1-2. Vyuma muka kangelo alwezele vaze mapwevo vayile kuchimbumbe, kaha vyuma muka avalwezele Yesu?

HALIKUMBI lyaNyisane 16, mumwaka wa 33 C.E. nachimene, lizavu lyamapwevo vaze vevwilenga Kalunga woma vayile kuchimbumbe kuze vasavalikile mujimba waMwata Yesu Kulishitu, mangana vakaukwite vyuma vyalivumba lyamwaza namaji alivumba. Omu vahetele kuze, valikomokelele mwomwo vawanyine muchimbumbe mwamupolongwa. Kaha kangelo avalwezele ngwenyi Yesu vanamusangula, nakwamba nawa ngwenyi, “Natetekela lyehi kuNgalileya, kukiko namukamumwena.”—Mateu 28:1-7; Luka 23:56; 24:10.

² Kahomu vaze mapwevo vafumine kuchimbumbe, Yesu avahumanganyine nakuvalweza ngwenyi: “Yenu mukalweze vandumbwami vayenga kuNgalileya, kukiko navakangumwena.” (Mateu 28:10) Pamo Yesu apwile nakusaka kuvalweza vyuma vimwe vyavilemu chikuma, mwomwo echi kuliwana chikiko chapwile chatete kulongesa hanyima yakusanguka.

3-4. Tunatachikiza ngachilihi ngwetu mulimo vasoneka hali Mateu 28:19, 20 kavauhanyine kaha kuli vaposetoloko? (Talenu muvwimbimbi wahalipapilo lyahelu.)

³ Tangenu Mateu 28:16-20. Yesu avulukile mulimo waulemu vatelelele kuzata tumbaji twenyi mulikulukaji lyamyaka lyakulivanga uze nawa tuli nakuzata makumbi ano, omu aliwanyine navaka-kumukavangiza kupili yamuNgalileya. Ambile ngwenyi: “Yenunga mukanangule vatu vakumafuchi osena vakapwe tumbaji. . . Mukavanangule kulamanga vyuma vyosena vize ngunamilweze.”

 ⁴ Yesu asaka vaka-kumukavangiza vosena vazatenga mulimo wakwambulula, mwomwo mulimo kana kauhanyine kaha vaze vaposetolo 11 vakushishikako. Tunejiva ngachilihi? Omu ahanyine elu lushimbi lwakunangula vatu vapwenga tumbaji hapili yakuNgalileya, kapwile kaha navaposetoloko. Ngana muze tunavuluka, uze kangelo alwezele vaze mapwevo ngwenyi: ‘KuNgalileya, kukiko namukamumwena.’ Echi chili nakulumbununa nge kwapwile namapwevo vakushishika. Kaha nawa kaposetolo Paulu ambile ngwenyi, Yesu “asolokele kuli vandumbwetu vakuhambakana 500 halwola lwolumwe.” (Koli. 1, 15:6) Jino vaze vatu 500 vapwile kumwe kulihi?

5. Twatachikiza ngachilihi ngwetu chisoneka chaWavaka-Kolinde 1, 15:6 chahanjika hakuliwana chize chapwileko muNgalileya?

⁵ Kuli vyuma vyavivulu vyatulingisa tufwelele ngwetu Paulu avulukile vyakuliwana chize chapwile muNgalileya chize vasoneka hali Mateu 28. Chatete, tumbaji twaYesu vavavulu vapwilenga vaka-Ngalileya. Shikaho, chapwile chachashi kuliwanyina hapili muNgalileya kuhambakana kuliwanyina muzuvo muYelusalema. Chamuchivali, shimbu kanda echi kuliwana, Yesu avangilile kuliwana navaposetolo jenyi 11, muzuvo yamuYelusalema. Shikaho nge Yesu asakile kuhana lushimbi kana kuli vaposetolo kaha, kachi alingile ngocho omu valiwanyine muYelusalema, muchishishisa chakuvalweza valiwanyine kuNgalileya hamwe navaze mapwevo navatu veka.—Luka 24:33, 36.

6. Uno chisoneka chaMateu 28:20 chasolola ngachilihi nge lushimbi lwakunangula vatu vapwenga tumbaji luli nakuzata namakumbi ano? Kaha mulimo kana unazovoloka ngachilihi?

⁶ Lushimbi lwaYesu lwakunangula vatu vapwenga tumbaji kalwakuminyinyine kaha kuli vaka-Kulishitu vamulikulukaji lyamyaka lyakulivangako. Tunejiva ngachilihi ngocho? Yesu akukulwile chihande kana hakwamba ngwenyi: “Ami nangupwanga nayenu makumbi osena palanga nakuchikukulwishi chakatwamino kamyaka yino.” (Mateu 28:20) Awa mazu ahanjikile Yesu ali nakutesamo mwomwo ou mulimo uli nakuzovoloka makumbi ano. Chakutalilaho, mwaka himwaka, veji kumbapachisanga vatu kafwe 300,000. Ngocho vatu kana veji kuliwezanga hamukana waVinjiho jaYehova nakupwa tumbaji twaYesu Kulishitu.

7. Vyuma muka natushimutwila, kaha mwomwo ika?

⁷ Vatu vavavulu vaze veji kulinangulanga Mbimbiliya, veji kuzovolokanga nakuheta kulumbapachiso. Chipwe ngocho, vamwe kavasaka kuzovoloka vapwenga tumbajiko, numba tuhu veji kulivwisanga kuwaha kulinangula Mbimbiliya. Tuvosena twasaka kukafwa vatu tweji kunangulanga Mbimbiliya vakavangize vyuma vali nakulinangula nakupwa tumbaji twaKulishitu. Muchihande chino natushimutwila hajijila tunahase kuvanangwilamo nakuvaheta kumichima nakuvakafwa nawa vazovoloke kushipilitu. Mwomwo ika twatela kushimutwila chihande kana? Mwomwo kweji kupwanga lwola luze twatela kukekesa tumone nge chakutamo kutwalaho kulinangula namutu nyi chiku.

8. Mwomwo ika chinahase kupwa chachikalu kunangula mutu azange Yehova?

⁸ Yehova asaka vatu vamuzachilenga mwomwo yakumuzanga. Shikaho, twatela kufwila kukafwa vatu tweji kunangulanga Mbimbiliya vejive ngwavo Yehova avazanga, kaha nawa avazakama chikuma. Twatela nawa kuvakafwa vamonenga Yehova kupwa “sevo yavana vakuzeneka masevo, ikiye muka-kukinga vatuliwe.” (Samu 68:5) Shikaho, nge mutu muli nakunangula Mbimbiliya mwatachikiza ngwenyi Kalunga amuzanga, kaha nachimukunyula nakumulingisa amuzange chikuma. Vatu vamwe vaze natunangula Mbimbiliya chinahase kuvakaluhwila kwitavila ngwavo Kalunga avazanga mwomwo pamo visemi javo kavavasolwelelele  zangi nakuvazakamako. (Chimo. 2, 3:1, 3) Ngocho, omu namunangula mutu Mbimbiliya, mwatela kumukafwa atachikize vilinga atwama navyo Yehova, nakumulweza nawa ngwenu Kalunga ketu wazangi ali nakusaka kukamuhana kuyoya chahaya myaka yosena, kaha nawa mwamukafwa alinge vyuma vyasakiwa numba akayoye. Vyuma muka vikwavo twatela kulinga?

9-10. Mikanda muka twatela kuzachisanga hakutetekela vilongesa vyaMbimbiliya, kaha mwomwo ika?

⁹ Zachisenunga mukanda “[wa]Mbimbiliya Nayitunangula Vyuma Muka?” namukanda “[wa]Mwakutwamina muZangi yaKalunga.” Mikanda kana vayisoneka mangana yitukafwe tunangule vilongesa vyetu vazange Yehova. Chakutalilaho, mukanda wakwamba ngwavo Nayitunangula, wakumbulula vihula vino: Uno Kalunga atuzakama tahi, nyi apwa waukenya? Uno Kalunga eji kwivwanga ngachilihi hakumona vatu vali nakuyanda? Uno unahase kupwa sepa lyaYehova tahi? Kaha mukanda waMwakutwamina muZangi yaKalunga naukafwa chilongesa atachikize ngwenyi, kukavangiza  jindongi jamuMbimbiliya nachimulingisa alumuneko vyuma vimwe mukuyoya chenyi nakupandama kuli Yehova. Shikaho, numba nge munalinangula lyehi mikanda kana navatu vavavulu, oloze mwatela kuhitulukanga chimweza shimbu kanda mulinangule nachilongesa nakushinganyeka nawa havyuma vili nakusakiwa kuli ikiye.

¹⁰ Vyuma muka namulinga kachi nge chilongesa chenu ali nakusaka kutachikiza chihande chimwe chize kachatwama muVinoma vyaKuzachisa haKunangulako? Pamo munahase kumulweza akatange chihande kana mumukanda vachisoneka halwola lweka mangana yenu mutwaleho lika kutetekela chilongesa kuzachisa mikanda tunavuluka.

11. Lwola muka twatela kuputuka kulomba namutu? Kaha natumulumbunwina ngachilihi kulema chakulomba?

¹¹ Lombenunga shimbu kanda muputuke kulinangula. Kachi nge mutu napu lyehi chilongesa, kaha chapwa chachilemu chikuma kulombanga hakuputuka nahakukumisa kulinangula nenyi. Mukafwenu atachikize ngwenyi shipilitu yaKalunga yikiko yinahase kumukafwa evwishise Mbimbiliya. Vandumbwetu vamwe veji kulumbunwinanga mutu kulema chakulomba hakutanga mukanda WaYakova 1:5, uze wamba ngwawo: “Kachi nge mutu umwe hali enu nahono mangana, alombenga lika Kalunga.” Kufumaho navamuhulisa ngwavo, “Chuma muka twatela kulinga numba Kalunga atuhane mangana?” Kaha yikiye mwakumbulula ngwenyi kuvangila tumulombe.

12. Namuhasa ngachilihi kuzachisa chisoneka chaSamu 139:2-4, hakukafwa chilongesa chenu alombenga namuchima wosena kuli Yehova?

¹² Nangulenu chilongesa chenu mwakulombela. Mufwelelesenu ngwenu Yehova mwevwilila kukulomba chenyi. Mulumbunwinenu nawa ngwenu nahase kulweza Yehova kala vyuma eji kushinganyekanga vize keshi kuhasa kulweza vakwavoko. Yehova ejiva vyuma tweji kushinganyekanga, shimbu kanda tumulwezevyo. (Tangenu Samu 139:2-4.) Tunahase nawa kukolezeza chilongesa chetu alombe Kalunga amukafwe echenga kushinganyekanga vyuma vyavipi nakumbila jitato jajipi. Chakutalilaho, pamo mutu uze nalinangulanga Mbimbiliya halwola lwalusuku, eji kwazananga muvilika vize vyakundwiza kulemesa chamakuli. Atachikiza vene ngwenyi kwazana muvilika kana chapwa chakuhenga, oloze kuli vyuma vimwe azanga vize vyeji kusolokanga hachilika kana. Shikaho mukolezezenu alweze Yehova omwo ali nakwivwa nakumulomba amukafwe azange vyuma vize azanga Kalunga.—Samu 97:10.

13. (a) Mwomwo ika katwatela kulangisako kulanya chilongesa kwiza nakukunguluka? (b) Natukafwa ngachilihi chilongesa apwenga wakukasunuka nge ali muzuvo yaWangana?

¹³ Kanda kulangisa kumulanya kukukungulukako. Vyuma mwevwa navize mwamona kukukunguluka, navimukwata chikuma kumuchima nakumukafwa azovoloke. Mutalisenu vindiyo yakwamba ngwavo Vyuma Muka Vyeji Kusolokanga haZuvo yaWangana? Kufumaho jino mulanyenu. Munahase kumukafwa mwakutambukila. Chapwa chamwaza nawa kuyanga kuchilongesa chenu navandumbwetu vakulisezaseza. Echi nachimukafwa alitachikize navatu vavavulu muchikungulwilo, nakumulingisa apwenga wakukasunuka nge neza nakukunguluka.

14. Chuma muka chinahase kukafwa mutu muli nakunangula azovoloke kushipilitu?

¹⁴ Chuma twatela kulinga shina kukafwa mutu azovoloke kushipilitu. (Efwe. 4:13) Kakavulu nge mutu netavila kulinangula Mbimbiliya, eji kufwilanga kaha kuwana vyuma vize navimunganyalisa ivene. Oloze nge naputuka kuzanga chikuma Yehova, eji kufwilanga  kuwana jijila jakukafwilamo vakwavo kuhakilako vene navaze vali lyehi muchikungulwilo. (Mateu 22:37-39) Kaha nge munamono ngwenu chinatemo, mwatela kumulweza mulimo twatwama nawo wakuhana mawana akukundwiza mulimo waWangana.

15. Natuhasa ngachilihi kukafwa mutu tuli nakunangula Mbimbiliya atachikize mwakulingila nge kunasoloka ukalu?

¹⁵ Munangulenu mwakulingila nge kunasoloka ukalu. Chakutalilaho, uno namulinga ngachilihi nge chilongesa chenu uze apwa muka-kwambulula wakuzeneka kumbapachisa mwamilweza ngwenyi, ndumbwenu umwe namwivwisa kupihya kumuchima. Muchishishisa chakumuhakwila, mwatela kumulweza vyuma yahanjika Mbimbiliya vize atela kulinga. Nahase kumukonekela chipwe kuyako nakushimutwila nenyi muzangi mangana ‘amunganyale.’ (Esekesenuko Mateu 18:15.) Mukafwenu awahise vyuma mwakahanjika. Mulwezenu mwakuzachishila Chisete cha JW, naChinoma Chakukafwa Vinjiho jaYehova Kuhehwojola nakeyala ya jw.org® mangana awane vishina vize navimukafwa kukumisa ukalu kana. Kumunangula mujila kaneyi shimbu kanda vamumbapachise nachimukafwa akatwamenga mukuunda navakwavo muchikungulwilo.

16. Uno kuya nandumbwenu kuchilongesa chenu chawahila halihi?

¹⁶ Mbatenungako vandumbwetu muchikungulwilo hakuya kuvilongesa vyenu, nakuzata nawa nakalama wakujinguluka nge namitambukila. Mwomwo ika? Mwomwo vandumbwenu vanahase kukafwa chilongesa chenu mujijila jize pamo kamweshi kuhasako. Chakutalilaho, nge neseka mapapa kakavulu kumbila tato yakunwa makanya oloze nahono, kaha munahase kuya nandumbwenu uze ahonesele tato kana. Ou ndumbwenu nahase kumulweza vyuma vize navimukafwa. Kachi nge chinamikaluhwila kutwaminyina chilongesa mwomwo yakuzata nandumbwenu wakulindunuka, kaha mulwezenu atetekele halikumbi kana. Kachi nge namuzatanga navandumbwenu vakulindunuka kaha nachikafwa mutu muli nakunangula anganyale. Anukenunga ngwenu chuma twafwila shina, kukafwa mutu tuli nakunangula azovoloke kushipilitu.

17-18. Vyuma muka mwatela kushinganyekaho nge muli nakusaka kwecha kulinangula namutu?

¹⁷ Kachi nge mutu muli nakunangula keshi nakuzovolokako, pamo munahase kulihulisa ngwenu, ‘Uno ngwechenga kulinangula nenyi tahi?’ Oloze shimbu kanda musakule vyakulinga, mwatela kukekesa uhashi wenyi. Vatu vamwe veji kumbatanga lwola lwalusuku numba vazovoloke. Shikaho lihulisenu ngwenu: ‘Uno mutu nguli nakunangula ali nakuzovoloka chindende chindende kweseka nauhashi wenyi tahi?’ ‘Kutala naputuka “kulama” chipwe ngwetu kukavangiza vyuma ali nakulinangula tahi?’ (Mateu 28:20) Numba tuhu mutu mwazovoloka chindende chindende, oloze atela kwalumunako vyuma vimwe mukuyoya chenyi.

 ¹⁸ Vyuma muka twatela kulinga nge tunalinangula namutu halwola lwalusuku oloze ikiye kuzovoloka chauchi? Achishinganyekenu munalinangula namutu mumukanda waNayitunangula nakuukumisa, kaha pamo munaputuka nakulinangula mukanda waMwakutwamina muZangi yaKalunga, oloze mutu kana kanda lyehi achizengaho kukukunguluka chipwe vene kuKwanuka Kufwa chaMwata. Kaha nawa kakavulu omu mweji kumutambukilanga, pamo eji kumilwezanga mukalinangule likumbi lyeka mwomwo yatuvyuma twatundende. Mutu wakufwana ngana nachiwaha kutwama nenyi nakumulweza muchano. *

19. Vyuma muka munahase kuhanjika namutu uze mweji kunangulanga uze keshi nakumona kulema chakulinangulako, kaha chuma muka mwatela kushinganyekaho?

¹⁹ Munahase kuputuka kushimutwila nenyi hakumuhulisa ngwenu, ‘Chuma muka chinahase kukuhonesa kupwa uChinjiho chaYehova?’ Pamo nahase kukumbulula ngwenyi, ‘Ngwazanga kulinangula Mbimbiliya, oloze kangweshi kukapwa nguChinjiho chaYehovako.’ Kachi nge munalinangula nenyi halwola lwalusuku, kaha nachiwaha kwecha kulinangula nenyi. Chipwe ngocho, vamwe vanahase kumilweza chuma chili nakuvahonesa kuzovoloka. Chakutalilaho, pamo eji kushinganyekanga ngwenyi nachikamukaluhwila kwambulwila kuzuvo hizuvo. Kutachikiza ukalu wenyi nachimikafwa mutachikize mwakumukafwila.

20. Uno chisoneka chaVilinga 13:48 nachitukafwa ngachilihi tumone numba nge twatela kutwalaho kulinangula namutu nyi chiku?

²⁰ Chaluvinda, vatu vamwe tweji kunangulanga vapwa ngana mwavaIsalele vamumakumbi aEzekele. Yehova alwezele Ezekele kutalisa kuvatu kana ngwenyi: “Tala! Vakiko vali nakukumona nge umuka-kwimba mwaso wazangi uze navemba nalizu lyamwaza nachisaji chamikole. Navevwa vyuma nauhanjika, oloze kaveshi kuvilingako.” (Ezeke. 33:32) Numba tuhu chinahase kutukaluhwila kulweza mutu ngwetu natwecha kulinangula nenyi, oloze twatela kwanuka ngwetu “lwola lunalituluko lunakehe” lyehi. (Koli. 1, 7:29) Muchishishisa chakwenyekela lwola kumutu uze keshi nakuzovolokako, twatela kutondanga vaze vali “namichima yamwaza yakusaka kuyoya chahaya myaka yosena.”—Tangenu Vilinga 13:48.

21. Chisoneka chauno mwaka wa 2020 chika, kaha nachitukafwa tulinge ika?

²¹ Chisoneka chauno mwaka wa 2020 nachitukafwa tuhotole uhashi wetu wakunangula vatu vapwenga tumbaji. Echi chisoneka chili namazu amwe aze ahanjikile Yesu omu apwile natumbaji twenyi hapili muNgalileya ngwenyi: “Yenunga mukanangule vatu . . . vakapwe tumbaji, mukavambapachise.”—Mateu 28:19.