1-2. Yinki ange mosi zonza’a na bakento ntangu ba kuma’a na tombo, mpe yinki Yesu yandi mosi zonza’a na bawu?

NA SUKA ya 16 Nisan (kalendrie ya bajwif) ya mvula 33 N.B. (Ntangu ya Beto), na mawa na ntima, bakento yina zola’a Nzambi kwenda’a na tombo ya Yesu, bilumbu tatu na manima ya lufwa ya yandi. Ba kwenda’a samu na kutula mafuta na mvumbi ya Yesu, kasi ba pamuka’a ntangu ba tala’a ti, mvumbi vanda dyaka ve kuna! Ange mosi zonza’a na bawu ti, Yesu me vumbuka na lufwa. Yandi bwela’a: “Yandi me tekila na Galile. Ni kuna beno ke tala yandi.”—Mat. 28:1-7, nwt-MK; Luke 23:56; 24:10.

² Ntangu ba katuka’a na tombo, Yesu yandi mosi bwabana’a bawu na nzila mpe zonza’a na bawu: “Beno kwenda [zabisa] bampangi ya munu ti, ba kwenda na Galile. Ni kuna ba ke tala munu.” (Mat. 28:10) Kima ya ntete yina Yesu sala’a ntangu ba vutulaka yandi na luzingu, ni kusala lukutakanu na bilandi ya yandi, samu yandi vanda’a na malongi ya mfunu mingi ya kupesa bawu.

3-4. Wapi faso beto me zaba ti Yesu pesa’a ve musiku ya Matayi 28:19, 20, kaka na ba-apotre 11? (Tala foto ya kuverture.)

³ Tanga Matayi 28:16-20. Na lukutakanu yina Yesu sala’a, yandi lakisa’a pwelele ti, bilandi ya yandi zola sala kisalu mosi ya mfunu na siekle ya ntete—ni kisalu yina mpe beto ke sala’a bubu yayi. Yesu zonza’a: “Na yina, beno kwenda na bantu ya bayinsi nyonso, . . . beno longa bawu na kusadila mambu nyonso yina mu longa’a beno.”

⁴ Yesu zola ti, bilandi ya yandi nyonso sala kisalu ya predikasion. Na mongo ya Galile, Yesu pesa’a ve musiku yayi kaka na ba-apotre  11 yina vanda’a na yandi. Wapi faso beto me zaba yawu? Samu ti, bantu ya nkaka vanda’a kuna. Yinki ke na lakisaka yawu? Beto zimbana ve mambu yina ange zonza’a na bakento: “Ni [na Galile] beno ke tala yandi.” Ya me lakisa ti, bakento yayi mpe, vanda’a na lukutakanu yango. Kasi, ya me suka ve kaka kuna. Apotre Paul zonza’a dyaka ti Yesu “talana’a mpe na bampangi kuluta 500, yina vukana’a kisika mosi.” (1 Ko. 15:6) Na wapi kisika Yesu vukana’a na bilandi 500 yango?

5. Samu na yinki beto lenda ndima ti 1 Bakorinto 15:6 ke zonzila’a lukutakanu yina Yesu sala na mongo ya Galile?

⁵ Beto ke na barezon mingi ya kukanisa ti, na 1 Bakorinto 15:6, Paul vanda’a zonzila lukutakanu yina Yesu sala’a na Galile. Wapi yina ke barezon yango? Ya ntete, bilandi mingi ya Yesu vanda’a bantu ya Galile. Na yina, ya vanda’a ve mpasi na kusala lukutakanu yina zola vukisa bantu mingi na mongo ya Galile. Kasi ya zola vanda mpasi si yandi salaka yawu na yinzo ya muntu na Jeruzalem. Ya zole, ntangu ba vumbula’a Yesu na lufwa, yandi kutana’a deja na ba-apotre 11 ya yandi na yinzo ya muntu na Jeruzalem. Si Yesu vanda’a na dikanisi ya kupesa musiku ya kupreche mpe ya kusala bilandi kaka na ba-apotre, yandi zola pesa yawu na Jeruzalem. Yandi zola zonza ve na bakento yina mpe na bantu ya nkaka na kubwabana yandi na Galile.—Luke 24:33, 36.

6. Wapi faso mambu yina Yesu zonza’a na Matayi 28:20, ke na lungana’a bubu yayi, mpe wapi faso ya ke na talana’a pwelele?

⁶ Rezon ya tatu: Musiku ya Yesu ya kukumisa bantu bilandi ya yandi, suka’a ve kaka na bakristo ya siekle ya ntete. Wapi faso beto me zaba yawu? Yandi zonza’a mambu yayi: “Mu ke na beno bilumbu nyonso, tii [na ntangu ya] nsuka ya yinza.” (Mat. 28:20) Kaka faso Yesu zonzaka yawu, bubu yayi, bantu mingi ke na sala’a Kisalu yango. Kanisa ntete na mambu yayi: Bamvula nyonso, bantu kuluta 300 000 ke kuma’a bilandi ya Yesu mpe ke zwa’a bateme. Ya ke mambu ya kilengi mingi!

7. Yinki artikle yayi ke zonzila, mpe samu na yinki?

⁷ Mingi ya ba yina ke longoka’a Biblia ke kwenda’a tii na bateme. Kasi, ba ya nkaka ve. Ba ke sepela’a kulongoka Biblia, kasi ba ke sala’a ve bangolo ya kukwenda tii na bateme. Beto nyonso ke zola’a ti ba yina ke longoka’a na beto, sadila nyonso yina ba ke longoka’a samu ba kuma bilandi ya Yesu. Artikle yayi ke lakisa beto yinki beto lenda sala samu na kusadisa bantu yina ke longoka’a Biblia na beto, na kuzola Yehova mpe na kukula na kimpeve. Samu na yinki beto ke zonzila yawu? Samu ti, bantangu ya nkaka, beto ke vanda’a na nsatu ya kuzaba si beto ke bika kulongoka na muntu to ve.

8. Samu na yinki ya ke vanda’a mpasi na ba yina ke longoka’a na beto na kutala Yehova faso Tata ya luzolo?

⁸ Yehova zola ti bantu sadila yandi samu ba ke zolaka yandi. Yina beto ke sosa’a, ni kusadisa ba yina ke longoka’a na beto na kuzaba ti, Yehova ke kipeke mpe ke zola’a na ntima nyonso, mosi na mosi na bawu. Beto ke zola’a ba tala Yehova faso “Tata ya ba yina ke ve na batata, mpe muntu yina ke bumba’a [bakento] yina fwidila’a babakala.” (Nku. 68:5) Ntangu bantu yina ke longoka’a na nge ke tala bunene ya luzolo ya Yehova samu na bawu, luzolo ya bawu mpe samu na Yehova ke kula. Ya ke vanda’a mpasi na bantu ya nkaka na kutala Yehova faso Tata ya luzolo, samu ti batata yina buta’a bawu, ke lakisa’a ve bawu luzolo mpe ntima ya mbote. (2 Tim. 3:1, 3) Ntangu nge ke na longoka’a na muntu, zonzila mingi bifu ya mbote ya Yehova. Sadisa yandi na kuzaba ti, Nzambi ya luzolo, ke na nsatu ya kupesa yandi luzingu ya ntangu nyonso. Mpe Yehova ke sadisa yandi na kuzwa yawu. Yinki ya nkaka beto lenda sala?

9-10. Wapi babuku beto lenda sadila samu na kulongoka na bantu, mpe samu na yinki?

 ⁹ Beto sadila buku “Yinki Biblia ke longa beto?” na buku “Restez dans l’amour de Dieu.” Ba sonikaka yawu samu na kusadisa beto na kusimba bantima ya ba yina ke longoka’a na beto. Na kifwani, kikapu 1 ya buku Longa beto ke pesa’a bamvutu na byuvu yayi: Nzambi ke kipeke beto to yandi ke na ntima ya yimbi?, wapi faso Nzambi ke tala bampasi ya beto?, mpe nge lenda kuma ndiku ya Nzambi? Dyaka, buku Restez dans l’amour de Dieu? ke sadisa muntu yina ke longoka’a na nge, na kuzaba faso ya kusadila misiku ya Nzambi samu ya bongisa luzingu ya yandi mpe ya kumisa yandi pene-pene na Yehova. Ata nge me longoka’a deja babuku yayi na bantu, prepare yawu mbote-mbote avant na kulongoka na muntu ya nkaka, mpe kanisa ntangu nyonso na bansatu ya yandi.

¹⁰ Kasi yinki nge lenda sala si muntu yina ke longoka’a na nge, ke na nsatu ya kuzaba mambu yina ke ve na kati ya buku yina beno ke na longoka’a? Nge lenda lomba yandi na kutanga yawu yandi mosi, na mosi ya mikanda ya beto,  samu beno zenga ve yina beno ke na longoka’a na buku Longa beto to Amour de Dieu.

11. Samu na yinki ya ke vanda’a mbote na kusambila ntangu beto ke banda’a mpe ke manisa’a kulongoka na muntu? Mpe wapi faso beto lenda sadisa muntu ke longoka’a na beto na kuzaba ti lusambu ke mfunu?

¹¹ Sambila avant beno longoka. Ya ke vanda’a mbote na kusambila ntangu beno ke banda, mpe ke manisa kulongoka na muntu yina me ndima’a deja kulongoka. Beto zola’a sadisa ba yina ke longoka’a na beto na kuzaba ti, beto lenda zaba mambu ya Nzambi, kaka si mpeve ya Nzambi sadisa beto. Na kusadisa bantu na kuzaba samu na yinki beto ke sambila’a, bampangi ya nkaka ke sadila’a Zaki 1:5, yina ke zonza’a: “Si mosi na kati ya beno ke ve na ndwenga (sagesse), yandi lomba yawu na Nzambi.” Mpe ba ke yufula na muntu ke na longoka’a na bawu: “Wapi faso beto lenda lomba ndwenga na Nzambi?” Ni yina ke sadisa muntu ke longoka’a na beto na kundima ti ya ke mfunu na kusambila.

12. Wapi faso nge lenda sadila Nkunga 139:2-4 na kusadisa muntu yina ke longoka’a na nge na kubongisa faso ya yandi ya kusambila?

¹² Longisa yandi faso ya kusambila. Lakisa yandi ti Yehova ke na nsatu ya kuwa lusambu yina ke katuka na ntima ya yandi. Zonza na yandi ti, ntangu yandi ke sambilaka, yandi lenda fungula ntima ya yandi na Yehova—kuzonzila Yehova mambu yina yandi zola ve ti bantu ya nkaka zaba, samu ti Yehova zaba makanisi nyonso ya bantima ya beto. (Tanga Nkunga 139:2-4.) Beto lenda zonza na bawu na kulomba na Nzambi, yandi sadisa bawu na kukatula makanisi mpe na kubika bifu ya yimbi. Ntangu ya nkaka, muntu yina ke longoka’a na nge, ke zola’a ntete bafete yina mukristo zola sala ve. Yandi me zaba ti bafete yina ke yimbi, kasi yandi ke na zola’a ntete mwa bamambu mingi ya bafete yango. Nata yandi na kuzonza na Yehova mambu yina ke na yandi na ntima, mpe yandi sambila samu na kuzola kaka yina Nzambi ke zolaka.—Nku. 97:10.

13. a) Samu na yinki beto zola lutisa ve bantangu mingi avant na kubokila ba yina ke longoka’a na beto na balukutakanu? b) Yinki beto lenda sala samu ti bantu yina ke longoka’a na beto vanda ve na nsoni na Salle du Royaume?

¹³ kulutisa ve bantangu mingi avant nge bokila ba yina ke longoka’a na nge na kukwiza na balukutakanu. Malongi yina ba ke kuwa, mpe mambu yina ba ke tala na balukutakanu, lenda simba bantima ya bawu mpe lenda sadisa bawu na kukula na kimpeve. Tala video Que se passe-t-il dans une Salle du Royaume? mpe pesa bawu nsatu ya kukwiza na nge na Salle du Royaume. Nge lenda nata bawu to kusadisa bawu na kukwiza na balukutakanu. Ya ke mbote na kukwenda na baproklamatere ya nkaka samu na kulongoka na bawu. Faso yina, ba ke zaba bampangi ya nkaka ya kimvuka, mpe ntangu ba ke kwiza na balukutakanu, ba ke vanda ve na nsoni, samu ti ba me mesana’a deja na bampangi mingi.

14. Yinki lenda nata ba yina ke longoka’a na nge na kukula na kimpeve?

¹⁴ Kima ya ntete yina beto ke sosa’a ntangu beto ke longoka’a na bantu, ni kusadisa bawu na kukula na kimpeve. (Ef. 4:13) Ntangu muntu ke ndima’a kulongoka Biblia na beto, kima ya ntete yina lenda’a sepelisa yandi, ni bambote yina yandi ke na zwa. Kasi ntangu luzolo ya yandi na Yehova ke kula, yandi lenda’a banda kusosa yina yandi ke sala samu na kusadisa bantu ya nkaka, mpe bampangi na kimvuka. (Mat. 22:37-39) Kuvanda ve na nsoni ya kuzonza na muntu yina ke longoka’a na nge, na kutula’a mwa mbongo na babwate ya makabu, samu kisalu ya predikasion kwenda na mantwala.

15. Wapi faso nge lenda sadisa muntu yina ke longoka’a Biblia na nge na kuzaba faso ya kusala ntangu bamambu ke kuminaka yandi?

 ¹⁵ Longa muntu yina ke longoka’a na nge yinki yandi lenda sala ntangu bamambu ke kuminaka yandi. Na kifwani, muntu yina ke longoka na nge, ke proklamatere yina me kuzwa ntete ve bateme, me zonza na nge ti mpangi mosi na kati ya kimvuka me nyongisa yandi. Kuzonza ve na yandi yinki ke mbote to yimbi na kusala, kasi lakisa yandi yinki Biblia ke zonza’a. Yandi lenda lemvokila mpangi, mpe kuzimbana yimbi yina ba me sala yandi. Si yandi ke na lenda’a ve, na luzolo mpe buzitu nyonso, yandi lenda kwenda zonza mambu yina ke na yandi na ntima na mpangi yango samu na ‘kuvutula mpangi na nzila ya mbote.’ (Tala Matayi 18:15, nwt-MK.) Sadisa yandi na kubongisa mambu yina yandi ke kwenda zonza. Lakisa yandi faso ya kusadila JW Library^®, Guide de recherche des Témoins de Jéhovah, mpe jw.org^® samu yandi zaba faso ya mbote ya kuyidika bamambu. Si yandi longoka faso ya kuyidika bamambu na bampangi avant bateme ya yandi, yandi ke zaba faso ya kutunga kindiku ya mbote na bampangi na kati ya kimvuka, na manima ya bateme ya yandi.

16. Samu na yinki ya ke mbote na kunata baproklamatere ya nkaka ntangu nge ke longoka’a na muntu?

¹⁶ Nata bampangi ya nkaka mpe ntwadisi ya sirkonskripsion ntangu nge ke kwenda’a longoka na muntu. Samu na yinki? Samu ti, baproklamatere ya nkaka lenda zonza mambu yina ke sadisa na faso ya mbote, muntu ke longoka’a na nge. Na kifwani, ya lenda vanda ti, muntu yina ke longoka’a na nge ke nwana’a na kubika sigarete, kasi yandi ke lenda’a kaka ve. Nata mpangi yina nwana’a bambala mingi na kubika sigarete, mpe lenda’a na kubika yawu. Mpangi yina lenda lakisa yandi yinki yandi lenda sala ntangu nsatu ya sigarete ke kwizilaka yandi. Si nge ke na nsoni ya kulonga muntu na mantwala ya mpangi yina me zaba mingi na kimpeve, lomba yandi na kulongoka na muntu yango. Ntangu nge ke nata’a bampangi ya nkaka na kulongoka Biblia na muntu yina ke longoka’a na nge, yandi lenda kuzwa bambote mingi na bampangi yina. Kuzimbana ve ti, kima ya ntete yina beto ke sosa’a ntangu beto ke longoka’a na bantu, ni kusadisa bawu na kukula na kimpeve.

17-18. Yinki nge zola tala avant na kubaka mukanu ya kubika kulongoka na muntu?

¹⁷ Si muntu yina ke longoka’a na nge, ke na sadila’a ve malongi ya Biblia, ya lenda nata nge na kuyufula si nge ke bika kulongoka na yandi to ve. Avant na kubika kulongoka na yandi, nge zola kanisa na bangolo, mayela mpe bamvula ya yandi. Ya ke baka’a mwa ntangu mingi na bantu ya nkaka na kukula na kimpeve. Nge lenda yufula: ‘Na kutadila bangolo, mayela mpe bamvula ya yandi, muntu yina ke longoka’a na munu ke na kula’a kwandi na kimpeve na faso ya kulunga?’ ‘Yandi me banda deja “kusadila,” mambu yina yandi ke na longoka’a?’ (Mat. 28:20) Ya lenda baka mwa ntangu na muntu yina ke longoka’a Biblia na kukuma kilandi ya Yesu.  Kasi fioti fioti, ya zola talana pwelele ti, yandi ke na bongisa ndyatulu ya yandi.

¹⁸ Kasi yinki nge zola sala si, muntu ke longoka’a na nge bantangu mingi, ke na lakisa ti, kulongoka Biblia ke ve mfunu na meso ya yandi? Kanisa ntete: Yandi me manisa buku Longa beto, mpe ntangu ya nkaka beno me banda buku Restez dans l’amour de Dieu, kasi yandi me tula’a ata mbala mosi ve dikulu na balukutakanu,—ata na Memoriale ya lufwa ya Yesu! Mpe yandi ke manga’a na kulongoka samu na barezon ya fioti-fioti. Si yandi ke na bifu ya faso yayi, nge zola solola pwelele na yandi. *

19. Yinki nge lenda yufula na muntu yina ke na lakisa’a neti yandi zola ve kulongoka, wapi faso nge lenda bakila yawu?

¹⁹ Na kubanda disolo, nge lenda yufula yandi: ‘Yinki ke na kanga’a nge nzila na kukuma Temwe ya Yehova?’ Yandi lenda vutula, ‘Mu zola kulongoka Biblia, kasi mu ke lenda ve kukuma Temwe ya Yehova!’ Si ni yayi ke dikanisi ya yandi na manima ya kulongoka Biblia bangonda mingi, nge ke longoka kaka na yandi? Ntangu ya nkaka, yandi lenda zonza na nge yinki ke na kangaka yandi nzila. Na kifwani, yandi lenda zonza na nge ti, yandi ke lenda ve na kusala predikasion ya yinzo na yinzo. Yina nge me zaba yinki ke na kangaka yandi nzila, nge lenda sadisa yandi na faso ya mbote.

20. Wapi faso Bisalu 13:48 lenda sadisa beto na kuzaba si beto ke bika kulongoka na muntu to ve?

²⁰ Na kyadi nyonso zonza na yandi ti, bantu ya nkaka yina ke longoka Biblia ke faso bantu ya Izraele na ntangu ya Ezekiele. Tala yina Yehova zonza na Ezekiele samu na bawu: “Tala! Nge ke na meso ya bawu faso nzimbu mosi ya luzolo, yina ba me yimba na ndinga ya kitoko, nzimbu yina ba me sika mbote-mbote na bima ya muzik. Ba ke kuwa mambu yina nge ke na zonza, kasi ata muntu mosi ve ke sadila yawu.” (Ezk. 33:32) Ya lenda vanda mpasi na kuzonza na muntu ti, beto ke longoka dyaka ve na yandi. Kasi, “ntangu yina me bikana ke kaka fioti.” (1 Ko. 7:29) Na kisika ya kulutisa bantangu mingi na kulongoka na muntu yina ke na sala’a ve bangolo na kukula na kimpeve, beto sosa ba yina ke na lakisa “ntima ya mbote samu na kuzwa luzingu ya ntangu nyonso.”—Tanga Bisalu 13:48.

21. Yinki ke dikanisi ya mvula 2020, mpe samu na yinki ya ke dikanisi ya mbote?

²¹ Dikanisi ya mvula 2020, ke sadisa beto na kuzaba faso ya mbote ya kukumisa bantu bilandi ya Yesu. Ya ke musiku yina Yesu pesa’a na lukutakanu ya nene yina yandi sala’a na mongo ya Galile. Yandi zonza’a: “Beno kwenda, mpe beno kumisa bantu bilandi ya munu . . . , beno pesa bawu bateme.”—Mat. 28:19.