1-2. Ntshinyi tshivua muanjelu kampanda muambile bakaji ku lukita lua Yezu? Ntshinyi tshivua Yezu nkayende mubambile?

MU DITUKU dia 16 ngondo wa Nisana tshidimu tshia 33 mu dindadinda, bakaji kampanda bavua batshina Nzambi bakaya ku lukita lua Yezu bikale ne dibungama dia bungi. Kukavua kupite mêba mapite pa 36 katshia bajiika Mukalenge Yezu Kristo. Pakafikabu ku lukita ne bintu bia dipembu dimpe ne mafuta a mupuya muimpe bivuabu balue nabi bua kumuela, bakazawuka pakasanganabu lukita munda mutupu! Muanjelu kampanda kubambila ne: Yezu ukavua mubike ku lufu, ubambila kabidi ne: “Udi udianjila kumpala kuenu mu Galela. Nenumumuenenaku.”​—Mat. 28:1-7; Luka 23:56; 24:10.

² Bakaji abu bamane kumbuka ku lukita, Yezu nkayende udi ulua kudibu, ubambila ne: “Ndayi, nuambile bana betu lumu elu bua bamone mua kuya mu Galela, nebammuenenaku.” (Mat. 28:10) Yezu uvua ne bua kuikala ne mêyi kampanda a mushinga wa bungi a kuambila bayidi bende, bualu dituilangana adi divua tshintu tshia kumpala tshivuaye mulongolole panyima pa dibishibua diende ku lufu!

3-4. Bua tshinyi tudi mua kuamba ne: mudimu udibu bakuile mu Matayi 28:19, 20 kawuvua utangila anu bapostolo nkayabu? (Tangila tshimfuanyi tshia pa tshizubu.)

³ Bala Matayi 28:16-20. Mu tshisangilu tshivua Yezu mulongolole atshi, wakakula bua mudimu wa mushinga mukole uvua bayidi bende ne bua kukumbaja mu bidimu lukama bia kumpala; mudimu au ngutudi tukumbaja petu lelu. Wakamba ne: “Ndayi nuvuije bantu ba mu bisamba bionso bayidi, . . . nubalongesha  mua kutumikila malu onso andi munuambile.”

⁴ Yezu uvua musue bua bayidi bende bonso bayishe. Kavua mutumine anu bapostolo bende ba lulamatu 11 nkayabu dîyi adi to. Bua tshinyi tudi tuamba nanku? Tuanji kuamba: anu bapostolo abu ke bavuapu pavuaye mutume dîyi dia kuvuija bantu bayidi ku mukuna wa ku Galela au anyi? Vuluka ne: muanjelu wakambila bakaji abu ne: ‘Nenumumuenene [ku Galela].’ Nunku, bakaji ba lulamatu abu bavua ne bua kuikala pabu muaba au. Kadi ki nkujike to. Mupostolo Paulo wakaleja ne: Yezu “wakamuenekela bana betu bapite pa 500 musangu umue.” (1 Kol. 15:6) Kuepi aku?

5. 1 Kolinto 15:6 udi utuambuluisha bua kumanya tshinyi?

⁵ Kudi malu adi atusaka bua kuamba ne: mu 1 Kolinto 15:6, Paulo uvua ne tshisangilu tshia ku Galela tshidibu bakuile mu Matayi nshapita wa 28 atshi mu mutu. Mmalu kayi au? Bua kumpala: Bayidi ba Yezu ba bungi bavua bena Galela. Nunku mukuna wa ku Galela uvua ne bua kuikala muaba mukumbane wa kukungijila bantu ba bungi, bishilangane ne kumbelu kua muntu mu Yelushalema. Buibidi: Yezu ukavua mutuilangane ne bapostolo bende 11 mu nzubu kampanda mu Yelushalema panyima pa dibishibua diende ku lufu. Bu Yezu musue kutumina anu bapostolo bende dîyi dia kuyisha ne kuvuija bantu bayidi, si uvua mua kuikala mubatuminadi mu Yelushalema pamutu pa kubambila bobu ne bakaji ba lulamatu abu ne bantu bakuabu bua kutuilangana nende mu Galela.​—Luka 24:33, 36.

6. Mmunyi mudi Matayi 28:20 uleja ne: dîyi dituma dia kuvuija bantu bayidi didi ditangila kabidi bena Kristo ba lelu? Mmushindu kayi udibu baditumikila?

⁶ Mona bualu buisatu bua mushinga: Dîyi dia Yezu dia kuvuija bantu bayidi divuaye mutume kadivua ditangila anu bena Kristo ba mu bidimu lukama bia kumpala to. Bua tshinyi tudi tuamba nanku? Yezu wakajikija mêyi avuaye wambila bayidi bende wamba ne: “Ndi nenu matuku onso too ne ku nshikidilu kua ndongoluelu wa malu eu.” (Mat. 28:20) Anu muvua Yezu muambe, lelu bantu ba bungi badi benza mudimu wa kuvuija bantu bayidi. Anji elabi meji: Tshidimu tshionso etshi, bantu batue ku 300 000 badi babatijibua balua bayidi ba Yezu Kristo!

7. Ntshinyi tshituamona? Bua tshinyi?

⁷ Bantu ba bungi badi balonga netu Bible badi baya too ne ku batismo. Kadi kudi bakuabu badi benze bu badi ne muoyo mukuatshidile bua kulua bayidi. Mbasue kulonga, kadi kabena baya kumpala too ne ku batismo to. Tudi bamanye ne: wewe ulongesha muntu Bible, udi musue kumuambuluisha bua kutumikila bidiye ulonga ne kulua muyidi wa Kristo. Tshiena-bualu etshi netshiakule bua tshitudi mua kuenza bua kuambuluisha balongi ba Bible bua banange Yehowa ne baye kumpala mu nyuma. Bua tshinyi mbimpe tuakule bualu ebu? Bualu bidi mua kuenzeka bua tumone ni bidi bikengela kutungunuka ne dilonga dia Bible anyi kudimanyika.

8. Bua tshinyi bidi mua kutukolela bua kuambuluisha balongi bua banange Yehowa?

⁸ Yehowa mmusue bua bantu bamuenzele mudimu bua dinanga didibu bamunange nadi. Nunku tshipatshila tshietu ntshia kuambuluisha mulongi bua kujingulula ne: Yehowa udi umutabalela bikole ne mmumunange bikole. Tudi basue kubambuluisha bua bamone Yehowa bu “tatu wa bana badi bafuishe batatuabu ne mukubi wa bakaji bakamba.” (Mis. 68:5) Padi balongi bebe bafika ku dimona ne: Nzambi mmubanange, pamuapa nebilenge muoyo wabu ne nebatuadije kumunanga pabu bikole. Bidi mua kukolela balongi bakuabu bua kumona Yehowa bu Tatu wa dinanga bualu batatuabu  kabavua babanange to. (2 Tim. 3:1, 3) Nunku paudi ulongesha muntu, imanyina pa ngikadilu milenga ya Yehowa. Ambuluisha balongi bebe bua bafike ku diumvua ne: Nzambi wetu wa dinanga mmusue bua bapete muoyo wa tshiendelele, ne udi ne muoyo wa kubambuluisha bua bakumbaje tshipatshila atshi. Ntshinyi tshikuabu tshitudi mua kuenza?

9-10. Mmikanda kayi itudi ne bua kulongesha nayi muntu Bible? Bua tshinyi anu yoyi ayi?

⁹ Longesha mulongi ne mukanda wa “Mmalu kayi adi Bible utulongesha?” ne wa “Mua kushala mu dinanga dia Nzambi.” Mikanda eyi mmienza nangananga bua kuambuluisha balongi bua banange Yehowa. Tshilejilu, mu nshapita wa 1 wa mukanda wa Bible utulongesha, mbandamune nkonko eyi: Nzambi utu ututabalela anyi, peshi mmuena tshikisu?, Mmunyi mutu Nzambi umvua padi bantu bakenga?, ne lua ne: Udi mua kulua mulunda wa Yehowa anyi? Kadi bua mukanda wa Kushala mu dinanga dia Nzambi? Wowu newambuluishe mulongi bua kumona mudi kutumikila mêyi manene a mu Bible mua kulengeja nsombelu wende ne kumusemeja pabuipi menemene ne Yehowa. Nansha biwikala ukadi mulonge ne  bantu bakuabu mikanda eyi, ikala udilongolola bimpe kumpala kua kulongesha muntu ne muntu, muikale ne majinga ende mu mutu.

¹⁰ Kadi tutekabi ne: mulongi mmusue nuyukile nende bua tshiena-bualu kampanda tshidi katshiyi mu Bintu bietu bia kulongesha nabi kadi tshikale mu mukanda mukuabu. Udi mua kumuambila bua adibadilatshi bua umone mua kutungunuka ne dilonga nende mikanda itudi bafume ku ditela eyi.

11. Ndîba kayi ditudi ne bua kutuadija dilonga ne disambila ne kujikija nadi? Mmunyi muudi mua kuasa bualu bua disambila?

¹¹ Ikala utuadija dilonga dionso ne disambila. Pa tshibidilu, kutuadija dilonga ne disambila ne kujikija nadi mbualu buimpe menemene. Bitu nangananga bimpe kutuadija kusambila ne mulongi anu mbingu ya kumpala ya panukadi batuadije dilonga didi dimueneka ne: nediye kumpala. Tudi ne bua kuambuluisha mulongi bua kumona ne: bua kumvua Dîyi dia Nzambi bimpe, anu tuetu ne diambuluisha dia nyuma muimpe. Bamanyishi bakuabu batu basa bualu bua disambila ne mvese wa Yakobo 1:5 udi wamba ne: “Bikala umue wa kunudi mupangile meji, atungunuke ne kualomba kudi Nzambi.” Pashishe batu bebeja mulongi ne: “Ntshinyi tshitudi mua kuenza bua Nzambi kutupesha meji?” Mulongi udi pamuapa mua kuandamuna ne: bidi bikengela tusambile.

12. Mmushindu kayi uudi mua kuambuluisha mulongi ne Misambu 139:2-4 bua kulengeja masambila ende?

¹² Longesha mulongi webe mua kusambila. Mujadikila ne: Yehowa mmusue bua kuteleja masambila adiye wenza ne muoyo mujima. Mumvuija ne: mu masambila atudi tuenza pa nkayetu, tudi mua kunzuluila Yehowa muoyo wetu badilekelele, tumuleja malu atudi katuyi pamuapa mua kuambila muntu mukuabu to. Yehowa muine si ukatu mumanye bionso bidi munda muetu. (Bala Misambu 139:2-4.) Tudi kabidi mua kukankamija mulongi wetu bua alombe Nzambi amuambuluishe bua kushintulula ngelelu mubi wa meji ne kulekela bibidilu bibi. Tshilejilu, tuteke ne: muntu kampanda udi mulonge Bible kukadi matuku mmunange difesto kansanga didi dibengangana ne Bible. Mmumanye ne: ndibi, kadi utshidi anu munange malu makuabu a mu difesto adi. Mukankamija bua ambile Yehowa mudiye udiumvua menemene ne amusengelele bua amuambuluishe bua anange anu malu adiye munange.​—Mis. 97:10.

13. a) Bua tshinyi tudi ne bua kubikila balongi betu mu bisangilu anu lua ku ntuadijilu kua dilonga? b) Mmunyi mutudi mua kuenza bua mulongi adiumvue bu udi kuabu padiye mu bisangilu?

¹³ Bikila mulongi webe wa Bible mu bisangilu anu lua ku ntuadijilu kua dilonga. Bidi mulongi webe umvua ne umona mu bisangilu bidi mua kumusaka bua kunanga Yehowa ne kuya kumpala. Muleja filme wa Tshitu tshienzeka ku Nzubu wa Bukalenge ntshinyi? ne umulombe ne musangelu bua nuye nende mu bisangilu. Kuoku mushindu, muambuluisha bua afike mu bisangilu. Mbimpe kabidi kuya kumulongesha ne bamanyishi bashilashilangane. Wewe muenze nanku, neibidilangane ne bakuabu mu tshisumbu, ne pamuapa neadiumvue anu bu udi kuabu padiye mu bisangilu.

14. Ntshinyi tshidi mua kusaka mulongi bua kuya kumpala mu nyuma?

¹⁴ Tshipatshila tshietu ntshia kuambuluisha mulongi wa Bible bua aye kumpala mu nyuma. (Ef. 4:13) Padi muntu witaba bua kulonga Bible, tshidi pamuapa mua kutamba kukoka ntema yende mmushindu udi dilonga adi mua kumuambuluisha. Kadi padiye wenda unanga Yehowa bikole, neatuadije pamuapa kuela meji a mudiye mua kuambuluisha bakuabu,  too ne bakadi mu tshisumbu. (Mat. 22:37-39) Paudi umona ne: dîba dia kumuambila bua diakalenga dia kufila bintu bitudi nabi bua kutua mudimu wa Bukalenge mpanda ndikumbane, kubengi bua kumuambila to.

15. Mmushindu kayi utudi mua kuambuluisha mulongi wa Bible bua kumanyaye tshia kuenza padi bilumbu bijuka?

¹⁵ Longesha mulongi webe wa Bible tshia kuenza padi bilumbu bijuka. Tshilejilu, tutekabi ne: mulongi webe wa Bible ukadi mumanyishi udi kayi muanji kubatijibua. Udi ukuambila ne: muntu mmumutape ku muoyo mu tshisumbu. Pamutu pa kuya ku bawetu, mbimpe kumumvuija tshidi Bible wamba bua bualu abu. Yeye musue, udi mua kubuikidila muanetu au; yeye kayi musue kulekela bualu abu, udi mua kuya kuyukila nende ne bulenga buonso ne tshipatshila tshia ‘kupeta muanabu’ anyi kulengejangana nende. (Fuanyikija ne Matayi 18:15.) Ambuluisha mulongi webe bua alongolole tshidiye uya kuamba. Muleja mua kuenza mudimu ne JW Library^® ne Mukanda wa makebulula wa Bantemu ba Yehowa ne jw.org^® bua kumanya tshidi tshikengela kuenza bua kupita ne nsombelu au. Wewe utamba kuleja mulongi webe mua kupita ne malu kabukabu kumpala kua kubatijibuaye, neamanye mua kusomba ne bena mu tshisumbu bimpe pabatijibuaye.

16. Bua tshinyi mbimpe kuya ne bamanyishi bakuabu bua kulongesha mulongi webe wa Bible?

¹⁶ Ikala uya ne bantu bakuabu ba mu tshisumbu (nansha mutangidi wa tshijengu padiye ukumbula tshisumbu tshienu) paudi uya kulonga ne mulongi. Bua tshinyi? Pa kumbusha malu atukadi batele, bamanyishi bakuabu badi mua kumuambuluisha bimpe menemene kukupita wewe mu malu makuabu. Tshilejilu, tutekabi ne: mulongi webe mmutate misangu ne misangu bua kulekela makanya. Biobi nanku, lomba Ntemu uvua mufike ku dilekela makanya, pamuapa mumane kutata misangu ne misangu bua kualekela bua aye kukufila. Muanenu au udi mua kupesha mulongi mibelu mimpe idiye nayi dijinga. Biobi bikutonda bua kulongesha mulongi mu mêsu mua muanetu kampanda udi mupiluke mu mudimu wa kuyisha, mulomba yeye alombole dilonga dituku adi. Dîba dionso diudi uya ne muntu, enza bua biambuluishe mulongi. Vuluka ne: tshipatshila tshietu ntshia kuambuluisha mulongi bua kuya kumpala mu nyuma.

17-18. Mbualu kayi butudi ne bua kukonkonona bua kumona ni bidi bikengela kuimanyika dilonga?

¹⁷ Bikala mulongi webe wa Bible uya kumpala ne majetete, nekufike dîba diwikala ne bua kudiebeja ne: ‘Ngimanyike dilonga anyi?’ Paudi ukonkonona tshilumbu atshi, mbimpe kutangila mudi muntu. Bitu biangata bamue bantu dîba dia bungi bua kuyabu kumpala, bakuabu bibangata dîba dikese. Diebeja ne: ‘Mulongi wanyi wa Bible udi wenda uya kumpala bimpe bilondeshile nsombelu wende anyi?’ ‘Mmubange “kutumikila” malu adiye ulonga anyi?’ (Mat. 28:20) Mulongi udi mua kuya kumpala ne lujoko, kadi udi ne bua kuenda kuya anu kumpala.

 ¹⁸ Kadi netuambe bishi bua muntu udi mulonge Bible kukadi matuku kadi kayi uleja ne: mmunange kulonga? Tufuanyikijabi bualu ebu: Mulongi webe mmujikije mukanda wa Bible utulongesha ne pamuapa mubange kulonga wa Kushala mu dinanga dia Nzambi, kadi katu muanji kubuela mu tshisangilu nansha tshimue to, nansha mu Tshivulukilu! Misangu ya bungi, utu ubenga bua kulonga bua malu a mukodikodi. Dîba dia nunku, mbimpe kuyukila nende kuyi udia tshibanga. *

19. Ntshinyi tshiudi mua kuambila muntu udi umueneka bu ne: ki mmunange kulonga Bible? Mbualu kayi buudi mua kuenza?

¹⁹ Bua kubanga muyuki, udi mua kumuebeja ne: ‘Buebe wewe, mbualu kayi bunene budi bukupangisha bua kulua Ntemu wa Yehowa?’ Mulongi udi mua kuandamuna ne: ‘Kulonga Bible kakuena ne bualu to, kadi tshiakulua Ntemu wa Yehowa nansha kakese!’ Bikalaye ne lungenyi lua nanku panyima pa bamane kulonga nende matuku a bungi, udi mua kuimanyika dilonga adi. Pamuapa bua musangu wa kumpala, mulongi webe udi mua kukuleja bualu budi bumupangisha. Tshilejilu, udi mua kuikala wela meji ne: kakukumbana bua kuyisha ku nzubu ne ku nzubu to. Nunku muudi mumanye lungenyi luende, neumuambuluishe kakuyi lutatu.

20. Mmunyi Bienzedi 13:48 mua kutuambuluisha bua kumona ni bidi bikengela kutungunuka ne dilonga dia Bible anyi kudimanyika?

²⁰ Bidi bibungamija bua kumona ne: balongi bakuabu mbenze anu bu bena Isalele ba mu tshikondo tshia Yehezekele. Yehowa wakambila Yehezekele bua kuamba bua bualu buabu ne: “Mona! wewe udi kudibu bu musambu wa mananga, muimba ne dîyi dimpe ne muimba bimpe bitambe ne tshiombelu tshia nshinga. Bobu nebumvue mêyi ebe, kadi muntu nansha umue kakuenza mêyi au to.” (Yeh. 33:32) Bidi mua kutukolela bua kuambila muntu ne: tudi basue kuimanyika dilonga nende Bible. Kadi tuamanya, “dîba didi dishale ndikese.” (1 Kol. 7:29) Pamutu pa kujimija dîba dia bungi ne mulongi wa Bible udi kayi uya kumpala, mbimpe tukebe muntu udi uleja ne: ‘mmuakaje muoyo wende bimpe bua kupeta muoyo wa tshiendelele.’​—Bala Bienzedi 13:48.

21. Mvese wetu wa tshidimu tshia 2020 mmvese kayi? Bua tshinyi tudi bamusungule?

²¹ Mu 2020, mvese wetu wa tshidimu neatuambuluishe bua kuimanyina pa mushindu wa kulengeja mudimu wetu wa divuija bantu bayidi. Udi wakula bua amue mêyi avua Yezu muambe mu tshisangilu tshia pa buatshi tshia pa mukuna wa mu Galela aa: “Ndayi nuvuije bantu . . . bayidi, nubabatiza.”​—Mat. 28:19.