1-2. Ingilosi ithini kwabesifazana abasethuneni likaJesu futhi uJesu ubatshela ukuthi benzeni?

KUSEMADABUKAKUSA ngoNisani 16 33 C.E. * Abesifazana abathembekileyo badanile futhi baya engcwabeni lapho okubekwe khona iNkosi uJesu Khristu. Sekudlule amalanga amabili ibekiwe. Abesifazana laba bathi befika engcwabeni bezogcoba isidumbu sikaJesu ngamakha kanye lamafutha anukelelayo bamangale bethola isidumbu singekho. Ingilosi ibatshela ukuthi uJesu usevusiwe kwabafileyo ibisisithi: “Uzaliqalela ukuya eGalile, lizambona khonale.”​—Mat. 28:1-7; Luk. 23:56; 24:10.

² Abesifazana bathi sebesukile engcwabeni, uJesu ngokwakhe abalande athi: “Hambani liyebikela abafowethu ukuze baye eGalile, yikho lapho abazangibona khona.” (Mat. 28:10) Kumele ukuthi uJesu ulemilayezo eqakatheke kakhulu afuna ukuyitshela abafundi bakhe ngoba uqala ngokuhlela umhlangano lo ngemva kokuvuswa kwakhe.

3-4. Kungani sisithi umlayo okuMathewu 28:19, 20 awunikwanga abaphostoli kuphela? (Khangela umfanekiso ongaphandle.)

³ Bala uMathewu 28:16-20. Emhlanganweni uJesu awubizayo watshela abafundi bakhe ngomsebenzi oqakathekileyo ababezawenza, lathi esilokhu siwenza. Wathi: ‘Ngakho-ke hambani liyekwenza abantu bezizwe zonke babe ngabafundi, libafundise ukulandela izinto zonke engililaye zona.’

⁴ UJesu ufuna bonke abalandeli bakhe batshumayele.  Kazange alaye abaphostoli bakhe abathembekileyo abangu-11 kuphela ukuthi benze umsebenzi lo. Kungani sisitsho njalo? Kambe ukuthi kwakulabaphostoli kuphela entabeni eseGalile ngesikhathi uJesu ekhuluma ngomlayo wokwenza abafundi? Khumbula ukuthi ingilosi yatshela abesifazana yathi: “Lizambona khonale [eGalile].” Ngakho kumele ukuthi abesifazana abathembekileyo labo babekhona emhlanganweni lo. Kodwa kulabanye ababekhona.

5. Kungani sisithi u-1 Khorinte 15:6 ukhuluma ngomhlangano owawuseGalile ochazwa kuMathewu 28?

⁵ Umphostoli uPhawuli uveza ukuthi uJesu “wabonakala kubafowethu abedlula 500 ngasikhathi sinye.” (1 Khor. 15:6) Wabonakala ngaphi? Kulezizatho ezenza sithi uPhawuli wayekhuluma ngomhlangano owawuseGalile ochazwa kuMathewu isahluko 28. Esokuqala, abafundi bakaJesu abanengi babengabeGalile. Yikho intaba eseGalile yayiyindawo engcono abantu abanengi ababengahlangana kuyo kulasendlini yomuntu eJerusalema. Esesibili, uJesu wayeseke wahlangana labaphostoli bakhe abangu-11 kwenye indlu eseJerusalema ngemva kokuvuswa kwakhe. Aluba wayefuna ukulaya abaphostoli kuphela ukuthi batshumayele futhi benze abafundi wayezahle abatshele bekhonale kulokuthi athi bahlangane eGalile labesifazana kanye labanye.​—Luk. 24:33, 36.

6. UMathewu 28:20 utshengisa njani ukuthi umlayo wokwenza abafundi uyasebenza lalamuhla njalo kuyini okutshengisa ukuthi abantu bayawulalela umlayo lo?

⁶ Nanku okunye okuqakathekileyo okwenza sithi umlayo kaJesu wokwenza abafundi wawungayisiwo wamaKhristu ayephila ngalesosikhathi kuphela. UJesu wathi eselaye abalandeli bakhe waphetha ngamazwi athi: “Ngizabe ngilani kuze kube yisiphetho somumo lo wezinto.” (Mat. 28:20) UJesu wayeqinisile sibili ngoba banengi abantu abenza abafundi lamuhla. Abantu abangaba ngu-300 000 bayabhabhathizwa minyaka yonke besiba ngoFakazi bakaJehova labafundi bakaJesu Khristu. Lokhu kuyamangalisa sibili!

7. Sizaxoxa ngani futhi kungani?

⁷ Abanengi abafunda iBhayibhili bayathuthuka baze babhabhathizwe. Lanxa kunjalo bakhona abanye abakhanya besesaba ukuba ngabafundi bakaKhristu. Bayakukholisa ukufunda kodwa abathuthuki ukuze babhabhathizwe. Nxa kulomuntu omfundisa iBhayibhili, sileqiniso lokuthi ufuna ukumncedisa ukuthi asebenzise akufundayo futhi abe ngumfundi kaKhristu. Esihlokweni lesi sizaxoxa ngokuthi singabancedisa njani esifunda labo ukuthi bathande uJehova njalo bathuthuke. Kumele sixoxe ngendaba le ngoba kungenzeka kufike isikhathi lapho okuyabe sekumele sibone ukuthi sizaqhubeka yini sifunda labo.

8. Kuyini okungenza kube nzima ukuthi esifunda labo bathande uJehova?

⁸ UJehova ufuna abantu bamkhonze ngoba bemthanda. Yikho inhloso yethu yikuncedisa esifunda labo iBhayibhili bazwisise ukuthi uJehova ulendaba labo njalo uyabathanda kakhulu. Sifuna ukubanceda babone uJehova ‘enguyise wezintandane lomlamuleli wabafelokazi.’ (Hubo. 68:5) Nxa bangananzelela ukuthi uJehova ubathanda kangakanani labo bangaqalisa ukumthanda. Kwabanye esifunda labo kungaba nzima ukuthi babone uJehova enguBaba olothando ngoba oyise abazange babatshengise uthando. (2 Tim. 3:1, 3) Yikho kuhle ukuthi nxa ufundisa umuntu onjalo ugcizelele kakhulu ubuntu  bukaJehova obugoqela uthando, umusa lesihawu. Nceda ofunda labo bazwisise ukuthi uNkulunkulu wethu olothando ufuna bathole ukuphila okungapheliyo futhi uzimisele ukubancedisa ukuthi bakuthole. Kuyini okunye esingakwenza?

9-10. Yiwaphi amabhuku okumele siwasebenzise nxa siqhuba izifundo zeBhayibhili njalo kungani kumele sisebenzise wona?

⁹ Sebenzisa ibhuku elithi “IBhayibhili Lisifundisani?” lelithi “Hlala Usethandweni LukaNkulunkulu.” Amabhuku la enzelwe ukuthi sincedise esifunda labo bathande uJehova. Ngokwesibonelo, isahluko sokuqala sebhuku elithi IBhayibhili Lisifundisani? siphendula umbuzo othi, UNkulunkulu ulendaba lathi yini?, UNkulunkulu uzwa njani nxa esibona sihlupheka? lothi Kungenzakala yini ukuthi ube ngumngane kaJehova? Ibhuku elithi Hlala Usethandweni LukaNkulunkulu lona linceda umfundi azwisise ukuthi ukusebenzisa izimiso zeBhayibhili kungenza njani impilo yakhe ibe ngcono. Limnceda lokuthi asondele kakhulu kuJehova.  Lanxa usuke wawasebenzisa amabhuku la ufunda labanye, kumele usilungiselele kuhle isifundo ngasinye ukuze uncede umuntu ngamunye omfundisayo kusiya ngezimo zakhe.

¹⁰ Kodwa ake sithi umfundi ufuna ukwazi okunengi ngendaba okukhulunywa ngayo ebhukwini elingekho eBhokisini Elilamathuluzi Okufundisa. Ungamkhuthaza ukuthi azibalele yedwa lelobhuku ukuze liqhubeke ngesifundo senu lisebenzisa elinye lamabhuku aqanjwe kundima 9.

11. Kumele siqalise nini ukuthandaza nxa siqhuba isifundo futhi singamncedisa njani umfundi azwisise ukuthi kungani ukuthandaza kuqakathekile?

¹¹ Qalisa isifundo ngokuthandaza. Izikhathi ezinengi kuhle ukuthi ungapholisi amaseko endabeni yokuthandaza nxa liqalisa ukufunda lalapho seliqedile. Lokhu ungakwenza lingakabi lamaviki amanengi liqalise isifundo. Kumele sincede esifunda laye abone ukuthi singazwisisa iLizwi likaNkulunkulu kuphela nxa sincediswa ngumoya ongcwele kaNkulunkulu. Abanye bajayele ukubala uJakhobe 1:5 ukuze bachasise ukuthi kungani kuqakathekile ukuthandaza nxa kufundwa. Umbhalo lo uthi: “Nxa ekhona phakathi kwenu osilelayo ekuhlakanipheni kaqhubeke ekucela kuNkulunkulu.” Ngemva kwalokho babuza umfundi umbuzo othi, “Singakucela njani ukuhlakanipha kuNkulunkulu?” Izikhathi ezinengi umfundi uyatsho ukuthi sikucela ngokuthandaza.

12. Ungawusebenzisa njani umbhalo weHubo 139:2-4 ukuze uncede ofunda laye akhululeke nxa ethandaza kuJehova?

¹² Mfundise ukuthandaza. Qinisekisa ofunda laye ukuthi uJehova uyafuna ukuyizwa imithandazo yakhe esuka enhliziyweni. Mchasisele ukuthi nxa sithandaza singathulula izifuba zethu kuJehova simtshela indlela esizizwa ngayo futhi simtshela lalokho esingeke sikutshele omunye umuntu. Phela uJehova uyakwazi okusenzikini yemicabango yethu. (Bala iHubo 139:2-4.) Ungaphinda umkhuthaze ukuthi acele uJehova amncedise antshintshe indlela engaqondanga acabanga ngayo njalo atshiye imikhuba emibi. Ngokwesibonelo, kungenzakala uthanda umkhosi okungamelanga unanzwe ngamaKhristu. Uyakwazi ukuthi akumelanga awuthande kodwa uyakukholisa okunye okwenziwa kuwo. Mkhuthaze ukuthi atshele uJehova indlela azizwa ngayo lokuthi amcele ukuthi amncedise athande kuphela lokho okuthandwa nguNkulunkulu.​—Hubo. 97:10.

13. (a) Kungani kungamelanga siphuze ukunxusa esifunda labo emihlanganweni yebandla? (b) Kuyini okungenza esifunda laye akhululeke nxa ebuye emhlanganweni webandla?

¹³ Ungaphuzi ukunxusa ofunda laye emihlanganweni yebandla. Lokho azakuzwa lazakubona emihlanganweni yebandla kungamenza afune ukukhonza uJehova njalo kumncede athuthuke. Mtshengise ividiyo ethi Kuyini Okwenzakala EWolu YoMbuso? ubusumcela ukuthi ahambe lawe emhlanganweni. Mtshele ukuthi ungamncedisa ukuthi ayefika emihlanganweni nxa usenelisa ukumncedisa. Kuhle ukuthi uhambe labamemezeli abatshiyeneyo nxa usiyafunda laye. Lokhu kuzamenza abajayele abanye okhonza labo njalo akhululeke nxa angabuya emihlanganweni yethu.

14. Kuyini okunganceda umfundi acabange ngokunceda abanye?

¹⁴ Inhloso yethu yikunceda esibafundisa iBhayibhili ukuthi bathuthuke ekukhonzeni. (Efe. 4:13) Nxa umuntu evuma ukufunda lathi iBhayibhili angabe ekuqakathekisa kakhulu yikubona ukuthi lokho akufundayo kuzamnceda njani. Kodwa nxa  uthando lwakhe ngoJehova lukhula kungenzeka aqale ukucabanga ngokuthi anganceda njani abanye ngitsho lalabo abasebandleni. (Mat. 22:37-39) Nxa ubona sekufanele, ungathikazi ukumtshela ngesibusiso sokusekela umsebenzi woMbuso ngokunikela.

15. Ungamncedisa njani ofunda laye ukuthi enze okuqondileyo nxa engaba lohlupho?

¹⁵ Mncedise akwazi ukuthi kumele enzeni nxa engaba lohlupho. Ake sithi umuntu ofunda laye osengummemezeli ongabhabhathizwanga ukutshela ukuthi kulomunye omkhubileyo ebandleni. Kulokuthi umtshele ukuthi ngubani ophambanisileyo kumbe ongaphambanisanga, mchasisele ukuthi iBhayibhili lithi kumele enzeni. Angamthethelela lowo omkhubileyo kumbe amlande akhulume laye ngendlela elomusa lelothando ehlose ‘ukuzuza umfowabo.’ (Khangela uMathewu 18:15.) Ncedisa umfundi alungiselele ukuthi uzakuthini. Mtshengise ukuthi angayisebenzisa njani i-JW Library^®, Ibhuku Lokuchwayisisa LaboFakazi BakaJehova kanye le-jw.org^® ukuze athole amacebo angamnceda. Nxa engaqeqetshwa ngale indlela engakabhabhathizwa kuzakuba lula ukuthi abe lobudlelwano obuhle labanye ebandleni nxa esebhabhathiziwe.

16. Kunceda ngani ukucela ukuhamba labanye esifundweni sakho?

¹⁶ Cela abanye ebandleni ukuthi bahambe lawe esifundweni sakho. Ungacela lombonisi wesiqinti nxa ehambela ibandla lenu. Kungani kumele wenze njalo? Ngaphandle kwezizatho ezisendimeni 13 abanye abamemezeli banganceda ofunda laye ngendlela ongeke wenelise ukumnceda ngayo. Ake sithi umfundi uke wazama ukuyekela ukubhema kodwa wehluleka kanengi. Cela ukuhamba lomunye ebandleni owatshiya ukubhema mhlawumbe ngemva kokuzama kanengi kodwa esehluleka. Angenelisa ukunika umfundi amacebo angamsiza. Nxa usesaba ukuqhuba isifundo uhamba lomfowethu kumbe udadewethu oselesikhathi eside enguFakazi ungamcela ukuthi asiqhube ngalelolanga. Ukuhamba labanye emuntwini ofunda laye kungamnceda kakhulu. Khumbula ukuthi inhloso yethu ngeyokumnceda athuthuke ekukhonzeni.

17-18. Kuyini okumele ucabange ngakho nxa uhlola ukuthi sekumele uyekele yini ukufunda lomuntu othile?

¹⁷ Nxa ubona ukuthi ofunda laye kantshintshi indlela aphila ngayo, ungazibuza ukuthi sekumele ume yini ukufunda laye. Kodwa ungakasenzi isinqumo lesi kumele uqale ucabange ngezimo zomfundi. Phela abanye kubathatha isikhathi ukuthi bathuthuke. Zibuze: ‘Umuntu engifunda laye uyathuthuka yini okuhambelana lezimo zakhe?’ ‘Useqalisile yini “ukulandela” kumbe ukusebenzisa lokho akufundayo?’ (Mat. 28:20) Kungathatha isikhathi ukuthi umuntu  esifunda laye abe ngumfundi kaKhristu kodwa kumele kukhanye ukuthi uyathuthuka.

¹⁸ Kodwa kuthiwani ngomuntu oselesikhathi eside efunda okhanya engakuqakathekisi akufundayo? Ake sithi useqedile ukufunda ibhuku elithi IBhayibhili Lisifundisani?, mhlawumbe useqalisile lelithi Hlala Usethandweni LukaNkulunkulu. Kodwa kakaze abuye emihlanganweni yebandla, ngitsho laseSikhumbuzweni. Kanti njalo ujayele ukukhuluma izizatho ezingatsho lutho ukuze lingafundi. Nxa ofunda laye enjalo, kuhle ukuthi uxoxe laye ungambhodi. *

19. Kuyini ongakutsho emuntwini okhanya engakuqakathekisi ukufunda iBhayibhili njalo impendulo yakhe ingakunceda njani?

¹⁹ Ungambuza: ‘Kuyini okubona kunzima kakhulu ngokuba nguFakazi kaJehova?’ Umfundi angathi, ‘Ngiyakuthanda sibili ukufunda iBhayibhili kodwa kangisoze ngibe nguFakazi kaJehova.’ Nxa kuyikuthi umfundi utsho njalo kulesizatho yini sokuthi liqhubeke lifunda? Kwesinye isikhathi angakutshela okuthile angakaze akutshele khona okumenza angathuthuki. Ngokwesibonelo angabe ebona angani kasoze enelise ukutshumayela endlini ngendlu. Ukwazi lokhu kuzakunceda ubone ukuthi ungamsiza njani.

20. Umbhalo wemiSebenzi 13:48 usinceda njani sibone ukuthi ngabanjani okumele siqhubeke sifunda labo?

²⁰ Kuyadanisa ukuthi abanye esifunda labo banjengama-Israyeli ayephila ngesikhathi sikaHezekheli. UJehova watshela uHezekheli ngabo wathi: “Ngempela, kubo wena kawusulutho olungedlula umuntu ohlabela izingoma zothando ngelizwi elihle njalo esitshaya kuhle isiginci, ngoba amazwi akho bayawezwa, kodwa akutshoyo kabakwenzi.” (Hez. 33:32) Kungaba nzima ukutshela umuntu ukuthi sesiyekela ukufunda laye. Kodwa “isikhathi esesisele sincane.” (1 Khor. 7:29) Kulokuthi siqhubeke sifunda labantu abangathuthukiyo kumele sidinge abantu abatshengisa ukuthi ‘balesifiso sokuthola ukuphila okungapheliyo.’​—Bala imiSebenzi 13:48.

21. Uthini umbhalo womnyaka ka-2020 futhi uzasinceda ukuthi senzeni?

²¹ Umbhalo womnyaka ka-2020 uzasinceda sicabange ngokuthi singathuthukisa njani indlela esenza ngayo abafundi. Ulamazwi akhulunywa nguJesu emhlanganweni oqakathekileyo owawusentabeni eseGalile: ‘Ngakho-ke hambani liyekwenza abantu babe ngabafundi, libabhabhathize.’​—Mat. 28:19.