1-2. Kañelu nayileji nindidi ana ambanda adi kwijamu daYesu, nawa nshimbinyi yinakuyilejayi Yesu?

KUCHIDI ntetemena, haNisani 16, 33 C.E. Ambanda ananeñi nankashi nawa amukeña Nzambi, anayi kwijamu kwamujikawu Mwanta Yesu Kristu henohu munahiti dehi maora akubadika ha 36. Chanashikiwu kwijamu nawu amuwayishi yuma yevumba dadiwahi nimanji evumba dadiwahi hamujimba, anahayami hakuwana mujimba mwijamu mwosi. Kañelu nayileji nindi, Yesu anamusañuli dehi kufuma mudi afu, dichi nabombelihu nindi: “Wukuyañahu dehi kuÑaliliya. Kwenoku dikumukumumwena.”—Mat. 28:1-7; Luka 23:56; 24:10.

² Hanyima yakwila awa ambanda anafumi dehi kwijamu, Yesu namwekani kudi wena nawa nakuyileja nindi: “Yenu muyileji anakwami kulonda ayi kuÑaliliya, kwenoku dikukummwenawu.” (Mat. 28:10) Yesu watela wudi nanshimbi yalema yinakukeñayi kuyileja atumbanji twindi, chineli iku kuhumañana dichuma chatachi chinaloñeshiyi hanyima yakusañuka kwindi.

3-4. Tukuhosheladi netu nshimbi yekala haMatewu 28:19, 20 hiyayinkeli hohu apostoluku? (Talenu mwevulu wudi hakava.)

³ Tañenu Matewu 28:16-20. Haniku kuhumañana kwaloñesheliyi Yesu, wayilejeli atumbanji twindi mudimu walema wazatiliwu mumafuku awapostolu, mudimu wutunakuzata ninetu makonu. Yesu wahosheli nindi: “Dichi, yenu mwakelishi antu akunyuza yejima ekali atumbanji, . . . muyidizisheña ahembeña yuma yejima yinnayileji enu.”

⁴ Yesu wakeñaña nindi akwakumulondela ejima ashimwineña. Bayi neyi walejeli hohu apostolu indi 11 ashinshikaku.  Tuneluki ñahi? Yesu chahanineñayi nshimbi yakwilisha atumbanji hampidi yaÑaliliya, hikwadiña apostolu hohuku. Tunahoshelidi mwenimu? Anukenu nenu kañelu wayilejeli ana ambanda nindi: “Kwenoku [kuÑaliliya] dikumukumumwena.” Dichi, chinamwekani neyi ninawa ambanda ashinshika adiña kwoku. Ilaña diwu adiñaku hohu wanyi. Kapostolu Pawulu wahosheli nindi Yesu “wamwekeni kudi anakwetu akubadika ha 500 hampinji yoyimu.” (1 Kor. 15:6) Kudihi?

5. Yumanyi yitwadizilaña kumukanda wa 1 Akorinda 15:6?

⁵ Tukweti wunsahu wunaleteshi tukuhweleli netu nsañu yasonekeliyi Pawulu ha 1 Akorinda 15:6, yinatalishi kukubulakana kwadiña muÑaliliya kwashimunawu haMatewu kapetulu 28. Wunsahwinyi weniwu? Chatachi, atumbanji twaYesu amavulu adiña amuÑaliliya. Dichi chadiña chaswayi kuhumañana nawantu amavulu hampidi yamuÑaliliya chatela ayi kwitala damuntu muYerusalema. Chamuchiyedi, chelili Yesu amusañuli, wabulakeni nawapostolu indi 11 mwitala mwakankawawu muYerusalema. Neyi Yesu wakeñeleña hohu kuleja apostolu nindi ashimwineña nikwilisha atumbanji wadi kuyilejela muYerusalema, hadi kuyileja nindi ayi nakumuhumañana muÑaliliya kushilahu ana ambanda niantu amakwawuku.—Luka 24:33, 36.

6. Matewu 28:20 yamwekeshaña ñahi nawu nshimbi yakwilisha atumbanji yatukundama nimakonu, nawa antu anakwovwahila ñahi ilu lushimbi?

⁶ Talenu chikuma chamuchisatu. Nshimbi yaYesu yakwilisha atumbanji hiyakundamini hohu kudi akwaKristu amumafuku awapostoluku. Tuneluki ñahi? Yesu wakunkulwili nakuyileja akwakumulondela nindi: “Ami nukwikalaña nanenu mafuku ejima kushika nikukukuma kwanshakaminu yamakonu.” (Mat. 28:20) Neyi chochahosheliyi Yesu, antu amavulu anakwilisha atumbanji. Talenu chumichi. Hachaaka-hachaaka antu akushika ku 300,000 anakupapatishewa nakwikala aYinsahu jaYehova nawa ekalaña atumbanji twaYesu Kristu!

7. Yumanyi yitukuhanjekahu, nawa muloñadi?

⁷ Antu amavulu adizaña Bayibolu anakupapatishewa. Hela chochu, amakwawu itwadizaña nawu Bayibolu atiyaña woma kwikala atumbanji. Atiyaña kuwaha kudiza, ilaña hiyapapatishewañaku. Neyi chakwila munakulombola kadizi waBayibolu, tunakuhweleli netu munakukeña kumukwasha kulonda yazatisheña yuma yinakudizayi nawa yekali kambanji kaKristu. Achinu chibaaba chikushimuna chitwatela kushika kadizi hamuchima nichitwatela kumukwasha kulonda yayiliku hambidi. Muloñadi chitwatela kuhanjekela haniyi nsañu? Muloña mpinji yikwawu tunateli kufuukulahu neyi chakwila tukutwalekahu kudizisha kadizi hela nehi.

8. Muloñadi mpinji yikwawu chichakalilaña kushika atudizi hamuchima?

⁸ Yehova nakukeña nindi antu amukalakeleña muloña wakumukeña. Dichi etu tukweti mudimu wakukwasha atudizi etu eluki nawu Yehova wayakamenaña chikupu hamuntu-hamuntu nawa wayikeña nankashi. Tunakukeña kuyikwasha eluki nawu Yehova “diyi tata yawanshona, diyi mukwakuyisompela antuluwa.” (Mas. 68:5) Neyi atudizi eluka nawu Nzambi wayikeña nankashi, hadaha niwena akutachika kumukeña. Atudizi amakwawu chinateli kuyikalila kwiteja nawu Yehova hiTata yawu muloña atata jawu ayimwekesheleli kukeña wanyi. (2 Tim. 3:1, 3) Neyi munakudizisha kadizi, konkomwenenu chikupu hayilwilu yayiwahi yekala naYehova. Kwashenuña  atudizi enu eluki nawu Nzambi yetu wakukeña nakukeña nindi akaheti wumi wahaya nyaaka nawa nindi wukuyikwasha kulonda atweshi kwila chuma chinakufwilawu. Chumanyi chikwawu chitwatela kwila?

9-10. Nyikandanyi yitwatela kudizishamu atudizi aBayibolu, nawa muloñadi chitwatela kuzatishila iyi nyikanda?

⁹ Zatishenu mukanda ‘waYumanyi Yinateli Kutudizisha Bayibolu? niwaShakamenu Mukukeña kwaNzambi.’ Iyi nyikanda ayisoneka kulonda yitukwasheña kushika atudizi hamuchima. Chakutalilahu, mukanda wa Kutudizisha kapetulu 1 wakula awa malwihu: Komana Nzambi watwakamenaña tahindi walukambu?, Nzambi watiyaña ñahi neyi antu anakukabakana?, nilwakwila nawu Munateli kwikala ibwambu daYehova? Indi mumukanda waShakamenu mukukeña kwaNzambi? Iwu mukanda wunateli kukwasha kadizi kwiluka nindi neyi yazatisha yishina yamuBayibolu chikumukwasha muchihandilu chindi  nikukundama kwakwihi naYehova. Hela chakwila mwadizishahu dehi antu amakwawu iyi nyikanda, loñeshenuña chiwahi kudiza kwejima kulonda mumukwashi kadizi kwesekeja nayuma yinakukeñayi.

¹⁰ Indi neyi kadizi nakukeña kwiluka nsañu yidi mumukanda wunabuli kwikala muChikasha Chetu chaYozelu Yakuzatisha Hakudizisha? Mwatela kumuleja kutaña owu mukanda kankawindi kulonda mutwalekihu kudiza nindi munyikanda yitwadizishaña antu yitunashimuni.

11. Mpinjinyi yitwatela kutachika kulomba nakadizi, nawa tunateli kumukwasha ñahi kwiluka chichalemena?

¹¹ Tachikenu nakulomba hakudiza. Neyi munatachiki kudiza nakadizi, tachikenuña nakulomba nikukumisha nakulomba. Twatela kumukwasha kadizi yeluki nindi spiritu yaNzambi diyi yinateli kutukwasha kutiya chahosha Izu daNzambi. Antañishi amakwawu atañaña Yakoba 1:5 kulonda amulumbulwili kadizi chalombelañawu hakudiza. Yahosha nawu: “Neyi hakachi kenu hadi muntu wunabuli maana, yatwalekihu kulomba kudi Nzambi nawa wakamwinka.” Kuhiñahu ntañishi wukwihula kadizi nindi, “Neyi tunakukeña kwikala namaana, chumanyi chitwatela kwila?” Kadizi wukwakula nindi twatela kulomba kudi Nzambi.

12. Munateli kuzatisha ñahi Masamu 139:2-4 kulonda mukwashi kadizi kenu kulomba kudi Yehova chakufuma hamuchima?

¹² Mudizishenu kadizi chakulomba. Mulejenu nenu Yehova nakukeña kutiya kulomba kwindi kwakufuma hamuchima. Mulumbulwilenu nenu neyi tunakulomba kwakankawetu, twekalaña akasunuka nakumuleja Yehova chitunakutiya kubadika chitunateli kuleja mukwetu muntu. Mwatela kwanuka nenu Yehova weluka yuma yekala mumuchima wetu. (Tañenu Masamu 139:2-4.) Twatela cheñi kukwasha kadizi ketu kulomba wukwashu kudi Nzambi kulonda yahimpi yitoñojoka yatama nikutondolwela yilwilu yatama. Chakutalilahu, twili netu kadizi waBayibolu nadizi mpinji yayilehi ilaña wakeña yidika yabulaña kwanakanawu akwaKristu. Weluka nindi chatama, ilaña wakeña iyi yidika. Mukwashenu yamuleji Yehova chinakutiyayi nikumulembelela kulonda yamukwashi kukeña hohu yuma yakeñayi Nzambi.—Mas. 97:10.

13. (a) Muloñadi chitwatela kuyitambikila atudizi etu aBayibolu kwinza nakupompa chitwatachika tuhu kudiza nawu? (b) Tunateli kukwasha ñahi kadizi kwikala wakasunuka neyi nenzi nakupompa?

¹³ Chimwatachika kudiza nakadizi waBayibolu mulejenu yenzeña nakupompa. Yuma yikutiyayi nikumonayi hakupompa yikumuletesha yatachiki kumukalakela Yehova. Mutalishenu vidiyo yaYumanyi Yamwekanaña Hetala daWanta? kuhiñahu mutambikenu yakenzi kukupompa. Neyi chinatwesheki loñeshenu njila yatela kumukwasha kuya nakupompa. Neyi himukuya kudi kadizi kenu, sendenuñaku akwakushimwina amboka-mboka. Neyi mwila mwenimu, kadizi kenu wukwiluka antu amakwawu amuchipompelu nawa wukwikala wakasunuka neyi nayi nakupompa.

14. Chumanyi chinateli kumukwasha kadizi kupama kuspiritu?

¹⁴ Tunakufwila kukwasha kadizi ketu kaBayibolu kupaminaku kuspiritu. (Efwe. 4:13) Neyi muntu yeteja kudiza Bayibolu, wukukeñaña nankashi kwiluka yuma yinakudizayi chiyinateli kumukwasha. Neyi yatachika kumukeña Yehova, nateli kutachika kutoñojoka chinateli kukwashayi amakwawu, kushilahu ninana adi muchipompelu. (Mat. 22:37-39) Neyi mpinji yinashikili, mulejenu kadizi  kenu nenu tukweti mudimu wakuhana yawaana yakukwasha mudimu waWanta.

15. Tunateli kukwasha ñahi kadizi wetu waBayibolu chatela kwilayi neyi kumwekana kukala?

¹⁵ Mudizishenu kadizi waBayibolu chatela kwilayi neyi kunamwekani kukala. Chakutalilahu, mukwila ñahi neyi kadizi wenu waBayibolu, wabula kupapatishewa yayileja nindi kudi muntu wunamuneñeshi muchipompelu? Bayi mumuleja wunaluwañeshi hakachi kawuku, ilaña mulumbulwilenu chatela kwilayi kwesekeja nachahosha Bayibolu. Nateli kumwanakena manakwetu nikujimbalaku. Hela neyi wukumwanakena wanyi, watela kuhosha nindi munjila yayiwahi kulonda ‘yamukwashi manakwindi kwila chuma chachiwahi.’ (Esekejenu Matewu 18:15.) Kwashenu kadizi wenu waBayibolu kulonda yeluki chatela kuhoshayi. Mulejenu chakuzatisha JW Library® app, Chitwa chakukwasha aYinsahu jaYehova hakusandujola nsañu, ni jw.org® kulonda yeluki chakumanisha kukala. Neyi yeluka chakumanisha kukala nawantu henohu kanda yapapatishewi, chikamukwashaku kudikunda nawantu muchipompelu neyi napapatishewi.

16. Chawahiladi kuya nawakwakushimwina amakwawu kudi kadizi ketu?

¹⁶ Neyi munakuya nakudizisha kadizi wenu yenuñaku nawantu amakwawu hela nankoñi wañinza neyi nayendeli. Muloñadi? Kubombela hayuma yitwashimuna dehi hakusambila, akwakushimwina amakwawu anateli kumukwasha kadizi wenu muyuma yikwawu yimunateli kubula kumukwasha enu. Chakutalilahu, indi neyi kadizi kenu neseki kapampa kakavulu kuleka kunwa makanya ilaña nakañanyi? Yenuku naChinsahu washindili iku kukala, hadaha niyena wakañenyi mpinji yesekeleñayi kuleka. Mukwenu Chinsahu nateli kumuleja yuma yinateli kumukwasha hakwila nawu yaleki. Neyi mumona nenu mukutwesha wanyi kulombola kadizi hadi manakwetu welukisha, mulejenu yalomboli hanoyu mpinji. Mpinji yejima yimunakuzata nawantu amakwawu, dizilenuku chelañawu. Anukenu nenu, chuma chitwafwilaña hikukwasha kadizi wetu kukulilaku kuspiritu.

17-18. Yumanyi yimwatela kutoñojokahu henohu kanda mufuukulihu kumuleka kadizi?

¹⁷ Neyi kadizi wenu nakuyilaku hambidi wanyi, mpinji yikwawu munateli kudihula nenu, ‘Nileki kumudizisha?’ Henohu kanda mufuukulihu, mwatela ntahi kutoñojoka hawuswa wukwetiyi. Amakwawu atiyaña swayi yuma yinakudizawu kubadika amakwawu. Dihulenu nenu: ‘Komana kadizi wami wakwataña swayi yuma yinakudizayi tahindi nehi? Natachiki ‘kuhemba’ hela kuzatisha yuma yinakudizayi?’ (Mat. 28:20) Hanateli kushimbula hakwila kadizi yekali kambanji, ilaña watela kuhimpa muchihandilu chindi.

¹⁸ Hanu twatela kwila ñahi neyi tunadizi namuntu hadi mpinji yayilehi ilaña nakulemesha wanyi yuma yinadiziyi? Talenu ichi  chakutalilahu: Kadizi kenu namanishi mukanda waKutudizisha, hadaha niwaShakamenu Mukukeña kwaNzambi, ilaña kanda yenzeñahu dehi nakupompa hela kuChanukishu. Nawa kakavulu waleyaleyaña. Neyi kadizi kenu dichekalayi, mwatela kuhosha nindi chakadi kumuhita mumbadi. *

19. Mukumuleja nenudi muntu wunakubula kulemesha yuma yinakudizayi, nawa yumanyi yimwatela kutoñojokahu?

¹⁹ Munateli kumwihula nenu, ‘Chumanyi chinakuyikañesha nankashi kubula kwikala Chinsahu chaYehova?’ Hadaha kadizi wukwakula nindi, ‘Nakeña kudiza Bayibolu, ilaña nakekala Chinsahu chaYehova wanyi!’ Neyi yahosha mwenimu hanyima yakudiza nindi mpinji yayilehi, mwatela kumuleka. Munjila yikwawu, kadizi wenu nateli kuyileja yuma yinakumukañesha. Chakutalilahu, hadaha watoñojokaña nindi wukutwesha wanyi kushimwina kwitala nikwitala. Dichi neyi mwiluka chatoñojokañayi, mukwiluka chakumukwasha.

20. Yilwilu 13:48 yinateli kutukwasha ñahi kwiluka muntu itwatela kutwalekahu kudiza nindi?

²⁰ Chawushona, atudizi amakwawu adi neyi aIsarela adiñaku mumafuku aEzekeli. Talenu chamulejeliyi Ezekeli hadi antu amuchidiwu kudi Yehova nindi: “Komana wena anakumoni neyi wukamina kakawahi kamuntu wukweti izu dasweja kuwaha, weluka kwimba chisanji chachiwahi. Muloña mazu eyi ayitiyaña, ilaña kuyilaña nehi.” (Ezek. 33:32) Chinateli kutukalila kumuleja muntu netu tukuleka kudiza nindi. Hela chochu, “mpinji yinashaliku yinakehi dehi.” (1 Kor. 7:29) Chatela tukiseña mpinji nakudizisha kadizi wunakubula kuyilaku hambidi, twatela kukeña antu adi “nanyichima yashinshika yakukeña kwikala nawumi wahaya nyaaka.”—Tañenu Yilwilu 13:48.

21. Nsona yetu yachaaka cha 2020, yinakuhosha nawudi, nawa yikatukwasha ñahi?

²¹ Mu 2020, nsona yetu yachaaka yikatukwasha kutoñojoka chitunateli kudikita mumudimu wakwilisha atumbanji. Munabombeli mazu amakwawu alema ahosheliyi Yesu hampinji yabulakeniyi nawatumbanji twindi hampidi yaÑaliliya akwila nawu: “Dichi, yenu mwakelishi . . . atumbanji, muyipapatisheña.”—Mat. 28:19.