1-2. Lingeloi litalusezañi basali kwa libita la Jesu, mi hasamulaho Jesu ubafa taelo mañi?

KI NAKO ya kakusasana fa lizazi la Nisani 16, 33 C.E. Sikwata sa basali babasaba Mulimu, ili babalobehile lipilu baliba kwa libita kokubulukilwe situpu sa Mulena Jesu Kreste, mi sabulukilwe mwa sibaka seo ka mazazi amabeli. Habafita kwa libita kobaile kuli bayo toza situpu milyani yenunka hande ni mafula a sende, bakomoka hahulu kufumana kuli libita liinzi mukungulu! Lingeloi litaluseza balutiwa kuli Jesu uzusizwe kwa bafu, mi liekeza kubulela kuli: “Uitangetile ku mina kuya kwa Galilea. Ki kona komuka yo mubona.”—Mat. 28:1-7; Luka 23:56; 24:10.

² Basali bao hase bazwile kwa libita, Jesu wabaatumela mi ubalaela, uli: “Hamuye, muyo zibisa banyani baka ilikuli baye kwa Galilea, mi ki kona kobaka yo nibona.” (Mat. 28:10) Kubonahala kuli Jesu ubata kufa balutiwa bahae litaelo za butokwa kakuli nto yapili yaeza hamulaho feela wa kuzusiwa kwa bafu ki kulukisa kuli akopane ni bona!

3-4. Ki kabakalañi halukona kubulela kuli taelo yeñozwi kwa Mateu 28:19, 20 neisika fiwa feela kwa baapositola? (Mubone siswaniso sesi fa kava.)

³ Mubale Mateu 28:16-20. Kwa mukopano wanaaonga-ongile Jesu, naabulezi za musebezi wa butokwa one bakaeza balutiwa bahae ka nako yeo, ili musebezi oswana olusweli kueza ni luna kacenu. Jesu naabulezi kuli: “Hamuye, mi mulute batu ba macaba kaufela kuba balutiwa, . . . mubalute kumamela lika kaufela zeni milaezi.”

 ⁴ Jesu ubata kuli balateleli bahae kaufela baeze musebezi wa kukutaza. Naasika laela feela baapositola bahae ba 11 babasepahala kuli baeze musebezi wo. Luziba cwañi cwalo? Jesu hanaafa taelo yeo fa lilundu la mwa Galilea, baapositola bahae haki bona feela bane baliteñi ka nako yeo. Muhupule kuli lingeloi nelibulelezi basali kuli: ‘Mukayo mubona [kwa Galilea].’ Kacwalo, kubonahala kuli basali babasepahala ni bona nebali teñi kwa mukopano wo. Kono hape nekunani batu babañwi. Muapositola Paulusi naañozi kuli Jesu “naabonahezi kwa mizwale babafitelela 500 ka nako iliñwi.” (1 Makor. 15:6) Taba yeo neiezahalezi kai?

5. Luitutañi kwa liñolo la 1 Makorinte 15:6?

⁵ Lunani buikolwiso bwa kuli Paulusi hanaañozi litaba ze kwa 1 Makorinte 15:6 naatalusa mukopano oswana wo one uezelizwe mwa Galilea, ili otalusizwe kwa Mateu kauhanyo 28. Ki kabakalañi halunani buikolwiso bo? Libaka lapili kikuli, buñata bwa balutiwa ba Jesu nebazwa mwa Galilea. Kacwalo, nekuswanela kuli mukopano wo uezezwe fa lilundu la mwa Galilea, ili kone kukafumaneha batu babañata, kufita kuuezeza mwa muzuzu wa mutu mwa Jerusalema. Libaka labubeli kikuli, Jesu yanaazusizwe kwa bafu naakopani kale ni baapositola bahae ba 11 mwa muzuzu wa mutu mwa Jerusalema. Kambe Jesu naabata kulaela feela baapositola bahae kukutaza ni kuluta batu kuba balutiwa, uzibe naakaeza cwalo hanaakopani ni bona mwa Jerusalema kufita kulaela kuli bona, basali, ni babañwi bayo kopana ni yena kwa Galilea.—Luka 24:33, 36.

6. Liñolo la Mateu 28:20 libonisa cwañi kuli ni kacenu luswanela kumamela taelo ya kuluta batu kuba balutiwa, mi ki sika mañi sesibonisa kuli lusweli lwamamela taelo yeo?

⁶ Mulemuhe libaka la butokwa labulaalu. Jesu naasika laela feela Bakreste bane bapila mwa linako zeo kuli balute batu kuba balutiwa. Luziba cwañi cwalo? Jesu naafelize kufa litaelo kwa balateleli bahae ka kubulela kuli: “Niinzi ni mina mazazi kaufela kuisa nako ya kufela kwa lifasi.” (Mat. 28:20) Sina feela mwanaabulelezi Jesu, balateleli bahae babañata kacenu basweli baluta batu kuba balutiwa. Munahane feela taba yeo! Batu bababato eza 300,000 bakolobezwanga silimo ni silimo ni kuba Lipaki za Jehova ni balutiwa ba Jesu Kreste!

7. Ki lika mañi zeluka nyakisisa cwale, mi ki kabakalañi?

⁷ Batu babañata boluituta ni bona Bibele baezanga zwelopili mi bafitanga fa kukolobezwa. Nihakulicwalo, babañwi ku bona bazina-zinanga kuunga muhato wa kuba balutiwa. Batabela kuituta kono habaezi zwelopili kuli bafite fa kukolobezwa. Haiba musweli kuituta Bibele ni mutu, lunani buikolwiso bwa kuli mubata kumutusa kusebelisa zasweli kuituta ni kuba mulutiwa wa Kreste. Cwale halunyakisiseñi zekona kulutusa kufita muituti kwa pilu ni kumutusa kueza zwelopili ya kwa moya. Ki kabakalañi halutokwa kunyakisisa taba yeo? Libaka kikuli fokuñwi haluituta ni mutu, lukatokwa kueza katulo ya kuzwelapili kuituta ni yena kamba kutokwa.

8. Ki kabakalañi hakukona kulubela taata kufita baituti baluna kwa pilu?

⁸ Jehova ubata kuli batu bamusebeleze kabakala kuli bamulata. Kacwalo, luswanela kutusa batu boluituta ni bona Bibele kuutwisisa kuli Jehova wabaisa pilu ka butu mi ubalata hahulu. Lubata kubatusa kuunga Jehova sina “ndatahe lindiala ni musilelezi wa limbelwa.” (Samu 68:5) Baituti bamina habaka lemuha kuli Mulimu wabalata, bakasusuezwa hahulu mi mwendi ni bona bakakala kumulata. Baituti ba Bibele babañwi kukona kubabela taata kuunga Jehova sina Ndate yalilato bakeñisa kuli bo ndataa bona baba bapepa nebasika babonisa lilato. (2 Tim. 3:1, 3) Kacwalo, hamunze muituta Bibele ni bona, mukoñomekange tulemeno  twa Jehova totunde. Mubatuse kuutwisisa kuli Mulimu waluna yalilato ubata kuli bafumane bupilo bobusa feli, mi uitukiselize kubatusa kueza cwalo. Ki lika mañi zeñwi zelukona kueza?

9-10. Ki lihatiso mañi zeluswanela kuitusisa haluzamaisa lituto za Bibele, mi ki kabakalañi haluswanela kuitusisanga libuka zeo?

⁹ Muitutange ni batu ka kuitusisa buka ya “Bibele Ilulutañi?” ni ya “Molukona Kuzwelapili Kubela Mwa Lilato la Mulimu.” Lihatiso zeo sihulu lilukiselizwe kulutusa kufita baituti baluna ba Bibele kwa pilu. Ka mutala, kauhanyo 1 ya buka ya Ilulutañi? ialaba lipuzo zelatelela: Kana Mulimu unani taba ni luna kamba ki yalunya?, Mulimu uikutwanga cwañi batu habanyanda?, ni Kana mwakona kuba mulikanaa Jehova? Kucwañi ka za buka ya Muzwelepili Kuba Mwa Lilato la Mulimu? Hatiso yeo ikatusa muituti wamina kuutwisisa libaka kusebelisa likuka za mwa Bibele hakukona kumutusa mwa bupilo bwahae ni kumutusa kusutelela hahulu ku Jehova. Kusina taba kuli muitutile kale lihatiso zeo ni batu babañwi, muswanela kuitukisezanga tuto ni tuto, ilikuli muzibe momukona kutuseza muituti ni muituti.

 ¹⁰ Kono kucwañi haiba muituti wamina utabela taba yeñwi yefumaneha mwa hatiso yelusa itusisangi kwa kuluta batu? Mwendi mwakona kumususueza kuli ayo ipalela hatiso yeo anosi kono muswanela kuzwelapili kuituta ni yena mwa lihatiso zeluitusisanga kwa kuluta batu Bibele, zesazo bulelwa zeo.

11. Luswanela kukala lili kulapela ni mutu yeluituta ni yena Bibele, mi lukona kumutusa cwañi kulemuha butokwa bwa kueza cwalo?

¹¹ Mulapelange pili musika kala kale kuituta ni mutu. Hañata, ki hande kulapelanga ni mutu yemusazo kala kuituta ni yena hamukalisa tuto yamina ni hamufeza tuto, mi mwakona kulukisa kueza cwalo nakonyana kuzwa fomukaliseza tuto yamina. Luswanela kutusa muituti waluna kulemuha kuli lukona feela kuutwisisa Linzwi la Mulimu ka tuso ya moya okenile. Bahasanyi babañwi batalusanga libaka halulapelanga lusika kakala kale kuituta Bibele ka kubala Jakobo 1:5, yeli: “Haiba yomuñwi ku mina haana butali, azwelepili kukupa Mulimu.” Mi hasamulaho, babuzanga muituti kuli: “Lukona kukupa cwañi Mulimu kuli alufe butali?” Mwendi muituti ukaalaba kuli lukona kueza cwalo ka kulapela ku Mulimu.

12. Mukona kuitusisa cwañi Samu 139:2-4 kuli mutuse muituti wamina kulukuluha kutaluseza Jehova mwaikutwela?

¹² Mulute muituti wamina mwakulapelela. Mumutuse kulemuha kuli Jehova ubata kuutwa litapelo zahae zezwelela kwa pilu. Mumutaluseze kuli halulapela inze luli lunosi, lwakona kuzibisa Jehova moluikutwela ni kumutaluseza lika kaufela zelusa koni kutaluseza mutu ufi kamba ufi. Muhupule kuli Jehova waziba maikuto aluna a mwa pilu. (Mubale Samu 139:2-4.) Hape lwakona kususueza muituti waluna kukupa Mulimu kuli amutuse kucinca mihupulo yahae yefosahalile ni kutuhela mikwa yemaswe. Ka mutala, luungeñi kuli mutu yomuñwi yese luitutile ni yena Bibele ka nako yetelelenyana ulata kueza mukiti omuñwi osimuluha kwa bulapeli bwa buhata. Waziba kuli kueza mukiti wo kufosahalile kono usaikolanga kueza lika zeñwi ka za mukiti wo. Mumususueze kutaluseza Jehova mwaikutwela luli ni kumukupa kuli amutuse kulata feela zalata Mulimu.—Samu 97:10.

13. (a) Ki kabakalañi haluswanela kumemela baituti baluna ba Bibele kwa mikopano lusakalisa feela kuituta ni bona? (b) Lukona kutusa cwañi muituti waluna kulukuluha haali kwa Ndu ya Mubuso?

¹³ Mumemele muituti wamina wa Bibele kwa mikopano musakalisa feela kuituta ni yena. Zakautwa ni kulemuha muituti wamina haali kwa mikopano ya puteho zakona kumufita kwa pilu ni kumutusa kueza zwelopili. Mumubuhise vidio ya Kiñi ze Ezahalanga Kwa Ndu ya Mubuso? mi mumumeme kuli aye ni mina kwa mikopano. Haiba kwakonahala, mumulukiseze nzila kuli ayo fumaneha kwa mikopano. Muyange ni bahasanyi babashutana-shutana kwa tuto yamina. Haiba mueza cwalo, muituti wamina ukaziba bahasanyi babañwi mwa puteho mi ukaikutwa kulukuluha hakatahanga kwa mikopano yaluna.

14. Ki nto mañi yekona kutusa muituti kueza zwelopili ya kwa moya?

¹⁴ Haluituta Bibele ni mutu, lubata kumutusa kueza zwelopili ya kwa moya. (Maef. 4:13) Hañata, mutu halumela kuituta Bibele ni luna, mwendi sihulu ubatanga kuziba moika mutuseza Bibele. Kono lilato lahae ku Jehova halinze lizwelapili kuhula, mwendi ukalemuha butokwa bwa kutusa babañwi, kukopanyeleza cwalo ni mizwale ni likaizeli mwa puteho. (Mat. 22:37-39) Ka nako yeswanela, mwakona kutaluseza muituti wamina za tohonolo yelunani yona ya kutusa mwa musebezi wa Mubuso ka kufa linubu.

15. Lukona kutusa cwañi muituti wa Bibele kueza zeswanela hakopana ni miinelo yetaata?

 ¹⁵ Mutuse muituti wamina wa Bibele kuziba zaswanela kueza hakopana ni miinelo yetaata. Ka mutala, luungeñi kuli muituti wamina yali muhasanyi yasika kolobezwa umitaluseza kuli usitatalisizwe ki mutu yomuñwi mwa puteho. Kufita kuyemela muituti wamina kamba muhasanyi yo, nemuka eza hande kunyakisisa ni yena zakona kueza ka kuya ka zeibulela Bibele. Wakona kuketa kuswalela muzwale yo; kono haiba apalelwa kueza cwalo, wakona kumuatumela ni kuambola ni yena za taba yeo ka lilato, mi ka kueza cwalo, ‘ukapilisa muzwale wahae.’ (Mubapanye Mateu 18:15.) Mutuse muituti wamina kuitukiseza zakayo bulela. Mumubonise mwakona kuitusiseza Progilamu ya JW Library^®, Buka ya Lipatisiso ya Lipaki za Jehova, ni webusaiti yaluna ya jw.org^®, ilikuli aitute zakona kueza mwa muinelo wali ku ona. Haiba aituta mwakutatululela butata bwanani bona ni babañwi pili asika kolobezwa kale, ukaba ni silikani sesinde ni batu babañwi mwa puteho hamulaho wa kukolobezwa.

16. Ki bufi bunde bwa kumema bahasanyi babañwi kwa tuto yamina?

¹⁶ Mumeme bahasanyi babañwi kamba muokameli wa mupotoloho hapotela puteho yamina kuya ni mina kwa tuto ya Bibele. Kabakalañi? Kwandaa mabaka abulezwi kwa makalelo, mwendi bahasanyi babañwi bakona kutusa muituti wamina ka nzila yemusa koni kumutusa. Ka mutala, luungeñi kuli muituti wamina ulikile kutuhela kuzuba kwai kono upalezwi kueza cwalo hañata-ñata. Muye kwa tuto yamina ni muzwale kamba kaizeli yomuñwi yanaatulile muliko oswana, ili yo mwendi sapili naalikile kutuhela kuzuba kwai kono naapalezwi. Mwendi muzwale kamba kaizeli yo wakona kufa muituti wamina kelezo yeka mutusa. Haiba hamuikutwi kulukuluha kuzamaisa tuto yamina inze muli ni muzwale kamba kaizeli yayezi seli, mumukupe kuzamaisa tuto fa musipili wo. Haiba mumema bahasanyi babañwi kuya ni mina kwa tuto yamina, muituti wamina wakona kutusiwa ki yeloseli yabona. Muhupule kuli haluituta Bibele ni mutu, lubata kumutusa kueza zwelopili ya kwa moya.

17-18. Ki lika mañi zemuswanela kunyakisisa hamunahana za haiba muswanela kutuhela kuituta ni mutu?

¹⁷ Haiba muituti wamina wa Bibele haezi zwelopili, mwendi nako hainze iya muswanela kuipuza kuli, ‘Kana niswanela kutuhela kuituta ni yena?’ Pili musika eza kale katulo, muswanela kunyakisisa buikoneli bwa muituti wamina. Babañwi baezanga zwelopili kapili kufita babañwi. Muipuze kuli: ‘Kana muituti waka ueza zwelopili yeswanela kulikana ni buikoneli bwahae?’ ‘Kana ukalile “kumamela” kamba kusebelisa zaituta?’ (Mat. 28:20) Nihaike kuli muituti ukona kuunga nako kuli abe mulutiwa, uswanela kueza licinceho mwa bupilo bwahae hanyinyani-hanyinyani.

¹⁸ Kono muswanela kuezañi haiba mulemuha kuli semuitutile ni mutu ka nako yetelelenyana kono mulemuha kuli haitebuhi tuto? Halunyakisiseñi muinelo wo: Luungeñi kuli muituti  wamina ufelize kuituta buka ya Ilulutañi? kamba mane ukalile kuituta ni buka ya Muzwelepili Kuba Mwa Lilato la Mulimu, kono haasika fumaneha kwa mikopano ya puteho nihaiba feela hañwi kamba kufumaneha kwa Kupuzo! Mi hañata ufanga mabaka asautwahali apaleliswa kuli muitute. Haiba muituti wamina ki mona mwainezi cwalo, mukatokwa kuikambota ni yena za taba yeo ka kusapata-pata. *

19. Ki lika mañi zemukona kubulela ku mutu yasaitebuhi tuto ya Bibele, mi ki lika mañi zemuka tokwa kunyakisisa?

¹⁹ Mwendi mwakona kukala puisano yamina ka kubuza kuli, ‘Mubona cwañi, ki nto mañi luli yekona kumipaleliswa kuba yomuñwi wa Lipaki za Jehova?’ Muituti wamina mwendi ukona kualaba kuli, ‘Nalata kuituta Bibele, kono hanina kuba yomuñwi wa Lipaki za Jehova nikamuta!’ Haiba ki mona mwaikutwela cwalo hamulaho wa kuituta Bibele ka nako yetelelenyana, uzibe hakuna tuso ya kuzwelapili kuituta ni yena. Kono mwendi muituti wamina uka mitaluseza zemupalelisizwe kueza zwelopili mi ikona kuba lona lwapili kumuutwa hatalusa taba yeo. Ka mutala, mwendi ukona kuikutwa kuli haana kukona kukutaza fa ndu ni ndu. Cwale hase muzibile mwaikutwela muituti wamina, mukaziba momukona kumutuseza.

20. Kuutwisisa liñolo la Likezo 13:48 kukona kulutusa cwañi kuziba haiba luswanela kuzwelapili kuituta ni mutu yomuñwi kamba kutokwa?

²⁰ Ka bumai, baituti babañwi baswana sina Maisilaele bane bapila mwa linako za Ezekiele. Jehova naabulezi cwana ku Ezekiele ka za batu bao: “Bona! Kwa batu bao, uswana sina pina ya lilato, yeopelwa ka linzwi lelinde ni yelizwa ka bukwala ku zelizwa za mihala. Bakautwa manzwi ahao, kono hakuna yaka amamela.” (Ezek. 33:32) Kukona kulubela taata kutaluseza muituti waluna wa Bibele kuli lubata kutuhela kuitutanga ni yena. Kono luswanela kuhupula kuli “nako yesiyezi ki yekuswani.” (1 Makor. 7:29) Mwa sibaka sa kutanda nako yeñata kuituta ni mutu yasatabeli kueza zwelopili, luswanela kufumana mutu usili yabonisa kuli ‘ubata bupilo bobusa feli.’—Mubale Likezo 13:48.

21. Ki lifi liñolo la silimo sa 2020, mi liñolo leo lika lutusa kuezañi?

²¹ Liñolo la silimo sa 2020 lika lutusa kunahanisisa molukona kuezeza hande musebezi wa kutusa batu kuba balutiwa. Liñolo leo linani manzwi anaabulezi Jesu fa mukopano wa butokwa one ubezi fa lilundu la mwa Galilea, aali: “Ka mukwa ocwalo, hamuye, mi mulute batu . . . , kuba balutiwa, mubakolobeze.”—Mat. 28:19.