1-2. Ni kyahi ekya omulaika akabwira abakali okw’isinda ya Yesu, kandi Yesu iyuwene-wene akabwira abakali athiki?

NI NGYAKYA-NGYAKYA, Nisani 16, 33 E.K. Abakali abali omwa bulighe, abak’ubaha Nyamuhanga bakaya okw’isinda eya Omukama Yesu Kristo amabirighunzamo esyosaha esilhabire oku 36 alitsikirwe. Bakabya bakahika okw’isinda, bakanza erihira okwa mubiri wiwe kw’amaghutha aw’akakumba ndeke, bakasweka bakasanga omw’isinda isimuliki! Omulaika akabwira abakali abo athi Yesu abirilhubuka oko baholi, kandi abiriya e Galilaya, kandi athi: “Eyo yo mwasyamulholerako.”​—Mt. 28:1-7; Lk. 23:56; 24:10.

² Abakali bakabya bakalhua okw’isinda, Yesu iyuwene-wene akabahikako n’eribabwira athi: “Mughende muyabwire baghalha bethu baye e Galilaya, eyo yo basyanyilholerako.” (Mt. 28:10) Yesu angabya iniawithire abigha biwe obusondoli bw’omughaso, kundi erihindana nabu eri ky’ekindu ky’erimbere ekyo amathegheka akanalhubuka!

3-4. Busana naki ithwabugha thuthi ekihano ekiri omu Matayo 28:19, 20 sikyahebawa abakwenda basa? (Lebaya ekisasani ky’okwa kidipa.)

³ Soma Matayo 28:16-20. Okwa muhindano owa Yesu atheghekanaya, mwahulha omubiiri mukulhu ogho abigha biwe banga kolire omwa kighonye ky’erimbere​—nethu ogho thunemukolha munabwire. Yesu mwabugha athi: “Neryo mughende, muyire abigha oko bihanda byosi; . . . Mukangirirayebo bakole ebyosi ebyo nabiribahana.”

⁴ Yesu anzire abosi abamukwamire ibathulira. Syalhayira  abakwenda abathaleghulha 11 basa. Ekyo thwanga kiminya thuthi? Yesu abere akaha ekihano ky’eriyira abigha okwa kithwe kye Galilaya, abakwenda s’ibo babyaho basa. Wibuke ngoku omulaika mwabwira abakali athi: ‘Mwasyamulholerako [e Galilaya].’ Neryo abakali abathaleghulha bangabya ibanabya okwa muhindano oyo. Aliwe si ky’ekyo kisa. Omukwenda Paulo akakanganaya ngoku Yesu “mwahulhukira abalikyethu bangyi kwilhaba maghana athano okwa ndambi nguma.” (1 Kor. 15:6) Hayi?

5. Ebiri omu 1 Abanya Korinto 15:6 bikathweghesayaki?

⁵ Hane esyonzumwa mbuya esikaleka ithwabugha thuthi omu 1 Abanya Korinto 15:6 Paulo abya iniakakanaya okwa muhindano ogho Yesu athunga n’abigha e Galilaya owali omu Matayo sura 28. Ni nzumwa syahi? Ey’erimbere, abangyi b’okwa bigha ba Yesu babya Banya Galilaya. Neryo kwesi kyanga thokekene abandu bangyi erihindana okwa kithwe e Galilaya​—omwakanya k’erihindana omwa nyumba y’omundu e Yerusalemu. Eyakabiri, Yesu iniabirilhubuka abya iniabirihindana n’abakwenda biwe 11 omwa nyumba y’omundu e Yerusalemu. Yesu kw’abya inianzire erilhaghira abakwenda basa erithulira n’eriyira abigha, angakikolere e Yerusalemu omwakanya k’eribabwira n’abakali n’abandi athi bahindane e Galilaya.​—Lk. 24:33, 36.

6. Matayo 28:20 hakakanganaya hathi ngoku ekihano ky’eriyira abigha kikakolha namunabwire, kandi abandu banemw’owa bathi ekihano eki?

⁶ Enzumwa eyakasathu. Ekihano kya Yesu eky’eriyira abigha sikihambire okwa Bakristayo ab’omwa kighonye ky’erimbere basa. Ekyo thukakiminya thuthi? Yesu abere akabalhaghira mwaghunzerera n’ebinywe bino: ‘Indi haghuma nenyu ebiro byosi erihika okw’ihwererera ly’emighulhu.’ (Mt. 28:20) Ngoku Yesu anabugha, omubiiri w’eriyira abigha anemukolhwa kutsibu. Thakilengekaniako! Abandu hakuhi 300,000 bakabatizibawa obuli mwaka eribya Bema ba Yehova n’eribya bigha ba Yesu Kristo!

7. Thukayakanaya okuki, kandi busana naki?

⁷ Abangyi abak’igha e Biblia bakakulha-kulhana ibabatizibwa. Nomwabine, abandi abo thukigha nabu bakanasagha eribya bigha ba Kristo. Bakatsemera erigha, aliwe ibathanza eribatizibwa. Thuyikethere ngoku wamabya iwunawithe omwigha, wanzire iwamuwathikya erikolesya ebyo ak’igha n’eribya mwigha wa Kristo. Omwatsi ono akendi kangania ngoku thwanga hika okwa muthima w’omwigha kandi ngoku thwanga muwathikya erikulha-kulhana. Busana naki ithwakania okw’ekyo? Kundi hanganayira ithwayithagha erithwamu nga thulhole embere n’erigha n’omwigha kutse nga thumuleke.

8. Busana naki kyanganakalha erihika okwa muthima?

⁸ Yehova akanza abandu ibamukolera busana n’erimwanza. Neryo thukalhubirira eriwathikya abigha bethu eriyitheghererya ngoku Yehova abatsomene kutsibu obuli mundu ahabwiwe kandi kw’abanzire kutsibu. Thwanzire eriwathikyabo erilhangira ngoku Yehova “akalembera esyongubi, kandi akahanganira abakwakali.” (Esy. 68:5) Abigha bawu bakendibya bakaminya ngoku Nyamuhanga abanzire, bakendi tsema neryo ibongera erimwanza. Abandi bigha kikanabakalira erilhangira Yehova nga Thatha w’olhwanzo kundi abo thatha wabu sibabya babatsomene n’eribakangya olhwanzo. (2 Tim. 3:1, 3) Neryo, ambi wuk’igha n’omundu, minyikalhaya emibere mibuya ya Yehova.  Wathikaya abigha bawu erilhangira ngoku Nyamuhanga wethu w’olhwanzo anzire ibathunga engebe y’erikotha, kandi kw’anayitheghekire eribawathikya eribanayo. Ni kindi kyahi ekya thwanga kolha?

9-10. Ni bitabu byahi ebya thutholere ithwakolesya erigha n’abandu, kandi busana naki ibyathwakolesya?

⁹ Kolesaya ebitabu “E Biblia Yanga Thukangiriryaki?” na “Ngoku Wanga Sighalha omo Lhwanzo Lhwa Nyamuhanga.” Ebitabu ebyo bitheghekirwe erithuwathikya erihika okwa mithima y’abigha bethu. Ng’eky’erileberyako, esura 1 ey’ekitabu Yanga Thukangiriryaki yikasubiraya ebibulyo bino: Nyamuhanga anathutsomene kutse syalikwa bulighe?, Nyamuhanga akayowa athi abandu bakanuba?, na Wanganabya munywani wa Yehova? Kandi ibbwa ekitabu Sighalha omo Lhwanzo Lhwa Nyamuhanga? Ekitabu ekyo ikikendi wathikya omwigha erilhangira ngoku erikolesya emisingyi ye Biblia lyangan’uwania engebe yiwe n’erimuthunda hakuhi na Yehova. Nomuwangabya iwabiryeghesya abandi b’ebitabu ebi, yitheghekere ndeke obuli mwigha  nuku wuhike okwa biyithawa by’obuli mwigha.

¹⁰ Aliwe ibbwa, omwigha amanza omwatsi owali omwa kitabu ekithe omwa Ebya Thukakolesaya Thukakangirirya. Iwanganamubwira wuthi ayisomere ekitabu ekyo nuku wulhole embere erigha nayu omw’ikolesya ekighuma ky’okwa bitabu ebya thukegheserayamu e Biblia ebiri ahighulhu.

11. Thutholere ithwatsuka mughulhu wahi erisaba thukigha n’omwigha, kandi wanga wathikya wuthi omwigha erilhangira obukulhu bw’omusabe?

¹¹ Muk’igha, tsuka n’omusabe. Kyuwene eritsuka lhuba eribya mukatsuka n’omusabe n’erihinda nagho. Thutholere ithwawathikya omwigha erilhangira ngoku ahathe obuwathikya bw’omulimu wa Nyamuhanga isithwanga yitheghererya Ekinywe kiwe. Abandi bakanakanaya n’abigha oko mwatsi w’erisaba omw’isoma Yakobo 1:5, hathi: “Hamabya mundu omo kathi-kathi kenyu oyukabulha amenge, abulhaye Nyamuhanga.” Neryo omukangirirya iniabulya, “Thwangasaba thuthi Nyamuhanga y’amenge?” Omwigha obundi iniakendi ligha ngoku thutholere ithwasaba Nyamuhanga.

12. Wanga kolesya wuthi Esyonyimbo 139:2-4 eriwathikya omwigha eryuwania emisabe yiwe?

¹² Kangiriraya omwigha wawu ngoku angasaba. Musoborere ngoku Yehova anzire eriowa emisabe yiwe eyikalhua oko muthima. Mubwire ngoku omwa misabe yethu thwangana bwira Yehova eriyowa lyethu n’erimubwira ebyo thuthe thwanga bwira owosi-wosi. Nibya, Yehova anasi amalengekania wethu awabisamire. (Soma Esyonyimbo 139:2-4.) Kandi thwangana hira omwa mwigha mw’omuhwa w’erisaba Nyamuhanga y’obuwathikya obw’erileka amalengekania mabi n’emibere eyithuwene. Thuthabugha thuthi omwigha we Biblia anzire ekiro kikulhu kirebe eky’ekikafiri. Anasi ku ni kibi, aliwe omwa kwenene, akinatsemera ebindi ebiri mukyo. Muhire mw’omuhwa w’eribwira Yehova eriyowa liwe eryonyine-nyine n’erimusaba obuwathikya bw’erianza ebyo Nyamuhanga anzire bisa.​—Esy. 97:10.

13. (a) Busana naki thutholere ithwakokya lhuba abigha bethu b’okwa mihindano? (b) Thwanga wathikya thuthi omwigha erithendibyako embeho okwa Kisenge ky’Obwami?

¹³ Kokaya omwigha wawu y’okwa mihindano okw’inatsuka. Ebya mwigha wawu ak’owa n’erilhangira okwa mihindano byangana muhambako n’erileka iniakolera Yehova. Mukanganaye evidiyo eya Okwa Kingdom Hall Kukakolhawaki? n’erimukokya okwa mihindano. Kyamathokekana muwathikaye okwa trasipot. Ni kibuya erighenda n’abathuliri muthina-muthina wukay’igha nayu. Ekyo ikikendi leka omwigha wawu iniaminya abandi abali omwa kithunga, n’eriyowa buholho ekiro angahindana.

14. Ni kyahi ekyanga wathikya omwigha erikulha bunyakirimu?

¹⁴ Ekilhubirirwa kyethu ly’eriwathikya omwigha erikulha bunyakirimu. (Efe. 4:13) Omundu anganaligha erigha e Biblia iniawithe ekighendererwa ky’erighasirwa ahabwiwe. Aliwe akabya anemwongera erianza Yehova, anganatsuka erilengekania ngoku angawathikya abandi, imwamune n’abali omwa kithunga. (Mt. 22:37-39) Okwa buthuku obutholere, isiwasagha erimubwira ku thunawithe olhusunzo lhw’erisighika omubiiri w’Obwami omw’ihayo esyosente.

15. Thwanga wathikya thuthi omwigha erikolha ekihikire akabana ebitsibu?

 ¹⁵ Kangiriraya omwigha wawu eky’erikolha hakabya ebitsibu. Ng’eky’erileberyako, omwigha wawu omuthuliri oyuthabatizibirwe iniakubwira athi omwa kithunga hali oyuwabirimuhithania. Omwakanya k’eribya n’olhuhandi, mubwire ekya Biblia yikabugha yithi atholere erikolha. Iniangana thwamu erimughanyira, kutse amabya isyanga thoka, omo lhukeri n’olhwanzo iniakania nayu inianawithe ekighendererwa eky’erisubya obughuma na mulikyabu. (Thasyalebaya na Matayo 18:15.) Wathikaya omwigha wawu erithegheka eby’eribugha. Muwathikaye ngoku angakolesya e JW Library^® app, Obusondoli obw’Erisekulya Omwa Bitabu eby’Abema ba Yehova, ne jw.org^® eribana ebyanga muwathikya okwa kitsibu ekyo. Amabirithendekwa ndeke athali abatizibwa, ikikendi muwathikya erikolongana n’abandi omwa kithunga enyuma waho.

16. Ni bibuya byahi ebya wamalhangira omw’ighenda n’abandi okwa mwigha wawu?

¹⁶ Wuk’igha n’omwigha​—ghenda n’abandi—​kandi ghenda n’omulebererya w’omuthimbo akababungira. Busana naki? Eryongera okwa bya thwabirikaniako, abandi bathuliri bangana thoka eriwathikya omwigha wawu omwa nzira eyo wuthe wanga thoka. Ng’eky’erileberyako, omwigha anemulengaho eritsira ethaba aliwe abirilemwa ngendo nyingyi. Ghenda n’omuthuliri oyuwasingura omutse oyo, obundi nayu mwalengaho ngendo nyingyi erilekagho. Omuthuliri oyo inianganaha omwigha y’amenge agho akayithagha. Wamabya iwukasagha eryeghesya omwigha embere sya mughalha wethu oyuwasi bingyi, mubwire wuthi asondole. Omwigha wawu angana ghasirwa omwa ebya bathuliri abo balhabamo. Wibuke ngoku ekilhubirirwa kyethu ly’eriwathikya omwigha akule bunyakirimu.

17-18. Ni byahi ebya wutholere iwalebya wukathwamu erileka erigha n’omundu?

¹⁷ Omwigha wawu amabya isyali kolha esyombinduka, iwangana yibulya wuthi, ‘Mbwino ngamuleke?’ Wuthe wathwamu, wutholere iwatsuka erilengekania oko maaka wiwe. Abandi bakakulha-kulhana lhuba n’abandi eyihi. Yibulhaye: ‘Mbwino omwigha waghe anemukulha-kulhana erikwamana n’emibere eyalimu?’ Anabiritsuka erighendera okwa by’ak’igha? (Mt. 28:20) Omwigha angana kulha-kulhana lyolho-lyolho, aliwe atholere iniabya inianemukolha esyombinduka.

¹⁸ Kandi ibbwa omundu amabya iniabirigha habw’obuthuku buuli, aliwe iniathakangania erikulha-kulhana lyosi-lyosi? Thalengekania oku kino: Omwigha wawu iniaghunza erigha ekitabu Yanga Thukangiriryaki, obundi n’eritsuka erigha ekya Sighalha omo Lhwanzo Lhwa Nyamuhanga, aliwe iniabya isyali  athahindana okwa muhindano n’omughuma​—kutse nibya n’okw’Ibuka olhuholho lhwa Yesu! Kandi obundi akanaghana erigha busana n’esyonzumwa esithenayo. Aho wutholere iwakania nayu okwa kitsibu kiwe butsira eribisirira. *

19. Ni byahi ebya wanga bwira omwigha oyuthekanganaya erikulha-kulhana lyosi-lyosi, kandi ni byahi ebya wutholere iwalengekaniako?

¹⁹ Iwangana tsuka erimubulya wuthi, ‘Wukalengekanaya ni kyahi ekyanga ku kakirya kutsibu eribya Mwema wa Yehova?’ Omwigha iniangana subirya athi, ‘Singwithe butsibu erith’igha, aliwe sinangabya Mwema wa Yehova!’ Ayo amabya iw’amalengekania wiwe kandi iniabirigha habw’obuthuku, mbwino hane ekyanga leka iwalholha embere erigha nayu? Aliwe hanganayira, omwigha wawu iniakubwira ekikamukakiriraya. Ng’eky’erileberyako, angana yowa nga syanga thoka erithulira nyumba okwa nyumba. Aho kundi wamabiriminya eky’akasagha, iwukendi thoka erimuwathikya.

20. Emibiri 13:48, NW hanga thuwathikya hathi erithwamu nga thulhole embere erigha n’omwigha kutse nga thumuleke?

²⁰ Eky’obulighe, abandi bigha bali ng’Abaisraeli ab’omwa buthuku bwa Ezekieli. Yehova abere akabakaniako, mwabwira Ezekieli athi: “Neryo lebaya, nawu wuli kubo ng’olhwimbo lhw’engumbu nyibi, lhw’oyuwithe omulenge owuwene, oyuwasi eriwatha enanga, kusangwa bak’owa ebinywe byawu, nikwa sibekolhabyo.” (Eze. 33:32) Kyangana kalha eribwira omundu thuthi thukendi leka erigha nayu. Aliwe, endambi eyikisighereyo ni nyike. (1 Kor. 7:29) Omwakanya k’eritsandya obuthuku wuk’igha n’omwigha oyuthekulha-kulhana, thutholere ithwasondekania abawithe “amalengekania awakaleka ibatholera eribana engebe y’erikotha.”​—Soma Emibiri 13:48, NW. *

21. Erisako lyethu ly’omwaka owa 2020 ly’eryahi, kandi busana naki litholere?

²¹ Omwa 2020, erisako lyethu ly’omwaka likendi thuwathikya eriminya ngoku thwanga kolha ndeke omubiiri w’eriyira abigha. Liri mw’ebighuma by’okwa binywe ebyo Yesu akanaya akahindana n’abigha biwe okwa kithwe e Galilaya, bithi: “Neryo mughende, muyire abigha . . . , mubatizayebo.”​—Mt. 28:19.