1, 2. ¿Mbaʼépa heʼi peteĩ ánhel umi kuña oho vaʼekuépe Jesús sepultúrape, ha mbaʼépa Jesús voi heʼi chupekuéra upe rire?

KOʼẼ javete pe 16 de Nisán áño 33-pe, unos kuánto kuña oservíva Ñandejárape oñembyasy ohóvo Jesús sepultúrape. Koʼã kuña oho omoĩ hag̃ua aséite perfumádo ha umi mbaʼe hyakuã porãva Jesús retekuére, oĩmava upépe 1 día imédio rasa. Og̃uahẽvo upépe, umi kuña tuichaiterei oñemondýi, pórke pe sepultúrape ndaipóri mbaʼeve. Upépe peteĩ ánhel heʼi chupekuéra Jesúspe oñemopuʼãma hague umi omanóva apytégui, ha heʼive: “Haʼe ohóma hína pene renonderã Galiléape. Upépe pehecháta chupe” (Mat. 28:1-7; Luc. 23:56; 24:10).

² Umi kuña oho rire pe sepultúragui, Jesús voi oñemboja hendapekuéra ha heʼi chupekuéra: “Tapeho pemombeʼu che ermanokuérape, ha peje chupekuéra toho Galiléape cherecha hag̃ua” (Mat. 28:10). Orresusita riremi, Jesús pyaʼe porã voi oorganisa vaʼekue ko rreunión, upévare ikatu jaʼe katuete orekóne hague algúna instruksión iñimportantetereíva idisipulokuérape g̃uarã, pórke kóva hína pe primer mbaʼe haʼe ojapóva orresusita rire.

3, 4. ¿Mbaʼérepa ikatu jaʼe pe mandáto jatopáva Mateo 28:19, 20-pe noñemeʼẽi hague umi apóstolpe añónte? (Ehecha pe taʼanga oĩva ko rrevísta apére).

³ (Elee Mateo 28:16-20). Pe rreunión Jesús oorganisa vaʼekuépe, haʼe omyesakã idisipulokuérape ojapo vaʼerãha hikuái peteĩ traváho iñimportantetereíva upe tiémpope, ha upe traváho ñande jajapo hína avei ko ñane tiémpope. Jesús heʼi vaʼekue: “Tapeho pemboʼe umi hénte entéro paisguápe oiko hag̃ua chuguikuéra che disípulo. [...] Ha pemboʼe chupekuéra ojapo hag̃ua entéro mbaʼe amanda vaʼekue peẽme”.

⁴ Jesús oipota entéro isegidorkuéra opredika. Haʼe nomandái  vaʼekue upéva umi 11 apóstol ifiélvape añónte. ¿Mbaʼérepa ikatu jaʼe upéva? Jesús omeʼẽrõ guare ko mandáto, upe montáñape noĩri vaʼekue umi apóstol añónte. Ñanemanduʼa vaʼerã pe ánhel heʼi hague umi kuñáme: “[Galiléape] pehecháta chupe”. Upévare ikatu jaʼe umi kuña ifiélva oĩne hague avei upe rreuniónpe. Péro ndahaʼéi upévante. Apóstol Pablo omombeʼu avei: “Peteĩ díape Cristo ojechauka mas de 500 ermánope” (1 Cor. 15:6). ¿Moõpa oiko raʼe upéva?

5. ¿Mbaʼérepa ikatu jaʼe 1 Corintios 15:6-pe Pablo oñeʼẽ hague pe rreunión oñemombeʼúvare Mateo kapítulo 28-pe?

⁵ Ikatu jaʼe upérõ Pablo imanduʼa hague pe rreunión oiko vaʼekuére Galiléape ha oñemombeʼúva Mateo kapítulo 28-pe. ¿Mbaʼérepa jaʼekuaa upéva? Primero, la majoría Jesús disipulokuéra galileo vaʼekue, ha upe rreuniónpe éntre heta oĩ vaʼekue hikuái. Upévare isentidove oñembyatýramo hikuái peteĩ montáñape Galiléape, oñembyaty rangue peteĩ ógape Jerusalénpe. Segundo, Jesús orresusita rire oñembyatýma kuri umi 11 ijapostolkuérandi peteĩ ógape Jerusalénpe. Ha oimérire Jesús omeʼẽse raʼe ko mandáto umi apóstolpe añónte, heʼítama voi kuri chupekuéra upérõ, ojerure rangue chupekuéra, umi kuñáme ha umi ótro idisípulope ohopa hag̃ua Galiléape oñembyaty hag̃ua hendive upépe (Luc. 24:33, 36).

6. a) ¿Mbaʼéichapa Mateo 28:20 ohechauka pe mandáto Jesús omeʼẽ vaʼekue oñekumpli vaʼerãha ñane tiémpope? b) ¿Mbaʼeichaite pevépa oñekumpli hína upe mandáto?

⁶ Ñapensamína avei ko mbaʼére. Jesús ningo nomeʼẽi vaʼekue upe mandáto umi kristiáno oikóvape upe tiémpope añónte. ¿Mbaʼéichapa jaikuaa upéva? Pórke omeʼẽ rire isegidorkuérape pe mandáto, Jesús heʼi chupekuéra: “Che aĩta penendive káda día, og̃uahẽ meve pe fin” (Mat. 28:20). Koʼág̃arupi oñekumpli hína upe Jesús heʼi vaʼekue, pórke oĩ hetaiterei oipytyvõva hapichápe oiko hag̃ua chuguikuéra Jesús disípulo. Epensamíntena: Káda áño ningo haimete 300.000 persónagui oiko Jesús disípulo, haʼekuéra ojevautisa ha oiko chuguikuéra testígo de Jehová.

7. ¿Mbaʼépa ñaanalisáta koʼág̃a, ha mbaʼérepa?

⁷ Heta umi ostudiáva la Biblia oprogresa porã ha ojevautisa. Péro oĩ avei umi ostudiáva ñanendive ha okyhyjéva oiko hag̃ua chuguikuéra Jesús disípulo. Ogusta chupekuéra umi mbaʼe oaprendéva, péro ndoprogresái ojevautisa hag̃uáicha. Oiméramo nde rembostudia hína la Biblia peteĩ persónape, katuete oiméne reipytyvõse chupe omoĩ hag̃ua en práktika umi mbaʼe oaprendéva, ha oiko hag̃ua chugui Cristo disípulo. Ko artíkulope jahecháta mbaʼéichapa ikatu ñaipytyvõ ñane estudiántepe ohayhu hag̃ua Jehovápe ha avei oprogresa hag̃ua. ¿Mbaʼérepa iñimportánte ñaanalisa ko mbaʼe? Pórke og̃uahẽta peteĩ moménto tekotevẽtahápe jadesidi jasegítapa jastudia hendive térãpa nahániri.

8. ¿Mbaʼérepa sapyʼánte ikatu ijetuʼu ñaipytyvõ ñane estudiántepe ohayhu hag̃ua Jehovápe?

⁸ Jehová ningo oipota umi hénte oservi chupe ohayhúgui chupe. Upévare ñande jaipota ñane estudiánte ontende Jehová ohayhuetereiha chupe ha oñeinteresaha hese. Ñande ñaipytyvõse chupe ohechakuaa hag̃ua Jehová haʼeha ‘peteĩ túa umi ityreʼỹvape g̃uarã, ha odefendeha umi viúdape’ (Sal. 68:5). Umi ñane estudiánte ohechakuaávo Jehová ohayhuetereiha chupekuéra, provávlemente haʼekuéra oñepyrũtama ohayhu avei chupe. Upéicharõ jepe, algúnope g̃uarã ikatu ijetuʼu ohechakuaa hag̃ua Jehová haʼeha peteĩ Túa oporohayhúva, pórke ikatu oime ituakuéra núnka noñeinteresái vaʼekue hesekuéra (2 Tim. 3:1, 3). Upévare, jastudia jave peteĩ persónandi, jahechauka porã vaʼerã chupe umi kualida porãite Jehová orekóva. Ñaipytyvõ chupekuéra ontende hag̃ua Ñandejára ñanderayhuetéva oipotaha haʼekuéra oiko pára siémpre, ha oipytyvõseha chupekuéra ohupyty hag̃ua upéva. ¿Mbaʼépa avei ikatu jajapo?

9, 10. ¿Mbaʼe lívropa jaipuru vaʼerã jastudia hag̃ua la Biblia peteĩ persónandi, ha mbaʼérepa?

 ⁹ Jaipuru umi lívro “¿Mbaʼépa ñanemboʼe la Biblia?” ha “Jasegíkena jaiko Ñandejára mborayhúpe”. Koʼã lívro ningo ojeprepara voi ikatu hag̃uáicha ñaipytyvõ ñane estudiántepe ohayhu hag̃ua Jehovápe. Por ehémplo, pe kapítulo 1 orekóva pe lívro Mbaʼépa ñanemboʼe, oñeʼẽ koʼã mbaʼe rehe: “¿Ñanderayhúpa Ñandejára térãpa ipyʼahatã ñanendive?”, “¿Mbaʼéichapa oñeñandu Ñandejára ohechávo jasufriha?”, ha “Nde ikatu reiko Jehová amígoramo”. ¿Mbaʼéichapa ikatu ñanepytyvõ pe lívro Jaiko Ñandejára mborayhúpe? Upéva ohechaukáta pe estudiántepe katuete oho porãvetaha chupe ha oñemoag̃uivetaha Jehováre osegíramo umi konsého oĩva la Bíbliape. Oiméramo jepe jastudiáma raʼe ótra persónandi koʼã lívro, lomímonte jajeprepara porã vaʼerã káda estúdiope g̃uarã, ikatu hag̃uáicha ñaipytyvõ upe persónape asegún pe haʼe oikotevẽva.

¹⁰ ¿Péro mbaʼépa ikatu jajapo ñane estudiántepe ointeresáramo peteĩ téma noñemyesakãiva umi puvlikasión oĩvape ñande Kit de Enseñánsape?  Ikatu ñamokyreʼỹ chupe olee hag̃ua ikuéntare pe puvlikasión oñeʼẽva upe témare. Péicha ñande ikatúta jasegi ñambostudia chupe jaipurúvo umi lívro ñamensiona vaʼekue angete.

11. a) Jastudia jave peteĩ persónandi, ¿mbaʼe moménto guivépa iporãvéta ñañepyrũramo ñañemboʼe hendive? b) ¿Mbaʼéichapa ikatu ñamyesakã chupe mbaʼérepa iñimportánte ñañemboʼe jastudia mboyve?

¹¹ Ñañemboʼe ñañepyrũ mboyve pe estúdio. Jastudia jave la Biblia peteĩ persónandi, iporãta ñañemboʼéramo ñañepyrũ mboyve pe estúdio ha avei ñaterminávo. Ani ñahaʼarõiterei upearã, síno jajapo vaʼerã upéva ija vovéntema ñandéve. Ñaipytyvõ vaʼerã ñane estudiántepe ohechakuaa hag̃ua Jehová ñanepytyvõramo añoite ijespíritu rupive ikatutaha ñantende Ñandejára Ñeʼẽ. ¿Mbaʼéichapa ikatu jajapo upéva? Oĩ ermáno oleéva iñestudiántepe Santiago 1:5 omyesakã hag̃ua mbaʼérepa iñimportánte ñañemboʼe jastudia mboyve. Upépe heʼi: “Oĩramo pende apytépe oikotevẽva arandu, ojerure meme vaʼerã Ñandejárape”. Upéi oporandu pe persónape: “¿Mbaʼéicha ikatu jajerure Ñandejárape tañanemoarandu?”. Ikatu hína pe estudiánte voi ohechakuaa tekotevẽha ñañemboʼe Ñandejárape ha jajerure chupe ajúda.

12. ¿Mbaʼéichapa ikatu jaipuru Salmo 139:2-4 ñaipytyvõ hag̃ua ñane estudiántepe omombeʼupaite hag̃ua Jehovápe mbaʼéichapa oñeñandu?

¹² Ñaipytyvõ ñane estudiántepe oñemboʼekuaa hag̃ua. Ñamyesakã chupe Jehová ohenduseha umi ñemboʼe haʼe ojapóva ikorasõite guive. Jaʼe vaʼerã chupe ñañemboʼe jave Jehovápe ikatuha ñamombeʼupaite chupe entéro mbaʼe, ha ikatuha voi ñamombeʼu chupe umi mbaʼe ñañandúva ha ndajaipotáiva avave oikuaa. Amo ipahápe ningo Jehová oikuaapaitéma voi entéro mbaʼe oĩva ñande pyʼapýpe (elee Salmo 139:2-4). Ikatu avei ñamokyreʼỹ ñane estudiántepe ojerure hag̃ua Jehovápe toipytyvõ chupe ikatu hag̃uáicha okambia opensa lája, térã oheja hag̃ua umi vísio ha kostúmbre naiporãiva. Por ehémplo, ñamoĩ chupe peteĩ estudiántepe ogustaitereiha peteĩ fiésta kristianokuéra ndovaléiva ofesteha. Haʼe oikuaa upéva oĩ vaiha, péro ogusta gueteri chupe unas kuánta kósa ojejapóva jepi upépe. Upéicha jave, ñamokyreʼỹ vaʼerã ñane estudiántepe omombeʼu hag̃ua Jehovápe mbaʼéichapa oñeñandu, ha ojerure asy hag̃ua chupe ohayhu hag̃ua umi mbaʼe Jehová ohayhúva añoite (Sal. 97:10).

13. a) ¿Mbaʼérepa ndovaléi ñahaʼarõiterei ñainvita hag̃ua ñane estudiántepe oho hag̃ua rreunionhápe? b) ¿Mbaʼépa ikatu jajapo ñane estudiánte oñeñandu porãve hag̃ua ág̃a oho vove rreunionhápe?

¹³ Ani ñahaʼarõiterei ñainvita hag̃ua ñane estudiántepe oho hag̃ua rreunionhápe. Umi mbaʼe ohecha ha ohendúva rreunionhápe, ikatu omomýi peteĩ estudiántepe oservi hag̃ua Jehovápe ha oipytyvõ chupe oprogresa hag̃ua. Jahechauka chupe pe vidéo ¿Mbaʼéichapa rojapo ore rreunionkuéra?, ha ñainvita chupe oho hag̃ua ñanendive rreunionhápe. Ijáramo ñandéve, ikatu voi jajeofrese jaha hag̃ua ipiári. Iporãta avei ñainvitáramo diferénte ermánope oho hag̃ua ñanendive ñande estúdiope. Upéicha pe estudiánte oikuaátama heta persónape kongregasiónpe, ha oñeñandu porãvétama ág̃a oho vove rreunionhápe.

14. ¿Mbaʼépa omomýita peteĩ estudiántepe oipytyvõ hag̃ua ótrope?

¹⁴ Ñande ningo jaipota ñane estudiánte oprogresa porã (Efes. 4:13). Peteĩ persóna oñepyrũ jave ostudia la Biblia, oiméne ointeresave chupe mbaʼéichapa ideprovéchota chupe pe estúdio. Péro ohayhúvo ohóvo Jehovápe, ikatu hína haʼe oñepyrũ opensa mbaʼéichapa ikatu oipytyvõ ótrope, umíva apytépe umi ermanokuérape (Mat. 22:37-39). Ág̃a opyta porã vove, ani jaduda jaʼe hag̃ua chupe haʼe ikatuha omeʼẽ ikontrivusión oapoja hag̃ua umi mbaʼe ojejapóva Ñandejára Rréino rehehápe, ha upéva haʼeha voi peteĩ priviléhio ñande jarekóva.

15. ¿Mbaʼéichapa ikatu ñamboʼe ñane estudiántepe mbaʼépa ojapo vaʼerã oĩ jave provléma?

 ¹⁵ Ñamboʼe ñane estudiántepe mbaʼépa ojapo vaʼerã oreko jave provléma. Ñamoĩ chupe ñane estudiánte haʼemaha peteĩ puvlikadór no vautisádo, ha omombeʼu ñandéve peteĩ ermáno ojapo térã heʼi hague álgo ombopochýva chupe. ¿Mbaʼépa ikatu jajapo? Ñasẽ rangue peteĩva ládope, ñamyesakã vaʼerã chupe mbaʼépa heʼi la Biblia. Haʼe ningo ikatu operdona pe ermánope ha hesarái upe oiko vaʼekuégui. Péro ndaikatúiramo oheja reínte upe mbaʼe, upéicharõ oho vaʼerã oñeʼẽ upe ermánondi mborayhúpe ha pyʼaguapýpe porãnte, ikatu hag̃uáicha ojogueraha porã jey oñondive (ekompara Mateo 18:15 heʼívare). Ñaipytyvõ vaʼerã ñane estudiántepe oprepara hag̃ua la heʼítava. Jahechauka chupe mbaʼéichapa ikatu oipuru pe aplikasión JW Library^®, pe Gía oipurúva testígo de Jehová otopa hag̃ua informasión ha ñande sítio jw.org^®, otopa hag̃ua informasión ikatúva oipytyvõ chupe ko situasiónpe. Koʼág̃ama haʼe oaprendéramo mbaʼéichapa ikatu osolusiona oreko jave provléma ótrondi, ág̃a ojevautisa rire ojogueraha porãvéta umi ermánondi kongregasiónpe.

16. ¿Mbaʼérepa iporã avei ñainvita diferénte ermánope ñanemoirũ hag̃ua pe estúdiope?

¹⁶ Ñainvita diferénte ermánope ha pe superintendénte de sirkuítope ñanemoirũ hag̃ua pe estúdiope. ¿Mbaʼérepa iporã jajapo upéva? Upéva ningo ou porãitereíta pe estudiántepe, jahecháma haguéicha párrafo 13-pe. Péro avei umi ótro ermáno ikatu hína oipytyvõ chupe umi mbaʼe ñande ndaikatumoʼãivape. Por ehémplo, ñamoĩ chupe ñane estudiánte oñehaʼãha hína oheja pe sigarríllo, péro hoʼa jey pe vísiope heta vése. Upéicharõ ikatu ñainvita peteĩ ermáno ymave opita vaʼekuépe, ha heta oñehaʼã rire ohejaite vaʼekue pe vísio. Upe ermáno ikatu hína omeʼẽ chupe heta konsého ou porãitereítava chupe. Oiméramo ñatĩ jajapo hag̃ua pe estúdio oĩ rupi ñanendive peteĩ ermáno iñexperiénsiava, upéicharõ ikatu jajerure chupe voi omoakã hag̃ua pe estúdio. Tahaʼe haʼeháicha, aníkena jajavy koʼã oportunida. Ñainvitáramo ótrope ñanemoirũ hag̃ua pe estúdiope, ñane estudiantekuéra ikatu hína oaprende heta mbaʼe chuguikuéra. Ñanemanduʼa vaʼerã ñande ñaipytyvõseha ñane estudiántepe oprogresa porã hag̃ua.

17, 18. ¿Mbaʼe mbaʼépa jahecha vaʼerã jadesidi mboyve jasegítapa jastudia peteĩ persónandi térãpa nahániri?

¹⁷ Oiméramo ñane estudiánte ndoprogresái hína, og̃uahẽta peteĩ moménto tekotevẽtahápe jadesidi jasegítapa jastudia hendive térãpa nahániri. Péro jadesidi mboyve, tekotevẽ ñapensa oimépa pe persóna pyaʼe voi ontende jepi umi mbaʼe ñamboʼeséva chupe, térãpa imbegue opilla hag̃ua. Sapyʼánte algúna persónape orahave voi tiémpo oprogresa hag̃ua. Upévare ñañeporandu vaʼerã: “¿Oprogresa porãpa ohóvo che estudiánte asegún pe isituasión? ¿Oñepyrũmapa ‘ojapo’ umi mbaʼe oaprendéva?” (Mat. 28:20). Ikatu hína peteĩ estudiánte mbegue oprogresa, péro saʼi saʼípe ojekuaa vaʼerã ohóvo umi kámbio ojapóva hekovépe.

 ¹⁸ ¿Ha mbaʼépa jajapóta oiméramo jastudiáma peteĩ persónandi peteĩ tiémpore, péro haʼe ndohechaukaguasúi omombaʼeha pe estúdio, térã katu nomombaʼeiete voi? Ñapensamína ko situasiónre: Pe persóna ostudiapáma pe lívro Mbaʼépa ñanemboʼe, ha ikatu oime oñepyrũma voi pe lívro Jaiko Ñandejára mborayhúpe, péro ndohói gueteri ni peteĩ rreuniónpe ni pe Konmemorasiónpe. Ha hiʼarive pyʼỹinte osuspende ñandehegui pe estúdio oimeraẽ mbaʼérente. Oiméramo upéicha, tekotevẽta ñañemongeta porã ñane estudiántendi. *

19. a) ¿Mbaʼépa ikatu ñaporandu peteĩ estudiántepe haʼetéva nomombaʼéiva la ijestúdio? b) ¿Mbaʼéichapa pe irrespuésta ikatu ñanepytyvõ?

¹⁹ Ñañepyrũ hag̃ua ikatu ñaporandu chupe: “¿Mbaʼépa nde ere ndejokoha oiko hag̃ua ndehegui testígo de Jehová?”. Pe estudiánte ikatu heʼi: “Chéve chegusta umi mbaʼe aaprendéva, ¡péro núnka ndoikomoʼãi chehegui Testígo!”. Oiméramo heʼi ñandéve upéva ostudia riréma peteĩ tiémpore, ¿añetehápe piko isentído jasegi jastudia hendive? Péro ñamoĩ chupe koʼág̃a pe estudiánte primera ves omombeʼuha ñandéve mbaʼépa ojoko chupe oprogresa hag̃ua. Por ehémplo, ikatu opensa haʼe núnka ndaikatumoʼãiha opredika ogahárupi. Jaikuaa rire mbaʼéichapa haʼe oñeñandu, ikatútama ñaipytyvõ porãve chupe.

20. ¿Mbaʼéichapa Hechos 13:48 ñanepytyvõ jadesidi hag̃ua jasegítapa jastudia peteĩ persónandi térãpa nahániri?

²⁰ Ñambyasýramo jepe, oĩ estudiánte ojoguáva umi israelita oiko vaʼekuépe Ezequiel tiémpope. Hesekuéra Jehová heʼi vaʼekue Ezequiélpe: “¡Emañamína!, nde ningo chupekuéra g̃uarã rejogua peteĩ opurahéi porãvape, ombopukuaáva instruménto de kuérda ha opurahéiva hína peteĩ músika rromántika. Haʼekuéra ohendúta umi mbaʼe eréva, péro ni peteĩva ndojapomoʼãi upéicha” (Ezeq. 33:32). Ikatu ningo ijetuʼu ñandéve jaʼe hag̃ua peteĩ persónape ndajastudiamoʼãveimaha hendive, péro ñanemanduʼa vaʼerã ‘saʼipaitemaha pe tiémpo hembýva’ (1 Cor. 7:29). Upévare, jaipuru rangue ñane tiémpo jastudia hag̃ua peteĩ persóna ndoprogresáivandi, jaheka vaʼerã umi persóna ohechaukáva ‘ipyʼaporãha ohupyty hag̃ua jeikove opaveʼỹva’ (elee Hechos 13:48).

21. ¿Mbaʼépa hína pe téxto áño 2020-pe g̃uarã, ha mbaʼéichapa ñanepytyvõta upe téxto?

²¹ Áño 2020 aja, pe téxto del áño ñanepytyvõta ñapensa hag̃ua mbaʼéichapa ikatu ñaipytyvõ porãve umi héntepe oiko hag̃ua chuguikuéra Jesús disípulo. Upe versíkulope jatopa umi mbaʼe Jesús heʼi vaʼekue pe rreunión iñimportantetévape, oiko vaʼekue peteĩ montáñape Galiléape. Upévare, ñanemanduʼa memékena pe téxto ko áño 2020-pe g̃uarãre: Tapeho pemboʼe umi héntepe oiko hag̃ua chuguikuéra che disípulo, ha pevautisa chupekuéra (Mat. 28:19).