1-2. Ñanyi bintu malaika byo abuujile banabakazhi bayile ku kilende kya kwa Yesu, kabiji Yesu wibakambizhe’mba ka?

KYAJINGA kimye kya lukelo pa Nisanyi 16, 33 C.E. Banabakazhi bamo batemwa Lesa bajinga bingi na bulanda kabiji bayile ku kilende ko bazhikile mubiji wa Nkambo Yesu Kilishitu saka papita maola kukila 36 kufuma po bamuzhikijile. Byo bafikile ku kilende, bakebelenga’mba bashinge mubiji wa kwa Yesu na binunka bulongo ne manyi anunka bulongo, bino bakuminye bingi pa kumona’mba mubiji wanji ufwamo. Malaika wabuujile bano banabakazhi kuba’mba Yesu wasangulwa, kabiji wanungilepo’mba: “Watangilako kala ku Ngalilea. Mukamumona konkakwa.”—Mat. 28:1-7; Luka 23:56; 24:10.

² Banabakazhi byo bafumine ku kilende, Yesu wamwekele kwi abo ne kwibakambizha’mba: “Yainga mukabuule balongo bami kuba’mba baye ku Ngalilea kabiji bakammona konkakwa.” (Mat. 28:10) Yesu wafwainwa wajinga na mikambizho yanema yo akebelenga kupa baana banji ba bwanga, mambo kyo kyajinga kimye kitanshi kumonañana nabo kufuma kimye kyo asangwilwe.

3-4. Mambo ka o twakonsha kwambila’mba mukambizho wanembwa pa Mateo 28:19, 20 kechi wapainwetu ku batumwa ne? (Monai kipikichala kya pa nkupiko.)

³ Tangai Mateo 28:16-20. Yesu byo amonañene na baana banji ba bwanga, wibabuujile mwingilo wanema ye bafwainwe kwingilanga pa kyo kya kimye, kabiji ye mwingilo ye tubena kwingila lelo jino. Yesu waambile’mba: “Onkao mambo, yainga na kufunjisha bantu ba mu bisaka byonse bya bantu kwikala ke baana bami ba bwanga, . . . ne kwibafunjisha kulama bintu byonse byo nemukambizha.”

 ⁴ Yesu ukeba’mba baana banji ba bwanga bonse basapwilenga. Kechi wakambizhetu batumwa ba kishinka 11 kuba bino ne. Twayuka byepi? Nanchi batumwa bo bonkatu batainweko ku mutumba wa Ngalilea kimye Yesu kyo apaine mukambizho wa kufunjisha bantu kwikala baana ba bwanga nyi? Vulukai kuba’mba malaika waambijile banabakazhi amba: “Mukamumona [mu Ngalilea].” Onkao mambo, kyamweka ne banabakazhi ba kishinka batainweko. Pano bino, kechi bo bonkatu batainweko ne. Mutumwa Paulo waambile’mba, Yesu “wamwekele ku balongo kukila pa 500 pa kimye kimo.” (1 Ko. 15:6) Kwepi ko amonañene nabo?

5. Tufunjilako ka ku kinembelo kya 1 Kolinda 15:6?

⁵ Tuji na bishinka byakonsha kwitulengela kulanguluka’mba Paulo waambilenga pa kupwila kwajinga mu Ngalilea kwanembwa mu Mateo kitango 28. Ñanyi bishinka byonkabyo? Kitanshi, baana ba bwanga ba kwa Yesu bavula bajinga bena Ngalilea. Onkao mambo, kyayijilemo kupwila pamo ku mutumba wa Ngalilea na bantu bavula kukila kupwila mu nzubo ya muntu mu Yelusalema. Kya bubiji, Yesu byo asangwilwetu, patanshi wamonañene na batumwa banji 11 ku Yelusalema mu nzubo. Inge Yesu wakebelengatu kupa batumwa mukambizho wa kusapwila ne kufunjisha bantu kwikala baana ba bwanga, umvwe waubile bino mu Yelusalema kabiji inge kechi waambijile baana banji ba bwanga, banabakazhi ne bantu bakwabo kuya na kumonañana nanji ku Ngalilea ne.—Luka 24:33, 36.

6. Kinembelo kya Mateo 28:20 kimwesha byepi’mba mukambizho wa kufunjisha bantu kwikala baana ba bwanga wingila ne lelo jino, kabiji bantu babena kukookela byepi uno mukambizho?

⁶ Monai kishinka kya busatu kyanema. Mukambizho wa kwa Yesu wa kufunjisha bantu kwikala baana ba bwanga kechi wapainwetu ku bena Kilishitu batanshi ne. Twayuka byepi? Kimye kyo apaine mukambizho wanji, Yesu wapezhezheko na bino byambo: “Nji nenu moba onse kukafikatu ne ku mpelo ya buno bwikalo.” (Mat. 28:20) Byonkatu byaambile Yesu, bantu bavula lelo jino babena kufunjisha bantu kwikala baana ba bwanga. Akilangulukai pa kino: Pa mwaka pa mwaka bantu pepi 300,000 babatizhiwa ne kwikala Bakamonyi ba kwa Yehoba kabiji bekala baana ba bwanga ba kwa Yesu Kilishitu.

7. Tusakwisamba pa ka, kabiji mambo ka?

⁷ Bavula bafunda Baibolo bafikilamo kubatizhiwa. Nangwa byonkabyo, bantu bamo bo tufunjisha Baibolo bakankazhama kwikala baana ba bwanga. Bomvwa bingi bulongo kufunda Baibolo, bino kechi bakeba kubatizhiwa ne. Umvwe muji na muntu ye mufunjisha Baibolo, twaketekela kuba’mba mukeba kumukwasha kwingijishanga byo afunda mu bwikalo bwanji ne kwikala mwana wa bwanga wa kwa Kilishitu. Uno mutwe waamba pa byo twakonsha kufika pa muchima bantu bo tufunjisha Baibolo ne byo twakonsha kwibakwasha kuyilako palutwe. Mambo ka o twafwainwa kwisambila pa uno mutwe? Mambo kimye kimo twakonsha kufuukulapo kuleka kufunjisha muntu.

8. Mambo ka bimye bimo o kyakonsha kukatezha kukwasha bo tufunjisha Baibolo kutemwa Yehoba?

⁸ Yehoba ukeba bantu kumwingijila na mambo a kumutemwa. Onkao mambo, twafwainwa kukwasha bo tufunjisha Baibolo kuyuka’mba Yehoba wibata bingi muchima pa muntu pa muntu kabiji amba wibatemwa bingi. Tukeba kwibakwasha kuyuka’mba Yehoba “ye shabo baana babula bashabo kabiji ye upokolola banabakazhi bafwilwa.” (Sala. 68:5) Inge bo mufunjisha Baibolo bayuka’mba Lesa wibatemwa, ne abo bakatendeka kumutemwa. Kyakonsha kukatazha bafunda Baibolo bamo kuswa’mba Yehoba ke Shetu wa butemwe na mambo a kuba’mba bashabo kechi bebamwesha butemwe ne kifyele ne. (2 Timo. 3:1, 3) Onkao mambo, inge mubena kufunjisha muntu Baibolo, mukwashai kuyuka byubilo bya kwa Yehoba byawama. Kwashainga bo mufunjisha Baibolo kuyuka’mba Lesa wetu wa butemwe ukeba’mba bakekale na bumi bwa myaka ne myaka  kabiji wipana kwibakwasha. Ñanyi bintu bikwabo byo twakonsha kuba?

9-10. Ñanyi mabuku o twafwainwa kwingijisha pa kufunjisha bantu Baibolo, kabiji mambo ka?

⁹ Ingijishainga buku wa “Nanchi Baibolo Waamba’mba Ka?” ne wa “Byo Twafwainwa Kwikala mu Butemwe bwa Lesa.” Ano mabuku beanengezha kwitukwasha bya kufika pa muchima bo tufunjisha Baibolo. Kitango 1 kiji mu buku wa Nanchi Baibolo Waamba’mba Ka? kyakumbula ano mepuzho: Nanchi Lesa wituta muchima nyi, inyi wakanama?, Lesa umvwa byepi pa kumona bantu na kuyanda?, ne bwa kuba’mba Nanchi Yehoba wakonsha kwikala mulunda nenu nyi? Nga mu buku wa Byo Twafwainwa Kwikala mu Butemwe bwa Lesa? Uno buku wakonsha kukwasha bo tufunjisha Baibolo kuyuka mafunde a mu Baibolo byo akonsha kwibakwasha mu bwikalo bwabo ne byo bakonsha kufwenya kwipi ne Yehoba. Nangwa kya kuba mufunjisha bavula mu ano mabuku, mwafwainwa kunengezha saka mukyangye kuya na kufunjisha muntu ne kuyuka mo mwakonsha kumukwasha.

¹⁰ Mwakonsha kuba byepi inge muntu ye mufunjisha Baibolo ukeba kufunda pa mutwe uji mu  buku wabula pa mabuku o twingijisha pa kufunjisha bantu Baibolo? Kampepo mwakonsha kumubuula kutanga yewo buku pa bunke bwanji pa kuba’mba mutwajijile kumufunjisha Baibolo mu mabuku o twaambapo kala.

11. Ñanyi kimye kyo twakonsha kutendeka kulomba pa kufunjisha muntu Baibolo, kabiji twakonsha kukwasha byepi ye tufunjisha Baibolo kuyuka ene mambo o kyanemena kuba bino?

¹¹ Tendekai na lulombelo pa kufunjisha muntu Baibolo. Kyanema bingi kutendeka ne kupezhako na lulombelo inge mwatendekatu kufunjisha muntu Baibolo, kikatakata mu milungu itanshi yo mwatendeka kumufunjisha. Mwafwainwa kukwasha ye mufunjisha Baibolo kuyuka’mba twakosha kumvwisha Mambo a Lesa na bukwasho bwa mupashi wa Lesa. Basapwishi bamo bamba ene mambo o tulombela kupichila mu kutanga Yakoba 1:5, paamba kuba’mba: “Umvwe umo mwi anweba wakepelwa maana, alombenga kwi Lesa.” Apa bino baipuzha bo bafunjisha Baibolo amba, “Twakonsha kuba byepi pa kuba’mba Lesa etupe maana?” Ubena kufunda Baibolo wakonsha kwamba’mba, twafwainwa kulomba kwi Lesa.

12. Mwakonsha kwingijisha byepi Salamo 139:2-4 pa kukwasha ye mufunjisha Baibolo kuyuka bya kulomba?

¹² Funjishai ye mufunjisha Baibolo kuyuka bya kulomba. Mulumbulwilai kuba’mba Yehoba ukeba kumvwa milombelo yanji ya kufuma panshi ya muchima. Lumbululai kuba’mba mu milombelo yetu ya pa bunke, twakonsha kubuula Yehoba byo tumvwa ne bintu byo twakonsha kubula kubuulako muntu mukwabo. Vulukai kuba’mba Yehoba wayukila jimo milanguluko yetu. (Tangai Salamo 139:2-4.) Kabiji twakonsha kutundaika bo tufunjisha Baibolo kulomba Lesa kwibakwasha kushinda milanguluko ne byubilo byatama. Fwanyikizhai kuba’mba muntu wafunda Baibolo pa kimye kyabaya watemwa kusekelela moba a kukookoloka a bantu babula kupopwela Lesa. Wayuka’mba kuba bino kwatama, pano bino watwajijila kutemwa byubiwa pa kuno kusekelela. Mwakonsha kumutundaika kubuula Yehoba byo omvwa ne kumusashijila kuba’mba amukwashe kutemwa bintu Lesa byo atemwa.—Sala. 97:10.

13. (a) Mambo ka o twafwainwa kwichilanga bo tufunjisha Baibolo ku kupwila inge twatendekatu kwibafunjisha? (b) Twakonsha kulengela byepi bo tufunjisha Baibolo kukasuluka inge baiya na kupwila pa Nzubo ya Bufumu?

¹³ Itaiko ye mufunjisha Baibolo kwiya na kupwila inge mwatendekatu kumufunjisha Baibolo. Bikomvwa ye mufunjisha Baibolo ne byo akamona pa kupwila bikamufika pa muchima ne kumutundaika kwingijila Yehoba. Mumweshai vidyo wa kuba’mba Ñanyi Bintu Byubiwa pa Nzubo ya Bufumu? ne kumwita kuba’mba mukaye nanji na kupwila. Mwakonsha kumukwasha na ñendelo inge kyakonsheka. Kyawama bingi kuya na basapwishi bapusana-pusana ku bantu bo mufunjisha Baibolo. Inge kemube bino, bo mufunjisha Baibolo bayuka bantu bavula baji mu kipwilo, kabiji bakakasuluka inge batendeka kupwila.

14. Ñanyi kintu kyakonsha kutundaika muntu ubena kufunda Baibolo kuyilako palutwe?

¹⁴ Kintu kyo tukebesha ke kukwasha bo tufunjisha Baibolo kuyilako palutwe. (Efi. 4:13) Inge muntu waswa kufunda Baibolo, wakonsha kuta bingi muchima pa byo akamwenamo mu kufunda Baibolo. Bino inge butemwe bwa kutemwa Yehoba bwabaya, ukatendeka kulanguluka pa byo akonsha kukwasha bakwabo, kubikapotu ne baji kala mu kipwilo. (Mat. 22:37-39) Kabiji inge kyakonsheka, mwakonsha ne kumubuula lunengezho lwa kutundaika mwingilo wa Bufumu kupichila mu kupana bupe bwa mali.

15. Twakonsha kukwasha byepi ye tufunjisha Baibolo kuyuka bya kuba na makatazho?

¹⁵ Funjishai ye mufunjisha Baibolo bya kuba inge waikala na makatazho. Mwakonsha kuba byepi inge musapwishi wabula kubatizhiwa ye mufunjisha Baibolo wimubuula’mba muntu umo mu kipwilo wamufichisha ku muchima? Kechi mwafwainwa kumubuula waubile bulongo nangwa  watamishe ne, bino mulumbulwilai byo afwainwa kuba kwesakana na byaamba Binembelo. Wakonsha kumulekelako mambo mulongo ne kulubako. Bino inge wakankalwa kuba bino, wafwainwa kumusolomoka ne kwisamba nanji mu jishinda jimwesha butemwe na mulanguluko wa ‘kubwezha mulongo wanji mu jishinda jawama.’ (Esakanyaiko Mateo 18:15.) Kwashai ye mufunjisha Baibolo kunengezha byo bakesamba na yeo mulongo. Mumweshai bya kwingijisha JW Library^® app, Buku wa Kukwasha Bakamonyi ba kwa Yehoba Kukebakeba Bishinka, ne Keyala wetu wa jw.org^® pa kuba’mba ayuke bya kuba na makatazho. Inge wayuka bya kupwisha makatazho na bakwabo mu kipwilo saka akyangye kubatizhiwa, kikamukwasha kukwatankana na balongo ne banyenga mu kipwilo inge wabatizhiwa.

16. Mambo ka o kyawamina kwitako basapwishi bakwabo kwikalapo kimye kyo mubena kufunjisha muntu Baibolo?

¹⁶ Itaiko basapwishi bakwabo baji mu kipwilo kyenu ne kalama wa mwanzo inge wafwakesha kipwilo kuya nabo ku muntu ye mufunjisha Baibolo. Mambo ka? Kununga pa bishinka byo twisambapo kala, basapwishi bakwabo bakonsha kukwasha ye mufunjisha Baibolo bintu byo mwakonsha kukankalwa kumukwasha. Twambe’mba, muntu ye mufunjisha Baibolo waeseka pa bimye byavula kuleka kupepa fwanka bino wakankalwa. Kimye kyo mubena kumufunjisha Baibolo, itaiko Kamonyi washinjile luno lukatazho kutanwapo. Uno Kamonyi wakonsha kumubuula byo aubile kabiji byakonsha kukwasha ye mufunjisha Baibolo kuleka kupepa fwanka. Inge kechi mukasuluka kufunjisha bantu Baibolo inge mwaingila na mulongo waingijila Lesa pa myaka yavula ne, mwakonsha kumubuula kutangijila lufunjisho. Bo mufunjisha Baibolo bakonsha kufunjilako byavula ku basapwishi bo muya nabo. Vulukai kuba’mba, kikonkwanyi kyetu ke kukwasha bo tufunjisha Baibolo kuyilako palutwe.

17-18. Ñanyi bintu byo mwafwainwa kulangulukapo saka mukyangye kufuukulapo kuleka kufunjisha muntu Baibolo?

¹⁷ Inge ye mufunjisha Baibolo kechi ubena kupimpula byubilo byanji ne, kimye kimo mwakonsha kwiipuzha amba, ‘Nanchi nafwainwa kuleka kumufunjisha Baibolo nyi?’ Pa kuba’mba mufuukulepo bulongo, mwafwainwa kulanguluka pa biji yeo muntu. Bamo bo tufunjisha Baibolo bapimpula byubilo byabo bukiji, bino bakwabo papita kimye. Iipuzhai’mba: ‘Nanchi muntu ye mfunjisha Baibolo ubena kuyilako palutwe kwesakana na byo aji nyi? Nanchi watendeka “kulama,” nangwa kwingijisha bintu byo abena kufunda nyi?’ (Mat. 28:20) Pakonsha kupita kimye pa kuba’mba muntu ye mufunjisha Baibolo ekale mwana wa bwanga, pano bino, wafwainwa kutendeka kupimpula byubilo byanji pachepache.

¹⁸ Pano twakonsha kuba byepi inge twafunjisha muntu Baibolo pa kimye kyabaya, pano bino, kechi umwesha’mba wanemeka byo abena kufunda ne? Akilangulukai pa kino: Ye mufunjisha Baibolo wapwisha kufunda mu buku wa Nanchi Baibolo Waamba’mba Ka? Kabiji kampe watendeka ne buku wa Ikalai mu Butemwe bwa Lesa, pano bino,  ukyangye kutanwapo ku kupwila kwa kipwilo nangwatu ku Kivuluko ne. Kabiji javula kechi ukeba kufunda ne, na mambo a bintu byabula kunema. Inge kyaikala bino, mwafwainwa kwisamba nanji kwa kubula kupita mu mbaji pa luno lukatazho. *

19. Mwakonsha kwamba’mba ka ku ufunda Baibolo umwesha’mba kechi wanemeka byo afunda mu Baibolo ne, kabiji mwafwainwa kulanguluka pa ka?

¹⁹ Mwakonsha kutendeka mwisambo kupichila mu kumwipuzha’mba, ‘Ñanyi lukatazho lukatampe lwimulengela kubula kufuukulapo kwikala Kamonyi wa kwa Yehoba?’ Ye mufunjisha Baibolo kampe wakonsha kukumbula’mba, ‘Natemwa bingi kufunda Baibolo, pano bino, kechi nakonsha kwikala Kamonyi wa kwa Yehoba ne.’ Inge kyaikala bino, nanchi kujipo bishinka byakonsha kwimulengela kutwajijila kumufunjisha Baibolo nyi? Nangwa byonkabyo, ye mufunjisha Baibolo wakonsha kwimubuula kimye kitanshi kimulengela kubula kufuukulapo kwikala Kamonyi. Kampe wakonsha kwimubuula’mba ulanguluka’mba kechi wakonsha kusapwila ku nzubo ku nzubo ne. Inge mwayuka byo alanguluka, mukayuka bya kumukwasha.

20. Kinembelo kya Byubilo 13:48 kyakonsha kwitukwasha byepi kuyuka muntu ye twafwainwa kutwajijila kufunjisha Baibolo?

²⁰ Kyatamakotu ke kya kuba’mba, bamo bo tufunjisha Baibolo bajitu byonka byajinga bena Isalela ba mu moba a kwa Ezikyo. Yehoba wabuujile Ezikyo pe abo amba: “Umvwa! Obewa uji nobe lwimbo wa butemwe kwi abo, ye baimba bulongo na kimenge ne na kijimba kya mizhinge. Bakomvwa bintu byo ukebabuula, pano bino kafwako nangwa umo ukebyuba ne.” (Ezi. 33:32) Kyakonsha kwitukatazha kubuula muntu amba tusakuleka kumufunjisha Baibolo. Pano bino, “kimye kyashalako kyakepa.” (1 Ko. 7:29) Kechi twafwainwa kutayanga kimye na kufunjisha muntu Baibolo ubena kubula kuyilako palutwe ne, bino twafwainwa kukeba muntu mukwabo uji na ‘muchima wa bukishinka wa kukeba bumi bwa myaka ne myaka.’—Tangai Byubilo 13:48.

21. Ñanyi kinembelo kyetu kya mwaka wa 2020, kabiji mambo ka o kyawamina?

²¹ Mu uno mwaka wa 2020, kinembelo kyetu kya mwaka kisakwitukwasha kuta muchima pa kuwamishako bya kwingila mwingilo wetu wa kufunjisha bantu kwikala baana ba bwanga. Kino kinembelo kya mwaka kyaamba pa byambo bimo byaambile Yesu kimye kyo bajinga na kupwila kwanemene bingi ku mutumba wa Ngalilea. Kyaamba’mba: “Onkao mambo, yainga na kufunjisha bantu . . . , ne kwibabatizha.” —Mat. 28:19.