1-2. Yɛɛ maalikɛinɔɔ ndoo dimullɛ waŋlaanduaa o sɛi ndaa kumbu Chiisu wo, nduyɛ yɛɛ Chiisu pila ndoo dimullɛ nda?

IDIIYO puŋ, Niisaŋ 16, wɔsi 33 C.E., waŋlaanduaa laalaŋ o Mɛlɛka niŋnda apum wa a kɔl tambɛiyo tau okoŋ, ma kua o sɛi nda kumbu Chiisu wo. Ndoo hiou niŋ palɛi iŋiiŋ chɔŋ a teleŋ nda kumbu ndu o sɛi koŋ niŋndo. Mɛɛ nda fuuluu o sɛiyo, ndaa yeema le siɛndiiyaŋ a chuɛima chuŋ kɛndiaŋ wouwo o dialuŋ Chiisu woŋ choo. Kɛ mi kɔndɔfillo bii nda kanifuule, a seeluŋ ndɛ Chiisu o sɛiyo niŋ te! Mi maalikɛinɔɔ dimul waŋlaanduaa haa maa Chiisu miiŋgu yoomu. Mbo dimul nda vɛlɛ aa: “La kɔ niko chɔ chɔ mi la kɔ dimul buɛiyaa nduaa maa o miiŋgu yoomu, nduyɛ, maa o cho kɔlaŋ pɔɔ nya lachi Kalili. Loŋ nya cho ndu chɔ ni.”​—Maa. 28:​1-7; Luku 23:​56; 24:​10.

² Mɛɛ waŋlaanduaa kaŋ faŋaŋ o sɛiyo, mi Chiisu pila fula nda o hɔl nduyɛ mbo dimul nda aa: “La kɔ mi la kɔ dimul pɔmbuaa niaa ma kuɛ Kalili mi ŋ chiikiaŋ loŋ.” (Maa. 28:​10) Nyɛ tase Chiisu tosa mɛɛ o miiŋgu yoomu wo wa ni, mbo kɛɛsiaa le bɔŋaŋndo biyɔɔ a buɛiyaa nduaa. O bɔŋaŋ koŋ choo, mbo ke nda silala sɔvɛ sɔvɛlaŋ lapum!

3-4. Le yɛɛ naŋ dimi yɛ maa o cho ko wanaa Chiisu vem hɔlte ndɔ wa kinɛi le o ke wali cho o Maatiu 28:​19, 20 niŋndo le? (Tofa fotueiyo o kɔɔ.)

³ Nuawɔ Maatiu 28:​16-20. O bɔŋaŋ Chiisu ndoo kɛɛsiaa koŋ le biyɔɔ a buɛiyaa nduaa wo choo, mbo dimul nda a wali sɔvɛ ndaa nɔ ma wa tosaa o teleŋ koŋ niŋndo okɔɔ. Nduyɛ, wali pilɛ koŋ kpe naa bɛɛ cho hau tosaa ni. Mi Chiisu dimul nda aa: “La kɔ o ŋwaŋnda chiee lo ba o ba fee mi la siiŋguu nda buɛiyaa ni [nduyɛ] . . . mi la pɛɛku nda ma tosa nyɛ o nyɛ ya dimul nya le tosaa.”

 ⁴ Chiisu yeema mi tol kɔɔliaa nduaa kpou dimi yooŋgu kɛndɔɔ. O cho ko ŋwaŋ 11 o vem hɔlte ndɔ wa kinɛi le ndoo dimul le wallo hoo tosaa le. Le yɛɛ naŋ dimi yɛ lende? Kanifuule, teleŋ Chiisu dimul buɛiyaa nduaa le waŋnda siiŋgoo buɛiyaa ndɔ wo, o cho ko wanaa o vem hɔlte ndɔ wa le wa o bɔŋaŋ koŋ choo le. Vɛɛ naŋ looku yɛ hei sina? Loonuŋ maa mi maalikɛinɔɔ dimul waŋlaanduaa kaŋ aa: “[Kalili] nya cho ndu chɔ ni.” Mɛɛ ŋ dimi maa waŋlaanduaa ndaa laalaŋ o Mɛlɛka niŋnda bɛɛ wa o bɔŋaŋ koŋ choo. Kɛ o cho ko keŋ te. Mi Pɔɔl, wana Chiisu vem hɔlte ndɔ wo dimi maa mi Chiisu “chɔmnuŋ wanaa laalaŋnda kunda, nda aa hiou kɛmɔɔ le ŋuɛɛnu.” (1 Kɔliŋ. 15:​6) Kuɛɛ Chiisu ndoo chɔɔmuŋ yɛ ŋwaŋ 500 haa?

5. Le yɛɛ naŋ laalaŋ yɛ maa a bɔŋaŋ Chiisu bii nda buɛiyaa nduaa o Kalili niŋndo Kɔliŋtiaŋ Tasoo 15:​6 cho suɛi okɔɔ ni?

⁵ Ŋ nɔ sabulaŋ le laalaŋndo maa a bɔŋaŋ Chiisu bii nda buɛiyaa nduaa o Kalili niŋ, mi kona koŋ wa o Maatiu 28 niŋndo okɔɔ Pɔɔl wa suɛi ni. Le yɛɛ? Sabu tasoo cho ni, buɛiyaa Chiisuaa a bɔɔbɔɔ, Kaliliaŋnda nda wa ni. Lelaŋ, i wa bɔɔ tɛtɛlɛ le bɔŋaŋndo biyɔɔ a faŋga bɛndu waa lende o pembii keŋ choo Kalili. Kanifuule, ndaa sul o chiɛi waŋndo niŋ Chulusɛlɛm te. Sabu diiŋ ndɔɔ, mɛɛ Chiisu miiŋgu yoomu, ndoo komal niŋ ŋwaŋ 11 o vem hɔlte ndɔ wa chiɛiniŋ Chulusɛlɛm. Te Chiisu ndoo yeema pɛ mi nda kinɛi ndaa dimi yooŋgu kɛndɔɔ nduyɛ ma siiŋguu waŋnda buɛiyaa ndɔ, mɛɛ Chulusɛlɛm o wa nda dimul ni. Okoŋ, ndoo dimullɛ nda, waŋlaanduaa kaŋ, a wanaa cheleŋ maa a komal ndu Kalili le.—Luku 24:​33, 36.

6. Vɛɛ Maatiu 28:​20 chɔm yɛ maa naa bɛɛ nɔ miŋ siiŋguu waŋnda buɛiyaa Chiisuaa, nduyɛ vɛɛ kpɛ naŋ cho yɛ hei tosaa?

⁶ Tofawɔ vɛlɛ sabu yaa ndɔɔ. O cho ko Kilisiɔŋaa wa o teleŋ koŋ niŋnda kinɛi le Chiisu dimul le wallo hoo tosaa le. Le yɛɛ naŋ dimi yɛ lende? Mi Chiisu mɛɛlu tol kɔɔliaa nduaa dimul aa: “I cho wa latulu a nya haaa mbo lo o koŋ mi chieeŋndo hoo fuuluu o mɛɛlulaŋ.” (Maa. 28:​20) A mɛɛ Chiisu dimi yɛ, wanaa bɔɔbɔɔ cho hau waŋnda siiŋgoo buɛiyaa nduaa. Yiyaŋndɔ a hei okɔɔ! Wɔsi o wɔsi, waŋnda le 300,000 simnuŋ buɛiyaa Chiisuaa ni, ma sɔla yiŋɔɔ, okoŋ, ma simnuŋ Seiyaa Chɛhowaa. Hei cho bɔɔ suɛi sɔvɛ!

7. Yɛɛnɛ naŋ cho yɛ niko yaasiaa, nduyɛ le yɛɛ?

⁷ Mi wanaa bɔɔbɔɔ naŋ pɛɛku Baabuiyo wa tosa hiouwɔɔ lachioo okoŋ ma yiŋ. Kɛ mi apum yɔŋ siooŋnde le simnɔŋndo buɛiyaa Chiisuaa. Ma naŋ kɔl tau le mɛɛ naŋ wa nda pɛɛkoo yɛ, kɛ a tosa hiouwɔɔ lachi ma yiŋ te. Te a nɔ pɛ wana ŋ cho Baabuiyo pɛɛkoo wo, ŋ laalaŋ maa a cho ndu mala mbo dɔu nyɛ o cho pɛɛkoo wo o wali niŋ nduyɛ mbo simnuŋ buɛi Kiliti wo. Buŋgɛi hei cho naa chɔm mɛɛ naŋ mala wana naŋ cho Baabuiyo pɛɛkoo wo mbo kaala Chɛhowa nduyɛ mbo tosa hiouwɔɔ lachioo yɛ. Le yɛɛ naŋ yeema yɛ miŋ soo a hei okɔɔ? Kanifuule teleŋndaŋ lapum, ŋ nɔ miŋ kɛɛsiaa te ŋ nɔ pɛ miŋ hiou lachi a wana koŋ pɛɛkoo ɔɔ miŋ kelu pɛɛkoo.

8. Le yɛɛ o wa yɛ lepum ikala le wanaa naŋ pɛɛku Baabuiyo wa malaa ma nɔ kaalaa le Chɛhowa?

⁸ Chɛhowa yeema mi waŋnda piɛi ndu le mɛɛ nda kaala ndu yɛ. Lelaŋ, kpeleŋ naa le wanaa naŋ cho Baabuiyo pɛɛkoo wa cho ni, le nda malaa ma sina maa Chɛhowa buulaŋ a nda nduyɛ maa o kaala nda a pilɛŋ pilɛŋnda kpou. Ŋ nɔ miŋ mala nda ma sina maa Chɛhowa cho “finyaa le wanaa nɔ ŋfinya le wa ni. Nduyɛ ndu cho wana suŋgu le viiyaa nɔ lɛ ŋpiaandu le wa ni.” (Sam 68:​5) Te wanaa ŋ cho Baabuiyo pɛɛkoo wa nɔ pɛ balika melaa le mɛɛ Mɛlɛka kaala nda yɛ, keŋ cho nda nyindɔɔ mi nda bɛɛ kandu kaalaa nɔɔ le ndu. Mi wanaa naŋ pɛɛku Baabuiyo wa apum che ndi ikala kpoke le  laalaŋndo maa Chɛhowa kaala nda kanifuule, finyaa velu nda wa chɔm nda kaala le. (2 Timo. 3:​1, 3) Te a wa pɛ waŋndo Baabuiyo pɛɛkoo, chɔm ndu suliŋnda sɔvɛla Chɛhowalaŋ. Mala wanaa ŋ cho Baabuiyo pɛɛkoo wa ma sina maa Mɛlɛka naa kaalaa yeema nda ma sɔla yoomu fafɛɛŋndo, nduyɛ maa o cho o bɛɛndiaŋ le nda malaa ma sɔla ndu. Yɛɛ cheleŋ naŋ nɔ yɛ miŋ tosa?

9-10. Yaula kuɛɛ naŋ nɔ yɛ miŋ soliŋ kpeku te ŋ wa pɛ waŋnda Baabuiyo pɛɛkoo, nduyɛ le yɛɛ?

⁹ Soliŋ yaulaŋ ndaŋ kpeku, “Yɛɛ Baabuiyo Pɛɛku yɛ Naa?” a “Vɛɛ Ŋ Lo yɛ o Kaala Mɛlɛkaa Bɛŋgu?” A toosiaa yaulaŋ ndaŋ le wanaa naŋ cho Baabuiyo pɛɛkoo wa malaa ma kaala Chɛhowa. Le taamaseliiyo, buŋgɛi tasei o yauwo hoo niŋ Pɛɛku Naa, nɔ mulilaŋ le nyunalaŋ ndaŋ: Baa Mɛlɛka buulaŋ pa le naa? Vɛɛ Mɛlɛka yiyaŋ yɛ a nyɛpalaa waŋchieeya cho niŋndo? A nɔla pa ma simnuŋ chaaŋ o Chɛhowa? Tofawɔ vɛlɛ yauwo hoo, Kaala Mɛlɛka Wo. Yauwo hoo mala wana ŋ cho Baabuiyo pɛɛkoo wo mbo bii bila mɛɛ sawala mandaala Baabuiyo dɔwɔɔ o wali niŋ mala ndu yɛ. Hei mala ndu mbo tosa hiouwɔɔ lachioo o yoomu ndɔɔ niŋ nduyɛ mbo sɔɔŋguu Chɛhowa ikɛi kpɛɛluŋ. O yɔŋ bɛɛ maa a pɛɛku niŋ wanaa cheleŋ paandu o yauwo hoo niŋ, o bɛnda ma bɛɛndiaŋ nyɛkɛndɛi teleŋ kɛ kɛ  ŋ wa pɛ waŋndo pɛɛkoo. Nduyɛ ma mala ndu mbo che mɛɛ o duau nyɛ nya cho pɛɛkoo wo o wali niŋ yɛ.

¹⁰ Yɛɛ ŋ nɔ yɛ ma tosa te wana ŋ cho Baabuiyo pɛɛkoo wo yeema pɛ le sinaa suɛi cho o yaula naalaŋ niŋnde, kɛ i cho o yaula cho o Kɔfu Nyɛm Waliŋ Naŋ Pɛɛku Waŋnda Woŋ Niŋ te? Naapum a dimul ndu mi ndupila veelu diomndaŋ o yau koŋ niŋ a ba ndɔ. Koŋ tosa ma hiou lachi a ndu pɛɛkoo o yaula kɔɔnaa toosiaa le waŋnda malaa ma pɛɛku Baabuiyo wo niŋ.

11. Teleŋ kuɛɛ naŋ nɔ yɛ miŋ kandu pɛɛku Baabuiyo a piɛileŋ nduyɛ miŋ mɛɛlu a piɛileŋ, nduyɛ vɛɛ ŋ mala yɛ wana ŋ cho pɛɛkoo wo mbo sina le sabu hei cho isɔvɛ wo?

¹¹ Teleŋ o teleŋ piɛi fɛŋ malaŋ nya pɛɛku. O kpeekpei niŋ, o cho bɔɔ suɛi sɔvɛ le pɛɛku Baabuiyo kandɔɔ a piɛileŋ nduyɛ mi la mɛɛlu vɛlɛ a piɛileŋ te a kandu dɔɔ pɛ waŋndo pɛɛkoo. Ŋ nɔ miŋ mala wana naŋ cho Baabuiyo pɛɛkoo wo mbo sina maa nyina diandaa Mɛlɛkaa kinɛi mala naa ni miŋ sina Diom Mɛlɛkaa nyɛkɛndɛi. Mi puaapiliaa a ndepiliaa apum tɛɛsial wanaa nda pɛɛku Baabuiyo wa le sabu nda piɛi te a wa nda pɛ pɛɛkoo wo. Ma veelul nda diomndaŋ o Chemisi 1:​5 niŋ. Le dimi aa: “Te wana o wana wa nya tɛɛŋ pɛ mbo nɔ taasi le, mɛɛ wana koŋ o nyuna Mɛlɛka diom le mbo ke ndu taasioo.” Mi wana pɛɛkaa nyuna wana o cho pɛɛkoo wo aa, “Vɛɛ naŋ nyuna yɛ Mɛlɛka le mbo ke naa taasioo?” Naapum mi wana o cho pɛɛkoo wo muli aa o piɛileŋ niŋ.

12. Vɛɛ ŋ soliŋ yɛ Sam 139:​2-4 kpeku le wana ŋ cho Baabuiyo pɛɛkoo wo malaa mbo piɛi o Chɛhowa lo a kɔl ndɔɔ kpou?

¹² Chɔm wana ŋ cho pɛɛkoo wo mɛɛ wana piɛi yɛ. Tɛɛsial ndu maa Chɛhowa yeema mbo tuei piɛile fula ndu o kɔl dika leŋ. Chɔɔlu ndu tɛɛsial maa te ŋ wa pɛ piɛileŋ le naapila, ŋ nɔla miŋ dimul Chɛhowa nyɛ cho naa o kɔl lo. Nduyɛ maa miŋ dimul ndu pɛŋ nyɛ naŋ nɔla bɛɛ miŋ dimul acheleŋnda le wo. Loonuŋ maa Chɛhowa sina yiyaŋnda naalaŋ kpou. (Nuawɔ Sam 139:​2-4.) Ŋ dɛɛniaa vɛlɛ wana naŋ cho pɛɛkoo wo mbo piɛi Mɛlɛka le mbo mala ndu le yiyaŋnda ndɔlaŋ a kaala ndɔla wɔɔŋndaŋ malɔɔ. Le taamaseliiyo, yiyaŋndɔ maa wana ŋ cho niŋ Baabuiyo pɛɛkoo le teleŋ vilɛiyo kaala dunyɛi waŋnda tosa o chieeŋndo niŋndo ipum. O sina kɛsɛ maa dunyɛi keŋ niŋ kposoŋ le Kilisiɔŋnɔ tonyaa le, kɛ tonyaa cho ni maa o kaala wɔ sɔɔŋ waŋnda tosa o dunyɛi keŋ choo woŋ ŋ tiŋ. Dɛɛniaa ndu le mbo dimul Chɛhowa yiyaŋ ndɔɔ o piɛileŋ niŋ nduyɛ mbo nyɔɔlu ndu le mbo mala ndu mbo kaala nyɛ Chɛhowa bɛɛ kaala wo.—Sam 97:​10.

13. (a) Le yɛɛ o bɛnda yɛ miŋ dimul wanaa naŋ pɛɛku Baabuiyo wa le kɔlaŋ o bɔŋaŋnda naalaŋ te ŋ kandu dɔɔ pɛ nda pɛɛkoo? (b) Vɛɛ naŋ tosa yɛ ma wa fɛɛsɛŋ te a kuɛ pɛ o bɔŋaŋnda naalaŋ?

¹³ Dimul wana ŋ cho Baabuiyo pɛɛkoo wo le kɔlaŋ o bɔŋaŋndaŋ te a kandu dɔɔ suukaŋndo a ndu pɛ. Mi nyɛ wana ŋ cho Baabuiyo pɛɛkoo wo tuɛi o bɔŋaŋnda naalaŋ nduyɛ mbo che vɛlɛ wo pilaŋ ndu kɔllo tau. Nduyɛ, o nɔla mbo mala ndu mbo piɛi Chɛhowa. Chɔm ndu vidueiyo hoo, Yɛɛ Naŋ Tosa yɛ o Toŋgo naa leMasaa Niŋ? nduyɛ ma dimul ndu le kɔlaŋ o bɔŋaŋndo. Te o bɛnda pɛ, a ke ndu kaniei le mbo chua nyɛ nyaanaŋndo. O cho bɔɔ vɛlɛ suɛi sɔvɛ le kɔlaŋ a puaapiliaa a ndepiliaa yɛ yiaa o wana ŋ cho Baabuiyo pɛɛkoo wo lo. O nɛi koŋ choo, o nɔla mbo sina wanaa cheleŋ o kundaa niŋ, nduyɛ koŋ tosa mbo wa fɛɛsɛŋ te o kuɛ pɛ o bɔŋaŋnda naalaŋ.

14. Yɛɛ nyindu yɛ wana ŋ cho Baabuiyo pɛɛkoo wo mbo nɔ yeemɛi le hiouwɔɔ lachioo tosaa o Mɛlɛka piɛiyo niŋ?

¹⁴ Kpeleŋ naa cho le wana naŋ cho Baabuiyo pɛɛkoo wo malaa mbo tosa hiouwɔɔ lachioo o Mɛlɛka piɛiyo niŋ ni. (Ɛfi. 4:​13) Te waŋndo chɛl pɛ le miŋ pɛɛku ndu Baabuiyo, mbo wa a yeemɛi tau le miŋ mala ndu o pɛɛku koŋ  niŋ. Mɛɛ kaala ndɔɔ le Chɛhowa hiau lachi fau, mbo kandu dɔɔ yiyaŋndo le acheleŋnda a wanaa cho niŋ bɛɛ o kundaa niŋnda malaa. (Maa. 22:​37-39) Te o bɛnda pɛ, a dimul wana ŋ cho Baabuiyo pɛɛkoo wo maa ndu bɛɛ nɔ dioo le mbo toolu wali dimiaa yooŋgu kɛndɔɔ a nyɛsɔlaa.

15. Vɛɛ naŋ mala yɛ wana naŋ cho Baabuiyo pɛɛkoo wo mbo tosa nyɛ bɛnda wo te waŋndo o kundaa niŋ pilaŋ ndu pɛ tana?

¹⁵ Mala wana ŋ cho Baabuiyo pɛɛkoo wo mbo sina nyɛ o nɔ mbo tosa wo te bahawɛilaŋ la komal ndu pɛ. Le taamaseliiyo, ŋ dimi wɔ maa wana dimiaa yooŋgu kɛndɛ yiŋndɔ le wo wana ŋ cho Baabuiyo pɛɛkoo wo cho ni. Kɛ mbo dimul num maa waŋndo o kundaa niŋ pilaŋ ndu tana. Yɔŋi ŋ kiolu yamɛi, o bɛnda ma mala ndu mbo sina nyɛ Baabuiyo dimi maa o nɔ mbo tosa wo. Te o nɔla pɛ, o mal wana koŋ haki fasɛi nduyɛ mbo puɛɛnuŋ a suɛi kalɛi. Kɛ te o nɔla mbo tosa hei le, mɛɛ o komal wana koŋ ma toosiaŋ tɛɛŋ. (Tuuwɔ Maatiu 18:​15.) Mala wana ŋ cho Baabuiyo pɛɛkoo wo mbo bɛɛndiaŋ le nyɛ o nɔ le kɔlaŋ dimioo wo. Chɔm ndu mɛɛ wana soliŋ nyɛm walloŋ muŋ kpeku le yaasiaa tosaa le bahawɛilaŋ solioo o nɛila sɔvɛlaŋ niŋ yɛ. Muŋ cho ni, JW Library^® app, Yau Yaasiaa ŋSɔɔ le Seiyaa Chɛhowaa, a jw.org^®. Te o pɛɛku pɛ mɛɛ o soli bahawɛilaŋ a wanaa cheleŋnda yɛ tuupa mbo yiŋ, koŋ tosa mbo nɔ chaŋyɛi kɛndɛi a wanaa cheleŋnda o kundaa niŋ o yɔŋ bɛɛ mbo yiŋ.

16. Le yɛɛ o bɛnda yɛ miŋ dimul puaapiliaa a ndepiliaa cheleŋ le ma liila naa o pɛɛku Baabuiyo?

¹⁶ Kɔ a wanaa cheleŋ o kundaa niŋ o pɛɛkula numndaŋ nduyɛ, a kua vɛlɛ a buɛi ibuŋgaa teleŋ o huŋ kunda nyaa yilɔɔ wo. Le yɛɛ? O faŋaŋndɔ o sabula naŋ chɔm suŋ ndaŋ kɔɔli, mi wanaa dimiaa yooŋgu kɛndiaa cheleŋ mala wana ŋ cho pɛɛkoo wo o nɛila ŋ tiuba le ndu mala le laŋ niŋ. Le taamaseliiyo, ŋ tuuwɔ maa wana ŋ cho Baabuiyo pɛɛkoo wo kindiŋ niŋ teleŋnda bɔɔbɔɔ le mbo mal sikɛɛtiiyo kolɔɔ, kɛ o tiuwɔ ba le. Dimul Sei Chɛhowa ndoo kol sikɛɛtiiyo paandu wo le mbo liila num o pɛɛku koŋ. Naapum mi ndu bɛɛ kindiŋ teleŋnda bɔɔbɔɔ le ndu malɔɔ kɛ o ve batiuwaa sɔla le haaa mɛɛ mi teleŋ tiŋ hiau. Naapum Sei Chɛhowa liila num koŋ ndo cho wana koŋ sila o yeema wo ke. Te siɔmbulaŋ la wa num pɛ le pɛɛku Baabuiyo tosaa puaapilɛnɔ nɔ taasioo tau wo o hɔl, dimul ndu le mi ndu tosa pɛɛku koŋ paaleleŋ. Te a dimul pɛ acheleŋnda le ma liila num le waŋndo pɛɛkoo, wana ŋ cho pɛɛkoo wo tiuba mbo sɔla tɔnɔɔ o taasi ndaa niŋ. Loonuŋ maa kpeleŋ naa cho ni le miŋ mala wana naŋ cho pɛɛkoo wo le mbo tosa hiouwɔɔ lachioo o Mɛlɛka piɛiyo niŋ.

17-18. Yɛɛ ŋ nɔ yɛ ma kɛsiŋ o kɔl te a wa pɛ kɛɛsiaa le pɛɛkoo kiolɔɔ?

¹⁷ Te wana ŋ cho Baabuiyo pɛɛkoo wo ve siŋgaŋnda tosa le, o bɛnda ma nyunaŋ aa, ‘Baa o bɛnda pa mi kelu pɛɛkoo a ndu?’ Tuupa ma tosa kɛɛsiaa hoo, o bɛnda ma yiyaŋ fɛŋ a nyɛ wana koŋ tiuba le tosaa wo okɔɔ. Mi waŋnda apum chua teleŋndo tau le hiouwɔɔ lachioo tosaa mbo hiou apum. Nyunaŋndɔ aa, ‘Baa wana ya cho pɛɛkoo wo cho pa hiouwɔɔ lachioo tosaa a mɛɛ o tiuba yɛ?’ ‘Baa o kandu pa ‘tosaa’ ɔɔ  dɔwɔɔ nyɛ o cho pɛɛkoo wo o wali niŋ?’ (Maa. 28:​20) Mbo chua teleŋndo tau le mi wana ŋ cho pɛɛkoo wo simnuŋ buɛi Chiisoo, kɛ o nɔ mbo wa siŋgaŋndaŋ tosaa o pɔmpɔmbɔ.

¹⁸ Te o wa yɛ mi wana ŋ cho niŋ pɛɛkoo le teleŋ vilɛiyo ve hiouwɔɔ lachi tosa le? Ŋ dimi wɔ maa wana ŋ cho pɛɛkoo wo chii niŋ yauwo hoo Pɛɛku Naa, nduyɛ, mi la kandu pɛŋ yauwo hoo Kaala Mɛlɛka Wo pɛɛkoo. Kɛ, paale pilɛ bɛɛ o kue wɔ o bɔŋaŋndo a o Loonuŋyaa le! Nduyɛ pɛŋ, teleŋnda bɔɔbɔɔ, mbo kɛɛ pɛɛkoo le sɔɔŋ cho ŋ sɔvɛ le woŋ. O hei niŋ, o bɛnda ma dimul ndu kpendekele maa a cho lɛ wa pɛɛku a ndu le. *

19. Yɛɛ ŋ dimullɛ pɛɛku Baabui cho hiouwɔɔ lachi tosa le wo, nduyɛ a yɛɛ okɔɔ ŋ nɔ yɛ ma yiyaŋ?

¹⁹ A nyuna ndu aa, ‘Yɛɛ kpeekpei cho yɛ num paaliaŋndo le simnɔŋndo Sei Chɛhowaa?’ Naapum mi wana ŋ cho pɛɛkoo wo muli aa, ‘I kaala bɔɔ Baabuiyo pɛɛkoo, kɛ fɛŋ bɛɛ I simnuŋ niŋ Sei Chɛhowaa le!’ Te o pɛɛku niŋ pɛ le teleŋ vilɛi nduyɛ mbo nɔ wɔ yiyaŋ waa naa, mɛɛ o bɛnda ma kelu pɛɛkoo a ndu. O baa pilɔɔ choo, naapum mi wana ŋ cho pɛɛkoo wo chɔm nyɛ cho ndu kuunaa hiouwɔɔ lachioo tosaa wo. Le taamaseliiyo, naapum o yiyaŋ maa fɛŋ bɛɛ o tiu niŋ ba mbo dimi yooŋgu kɛndɔɔ chiɛiyo a chiɛiyo le. O hei niŋ, te a sina niŋ pɛ yiyaŋ ndɔɔ, a tiuba niko ma sina mɛɛ ŋ mala ndu yɛ.

20. Vɛɛ Walta Wanaa Chiisuaa 13:​48 mala yɛ naa le sinaa te o bɛnda pɛ miŋ hiou lachi a waŋndo pɛɛkoo ɔɔ miŋ kelu pɛɛkoo?

²⁰ I cho suɛi imɔnɔ le sinaa maa, wanaa naŋ pɛɛku Baabuiyo wa apum cho ko mɛɛ Isɔluɛiya wa o palɛi Isikiaa ve niŋ yɛ. Mi Chɛhowa dimul Isikiaa a nda okɔɔ aa: “A chua num machuaa mɛɛ wana nyɛ chaa o cho nuaa yɛ. Mɛɛ waŋnda chuuŋgiaŋ nuaa le hunɔɔ wana chaa towaa chaa bɛndoo lɔɔ mbo soli chonduŋ kɛndɔŋ ndo nilaŋ yaŋɔɔ yɛ, lende nda chuuŋgiaŋ naapilɛ le num nilaŋ yaŋɔɔ ni. Kɛ nduyɛ nyɛ o nyɛ ŋ dimul nda le tosaa, o pilɛ bɛɛ a chɛl ma tosa ndu le.” (Isi. 33:​32) Naapum miŋ che ndi ikala le wana naŋ cho pɛɛkoo wo dimullo maa ŋ cho lɛ wa pɛɛku a ndu le. Kɛ, “teleŋndo o bendu lɛ le.” (1 Kɔliŋ. 7:​29) Yɔŋi naŋ hiou lachi a wana cho hiouwɔɔ lachi tosa le wo pɛɛkoo, o bɛnda miŋ nuuviaa wanaa cho a yeemɛi le “yoomu kpeekpeiyo o nɔ lamɛɛlu le wo” sɔlaa wa.​—Nuawɔ Walta Wanaa Chiisuaa 13:​48.

21. Yɛɛ cho yɛ bolle Baabuile naaleŋ le wɔsi 2020, nduyɛ yɛɛ le cho yɛ naa mala miŋ tosa?

²¹ Bolle Baabuile naaleŋ le wɔsi 2020 cho naa mala miŋ nuuviaa nɛila naŋ tosa hiouwɔɔ lachioo le waŋnda siiŋgoo buɛiya Chiisuaa wo. Le nɔ sɔɔŋ Chiisu dimi woŋ ŋtiŋ a teleŋ o bii bɔŋaŋndo a buɛiyaa nduaa o pembii keŋ choo Kalili wo. Le dimi aa: “La kɔ o ŋwaŋnda chiee lo . . . mi la siiŋguu nda buɛiyaa ni . . . mi la yiŋ nda.”​—Maa. 28:​19.