1-2. Nama dipadah seiku melikat ngagai sida indu ba kubur Jesus? Nama pesan ke diberi Jesus ngagai sida indu nya?

MAYA nya tumu pagi 16 Nisan kena taun 33 M. Enggau ati ti balat tusah, sekeda indu ke rinduka Petara mansang ngagai kubur Jesus. Bangkai Jesus udah dikuburka dua hari. Sida deka ngunsut bangkai iya ngena rempah enggau minyak wangi. Lebuh sida datai ba kubur, sida tekenyit laban bangkai Jesus nadai dalam kubur! Seiku melikat madah ngagai sida, Jesus udah angkat idup baru. Ku melikat nya agi: ‘Iya diatu mansang ngagai Galili dulu ari kita. Din kita deka meda iya!’—Mat. 28:1-7; Luk. 23:56; 24:10.

² Pengudah bala indu nya mupuk ari kubur nya, Jesus empu mansang ngagai sida lalu meri pesan: ‘Asuh bala menyadi aku mupuk ngagai Galili. Din sida deka meda aku.’ (Mat. 28:10) Utai keterubah digaga Jesus pengudah angkat idup baru iya nya, iya deka betemu enggau bala murid iya lalu meri sida sekeda iring ti beguna bendar.

3-4. Nama kebuah kitai ngumbai pesan ke dipadah ba Matthew 28:19, 20 ukai semina dituju ngagai bala rasul Jesus aja? (Peda gambar ba kulit majalah.)

³ Bacha Matthew 28:16-20. Lebuh Jesus betemu enggau bala murid, iya madah pasal pengawa ti beguna bendar ke deka digaga sida maya nya. Pengawa nya mega benung digaga kitai kemayaharitu. Jesus madahka: ‘Nya alai, bejalai kita ngagai semua bansa lalu gaga sida nyadi murid aku, . . . ajar sida ngasika semua pesan ti udah diberi aku ngagai kita.’

 ⁴ Jesus dekaka semua murid iya nginjil. Pesan nya ukai semina diberi ngagai 11 iku rasul iya ke tetap ati. Baka ni kitai ulih nemu? Kati semina bala rasul aja ke datai ba bukit di Galili lebuh pesan ke ngasuh ngaga orang nyadi murid nya diberi? Kingatka meh utai ke dipadah seiku melikat ngagai sida indu nya baru: ‘[Di Galili] kita deka meda iya!’ Nya alai bala indu ke tetap ati mega engka bisi datai. Tang pesan nya ukai dituju ngagai sida aja. Rasul Paul madahka, Jesus ‘pegari di mua lebih lima ratus iku murid iya sereta sekali.’ (1 Kor. 15:6) Dini alai sida 500 iku nya begelumu?

5. Nama kebuah kitai pechaya 1 Korint 15:6 bejaku pasal Matthew bagi 28?

⁵ Kitai pechaya utai ke disebut Paul ba 1 Korint 15:6 bisi kaul enggau Matthew bagi 28. Nya pasal pengawa bala murid ke betemu enggau Jesus ba bukit di Galili. Nama kebuah kitai ulih ngumbai baka nya? Keterubah, mayuh ari murid Jesus nya orang Galili. Nya alai bukit di Galili nya endur ti engkeman alai mayuh orang betemu enti dibanding enggau betemu ba rumah orang di Jerusalem. Kedua, Jesus ke udah angkat idup baru udah betemu enggau 11 iku bala rasul iya ba sebuah rumah di Jerusalem. Enti sema Jesus semina deka ngasuh bala rasul iya aja ke nginjil sereta ngaga orang nyadi murid, iya ulih ngereja nya di Jerusalem. Iya enda ibuh ngasuh bala rasul, sida ke indu nya, sereta bala murid ke bukai betemu enggau iya di Galili.—Luk. 24:33, 36.

6. (a) Baka ni Matthew 28:20 nunjukka pesan ke ngasuh ngaga orang nyadi murid Kristus mega patut dipejalaika kemayaharitu? (b) Nama nunjukka orang ngasika pesan nya kemayaharitu?

⁶ Peratika kebuah ketiga. Pesan Jesus ke ngasuh ngaga orang nyadi murid ukai semina dituju ngagai orang Kristian maya jeman Jesus aja. Baka ni kitai nemu? Ku Jesus ngujungka pesan iya: “Aku deka seruran enggau kita nyentuk ngagai pengujung dunya.” (Mat. 28:20) Baka ke dipadah Jesus, mayuh orang benung bejalaika pengawa ngaga orang nyadi murid iya kemayaharitu. Uji pikirka tu! Nyauka 300,000 iku orang dibaptisa ninting taun ketegal sida deka nyadi Saksi-Saksi Jehovah sereta murid Jesus Kristus!

7. Nama deka dikerandauka kitai diatu, lalu nama kebuah?

⁷ Mayuh orang ke belajar Bup Kudus ngaga pemansang lalu dibaptisa. Taja pia, sekeda sida ke belajar enggau tetap kakang ati deka nyadi murid Kristus. Sida rindu belajar, tang nadai ati deka dibaptisa. Enti sema nuan ngajar orang Bup Kudus, nuan tentu deka nulung sida nitihka utai ti dipelajar sereta nyadi murid Kristus. Artikel tu deka berandauka chara kitai ulih nulung pemelajar kitai rinduka Jehovah lalu ngaga pemansang ba pengarap. Nama kebuah kitai patut berandauka pekara tu? Laban kadang-kadang kitai engka berunding sekalika deka terus ngajar sida Bup Kudus tauka enda.

8. Nama kebuah kadang-kadang tusah deka nulung pemelajar rinduka Jehovah?

⁸ Jehovah deka orang nyembah Iya ketegal pengerindu sida ke Iya. Nya alai juluk ati kitai iya nya, deka nulung pemelajar nemu Jehovah amat ibuhka sida seiku-seiku lalu Iya sayau bendar ke sida. Kitai deka nulung sida ngumbai Jehovah nya Apai ke “orang ke nadai apai indai, lalu nyaga sida indu ke balu.” (Mas. 68:5) Enti pemelajar nemu Jehovah sayau ke sida, sida mega deka rinduka Iya. Sekeda pemelajar engka ngasaika nya tusah deka ngumbai Jehovah nya Apai ti bisi pengerindu laban apai sida empu enda ngayanka pengerindu enggau penyayau ngagai sida. (2 Tim. 3:1, 3) Lebuh nuan ngajar pemelajar  Bup Kudus, padahka kualiti Jehovah ti ngerinduka ati. Tulung sida nemu Jehovah deka sida bulih pengidup ti meruan belama iya, lalu Iya sedia deka nulung sida ngulihka berekat nya. Nama utai bukai ke ulih digaga kitai?

9-10. Nama bup ke patut dikena kitai ngajar orang Bup Kudus? Nama kebuah ngena bup nya?

⁹ Ngena bup “Nama Ulih Dipelajarka Kitai Ari Bup Kudus?” enggau “Meruan Dalam Pengerindu Petara.” Bup tu dikena nulung pemelajar rinduka Jehovah. Ambika chunto, pelajar satu ba bup Ajar Kitai nyaut tanya: Kati Petara ibuhka kitai tauka kati Iya jai?, Baka ni asai ati Petara lebuh orang merinsa?, lalu Ulih kitai nyadi pangan Jehovah? Baka ni enggau bup ‘Pengerindu Petara’? Bup tu deka nulung pemelajar nemu baka ni nitihka prinsip Bup Kudus ulih ngasuh pengidup sida manah agi lalu nulung sida semak agi enggau Jehovah. Taja pan nuan udah belajarka dua iti bup tu enggau pemelajar bukai, nuan agi patut besedia enggau manah ke tiap iti pengawa belajar. Enggau tu nuan ulih nulung pemelajar nitihka utai ke diguna sida seiku-seiku.

¹⁰ Nama patut digaga enti pemelajar rinduka topik bukai, tang topik nya nadai dikerandau  ba bup ke dikena kitai ngajar orang Bup Kudus? Enti pia, nuan ulih meransang iya macha topik nya kediri ba litaricha kitai ke bukai. Enggau nya, nuan ulih terus ngajar iya ngena bup ke benung dikena iya belajar.

11. (a) Kemaya kitai patut berengkah besampi sebedau enggau pengudah belajarka Bup Kudus enggau pemelajar? (b) Baka ni nuan deka nulung pemelajar nemu kebuah pengawa nya beguna?

¹¹ Besampi dulu sebedau belajar. Pengudah belajar Bup Kudus beberapa kali enggau tetap, endang manah enti kitai berengkah besampi sebedau enggau pengudah belajar enggau pemelajar. Kitai patut nulung sida nemu, kitai ulih meretika Bup Kudus ari saup roh kudus Petara. Sekeda menyadi ke ngajar Bup Kudus nerangka kebuah kitai besampi sebedau enggau pengudah belajar. Sida macha James 1:5 ke madahka: ‘Enti kita nadai penemu-dalam, pinta ngagai Petara.’ Udah nya menyadi ke ngajar Bup Kudus nanya pemelajar, “Enti kitai deka bulih penemu-dalam, nama patut digaga kitai?” Pemelajar tentu madahka kitai patut besampi ngagai Petara.

12. Baka ni nuan deka ngena Masmur 139:2-4 nulung pemelajar ngemanahka agi chara iya besampi?

¹² Ngajar pemelajar chara besampi. Padah ngagai pemelajar, Jehovah deka ninga sampi iya ti ari ati. Terangka ngagai iya, lebuh kitai besampi kediri, kitai ulih madah ngagai Jehovah asai ati kitai sereta utai ke engka enggai dipadah kitai ngagai orang bukai. Kingatka meh, Jehovah udah nemu utai ke bisi dalam ati enggau runding kitai. (Bacha Masmur 139:2-4.) Kitai mega ulih meransang pemelajar minta Jehovah nulung iya ngubah runding ti salah sereta mutarka ulah ti enda manah. Ambika chunto, pemelajar engka rinduka pengerami ke enda patut diintu orang Kristian baka ngintu Hari Gawai tauka Krismas. Iya nemu pengerami nya salah laban datai ari pengarap ke enda nyembah Jehovah. Tang iya agi rinduka sekeda utai ke bekaul enggau pengerami nya. Peransang iya madah ngagai Jehovah enggau nyemetak utai ke amat diasaika iya, lalu minta tulung ngambika iya semina rinduka utai ti dikerindu Jehovah.—Mas. 97:10.

13. (a) Nama kebuah kitai patut enggau lengkas mai pemelajar datai begempuru? (b) Baka ni kitai ulih nulung pemelajar ngambika berasai nyamai lebuh datai begempuru?

¹³ Enggau lengkas mai pemelajar datai begempuru. Utai ke didinga enggau dipeda pemelajar ba gempuru Kristian ulih meransang iya nyembah Jehovah sereta nulung iya ngaga pemansang. Pandangka video Nama Nyadi ba Palan Gempuru? lalu enggau gaga ati mai iya datai begempuru. Enti ulih, nulung ngambi iya enti iya nadai perengka pengangkut. Endang manah enti ulih mai menyadi Kristian bukai lebuh belajar enggau iya. Enggau tu, pemelajar ulih bekelala enggau menyadi Kristian kitai ke bukai. Lalu tu ulih ngasuh iya berasai nyamai lebuh datai begempuru.

14. Pengerindu ke Jehovah meransang pemelajar Bup Kudus ngereja nama?

¹⁴ Juluk ati kitai iya nya deka nulung pemelajar mansang ba pengarap. (Eps. 4:13) Lebuh orang deka belajar Bup Kudus enggau kitai, terubah-rubah iya engka belajar ketegal deka nemu baka ni Bup Kudus ulih nulung iya. Tang seraya pengerindu iya ke Jehovah majak nambah, iya engka berengkah berunding pasal chara iya ulih nulung orang ke udah nyadi Saksi-Saksi Jehovah sereta orang bukai. (Mat. 22:37-39) Lebuh bisi awak ti ngena, anang kakang ati madah ngagai pemelajar pasal kitai ke bisi tanggung pengawa meri duit pemeri kena nyukung pengawa nginjil kitai.

15. Baka ni kitai ulih ngajar pemelajar mutarka penanggul?

 ¹⁵ Ngajar pemelajar utai ke patut digaga lebuh bisi penanggul. Ambika chunto, pemelajar nuan udah nyadi penginjil ke bedau dibaptisa. Iya bisi madah pasal menyadi Kristian ke udah ngemediska ati iya. Anang madah ngagai iya pasal sapa ke betul tauka sapa ke salah. Tang terangka utai ke patut digaga iya nitihka prinsip Bup Kudus. Iya ulih ngampun menyadi nya lalu enda kiruhka pekara nya agi. Tauka enti iya enda ulih ngereja nya, iya patut berandau enggau menyadi nya enggau chara ti nelap sereta siru. Tuju iya ngambika ulih bebaik enggau menyadi nya. (Banding Matthew 18:15.) Tulung pemelajar berundingka utai ti patut disebut. Ajar iya chara ngena aplikasi JW Library^®, Bup Dikena Saksi-Saksi Jehovah Ngiga Pansik, enggau jw.org^® ngambika iya nemu chara mutarka penanggul bekaul enggau orang. Enti iya nemu chara mutarka penanggul nya taja pan bedau dibaptisa, iya tentu ulih begulai manah enggau bala menyadi ke bukai pengudah iya dibaptisa.

16. Nama kebuah nya manah enti mai bala menyadi Kristian ke bukai enggau kitai ngajar pemelajar Bup Kudus?

¹⁶ Mai bala menyadi ke bukai tauka tuai ti ngabas lebuh belajarka Bup Kudus enggau pemelajar. Nama kebuah? Kelimpah ari kebuah bukai ke udah dipadah tadi, sekeda menyadi Kristian ke bukai ulih nulung pemelajar nuan enggau manah agi. Ambika chunto, pemelajar nuan udah beberapa kali nguji deka badu nginsap, tang enda ulih. Bai meh seiku menyadi Kristian ke udah mujur mutarka penanggul nya. Iya engka ulih meri jaku ajar ti badas agi ngagai pemelajar nuan. Enti nuan enda berasai nyamai ngajar Bup Kudus lebuh bisi menyadi Kristian lelaki tauka indu ti bepeneleba enggau nuan, nuan tau ngasuh iya bejalaika pengawa ngajar nya. Lebuh nuan mai orang bukai enggau nuan, pemelajar nuan tau bulih penguntung ari peneleba sida. Kingatka meh, juluk ati kitai iya nya deka nulung pemelajar mansang ba pengarap.

17-18. Nama patut diperundingka nuan dulu sebedau ngetu belajar enggau pemelajar ke enda ngaga pemansang?

¹⁷ Enti pemelajar Bup Kudus nuan enda mansang ba pengarap, nuan tau nanya diri empu, ‘Kati aku patut ngetu belajar enggau iya?’ Sebedau ngaga pemutus, nuan patut berunding pasal penau iya. Sekeda orang begunaka awak ti lama deka ngaga pemansang. Tanya diri empu: ‘Kati pemansang pemelajar aku nya nitihka penau iya?’ ‘Kati iya berengkah “ngasika” tauka nitihka utai ke dipelajar iya?’ (Mat. 28:20) Sekeda pemelajar engka begunaka awak ti lama deka nyadi murid Kristus. Taja pia sida patut belubah-lubah ngaga pemansang.

¹⁸ Tang nama patut digaga kitai enti kitai udah lama belajar enggau sida tang sida enda  ngaga pemansang? Perundingka tu: Pemelajar nuan udah abis belajar ngena bup Ajar Kitai lalu engka udah berengkah belajar ngena bup ‘Pengerindu Petara,’ tang iya empai kala datai begempuru tauka enggau Ngingatka Pemati Jesus! Lalu iya suah enda ulih belajar ketegal pekara ti mit. Enti pia, nuan patut berandau enggau iya. *

19. Nama engka ulih dipadah nuan ngagai orang ke enda beberatka pengawa belajarka Bup Kudus? Lalu baka ni saut ari sida ulih nulung nuan ngaga pemutus?

¹⁹ Nuan ulih ngepunka randau enggau nanya pemelajar, ‘Nama utai ke pemadu tusah digaga nuan enti deka nyadi Saksi Jehovah?’ Pemelajar engka nyaut, ‘Aku rindu belajarka Bup Kudus. Tang aku enggai nyadi Saksi Jehovah!’ Enti runding iya baka nya taja pan udah lama belajar, nuan engka tau ngetu belajar enggau iya. Tang baka ni enti pemelajar madahka kebuah iya enda ulih ngaga pemansang? Ambika chunto, iya engka ngasaika diri enda ulih nginjil ari rumah ke rumah. Lebuh nuan nyau nemu baka ni asai ati iya, nuan ulih nemu chara deka nulung iya.

20. Baka ni Kereja Rasul 13:48 ulih nulung kitai mutus sekalika kitai patut terus ngajar pemelajar Bup Kudus tauka enda?

²⁰ Sayau amat, sekeda pemelajar kitai baka orang Israel maya jeman Esekiel. Peratika utai ke dipadah Jehovah ngagai Esekiel pasal sida: “Ba penemu sida, nuan tu nadai lebih ari orang ke belagu merindang sida ngena lagu pengerindu, tauka nebah belikan. Sida mendingka semua leka jaku nuan, tang nadai ngasika jaku ti disebut nuan.” (Esk. 33:32) Kitai engka tusah deka madahka diri deka ngetu ngajar sida Bup Kudus. Tang, “kitai nyau suntuk hari.” (1 Kor. 7:29) Ari ke masau jam belajar enggau sida ke nadai ngaga pemansang, kitai patut ngiga sida ke nunjukka diri “bisi pengingin deka bulih pengidup ti meruan belama iya.”—Bacha Kereja Rasul 13:48 ari nota kaki. *

21. Nama ayat taun 2020 kitai? Lalu nama kebuah ayat nya ngena?

²¹ Ayat taun 2020 deka nulung kitai berundingka chara kitai ulih mujur agi ba pengawa ngaga orang nyadi murid Kristus. Aram meh kitai ingatka pesan ke diberi Jesus lebuh betemu enggau bala murid iya ba bukit di Galili: ‘Nya alai, bejalai kita lalu gaga sida nyadi murid, maptisa sida.’—Mat. 28:19.