayɛli-ví e nɔ gbɛ̀ ɖò Ezekiyɛli hwenu lɛ é ɖɔhun. Jehovah ɖɔ nú Ezekiyɛli dó ye wu ɖɔ: “Hanvívíjitɔ́ ɖé kpowun wɛ ye sɔ́ we dó mɔ, hanvívíjitɔ́ e ɖó gbè ɖagbe kɔnu bo nɔ dó jihan, bo nɔ ɖò nǔ xò d’emɛ wɛ ɔ wɛ ye sɔ́ we dó mɔ. Ye nɔ sè xó e a ɖɔ lɛ; ye mɛ ɖebǔ ka nɔ bló ɖ’eji ǎ.” (Ezek. 33:32) É sixu vɛwǔ nú mǐ bɔ mǐ na ɖɔ nú mɛɖé ɖɔ mǐ na ɖó nǔkplɔnkplɔn xá ɛ te. Amɔ̌, “hwenu kpɛɖé wɛ kpò.” (1 Kɔ. 7:29) É na nyɔ́ ɖɔ è ni ma gú hwenu mɛtɔn dó ɖò nǔ kplɔ́n xá mɛ e ma ɖò nukɔn ɖebǔ yì wɛ ǎ é ó. Mǐ ɖó na tɛ́n kpɔ́n bo ba mɛ e “ɖó ninɔmɛ ayi mɛ tɔn e jɛxa gbɛ̀ mavɔmavɔ lɛ é.”—Mɛsɛ́dó 13:48, nwt.

Mɛ ɖevo lɛ sixu ɖò fí e a nɔ ɖekúnnu ɖè é bo ɖò ɖɛ xò wɛ bá mɔ alɔdó (Kpɔ́n akpáxwé 20gɔ́ ɔ)

21. Ðɔ xóta mǐtɔn xwè 2020 tɔn. Etɛwu é ka sɔgbe?

21 Xóta mǐtɔn xwè 2020 tɔn na d’alɔ mǐ, bɔ mǐ na zé ayi ɖó lee mǐ sixu wà gbɔn, bɔ nǔ kplɔnkplɔn mɛ lɛ nú ye na huzu ahwanvu zɔ́ mǐtɔn na kpɔ́n te hugǎn gbɔn é jí. Xó ɖěɖee Jezu ɖɔ ɖò kplé taji e é bló ɖò Galilée só ɖé jí é ɖé lɛ ɖ’emɛ; é ɖɔ: Hǔn, mi yì, bo kplɔ́n nǔ mɛ lɛ nú ye ni huzu ahwanvu, lobo bló baptɛm nú ye.Mat. 28:19.

Mi nú mǐ ni kánɖeji bo na zé ayi ɖó lee mǐ sixu wà gbɔn, bɔ nǔ kplɔnkplɔn mɛ lɛ nú ye na huzu ahwanvu zɔ́ mǐtɔn na kpɔ́n te hugǎn é kpo alɔdidó ye bonu ye na bló baptɛm kpo jí (Kpɔ́n akpáxwé 21gɔ́ ɔ)

HAN 70 Ba Mɛ E Jɛxa lɛ É Mɔ

^ akpá. 5 Xóta mǐtɔn xwè 2020 tɔn dó wusyɛn lanmɛ nú mǐ ɖɔ mǐ ni “kplɔ́n nǔ akɔta lɛ bǐ, bonu ye ni huzu ahwanvu.” Jehovah sɛntɔ́ lɛ bǐ wɛ ɖó na setónú nú gbeɖiɖe enɛ. Nɛ̌ mǐ ka sixu bló gbɔn bɔ xó ɔ na byɔ ayi mɛ nú Biblu kplɔntɔ́ mǐtɔn lɛ bɔ ye na huzu ahwanvu Klisu tɔn? Xóta elɔ na xlɛ́ mǐ lee mǐ sixu d’alɔ Biblu kplɔntɔ́ mǐtɔn lɛ bɔ ye na sɛkpɔ́ Jehovah gbɔn é. Mǐ na lɛ́ ɖɔ xó dó lee mǐ sixu wá gbeta ɔ kɔn ɖɔ mǐ na ɖó nǔ Biblu kplɔnkplɔn ɖé nu alǒ gbɔ gbɔn é wu.