1, 2. (1) ¿Jamüsü nünüiki chi aapieekai namüin na jieyuu chajanakana eejachire niʼitaanüin Jesuu? (2) ¿Jamüsü nünüiki Jesuu mapa namüin naya jieyuukana?

WANEE kaʼi shiatapünaamüin süchikijee niʼitaanüin Jesuu, suwasajaapa aikat, oʼunushii kojuyashii jieyuu chaa eejachire niʼitaanüin müliashii. Mojujasü maʼin naaʼin naya jieyuukana. Tia, soʼujatü 16 nisán soʼu juyakat 33 soʼu wakalia. Oʼunushii naya chamüin süpüla noʼyotuin seita otta nejitüin wunuʼu jemeta eejuut naaʼu müliashii. Nainkuuka aaʼin süka nnojoluin nia napüla. Nüküjakalaka namüin wanee aapiee nümaʼanajeejachi Maleiwa sünain nüsoʼiraain aaʼin Jesuu. «Oʼuneechi jooluʼu nia jüpüleerua Galileamüin. Jiʼreechi nia chaʼaya», nümakalaka namüin (Mat. 28:1-7; Luc. 23:56; 24:9, 10).

² Naleʼejapa na jieyuukana amuuyuupaʼajeʼe, eeʼiyalaashi Jesuu namüin wopuluʼu. Nümaka Jesuu namüin: «Shia anaka aluʼu müleka juʼunüle nanainmüin na tawalayuukana jaapiraiwa naya süchiki noʼunüinjanain Galileamüin. Neʼreechi taya chaʼaya» (Mat. 28:10). Tü naaʼinrakat Jesuu palajana süchikijee nüsoʼiraain aaʼin shia nuutkajeʼerüin na nikirajüinkana. Nüküjainjatü namüin waneirua kasa naaʼinrajatka nayakana.

3, 4. ¿Jamüsü watüjaaka saaʼu nnojoluin napülajatüin neʼe na aluwataaushikana tü sümakat Mateo 28:19, 20? (Piirakaa sümüin tü ayaakuaa sünainkat süta tü rewiisütakat).

³ (Paashajeʼera Mateo 28:16-20). Sünain tia outkajawaakat nuluwataain Jesuu na nikirajüinkana sünain aaʼinraa wanee aʼyatawaa kojutuka maʼin. Müshi nia namüin: «Juʼuna jumaala sainküin mmakat süpüshua süpüla jüküjainjatüin tachiki sümüin wayuu [...]. Jikirajeena naya süpüla nayainjanain na tekirajüinkana maa aka jiakana [...]. Jikirajeena naya sünain tü taluwataapüʼükat anain jia süpüla noonooinjatüin sümaa».

 ⁴ Naashin Jesuu, aküjainjana pütchi napüshuaʼa na nikirajüinkana, nnojoishii nayainjanain neʼe na 11 nikirajüin. ¿Jamüsü watüjaaka saaʼu tia? Jülüjataa paaʼin tüü: ¿Nayache neʼe eejanakana na 11 aluwataaushi chaa Galilea soʼu nuluwataain Jesuu sünain ekirajaa wayuu? Soto waaʼin tü nümakat chi aapieekai namüin na jieyuukana: «Jiʼreechi nia chaʼaya [Galilea]», müshi nia namüin. Eeshiijaʼa chajanale naya jieyuukana soʼu nuutkajeʼerüin Jesuu na nikirajüinkana. Nüküjain chi aluwataaushikai Pablo niiʼiyataain Jesuu namüin maʼaka 500 anoujashii soʼu jutkatüin naya (1 Cor. 15:6). ¿Jalajana jutkatüin naya?

5. ¿Jamüsü watüjaaka saaʼu shiain naashajaain achiki Pablo suluʼu 1 Corinto 15:6 tü outkajawaa chajatkalü aainjünüin Galilea, tü aküjünakalü achiki suluʼu Mateo 28?

⁵ Watüjaa aaʼu shiain naashajaain achiki Pablo tü outkajawaa chajatkalü aainjünüin Galilea, tü aküjünakalü achiki suluʼu Mateo 28. ¿Jamüsü watüjaaka saaʼu tia? Shia süka wainmaleein na nikirajüin Jesuu chejeʼewaliikana Galilea. Anasü jutkataa sümaa watta saalii wayuu saaʼu wanee namüna chaa Galilea suulialeʼeya jutkataa suluʼu wanee miichi chayaa Jerusalén. Süchikijee nüsoʼiraain aaʼin Jesuu, chajachi nia outkajaain suluʼu wanee miichi chayaa Jerusalén namaa na 11 aluwataaushi. Nayalejeʼe neʼe nuluwataain Jesuu sünain aküjaa pütchi otta ekirajaa wayuu na polookana waneemüin aluwataaushi, nüküjaleeinjeʼe shia namüin chayaa Jerusalén, nnojotsüjeʼe nuchuntuin namüin noutkajaainjanain chayaa Galilea namaʼaleʼeya na jieyuukana jee waneinnua nikirajüin (Luc. 24:33, 36).

6. (1) ¿Jamüsü watüjaaka saaʼu wamüinjatüin wayakana wapüshuaʼa tü nuluwataakalü anain Jesuu suluʼu Mateo 28:20? (2) ¿Kasa naaʼinraka watta naalii wawalayuu süka noonooin sümaa tia pütchikat?

⁶ Wane kasa jülüjeeka waaʼin shia nnojoluin nayain neʼe na anoujashii namaiwajanakana nuluwataain Jesuu sünain aküjaa pütchi otta ekirajaa wayuu. Tü nümakat, wamüinjatü wayakana wapüshuaʼa. Watüjaa aaʼu tia sutuma tü nümakat Jesuu sajaʼttiamüin nünüiki, müshi nia: «Shiimüin sünain jümaainjachin taya waneepia waneʼereʼeya süntapa tü kaʼi sajaʼlajaweetkat oʼu kasa süpüshua» (Mat. 28:20). Ekeraajüsü maaʼulu tü nüküjakat Jesuu. Watta naalii na wawalayuu ekirajakana wayuu süpüla nanoujainjanain wanaa wamaa. Woutiisashii juyawai maʼaka 300.000 wayuu süpüla naʼyataainjanain nümüin Jeʼwaa otta süpüla noushikajaain süchiirua nukuwaʼipa Jesuu.

7. ¿Kasa wekirajaainjatka anain? ¿Jamüsü anaka wekirajaale sünain tia?

⁷ Watta naalii na wayuu ekirajaakana sünain tü Wiwüliakat jee woutiisaka mapa. Eepejeʼe na nnojoliikana acheküin aʼyatawaa nümüin Jeʼwaa mayaainjeʼe nekirajaain sünain tü Wiwüliakat. Kamalainsü neʼe namüin ekirajawaa, nnojoliipejeʼe naya woutiiseein. Watüjaa aaʼu pikirajüin wayuu süpüla noonooinjanain sümaa sünüiki tü Wiwüliakat otta süpüla noushikajaain süchiirua nukuwaʼipa Kürisüto. Sünain ekirajaayakat tüü, wekirajaajeerü anain tü waaʼinrajatkat süpüla sütanalüin naaʼin na wekirajüinkana tü wekirajakalü anain naya otta süpüla alinjachin Jeʼwaa napüla. ¿Jamüsü anaka wekirajaale sünain pütchikat tüü? Shia süka wayaawateerüin saaʼu ayatüinjachire wekirajüin wanee wayuu.

8. ¿Jamüsü kapüleʼewaika namüin waneinnua wekirajüin alinjachin Jeʼwaa napüla?

⁸ Shia keeʼireeka naaʼin Jeʼwaa shiʼyataainjatüin wayuu nümüin saaʼu alin nia süpüla. Müshiijeseʼe wakaalinjain na wekirajüinkana süpüla nayaawatüin saaʼu naaʼinmajüin Jeʼwaa naya waneʼewai nakua sümaa alin naya nüpüla. Wekirajüin naya süpüla nayaawatüin saaʼu nashin Jeʼwaa «na mooʼutshiikana otta naaʼinmajüin na jieyuu outakana aʼwayuuse» (Sal. 68:5). Nayaawatapa saaʼu na pikirajüinkana sünain alin naya nüpüla Jeʼwaa, aijeechi nia napülaya. Eeshii wayuu ekirajaakana sünain tü Wiwüliakat kapüleekana amüin nayaawatüin saaʼu alin  naya nüpüla Jeʼwaa, süka jamüin, maalin naya apülawaa namaiwa (2 Tim. 3:1, 3). Anashii pikirajüle naya sünain anamiain jee aipüralin maʼin wayuu Jeʼwaa. Pikiraja naya süpüla nayaawatüin saaʼu nücheküin Jeʼwaa napüleerua katüinjatüin noʼu waneepia otta nükaalinjeein naya süpüla nainküin tia. ¿Kasa maa eeka süpüla waaʼinrüin napüleerua na wekirajüinkana?

9, 10. (1) ¿Jarat tü karaloʼuta wekirajüinjatkalü aka wayuu sünain tü Wiwüliakat? (2) ¿Jamüshii wekirajüinjanaka süka tia karaloʼutakat?

⁹ Pikiraja naya süka tü karaloʼutakat ¿Kasa süküjaka wamüin tü Wiwüliakat? otta süka tü karaloʼutakat Wayaawata waneepia waalin nüpüla Maleiwa. Tia piamasükat karaloʼuta süpülajatü wekirajüin na wayuukana süpüla aleewaa nümaa Jeʼwaa. Jamüsüjaʼa suluʼu tü karaloʼutakat ¿Kasa süküjaka wamüin tü Wiwüliakat? ekirajaaya 1, aküjünüsü süchiki pütchikat tüü: ¿Naaʼinmajüinche waya Maleiwa?, ¿mojulaashiche nia?, ¿jamüsü naaʼin Maleiwa müliale waya? otta ¿eeshiche süpüla paʼaleewain Maleiwa? Tü karaloʼutakat Wayaawata waneepia waalin nüpüla Maleiwa süpülajatü nayaawatüin saaʼu na wekirajüinkana tü naaʼinrajatkat süpüla noonooin sümaa tü pütchi suluʼukat tü Wiwüliakat,  süpüla sunoutaain nakuwaʼipa otta aleewaleein naya nümaa Jeʼwaa. Müleka pikirajüitchire wayuu sükajee tia karaloʼutakat, soteesü paaʼin naatawalin nakuwaʼipa na wayuu pikirajakana, müshijeseʼe pikirajaʼawalinjachin maʼin süpülapünaa pikirajüin naya.

¹⁰ Kamalainre nümüin chi pikirajüinkai wanee pütchi naashajeʼeraka suluʼu wane karaloʼuta nnojotka eein saʼaka tü karaloʼuta wekirajakalü aka wayuu, pümaa nümüin naashajeʼeraiwa tia karaloʼutakat nümüiwaʼa. Paaʼinrüinjatü tia süpüla ayatüin nia pikirajüin sünain tü karaloʼuta pikirajakalü aka nia.

11. (1) Wekirajapa wayuu sünain tü Wiwüliakat, ¿joujainjana waya oʼttüin sünain achuntaa nümüin Jeʼwaa? (2) ¿Kasa waaʼinrajatka süpüla niyaawatüin saaʼu chi wekirajüinkai choʼujaain nuchuntuin nümüin Jeʼwaa?

¹¹ Puchunta nümüin Jeʼwaa süpülapünaa pikirajüin. Pikirajüinjachire wanee wayuu sünain tü Wiwüliakat, puchunta nümüin Jeʼwaa süpülapünaa pikirajüin nia. Eesü süpüla paaʼinrüin tia maʼaka jeʼra semaana süchikijee puʼttüin sünain ekirajaa nia. Pikirajeein nia süpüla nütüjaain saaʼu niain neʼe chi naaʼinkai Maleiwa akaalinjaka waya süpüla wayaawatüin saaʼu sünüiki tü Wiwüliakat. Eeshii wawalayuu aküjakana namüin na nekirajüinkana jamüin nachuntüinjanaka nümüin Maleiwa. Otta naashajeʼerüin namüin tü sümakat Santiago 1:5, tü makat: «Müleka eere jaʼaka eekai cheʼojaain nümüin kekiinjachin nia [...] anakaja müleka nüchuntüle nümüin Maleiwa sooʼopünaa tia». Süchikijee tia, nasakirüin na nekirajüinkana sünain tüü: «¿Kasa waaʼinrajatka müleka choʼujaale wamüin kekiinjanain waya?». Eeshiijaʼa namüle na nekirajüinkana namüin: «Achuntuinjana waya nümüin Maleiwa».

12. Sükajee tü sümakat Salmo 139:2-4, ¿kasa waaʼinrajatka süpüla natüjainjanain na wekirajüinkana achuntaa nümüin Jeʼwaa?

¹² Pikiraja nia sünain achuntaa nümüin Jeʼwaa. Püküja nümüin chi pikirajüinkai naapajeein Jeʼwaa nünüiki nuchuntapa nümüin suluʼujee naaʼin. Püküja nümüin eein süpüla nüküjain nümüin Jeʼwaa tü suluʼukat naaʼin, tü isakat nüchiki nüküjain sümüin wayuu, jama niain neʼe Jeʼwaa eʼraajüin maʼin wakuwaʼipa (paashajeʼera Salmo 139:2-4). * Wakaalinjeein na wekirajüinkana süpüla nachuntuin kaalinwaa nümüin Jeʼwaa süpüla neeʼiratüin tü kasa mojusü jülüjakat naaʼin. Otta süpüla nooʼulaain suulia tü kasa mojusü kiʼrakalü anain naya. Jülüjataa paaʼin tüü: jamüshijaʼa eere wanee pikirajüin kamalainkai amüin tü miʼiraa naaʼinrakat na manoujainsaliikana sümaa kakaliaichin nia sünain ekirajawaa, püma nümüin nüküjai nümüin Jeʼwaa jamüin naaʼin otta nuchuntai kaalinwaa nümüin süpüla naaʼinrüin tü nüchekakat Jeʼwaa (Sal. 97:10).

13. (1) ¿Jamüshii wounejaamaatüinjanaka sünain tü outkajawaakat na wekirajüinkana? (2) ¿Kasa waaʼinrajatka süpüla anain naaʼin chi wekirajüinkai nüntapa sünain tü outkajawaakat?

¹³ Puunejaamaata sünain tü outkajawaakat chi pikirajüinkai. Tü niʼrakat jee tü naapajakat sünain tü outkajawaakat shia wanee kasa akaalinjeechika nia süpüla sükooʼomüinraain naalin Jeʼwaa nüpüla. Piiʼiyata nümüin tü videokot ¿Kasache aainjünaka suluʼu tü Piichi Outkajaaleekat?, puunejaa nia sünain tü outkajawaakat jee püsaajüle nia. Anashii naatawaire na wawalayuu pümaakana pikirajapa nia, süka jamüin, niʼraajeenain naya otta aneerü naaʼin nüntapa sünain tü outkajawaakat.

14. ¿Kasa eeka süpüla laülaain atuma naaʼin wanee wekirajüin?

¹⁴ Sotuinjatü waaʼin wakaalinjain chi wekirajüinkai süpüla laülaainjatüin naaʼin sünain anoujaa (Éf. 4:13). Eeshii na wayuu ekirajaweekana  sünain tü Wiwüliakat shiiʼiree aneein neʼe nakuwaʼipa. Sukooʼomüinraapa naalin Jeʼwaa napüla, nayaawata aaʼu nakaalinjainjanain wayuu jee nakaalinjainjanain na wawalayuukana (Mat. 22:37-39). Püküja nümüin eein süpüla nüsülajüin nneerü süpüla tü aʼyatawaakat nümüin Jeʼwaa, püküja tia nümüin anashiipa shia saaʼin pümüin.

15. ¿Kasa waaʼinrajatka süpüla nütüjainjachin chi wekirajüinkai akumajaa sukuwaʼipa wanee mojujirawaa?

¹⁵ Pikiraja nia süpüla nütüjain achecheraa naaʼin soʼunnaa tü alatakat nümüin. Anuu wanee sukuwaʼipa: nüküjataarale pümüin wanee pikirajüin aküjakai pütchi sümaa nnojoyülin woutiisain nia airuʼuluin nünüiki wanee wawala nümüin, ¿kaseerü paaʼinraka? Nnojo wanaawain paaʼin nümaa. Shia anaka aluʼu pikirajaale nümaa sünain tü sümakat tü Wiwüliakat süchiki tia. Püküjeein nümüin anain motule naaʼin naainjala chi wawalakai nümüin jee shiale naashajaain nümaa kapüleere nümüin motuin naaʼin naainjala (anasü paashajeʼerüle Mateo 18:15). Pükaalinjeein nia süpüla nukumajüin tü nünüikinjatkat nümüin chi wawalakai. Pikiraja nia sünain achajawaa pütchi suluʼu JW Library^®, Nachajaayainjatü pütchi na aküjaliikana pütchi nüchiki Jeʼwaa jee müsia jw.org^®. Nuusüteerü anain yala tü naaʼinrajatkat süpüla nukumajüin sukuwaʼipa wanee mojujirawaa. Nütüjale süpüleerua tia süpülapünaa woutiisain nia, mapüleejeerü nümüin anajiraain nia mapa namaa na wawalayuukana.

16. ¿Jamüshii wounejaainjanaka waneinnua wawalayuu wekirajapa chi wekirajüinkai?

¹⁶ Puunejaa waneinnua wawalayuu sünain ekirajaa nia jee niale puunejaain chi wawala alapalaakai waaʼu. ¿Jamüsü anaka paaʼinrüle tia? Aküjünüsü suluʼu pütchi 13 waneirua kasa anasü eeka sünainjee aaʼinraa tia. Jee müsia, eeshii süpüla nakaalinjain na wawalayuukana chi pikirajüinkai sünain waneirua kasa isaka nüchiki. Jamüsüjaʼa kapüleere nümüin nuuʼulaain suulia akamüjaa, eeshi süpüla pümaain wanee wawala akamüjapuʼukai nümaiwa otta kapüleepuʼukai amüin ooʼulawaa suulia tia. Eeshijaʼa nüküjeechire nümüin chi pikirajüinkai tü kasa anakat süpüla naaʼinrüin. Mmoluwaale paaʼin sünain ekirajaa nuʼupala chi wawalakai, eeshi süpüla pümüin nümüin niaiwa ekirajüin. Aneerü maʼin namüin na pikirajüinkana pikirajawaire nia namaa waneinnua wawalayuu. Jülüjeesü paaʼin shiain kachiiruainjatüin waaʼin wakaalinjain na wekirajüinkana süpüla alinjachin Jeʼwaa napüla.

17, 18. ¿Kasa jülüjeeka waaʼin wooʼulaainjanale suulia ekirajaa wanee wayuu?

¹⁷ Nnojorüle niiʼiratüin nukuwaʼipa chi wekirajüinkai, jülüjeesü waaʼin wooʼulaainjanale suulia wekirajüin nia. Jülüjeepejeʼe waaʼin tü kasa nuuntakat jee tü kasa isakat nüchiki. Eeshii na kakaliakana süpüla neeʼiratüin nakuwaʼipa, makalaka anain süpüla wasakireʼerüin waaʼin sünain tüü: «¿Jaʼyasüche saaʼu niiʼiratüin nukuwaʼipa? ¿Naaʼinrüinche tü nikirajaakalü anain?» (Mat. 28:20). Eeshi kakaliale wanee wayuu süpüla niiʼiratüin nukuwaʼipa, niiʼiratüinjatpejeʼe shia shiʼipaʼaya nikirajaain.

¹⁸ ¿Jama mojutuyaale nümüin tü nikirajaakalü  anain? Najaʼttirüitpale tü karaloʼutakat ¿Kasa süküjaka wamüin tü Wiwüliakat? jee nuʼttuichipale sünain ekirajawaa sünain tü karaloʼutakat Wayaawata waneepia waalin nüpüla Maleiwa sümaa nnojotyülin nuʼunuin sünain tü Outkajawaakat eere Sotuin Waaʼin Outuin Jesuu jee nnojoluwaire nikirajaain süpüleerua aaʼinraa waneirua kasa, acheküshii waashajaain nümaa. *

19. (1) ¿Kasa eeka süpüla waküjain nümüin wanee wekirajüin mojutuyaale nümüin tü nikirajaakalü anain? (2) ¿Kasa jülüjainjatka waaʼin süpülapünaa waaʼinrüin tia?

¹⁹ Eesü süpüla müin wanüiki nümüin: «¿Kasa kapüleeka pümüin süpüla püküjalin pütchi nüchiki Jeʼwaa?». «Kamalainsü tamüin ekirajawaa sünain tü Wiwüliakat, kapüleepejeʼe tamüin taküjalinjachin pütchi», nümüle wamüin wanee wekirajüin sümaa kakaliaichin nia wekirajüin, ¿ooʼulaainjanache waya suulia wekirajüin nia? Eesüjaʼa nüküjeerüle wamüin jamüin kapüleeka nümüin nüküjalin pütchi. Eesüjaʼa jülüjale naaʼin iseerüin nüchiki nüküjain pütchi sainküin miichi. Watüjaapa saaʼu tü nümakat mapüleejeerü wamüin wakaalinjain nia.

20. ¿Jamüsü sünüiki Aluwataaushikana 13:48 süpüla wayaawatüin saaʼu müleka ayatüinjachire wekirajüin wanee wayuu?

²⁰ Eeshii na wekirajüin makana akuwaʼipa maʼaka saaʼin nakuwaʼipa na israeliita eejanakana nükalioʼu Ezequiel. Anuu nünüiki Jeʼwaa nümüin Ezequiel: «Müshi pia namüin maʼaka saaʼin niiʼirain wanee wayuu anakai maʼin amüraluʼu jee anakai maʼin atalejia sümüin nümüraajüin. Naapajeerü pünüiki, nnojotpejeʼe naaʼinreerüin tü pümakat» (Ezeq. 33:32). Kapüleesü wamüin waküjain nümüin wanee wekirajüin wooʼulaainjanain suulia wekirajüin nia, waaʼinrüinjatpejeʼe tia süka «sajaʼtteerüin maalü tü wakalia waʼyataainjatkat oʼu nümüin chi Senyotkai» (1 Cor. 7:29). Wooʼulaa suulia wekirajüin na wayuu nnojoliikana eeʼirateein nakuwaʼipa, naya wachajaa na «kapülakana aaʼin nünüiki Maleiwa süpüla eeinjanain naya waneepia» (paashajeʼera Aluwataaushikana 13:48, TNM). *

21. (1) ¿Jarat tü pütchi süpülajatkat tü juyakat 2020? (2) ¿Kasa sükaalinjeenaka anain waya tia pütchikat?

²¹ Tü pütchi süpülajatkat tü juyakat 2020, sükaalinjeena waya sünain anouteʼeraa tü waaʼinrakat wekirajapa wayuu. Süpüshi tia pütchikat shia tü nüküjakat Jesuu soʼu chajachin nia ekirajüin saaʼu wanee namüna chaa Galilea, anuu süpüshi tia nümakat: «Juʼuna jümaala, jikiraja na wayuukana jee juwoutisaaja naya» (Mat. 28:19).