1-2. Ihi ya zwela o Anju kwa ahatu mu mbila ya Jezú? Itendelesu yebhi ya bhana Jezú ku maxibulu mê?

MUKAMENE wa 16 dya mbeji ya Nisá, wa muvu 33 K.K., kibuka kya ahatu ni mixima ya neme exile muya mumbila mwa fundu Jezú. Kwa bhiti kya 36 a ji ola tundé kya fundu Ngana Jezú Kidistu. Kyoso kya bhixila mu mbalale ni maji phala kuwesa o kimbi kya Jezú, ene adiwana mukonda o kimbi mu mbila ki kyexilebhu dingi! O Anju ya tangela o maxibulu kwila Jezú a mu fukununa kyá. Yú wa bandekesaku dingi: “Mwène wa mi twamenena ku Ngalileya; kwene ku mwa kà di mona-nê.”—Mat. 28:1-7; Luka 23:56; 24:10.

² Kyoso ahatu kya xisa o mbila, Jezú wa a tukulukila yu wa bhana o itendelesu: “Ndenu kà tangedyenu phange jami, a katuke, a kàye ku Ngalileya, kwene kwa kà ngi mona.” (Mat. 28:10) O kima kya dyanga kubhanga Jezú kyoso kya mu fukununa o kusokejeka o kyônge ni maxibulu mê. Mu kyônge kiki mwene wa bhana itendelesu yavulu ya beta-kota!

3-4. Mukonda dyahi tu tena kuzwela kwila, o kitumu mu Matesu 28:19, 20 ka ki bhana ngó ku jipoxolo? (Tala o foto ya kapa.)

³ Tanga Matesu 28:16-20. Mu kyônge kya sokejeka Jezú, mwene wa jimbulula o kikalakalu kya katunda kyeji bhanga o maxibulu-mê tundé mu hama ya dyanga katé mu izuwa ya lelu. Jezú wambe: ‘Enu-phe ndenu, mwa ka bhange jixibulu ku akwa jixi joso, . . . ni ku a longa kwaluka o ima yoso kyá i nga mi tumu eme.’

⁴ Jezú wandala kwila, akyedi’ê oso a boka. Mwene ka bhana ngó o kitumu kiki ku 11 dya jipoxolo jê ja fiyele. Mukonda dyahi tu zwela kiki? Mbo, kyoso Jezú kya bhana o kitumu kya kubhanga  maxibulu mu kyônge ku mulundu wa Ngalileya, o jipoxolo ki jene ngó ja kexilebhu. Kyebhi ki twejiya o maka yá? Lembalala o izwelu ya anju ku ahatu: “Kwene ku mwa kà di mona-nê [ku Ngalileya].” Kyenyiki-phe, nange ahatu a fiyele akexile we mu kyônge kiki. Maji ki kyene ngó. Poxolo Phawulu wa jimbulula kwila, Jezú wa “tukulukila hama jitanu ja axikani bhwa-moxi.” (1 Kol. 15:6) Kiki kya bhiti kwebhi?

5. Mukonda dyahi tu xikinisa kwila, 1 Kolindu 15:6 yalungu ni kyônge ku Ngalileya kyo tumbule mu kibatulu 28 dya Matesu?

⁵ Ima yavulu i tu xikinisa kwila, o izwelu ya Phawulu mu 1 Kolindu 15:6, yalungu ni kyônge kya mulundu wa Ngalileya kyo tumbule mu divulu dya Matesu kibatulu 28. Ima yahi i tu bhangesa kuxinganeka kiki? Kyadyanga, maxibulu avulu a Jezú exile akwa Ngalileya. Kyenyiki, kyeji bhebhuluka dingi kwongeka athu avulu ku mulundu wa Ngalileya, mu veji dya kwa ongeka mu dibhata dya muthu mu Jeluzaleme. Kayadi, kyoso Jezú kya mu fukununa, wa dyongekele kyá ni 11 dya jipoxolo mu dibhata dya muthu mu Jeluzaleme. Se mwene wa mesenene kubhana ngó ku jipoxolo o kikalakalu kya kubhanga maxibulu, hinu weji kwa tumina kyá mu mbanza ya Jeluzaleme, mu veji dya kubhinga dingi ku jipoxolo, ku ahatu ni akwá phala kudyongekanê mu Ngalileya.—Luka 24:33, 36.

6. Kyebhi o divulu dya Matesu 28:20 kilondekesa kwila o kitumu kya kubhanga maxibulu kya mu dikumbidila we lelu? O kitumu kiki a mu dikumbidila kyebhi kindala?

⁶ Tala o kima kya katatu kya beta-kota. O kitumu kya Jezú kya kubhanga maxibulu, ki kya lungu ngó ni Jikidistá a tungile mu hama ya dyanga. Kyebhi ki twejiya o maka yá? Jezú wazubha kutendelesa o akyedi’ê ni izwelu yiyi: “Eme-mwène ngà kala ni enu izuwa yoso, katé ku dizubhilu dya mundu.” (Mat. 28:20) Kala kya zwela Jezú, kindala athu avulu a mu bhanga maxibulu. Xinganeka ngó! Ku muvu woso 300.000 athu ene mwa batizala kala Jimbangi ja Jihova ni kukituka maxibulu a Jezú!

7. Ihi i twanda zwela mu milongi yiyi ni mukonda dyahi?

⁷ Avulu adilonga o Bibidya akula mu nzumbi katé kya di batizala. Maji, amoxi u twene mu longa o Bibidya semana joso, edi kala ala ni wôma wa kukituka maxibulu. Ene a wabhela kudilonga o Bibidya, maji kene mu kula mu nzumbi phala kudibatizala. Se wa mu longa o Bibidya ku muthu twejiya ni kidi kyoso kwila eye wa mesena ku mu kwatekesa kukumbidila o ima ya mu dilonga ni kukituka dixibulu dya Kidistu. Mu milongi yiyi twanda zwela kyebhi ki tu tena kubhixidisa o milongi ku muxima ya dixibulu ni kyebhi ki tu tena ku mu kwatekesa kukula mu nzumbi. Mukonda dyahi twa bhingi kuzwela o maka yá? Mukonda mu kubhita kithangana twanda bhinga kusola se twanda suluka ni kudilonga o Bibidya ni muthu mba kana.

8. Mukonda dyahi sayi ithangana kubhonza kukwatekesa o muthu kuzola Jihova?

⁸ Jihova wa mesena kuma athu oso a mu sidivila mukonda ene a mu zolo. Kyenyiki-phe, o mbambe yetu o kukwatekesa yó u twene mu longa o Bibidya kutendela kwila Jihova u suwa muthu ni muthu ni kwila mwene wa a zolo kyavulu. Etu twa mesena ku akwatekesa kumona kwila Jihova “Tata ya jihukunyi, o dilemba dya ahatu a xala atudi.” (Jisá. 68:5) Kyoso o maxibulu mê a Bibidya kya mona kuma Jihova wa a zolo kyavulu, ene nange anda mateka we kuzola Jihova. Sayi maxibulu kwa bhonza kumona kwila Jihova wa a zolo mukonda o Jitata jâ ka a londekesa henda ni kilendu. (2 Tim. 3:1, 3) Kyoso ki wa mu longa o Bibidya  londekesa o idifwa yambote ya Jihova. Kwatekesa o athu u wa mu dilonganawu kutendela kuma o Nzambi yetu ya henda wa mesena ku a bhana o mwenyu wakalelaku. Mwene wala polondo phala ku a kwatekesa kukumbidila o mbambe yiyi. Ihi i tu tena kubhanga dingi?

9-10. Madivulu ebhi u twa tokala kulonga nawu o Bibidya ni mukonda dyahi?

⁹ Kalakala ni madivulu “Ihi i Tu Longa o Bibidya?” ni ‘Kala mu Henda ya Nzambi.’ O madivulu yá a asoneka phala ku tu kwatekesa kubhixidisa o maka ku mixima ya yó u twene mulonga o Bibidya. Mu kifika, o kibatulu 1 kya divulu Ihi i Tu Longa o Bibidya, kitambwijila o ibhwidisu yiyi: O kwila Nzambi wa tu zolo inga muthu wayibha? Kyebhi kya divwa Nzambi kyoso kya mona athu a mu bhita mu jiphaxi? O kwila u tena kukala u dikamba dya Jihova? O divulu ‘Kala mu Henda ya Nzambi,’ yanda kwatekesa o adilongi a Bibidya kutendela kwila, kutumaka o itumu ya Bibidya, kutena kubandekesa o kisangusangu ku mwenyu wê ni ku mu zukamesa dingi kwa JIhova. Né mwene se wene kyá mulonga athu avulu ni madivulu  yá, wa tokala hanji kudipelepalala kyambote ni kuxinganeka o ibhindamu ya muthu ni muthu u wanda longa.

¹⁰ Maji se muthu wa mesena kudilonga maka ala mu divulu dyengi, ki dyala mu Jifalamenda jetu ja Kulonga? Nange utena ku mu swinisa phala kutanga o divulu didi ubheka wé, maji wa tokala kusuluka ni ku mulonga o Bibidya bhu kaxi ka madivulu a kulonga.

11. (a) Kithangana kyebhi ki twa tokala kumateka kusamba mu kudilonga ni athu? (b) Kyebhi ki tu tena kukwatekesa o maxibulu a Bibidya kutendela kwila kiki kima kya tokala?

¹¹ Ande dya kumateka kulonga muthu, wa tokala kusamba. Mu kudilonga ni muthu, kota se tu mateka kusamba tunde mu jisemana ja dyanga. Twa tokala kusamba kudimaketenu ni kudisukilu dya milongi. Twa tokala kukwatekesa o maxibulu kutendela kwila, tu tena ngó kutendela o Bibidya ni kikwatekesu kya nzumbi ikôla ya Nzambi. Alongexi avulu ajimbulula se mukonda dyahi twene musamba ande dya kudilonga, bhu kaxi ka Tiyaku 1:5, yamba: “Se sayi muthu mudyenu wa kambe unjimu, a u bhinge Nzambi.” Mu kusuluka, o mulongexi wibhwidisa yó wa mu dilonga, “Tubhinga kyebhi o unjimu kwa Nzambi?” O maxibulu mu veji javulu atambwijila: Mu kusamba kwa Nzambi.

12. Bhu kaxi ka Jisálamu 139:2-4, kyebhi ki tu tena kukwatekesa o maxibulu metu kubandekesa o uhete wâ wa kusamba?

¹² Longa yó u wene mulonga o Bibidya kyebhi kya tokala kusamba. Dyelelesawu kwila, Jihova wamesena kwivwa o misambu yá ya kidi. Tangelawu we kwila, mu misambu i tu bhanga ubheka wetu, tu tena kujikula o muxima kwa Jihova, ni ku mu tangela o ima ki tu xikina ku itangela ku muthu woso-woso. Lembalala kuma, Jihova wejiya kyá o ixinganeku yetu. (Tanga Jisálamu 139:2-4.) Etu we tu tena kuswinisa o adilongi’etu kubhinga kikwatekesu kwa Nzambi phala kulungulula o ixinganeku yâ yayibha ni kutolola o ifwa ayibha. Maji se muthu wene mu dilonga kyá o Bibidya mu ithangana yavulu ubhange hanji o jifesa jofidise mu Bibidya? Mwene wejiya kwila, kyayibha kubhanga o fesa yiyi, maji wa iwabhela kyavulu. Wa tokala u mu swinisa kuzwela kwa Jihova kyebhi kya mu divwa. Mwene wa tokala we kubhinga kikwatekesu phala kuzola ngó o ima yazolo Nzambi.—Jisá. 97:10.

13. (a) Mukonda dyahi twa tokala kwixana o maxibulu metu phala kuya mu kyônge tunde ku dimatekenu? (b) Kyebhi ki tu tena kubhangesa o maxibulu metu kudivwa kyambote mu Kilunga?

¹³ Kana kulaleka kwixana o maxibulu mê a Bibidya phala kuya mu yônge. O milongi yanda mona ni kwivwa mu yônge ya Ukidista, itena kutula ku muxima wa yó u wa mu longa ni ku mu kwatekesa kukula mu nzumbi. Mulondekese o vidyu Ihi Yene Mu Bhanga Bhu Kididi Kya Ubhezelu? Mubhinge phala kuya n’eye mu kyônge. Dibhakule phala ku mu takana kubhata ni mwende kumoxi mu kyônge. Kiki kixinganeku kyambote kwixana o aboki engi phala kukuxinjikila ku maxibulu mê. Mu ukexilu yu, o maxibulu mê anda kwijiya dingi aboki engi mu kilunga, ene anda divwa kyambote kyoso ene kyandaya mu kyônge kyetu.

14. Ihi i tena kubhangesa o muthu u wa mu dilongane kukula mu nzumbi?

¹⁴ O mbambe yetu o kukwatekesa o muthu u twa mu longa kukula mu nzumbi. (Efe. 4:13) Kyoso o muthu u xikina o kudilonga o Bibidya n’etu, mwene u tena ku wabhela mu kumona kyebhi o milongi ya Bibidya kya kwatekesa ku mwenyu wê. Kyoso kya mateka kuzola Jihova, mu kiki, mwene u mateka kuxinganeka kyebhi kya tena kukwatekesa akwâ, katé mwene yó a tokala mu kilunga. (Mat. 22:37-39) Kyoso ki  u kala ni kithangana kya kubhanga kiki bhanga kyu, kana kukala ni hele, ya kutangela ku maxibulu mê kwila twala ni ujitu wa kukwatekesa o kikalakalu kya Utuminu ni kitadi kyetu.

15. Kyebhi ki tu tena kukwatekesa o maxibulu kubatula kyambote o maka atena kumoneka?

¹⁵ Longa o maxibulu ihi ya tokala kubhanga kyoso ki kumoneka maka. Mu kifika, se wa mu dilonga ni muboki ka mu batizala luwa u kutangela kwila sayi muthu mu kilunga wa mu luwalesa? Kana ku mu tangela se nanyi walungu se nanyi wabhele, maji u mu jimbulula se ihi i zwela o Bibidya yalungu ni maka enya. Mwene wa tokala kuloloka phangi’e ni kujimba o maka. Se ka tena ku mu loloka, wa tokala-phe kuzwela nê ni henda yoso phala ku ‘mu nganyala.’ (Sokesa ni Matesu 18:15.) Kwatekesa o dixibulu dyé kuphelephalala yanda zwela. Mu londekese kyebhi kya tena kukalakala ni apilikativu JW Library^®, Kadivulu ka ku Tokwesa Phala o Jimbangi ja Jihova ni jw.org^® phala kudilonga o ukexilu wa kudibhana ni maka enya. Se mwene udilonga kya kubatula maka ande dya ku mu batizala, wanda kala dingi polondo phala kubhanga ukamba wambote ni akwâ mu kilunga kyoso kyanda mu batizala.

16. Mukonda dyahi kima kyambote kwixana aboki engi phala kwendesa o milongi?

¹⁶ Exana akwenu mu kilunga, kafunga ka ilunga kyoso kya kunda o kilunga ni kwendesa o milongi. Mukonda dyahi? Ku mbandu yamukwa o aboki engi a tena kubhana jindunge ki u tena kujibhana. Maji xinganeka kwila o dixibulu dya mu bhânga ni kifwa kya kubhwakula mu thembu yavulu kyá, maji ka mu tena ku kixisa. O kwixana Mbangi ya Jihova wa tolola o kifwa kiki, nange u tena ku mu kwatekesa. O muboki nange u tena ku mu bhana jindunge ja bhindamena phala kutolola o kifwa kiki. Se u divwa kwila ki wala polondo phala kwendesa o milongi kupholo dya phange wala ni uhete u tena ku mu bhinga phala nendesa o milongi. Kyoso ki wixana aboki engi phala kwendesa o milongi yé a Bibidya, mwene wanda katula mbote yavulu ku uhete wâ. Lembalala kuma o mbambe yetu o kukwatekesa o maxibulu metu kukula mu nzumbi.

17-18. Kyoso ki u xinganeka kweha kulonga o Bibidya ku muthu, ihi i wa tokala kuxinganeka?

¹⁷ Se wa mulonga o Bibidya ku muthu, maji mwene ka mu lungulula o ukexilu wa mwenyu wê, mu kubhita kithangana wanda dibhwidisa kiki: ‘O kwila nga tokala kweha kudilonga ni muthu yú?’ Ande dya kweha, wa tokala kuxinganeka o mawuhete mê. Dibhwidise: ‘O kwila ni kamwanyu kamwanyu o muthu wa mu kulaku bhofele?’ ‘O kwila mwene wa mu “kwaluka,” mba kukumbidila o ima ya mu dilonga?’ (Mat. 28:20) Kubhinga ithangana phala o muthu wa mu dilonga o Bibidya kukituka dixibulu dya Jezú. Maji mwene wa tokala kulungulula o ukexilu wa mwenyu wê bhofele bhofele.

 ¹⁸ Ihi i twamba se muthu wa mu dilonga kya mu thembu yavulu, maji ka mu lungulule o ukexilu wa mwenyu wê, ka mu bhange kima kilondekesa kwila wawabhela o ima ya mu dilonga? Xinganeka mu maka yá: Wazubha kyá kulonga o muthu mu divulu Ihi i Tu Longa o Bibidya? nange katé wa mateka kyá o divulu Kala mu Henda ya Nzambi, maji mwene né kyonge kimoxi kyayiku, né mwene ngó o Lembalasa! Mu veji javulu udituna kudilonga o Bibidya mu kama koso-koso mba mu kingoho. Se wene mulonga o Bibidya ni muthu wa difu kiki, xikama nê, u mu tangela ni kidi kyoso. *

19. Ihi i wa tokala kuzwela ku muthu wedi kala ka mu bhana valolo ku milongi ya Bibidya? Ihi i wa tokala kuxinganeka?

¹⁹ Utena kumateka mu ku mwibhudisa: ‘Kyebhi o kima kya beta-kota, kya mu kufidisa kukala Mbangi ya Jihova?’ Mwene utena kutambwijila, ‘Eme nga wabhela kudilonga o Bibidya, maji nuka nganda kituka Mbangi ya Jihova!’ Se kyene hanji kya mu xinganeke, sumbala wa dilongo kyá mu ithangana yavulu, o kwila kima kyambote kuzanga ngó kithangana ni mwene? Maji sayi bhabha, o dixibulu di kutangela mu veji yadyanga se ihi ya mu mu fidisa kukituka Mbangi ya Jihova. Mu kifika, nange mwene u divwa kwila, kala ni uhete wa kuboka nzo ni inzo. O kwijiya kyebhi kya mu divwa, wanda tena ku mu tendela ni ku mu kwatekesa dingi kyambote.

20. Kyebhi o kutendela Ikalakalu 13:48 kwanda tu kwatekesa kumona se kwa bhingi kusuluka ni kulonga o Bibidya ku muthu mba kana?

²⁰ Kima kya kuluwala. Maji avulu ene mudilonga o Bibidya lelu, a difu ni akwa Izalayele mu thembu ya Izekiyele. Tala ya atangela Jihova bhu kaxi ka polofeta Izekiyele: “Eye-phe kyá wa di bhange u kamwimbu kâ ka jihenda, kamwimbu ka yó woso wala ni mbimbi ya tululuka, wejiya we o kuxika kyambote; mukonda o maka mé a evwa mwene, maji ka xikina ku a bhanga.” (Ize. 33:32) Kubhonza kutangela o muthu kwila, ki twanda suluka dingi ni ku mulonga o Bibidya. Maji “o thembu ya butu.” (1 Kol. 7:29) Mu veji dya kuzanga kithangana ni athu ka mesena kukula mu nzumbi, twa tokala kusota oso a londekesa kwila, “a fwamena o mwenyu ki wabhwa.”—Tanga Ikalakalu 13:48.

21. Yebhi o velusu ya muvu wa 2020, ni mukonda dyahi wa tokala mwene?

²¹ O velusu ya muvu wa 2020, yanda tu kwatekesa kubandekesa o uhete wetu wa kulonga ni kubhanga maxibhulu. Mwala o izwelu yiyi ya tumbula Jezú mu kyônge kya katunda ku mulundu wa Ngalileya: ‘Enu-phe ndenu, mwa ka bhange maxibulu . . . , ni ku a batizala.’—Mat. 28:19.