1-2. Ino munjelo wakabalwiita nshi banakashi bakalinga baya kucuumbwe cakwe Yesu, alimwi ino Yesu wakabalwiita nshi?

PA NISANI 16 mu mwaaka wa 33 C.E., macuunsa cuunsa, banakashi bamwi bakalinga kuloonda Lesa bakaya kucuumbwe nkobakalinga babika mubili wa Mwaami Yesu Klistu kabacite buumba abuumbi. Paciindi ici kakwiindite kale nshiku shobilo kuswa ciindi Yesu ndyaakabikwa. Bakalinga kusuni kunanika mubili wakwe Yesu mafuta alimwi atununkila. Ano ndyebakashika, bakacana ayi mucuumbwe tamuwo mubili wakwe Yesu. Lyalo munjelo wakalwiita bashikwiiya ayi Yesu wabushikwa kuswa kubafu, aboobo ‘watanjila kuya ku Galili, uko nkweshi mukamuboone.’​—Mate. 28:1-7; Luka 23:56; 24:10.

² Ndyebakalinga kuswa kucuumbwe, Yesu wakabakumanya akubalwiita ayi: “Kamuya, mukalwiite bamakwesu ayi baye ku Galili uko nkweshi tuye tukumanine.” (Mate. 28:10) Cintu cakutaanguna Yesu ncaakalinga kusuni kucita ndyaakabushikwa, nkubungana abashikwiiya bakwe. Ndyebakabungana wakabalwiita shakucita shiyandika abuumbi.

3-4. Ino nciinshi nceenga twaambila ayi mulawo ulembetwe pa Mateyo 28:19, 20 toona kupekwabo kubatumwi bakwe Yesu beenka? (Amubone cikope cili pa peeji yakutaanguna.)

³ Amubelenge Mateyo 28:16-20. Yesu ndyaakabungana abashikwiiya bakwe, wakabalwiita ncito iyandika abuumbi njobakalinga kweelete kukumanisha paciindi cilya​—incito aswebo njetutoosebensa munshiku shino. Wakabalwiita ayi: “Aboobo kamuya mukaiishe bantu bamishobo yoonse kwaamba ayi babe bashikwiiya . . . mukabeeishe kukonkela shintu shoonse nshendakamulwiita.”

 ⁴ Yesu taakwe kupabo mulawo uyu kubatumwi bakwe bashomeka bali 11, sombi alisuni ayi bashikwiiya bakwe boonse banooshimikila makani abotu. Ino nciinshi ncetwaambila boobo? Amuyeeye paceeci, sa Yesu ndyaakalinga kupa mulawo wa kushimikila makani abotu wakalingabo abatumwi bakwe paKalundu ku Galili? Sobwe. Na mutokwiibaluka, munjelo wakalwiita banakashi balya bakalinga baya kucuumbwe ayi: “mukamuboone [ku Galili].” Aboobo cilyeelete kwaamba ayi banakashi bamwi bakalinga bashikwiiya bakwe Yesu bakacanikaako. Kwiilikaawo, mutumwi Paulo wakaamba ayi Yesu “wakaboneka kubashomi beendilila myaanda yosanwe (500) paciindi comwi.” (1 Koli. 15:6) Ano ino nkuli nkobakabunganina?

5. Ino nciinshi nceenga twaambila ayi 1 Bene Kolinto 15:6 itokwaamba pakubungana kwa kaambwa mu Mateyo 28?

⁵ Kweelana a 1 Bene Kolinto 15:6, inga twaamba ayi Paulo alyeelete wakalinga kwaamba pamakani ngotucana mu Mateyo 28, ayo aamba paciindi Yesu ndyaakabungana abashikwiiya bakwe pakalundu ku Galili. Ino nciinshi ncetwaambila boobo? Cakutaanguna, bashikwiiya bakwe Yesu baanji bakalinga kukala ku Galili. Aboobo cakalinga cuubu kubunganina pakalundu pakalinga musena unene kwiinda muŋanda ku Jelusalemu. Cabili, Yesu ndyaakabushikwabo wakakumanya bashikwiiya bali 11 muŋanda ku Jelusalemu. Aboobo naakwiinga Yesu wakalinga kusuni ayi batumwi bakwe beenkabo mbeshi bakanoosebensa ncito yakushimikila makani abotu, naakwiinga taakwe kubalwiita kuya ku Galili.​—Luka 24:33, 36.

6. Ino Mateyo 28:20 ilatondesha buyani ayi mulawo wakwiisha bantu kuba bashikwiiya utokonkelwa amunshiku shino, alimwi ino utokonkelwa buyani?

⁶ Amuyeeye paciteente catatu. Mulawo Yesu ngwaakapa wakuya mukwiisha bantu kuba bashikwiiya, tookwe kweelabo ku Beneklistu bamuciindi ca batumwi. Ino tulishi buyani? Pesule lyakupa bashikwiiya bakwe mulawo uyu, Yesu wakatolelela akwaamba ayi: “Ndi andimwe nshiku shoonse kushikila kumamanino abweende bwashintu.” (Mate. 28:20) Bweenka mbuli Yesu mbwaakaamba, bantu baanji batokwaabanamo lubasu muncito yakwiisha bantu kuba bashikwiiya. Kucakubonenaako, bantu pafwiifwi a 300,000 balabombekwa mwaaka amwaaka, akuba Bakamboni Bakwe Yehova abeshikwiiya bakwe Yesu Klistu!

7. Ino nshiinshi shimwi nsheshi twiiye, alimwi ino nceebonshi?

⁷ Bantu baanji beshikwiiya Baibo balaya panembo akubombekwa. Nacibo boobo, bamwi mbotwiisha Baibo balawayawaya. Balanyumfwa kabotu kwiiya Baibo, sombi tabayi panembo akubombekwa. Na kuli ngomwiisha Baibo, ncakutatoonsha kwaamba ayi mulisuni kumucafwa kukonkela nshatokwiiya akuba shikwiiya wakwe Klistu. Mumutwi uyu tutokwiiya nsheenga twaciita kwaamba ayi tucafwe shikwiiya Baibo kusuna Yehova akuya panembo lwakumushimu. Ino nceebonshi ncotweelete kubandikila makani aya? Mukwiinga kulaakuba ciindi cimwi ndyeshi tukayandike kusalawo kutolelela nabi kucileka ciiyo.

8. Ino nceebonshi cimwi ciindi teshi cuubu kucafwa shikwiiya kusuna Yehova?

⁸ Yehova alisuni bantu kumusebensela ceebo cakwaamba ayi balimusuni. Aboobo tulisuni kucafwa baabo mbotwiisha Baibo kushiba kwaamba ayi Yehova alibasuni alimwi alababikila maano abuumbi. Tulisuni kubacafwa kunoobona Yehova mbuli ‘mushali ulama bana banshiwa alimwi wiimikanina bamukalubinje.’ (Kulu. 68:5) Na shikwiiya Baibo wesa mukushiba ayi Lesa alimusuni, alakwe inga watalika kumusuna. Beshikwiiya bamwi inga cabayumina kubona Yehova mbuli mushali ceebo cakwaamba ayi tabakwe kutondeshekwawo lusuno akubikilwa maano kubashali babo. (2 Timo. 3:1, 3) Aboobo ndyemutoobaiisha, amuyuminishe bunene mibo ibotu yakwe Yehova. Amubacaafwe  kunyumfwisha kwaamba ayi Lesa shilusuno alisuni kwaamba ayi bakabe abuumi butamaani, alimwi alilibambite kubacafwa kwaamba ayi bakacikoonshe. Ino nshiinshi shimwi nsheenga twaciita kwaamba ayi tubacaafwe?

9-10. Ino ngamabuku nshi ngotweelete kusebensesha ndyetutoocita shiiyo sha Baibo, alimwi ino mabuku aya akabambilwa nshi?

⁹ Amusebenseshe libuku lya “Ino Baibo Ilaiisha Nshi?” a “Mbweenga Mwatolelela Kusuna Lesa.” Mabuku aya akalembwa munshila yakwaamba ayi cibe cuubu kucafwa shikwiiya Baibo kusuna Yehova. Kucakubonenaako, mutwi 1 kuswa mulibuku lya Baibo Ilaiisha ulicite shikumbulo kumiipusho mbuli: Sa Lesa ulatubikila maano?, Ino Lesa alanyumfwa buyani na katupenga?, alimwi a Sa inga mwaba shicibusa wakwe Yehova? Ino libuku lya Kusuna Lesa? Libuku ili lyakabambilwa kucafwa shikwiiya kushiba mbweenga wakonkela njiisho shamu Baibo akuyumya bushicibusa bwakwe a Yehova. Nabi kwaamba ayi mwakaiishako kale bamwi mumabuku aya, lyoonse mulyeelete kulibambila kabotu ndyemutooya mukwiisha muntu umwi, alimwi ndyemutoolibambila  mulyeelete kuyeeya pamuntu ngomutooya mukwiisha.

¹⁰ Ino inga mwacita buyani na shikwiiya alisuni kushiba makani amwi ali mulibuku litabete paayo Ngotusebensesha Ndyetutokwiisha? Mpashi inga mwamuyuminisha kulibelenga mwiine palwaakwe kwaamba ayi mutolelele kumwiisha mulibuku lya Baibo Ilaiisha na libuku lya Kusuna Lesa.

11. Ino ndilili ndyeenga twatalika kupaila paciiyo ca Baibo, alimwi ino inga mwacita buyani kwaamba ayi mucafwe shikwiiya kushiba ncotupailila?

¹¹ Amutaangune kupaila kamutana kutalika ciiyo. Cili kabotu kutacelwa kutalika akumanisha ciiyo amupailo, mulyeelete kucita boobo nsondo shiniinibo kuswa ciindi ndyemwakatalika ciiyo. Tulyeelete kucafwa shikwiiya kushiba kwaamba ayi inga taanyumfwishishi Maswi akwe Lesa kwakubula lucafwo lwa mushimu usalashi. Beshikushimikila bamwi balacafwa shikwiiya kushiba ncotupailila paciiyo kwiinda mukusebensesha lilembo lyakwe Jemusi 1:5, lyaamba ayi: “Na umwi pakati kanu taacite busongo, atolelele kusenga Lesa.” Lyalo shikwiisha aleepusha shikwiiya ayi, “Ino inga twacita buyani kwaamba ayi tusenge busongo kuli Lesa?” Cakutatoonsha shikwiiya inga wakumbula ayi tulyeelete kupaila kuli Lesa.

12. Ino Kulumbaisha 139:2-4 inga yamucafwa buyani kucafwa shikwiiya kushiba mbweenga wapaila kuswa panshi lya moyo?

¹² Amucafwe shikwiiya kushiba bwakupaila. Amumucaafwe kushiba kwaamba ayi Yehova inga wamukutika na wapaila kuli nguwe kuswa panshi lya moyo. Amumusansulwiite kwaamba ayi ndyetutopaila palweesu, inga twalwiita Yehova mbotutoolinyumfwa, ashintu shimwi nsheenga tatulwiitiko muntu umwi uli woonse. Mukwiinga Yehova alishi kale miyeeyo yesu. (Amubelenge Kulumbaisha 139:2-4.) Inga twamuyuminisha shikwiiya kunopaila kuli Yehova kwaamba ayi amucaafwe kwaalula miyeeyo akucileka mibo itabete kabotu. Atwaambe ayi, shikwiiya Baibo ngomweeyaakwe kwaciindi cilaamfu alisuni bunene kusekelela kumwi Beneklistu nkobateelete, alimwi alicishi kwaamba ayi taeelete kucita boobo, ano kuli mbasu shimwi shakusekelela uko nshaasuni. Ino inga mwacita buyani kwaamba ayi mumucaafwe? Amumuyuminishe kulwiita Yehova mumupailo mbwaatoolinyumfwa akumusenga kwaamba ayi amucaafwe kusuna shintu Lesa nshaasuni.​—Kulu. 97:10.

13. (a) Ino nceebonshi tulyeelete kufwambaana kwiita shikwiiya kumabungano? (b) Ino inga twacita buyani kwaamba ayi tucafwe shikwiiya kutalinyumfwa kusoweka ndyesa Kuŋanda ya Bwaami?

¹³ Ndyemwatalikabo ciiyo amumwiite shikwiiya kusa kumabungano. Nsheenga wanyumfwa akubona kumabungano inga shamucafwa kusuna kusebensela Yehova akuya panembo. Amumutondeshe vidyo ya Ino Nshiinshi Shicitika Paŋanda ya Bwaami? akumwiita kwaamba ayi akese kumabungano pomwi andimwe. Na kacikonsheka amuye akwe kumabungano. Ncibotu kunooya abeshikushimikila bapusenepusene kuciiyo. Kucita boobo kulaakupa kwaamba ayi shikwiiya abashibe kabotu bamwi mulibungano, alimwi ici cilaakumupa kutanyumfwa anga wasoweka na akese kumabungano.

14. Ino nshiinshi sheenga shacafwa shikwiiya kuya panembo lwakumushimu?

¹⁴ Cinene ncetusuni nkucafwa shikwiiya kuya panembo lwakumushimu. (Efe. 4:13) Na muntu wasumina kwiiya Baibo, mpashi luyaando lwakwe ndwakushiba mbweenga kwiiya kwamucafwa. Lusuno lwakwe pali Yehova ndyelutooya cikomena, mpashi inga watalika kuyeeya mbweenga wacafwako bamwi, kwiilikaawo abaabo bali kale mulibungano. (Mate. 22:37-39) Na mwabona ayi ceelela, mutanyumfwi nsoni kumulwiita coolwe ca kupako maali mukuliyandila akucafwilisha ncito ya Bwaami.

15. Ino nshiinshi nsheenga mwaciita kwaamba ayi mucafwe shikwiiya Baibo kushiba nsheenga wacita na wacana mapensho?

 ¹⁵ Amucafwe shikwiiya kushiba nsheenga wacita na wacana mapensho. Atwaambe ayi shikwiiya wanu, ngushikushimikila utana kubombekwa, ano wesa kuli ndimwe akumulwiita ayi kuli umwi wakamukalasha mulibungano. Muciindi cakumulwiita ayi wakabisha ngooyu, amumusansulwiite Baibo nshoyaamba ayi nshaeelete kucita. Inga wasalawo kumulekelela uyo wamukalasha akulubaako, na inga taalubikobo, inga wekala panshi akubandikishanya mukabotu awooyo wakamukalasha aluyaando lwa ‘kumuboosha munshila.’ (Amweelanye a Mateyo 18:15.) Amumucaafwe kulibambila nsheshi akaambe. Amumutondeshe mbweenga walangoola makani kuswa mumabuku esu kwaamba ayi ashibe nshila shicafwa kumana mapensho. Na washibila limwi kaatana kubombekwa bwakucita na wacana mapensho, nkokwaamba ayi alaakucikonsha kunonyumfwana kabotu abamwi mulibungano pesule lyakubombekwa.

16. Ino nceebonshi ncibotu kuya abeshikushimikila bapusenepusene kuciiyo ca Baibo?

¹⁶ Amuye abamwi mulibungano ndyemutooya kuciiyo ca Baibo​—kwiilikaawo amutanjilili walubasu na wesa mukufwakashila libungano lyanu. Ino nceebonshi? Bweenka mbuli mbotwaambawo kale, beshikushimikila bamwi inga bacikonsha kucafwa shikwiiya wanu mushintu shimwi nsheenga mwebo tamucikoonshi. Kucakubonenaako, mpashi shikwiiya wanu alisuni kucileka kufweba ano atokwaalilwa. Ndyemutooya mukumwiisha inga mwayaako ashikushimikila umwi wakacikonsha kukoma lipenshi ili pesule lyakwaalilwa mankanda aanji. Shikushimikila uyo mpashi inga walwiitako shikwiiya sheenga shamucafwa kucileka kufweba. Na mulanyumfwa nsoni kucita ciiyo ndyemuli a shikushimikila ucishi kabotu kwiisha, amumusenge ayi lakwe acite ciiyo. Kuya abamwi kuciiyo ca Baibo inga kwacafwa shikwiiya Baibo kufubilaamo abuumbi. Mutaluubi kwaamba ayi ncetusuni bunene nkucafwa shikwiiya kuya panembo lwakumushimu.

17-18. Ino nshiinshi nshomweelete kutaanguna kuyeeyawo kamutana kucileka kwiisha muntu?

¹⁷ Na shikwiiya Baibo wanu tatooya panembo, mulyeelete kuliipusha ayi, ‘Sa ncileeke kumwiisha?’ Kamutana kucileka kumwiisha, amutaangune kuyeeya nsheenga wacikonsha kucita ansheenga taacikonshi. Bantu bamwi balatola ciindi cilaamfu kwaamba ayi batalike kuya panembo. Aboobo amuliipushe ayi: ‘Sa shikwiiya uyu atoocita nsheenga wacikonsha kwaamba ayi aye panembo kweelana abukaalo bwakwe?’ ‘Sa wakatalika “kukonkela,” nshatokwiiya?’ (Mate. 28:20) Ncakwiila inga catola ciindi kwaamba ayi shikwiiya aye panembo. Sombi alyeelete kunokwaalula buumi bwakwe paniini paniini.

¹⁸ Ino inga mwacita buyani na shikwiiya Baibo tatooya panembo nabi pesule lyakwiiyaakwe kwaciindi cilaamfu? Amuyeeye cakubonenaako ici: Atwaambe ayi shikwiiya Baibo wamanisha kwiiya libuku lya Baibo Ilaiisha, mpashi watalika alibuku lya Mbweenga Mwatolelela Kusuna Lesa, sombi taana kusako kale kumabungano nabibo  ku Ciibalusho! Alimwi liinji alakaka kwiiya patapuwo aciine ncaacitila boobo. Na caba boobo nkokwaamba ayi mulyeelete kubandikaakwe cakuteenda mweela. *

19. Ino nshiinshi nsheenga mwalwiita shikwiiya Baibo utatooya panembo, alimwi ino nshiinshi nshomweelete kuyeeyawo?

¹⁹ Mpashi inga mwatalika amwiipusho wakwaamba ayi, ‘Ino nciinshi ncomutoobona ayi nciyumu abuumbi kwaamba ayi mube Kamboni wakwe Yehova?’ Mpashi shikwiiya wanu inga wakumbula ayi, ‘Ndisuni kwiiya Baibo, sombi teshi nkabewo Kamboni!’ Na mbwaatoolinyumfwa ubo pesule lyakwiiyaakwe kwa ciindi cilaamfu, inga cabota kutatolelela aciiyo ico. Nacibi boobo, mpashi inga wamulwiita citoomupa kwaamba ayi aalilwe kuya panembo. Kucakubonenaako, mpashi alalinyumfwa ayi inga taacikoonshi kushimikila kuŋanda aŋanda. Kushiba mbwaalinyumfwa inga kwamucafwa kushiba kabotu nsheenga mwaciita kwaamba ayi mumucaafwe.

20. Kweelana a Milimo 13:48 ino mbaani mbotweelete kutolelela kwiisha Baibo?

²⁰ Cabicaako ncakwaamba ayi beshikwiiya Baibo bamwi bali anga mbene Isilaeli bamuciindi cakwe Esekelo. Amukutike Yehova mbwakasansulula kuli Esekelo ayi: “Ncakwiila kuli mbabo ulaboneka anga ngumuntu ubeembila nyimbo shalusuno akulisha kabotu kalumbu. Balakutika maswi ako, sombi tabaciti nshoobaambila.” (Ese. 33:32) Mpashi inga caba ciyumu kulwiita shikwiiya ayi tutoocileka kumwiisha. Nacibi boobo, “ciindi camana.” (1 Koli. 7:29) Muciindi cakusowa ciindi kwiisha muntu utatooya panembo, cili kabotu kucileka akuya mukulangoola bamwi beenga batondesha ayi balicite ‘moyo ubotu ulibambite kutambula buumi butamaani.’​—Amubelenge Milimo 13:48, NWT.

21. Ino ndilembo nshi lya mwaaka wa 2020, alimwi ino lilaakutucafwa kucita nshi?

²¹ Lilembo lya mwaaka wa 2020, lilaakutucafwa kuyeeya nsheenga twaciita kwaamba ayi tuye panembo muncito yakwiisha bantu kuba bashikwiiya. Mulilembo ili muli maswi ayandika akaamba Yesu ndyaakabungana abashikwiiya bakwe pakalundu ku Galili akubalwiita ayi: “Aboobo kamuya mukaiishe bantu kuba bashikwiiya . . . , akubabombeka.”​—Mate. 28:19.