1-2. Tiheeni munkeelo onaaleeleiye athiyana o nihiye na Yesu, nave ohoolela taani Yesu onaavaheiye?

OLA WOOSIISELO wa nihiku na 16 a Nisani eyaakha ya 33 E.K. Athiyana akina, yaawo ari awiiniwa murima nave anamusivela Muluku, annaya o nihiye weiwo Pwiya Yesu Kristu ovithiweiyewo waacamela mahiku meeli avirale. Vaava anaphiyaaya o nihiye, echunaka ohela mwiili wa Yesu sawunkhela ni makhurwa, awo annatikhiniheya woona wi mu nihiye haphwannyemo mwiili wa Yesu! Munkeelo mmoha onnaaleela oohuserya akina wi Yesu ooviihiwa mookhwani, nave onnaaceererya: “Owo oohoola, onaya oKalileya. Weiwo munammoona.”—Mat. 28:1-7; Luka 23:56; 24:10.

² Athiyana emanle ocimula o nihiye, Yesu onnawaacamela nave onnaavaha ohoolela ola: “Haweni mwaaleele asinnaka wi eye oKalileya, nakumane weiwo.” (Mat. 28:10) Echu yoopacerya Yesu onapakeiye amanle oviihiwa mookhwani ori orehererya muthukumano ni oohuserya awe. Va muthukumano yoowo Yesu onnaavaha oohuserya awe mahusiheryo oochuneyaxa!

3-4. Ntakhara heeni nnalocaahu wi nlamulo nnaphwanyeya mu Mateu 28:19, 20 hiyaavahiwe pahiru arummwa? (Moone eruku ya ekaapa.)

³ Mwaalakhanye Mateu 28:16-20. Va muthukumano yoowo Yesu aareherenryeiye, aahaaleela oohuserya awe vooloca sa muteko woochuneya yoowo yaahaalaaya opakaka mu elukuluku yeele, yoowotho nnapakaahu olelo. Yesu aahiloca: “Haweni wa achu a maloko oothene, mwaapakeke oohuserya aka . . . munaahusiha ochariha soothene koorummaakaani.”

⁴ Yesu onachuna wi oomuchara awe oothene elaleeryeke. Tahi wi pahiru aalamulenle ohuserya awe oororomeleya khumi nammoha. Elukuluku Yesu aaperenkheiye nlamulo nenla, tahi wi  yaarivo oohuserya awe pahiru. Nnasuwela hai yeela? Muupuwele wi munkeelo aalonce wa athiyana ariki: “Munammoona [o Kalileya].” Mwawiihiiha ti yawooneya wi athiyana akina oororomeleya, yaahikhalavo va muthukumano yoole. Nyenya hiyaari yaaworu. Murummwa Paulo ohuupulula wi Yesu “aahooneya wa asinna opwaha masana mathanu, elukuluku emoha yeeyo.” (1 Kor. 15:6) Asinna masana mathanu ale yaathukumanne woowi?

5. Ntakhara heeni nnaroromelaahu wi 1 Korinto 15:6 onaloca muthukumano waapakiwe o Kalileya yoowo olociwe mu Mateu 28?

⁵ Nookhalano mathowa aphaama a ororomela wi mu 1 Korinto 15:6, Paulo aaloca sa muthukumano wo Kalileya yoowo oromoliwe mu ekapitulu 28 ya Mateu. Mathowa taani? Noopacerya, oohuserya ancipale a Yesu yaari o Kalileya. Mwawiihiiha, waamukhala wookhweya othukumana ni achu ancipale o mwaako wo Kalileya, opwaha mu empa yoovitheya o Yerusalemu. Nanaawiili, amanle oviihiwa, Yesu aahithukumana moovitheya ni amuhuserya awe khumi nammoha o Yerusalemu. Waakhanle wi Yesu aachuna waahusiha arummwa awe pahiru wi elaleeryeke ni waapaka oohuserya, aanwerya weerano eyo o Yerusalemu ahaavemke awo ni athiyana vamoha ni achu akina wi yakumane ni yoowo o Kalileya.—Luka 24:33, 36.

6. Mateu 28:20 onooniherya hai wi nlamulo na waapaka oohuserya ninnaphariheleya olelo, nave achu aniiwelela hai nlamulo nenla mmahiku ahu?

⁶ Moone nthowa naneeraru noochuneya. Nlamulo na Yesu na waapaka oohuserya hinaari pahiru wa Akristu a nsana noopacerya. Nnasuwela hai? Yesu aahikuchula mahusiheryo awe wa omuchara awe ni masu ala: “Miyo kiri ni nyuwo mahiku oothene ophiyerya makuchuwelo a elukuluku.” (Mat. 28:20) Hiiha ntoko Yesu aalonceiye, achu ancipale annaapaka oohuserya mmahiku ahu. Nkuupuwelani ela! Achu waacamela 300.000 eyaakha ti eyaakha annakhala oohuserya a Yesu Kristu, annapatisiwa, nave annakhala anamoona a Yehova.

7. Tiheeni nnahaalaahu othokororya hiihaano, nave ntakhara heeni?

⁷ Ancipale a yaawo anamuhuserya Piipiliya annaya vahoolo nave annapatisiwa. Nyenya enooneya wi akina a yaawo nnaahusihaahu Piipiliya, annoovelela opatisiwa. Awo annahakalala ni yoohuserya aya, nto hanaya vahoolo wi epatisiwe. Waakhanle wi munneeciha yoohuserya ya Piipiliya, ninnaroromela wi munnachuna omukhaviherya opharihela yeeyo onahusereiye ni omukhaviherya okhala oohuserya a Kristu. Mwaha ola onahaala othokororya mukhalelo nneeraahu ntannye murima wa oohuserya ni mukhalelo nneeraahu naakhaviherye wunnuwa omunepani. Ntakhara heeni nnachunaahu othokororya mwaha yoola? Ti nthowa nawi mu ilukuluku ikina, onamuchuneya olakelela waakhanle wi ninnaphwanela opwahiherya yoohuserya naari hooye.

8. Ntakhara heeni ilukuluku ikina onnakhala woovila waakhaviherya oohuserya ahu omusivela Yehova?

⁸ Yehova onachuna wi achu emulapeleke yoowo nthowa na omusivela. Mwa yeeyo yoolakelela ahu ori waakhaviherya oohuserya ahu wiiwexexa wi Yehova onnampwacha muchu ti muchu a yaawo mwawiiseela, navetho wi onnatepa waasivela. Nnachuna waakhaviherya wi emooneke Yehova ntoko “atiithi a ikwaasuni, ni awaakiha a anaamukhwele.” (Sal. 68:5) Vaavaa oohuserya anyu anasuweleiye ophiyerya mweeryo taani Muluku onaasiveleiye, awo anahaala opacerya omusivela tho. Oohuserya akina anamoona okhala woovila omoonaka Yehova ntoko Tiithi oosivela, nthowa nawi asitiithi aya hiyaawoonihenrye osivela ni niphwanya. (2 Tim. 3:1, 3) Elukuluku muneecihaanyu yoohuserya ya Piipiliya, muceenyerye mikhalelo sootannya murima sa Yehova. Mwaakhaviherye oohuserya anyu wiiwexexa wi Muluku ahu oosivela onachuna wi ephwanye ekumi yoohimala, nave wi ori ooreheryeya waakhaviherya okhwaaniherya yoolakelela yeeyo. Echu taani nnaphwanelaahu weera?

9-10. Aliivuru taani nnaphwanelaahu waapharihela vaavaa nneecihaahu yoohuserya ya Piipiliya, nave ntakhara heeni?

 ⁹ Mwaapharihele aliivuru “Tiheeni Piipiliya Onanihusiheiye?” ni “Mutitelele Omusivela Muluku.” Soolaleeryiwa seiya ti seiyo ithanliwe wi sinikhaviherye otannya murima wa oohuserya ahu. Ntoko yootakiherya, ekapitulu yoopacerya ya liivuru Piipiliya Onanihusiheiye ennaakhula makoho ala: Muluku onnanikhapelela naari wi tawuuma murima? Muluku onoona hai ohooxeya wa achu?, ni Munanwerya okhala nthamwene a Muluku? Hanka vooloca sa liivuru Omusivela Muluku? Liivuru yoola onammukhaviherya oohuserya wiiwexexa mukhalelo oneereiye apharihele malakiheryo a Piipiliya yaawo anahaala otoroka okumi awe, ni omwaacameliha wa Yehova. Naamwi mpharihenle woosiilo soolaleeryiwa seiya ni oohuserya a Piipiliya, murehererye phaama mwaha ti mwaha mwawiiwanana ni mikhalelo sa muchu ti muchu.

¹⁰ Tiheeni munaphwanelaanyu weera wakhala wi oohuserya anyu, oosiveliwa ni mwaha yoowo onaphwanyeya mu liivuru ohinapaka makupa mu Ikaruma Soohusihano? Munaphwanela omuceenyerya waalakhanya yoolaleeryiwa eyo mukhateiye  nyenya mutitelele weeciha yoohuserya anyu ni aliivuru yaawo aromoliwe.

11. Elukuluku taani nnaphwanelaahu opacerya ni okuchula nnivekelo yoohuserya ya Piipiliya, nave nni nimukhaviherye hai oohuserya osuwela wi ti yookhweleya?

¹¹ Mpaceryeke yoohuserya ya Piipiliya nnivekelo. Ilukuluku soothene, ti yaphaama opacerya ni okuchula nnivekelo yoohuserya ya Piipiliya wakhala wooweryeya, mu isumana vakhaani nimanle opacerya yoohuserya yookilaatheya. Nnahaala omukhaviherya oohuserya osuwela wi nnanwerya wiiwexexa Masu a Muluku nnikhaviheryo na munepa waweela. Anna ni arokora akina annathariha ntakhara heeni nnaphwanelaahu ovekela va yoohuserya ya Piipiliya orweela wa omwaalakhanya Tiyako 1:5, yoowo oni: “Mukina a nyuwo athowiwa miruku, amveke Muluku.” Voocharela, mulipa oohusiha onnamukoha oohuserya: “Mmukhalelo taani nneeraahu nimveke Muluku miruku?” Oohuserya onamweemererya wi nnaphwanela ovekela wa Muluku.

12. Muni mumpharihele hai Salumu 139: 2-4 wi mmukhaviherye oohuserya a Piipiliya olocaka mootaphuwa ni Yehova mu nivekelo?

¹² Mmuhusihe oohuserya anyu mukhalelo wa ovekela. Mmutharihele wi Yehova onnachuna owiriyana mavekelo awe ookhumela vathi va murima. Mutharihe wi mu nivekelo na muchu mukhateiye, nnanwerya omuleela Yehova mukhalelo nnoonaahu ni omuleela ichu seiho nihinachunaahu omulela muchu vyakala. Muupuwele wi Yehova onnasuwela muupuwelo ahu. (Mwaalakhanye Salumu 139:2-4.) Nnanwerya tho omuceenyerya oohuserya ahu oveka nikhaviheryo na Muluku wi atoroke muupuwelo woonanara, ni ovootha sookhovelela soonanara. Ntoko yootakiherya, oohuserya a Piipiliya onasiveliwa ni ifesta seiyo Mukristu ohinaphwaneleiye opaka. Owo onnasuwela wi ti yoonanara, nyenya nlelo owo onnasiveliwa ni ichu ntoko seiyo. Mmuceenyerye wi amuleele Yehova mwawiiseela vooloca sa mukhalelo onooneiye nave amveke nikhaviheryo wi asiveleke pahiru yeeyo Muluku onasiveleiye.—Sal. 97:10.

13. (1) Ntakhara heeni nnaphwanelaahu waawopa oohuserya ahu wi ephiye mmithukumano mwawaakuveya wakhala wooweryeya? (2) Nni nimweerihe hai oohuserya a Piipiliya okhala ootaphuwa mu Empa ya Omwene?

¹³ Munwope oohuserya anyu a Piipiliya wi aphiye mmithukumano mwawaakuveya wakhala wooweryeya. Yeeyo oohuserya anyu onayeiye woona ni wiiwa mmithukumano Seekristu enanwerya otannya murima awe ni omukhaviherya oya vahoolo. Mmoonihe exilema Tiheeni Eneereya mu Empa ya Omwene? nave moosivela munwope wi ayewo. Mmukhaviherye oya o mithukumano wakhala wooweryeya. Ti yaphaama waawopa alaleeryi oohiyanahiyana wi yoohooleeni wa oohuserya anyu. Mmukhalelo yoola, oohuserya anyu onahaala owerya waasuwela anna ni arokora akina mmulokoni, nave owo onahaala okhalaka ootaphuwa vaavaa onaphiyeiye mmithukumano.

14. Tiheeni eni emukhaviherye oohuserya a Piipiliya wunnuwa omunepani?

¹⁴ Yoolakelela ahu ori omukhaviherya oohuserya ahu a Piipiliya wunnuwa omunepani. (Éfe. 4:13) Vaavaa muchu oneemereryeiye yoohuserya ya Piipiliya owo onuupuwela pahiru mmukhalelo yoohuserya enahaala omukhaviherya. Elukuluku osivela wawe ntakhara Yehova onannuwaaya, owo onahaala opacerya wuupuwela mukhalelo oneereiye aakhaviherye akina, ophitaanyerya yaale anapaka makupa a muloko. (Mat. 22:37-39) Vaavaa onakhalaaya woophwanelela, muhoovelele omuleela ekari ya okhaviherya Omwene, moorweela wa sookhalano sahu.

15. Nni nimukhaviherye hai oohuserya ahu a Piipiliya opaka yeeyo eri yaphaama elukuluku onakhaleiyeno makacamiho?

¹⁵ Mmuhusihe oohuserya anyu a Piipiliya echu yaweera vaavaa makacamiho anakhumelelaaya. Ntoko yootakiherya, mwaanyiherye wi oohuserya anyu a Piipiliya ohipatisiwe, ohooleelaani wi ookhalihiwa moonanara ni muchu  a mmulokoni. Hamunaphwanela omuleela taani omuchekenle mukhweiye, nyenya mutharihe yeeyo Piipiliya onamuleeleiye opaka. Owo onanwerya omulevelela munna naari murokora ni ocuwala vooloca sa mwaha owo. Naari wakhala wi hawerya ocuwala mwaha, owo onaphwanela oloca ni muchu ene yoowo mweepewe ni moosivela ni yoolakelela ya ‘omukookiha munnawe.’ (Mulikanyihe ni Mateu 18:15.) Mmukhaviherye oohuserya anyu orehererya masu onayeiye oloca. Mmoonihe mukhalelo wa ompharihela JW Library^® app, ni Yoohoolela ya Otholathola ya Anamoona a Yehova, ni jw.org^® wi ahuserye mukhalelo wa ohoolela mwaha owo. Wakhala wi owo oohuserya mukhalelo wa omaliha makacamiho ni akina ahaakumve opatisiwa, onamukhalano onthamwene waphaamaxa ni akina mmulokoni amanle opatisiwa.

16. Ntakhara heeni oryaaya waphaama waawopa alaleeryi akina elukuluku munayaanyu wa oohuserya anyu a Piipiliya?

¹⁶ Mwaawope anna akina mmulokoni wi mukhale vamoha va yoohuserya anyu, navetho munwope ooweherya a ekulucu vaavaa onaxekuryeiye muloko. Ntakhara heeni? Mwawaaceererya va mathowa alociwe wuupaceryani, alaleeryi akina ananwerya omukhaviherya oohuserya anyu a Piipiliya mmukhalelo mweeraanyu muhiwerye. Ntoko yootakiherya, mwaanyiherye wi oohuserya anyu oheererya ohiya omulya soona nyenya ahinawerya mu ikwaha sincipale. Mumveke munna naari murokora yoowo aavoonthe nikacamiho ntoko nenla, akhweya amanle weererya nyenya anahesa mu ikwaha sincipale. Nthamwene anyu onanwerya ovaha ekano yoophara muteko yeeyo oohuserya anyu achuneiye wiiwa. Wakhala wi hamunakhala ootaphuwa weeciha yoohuserya muniiha muri ni munna naari murokora amavyakelo, mumveke yoowo wi eecihe yoohuserya anyu. Vaavaa munaawopaanyu akina wi ekhale ni nyuwaano va yoohuserya anyu ya Piipiliya, oohuserya anyu onanwerya ophwanya mphurelo orweela wa saweereya saya. Muupuwele wi, yoolakelela ahu ori omukhaviherya oohuserya ahu wunnuwa omunepani.

17-18. Tiheeni munaphwanelaanyu othokororya waakhala wi munnaphwanela ohiyererya yoohuserya?

¹⁷ Wakhala wi oohuserya hanapaka matorokelo, ilukuluku ikina munahaala wiikoha, ‘Apwanne kinnaphwanela ohiyererya yoohuserya?’ muhaakumve opaka yoolakelela yeela, munaphwanela wuupuwelela mavyakelo a muchu yoowo. Wa achu akina ennaviravo elukuluku yincipale wi epake matorokelo opwaha akina. Mwiikohe: ‘Apwanne oohuserya aka onnaya vahoolo mmukhalelo woophwanelela mwawiiwanana ni mikhalelo sawe?’ ‘Apwanne oopacerya “ochariha” naari opharihele seiyo onahuseryeiye?’ (Mat. 28:20) Enamviravo elukuluku yincipale wi oohuserya apatisiwe. Nyenya onanwerya opaka matorokelo vakhaani vakhaani.

¹⁸ Tiheeni nnaphwanelaahu weera wakhala wi noomuhusiha muchu mu elukuluku yammoori, nyenya ahinooniherya wi yoohuserya eyo ti yoochuneya wa yene? Muupuwele vooloca sa ela: Oohuserya anyu a Piipiliya ommaliha liivuru Piipiliya  Onanihusiheiye naari akhweya oompacerya liivuru Omusivela Muluku nyenya hatonko ophiya mmithukumano naari mano va Mukonelo! Nave wiiliwiili onnakwatelela yoohuserya ni miyaha soohiphwanelela. Waakhanle wi oohuserya anyu ta mukhalelo yoowo, munaphwanela ovaanelano mookwakwaleya. *

19. Tiheeni munaphwanelaanyu oloca wa muchu yoowo ahinooniherya wi yoohuserya eyo ti yoochuneya, nave tiheeni munaphwanelaanyu wuupuwela?

¹⁹ Munanwerya opacerya ovaanela muriki: ‘Nikacamiho taani ntokweene, nnoohiihaani okhala mmoha a Anamoona a Yehova?’ Akhweya oohuserya onamwaakhula, ‘Kinnasiveliwano omuhuserya Piipiliya, nyenya nkirwa kikhala mmoha a Anamoona a Yehova!’ Wakhala wi muupuwelo awe ti yoowo, amanle omuhuserya Piipiliya mu elukuluku yincipale, nlo nthowa naphaama na ohiyererya yoohuserya. Mmakupa makina, oohuserya anyu onanwerya wooleelaani mathowa anamuhiiha oya vahoolo. Ntoko yootakiherya, owo onamuupuwela wi hani awerye olaleerya empa ni empa. Vaavaa munasuwelaanyu mukhalelo owo onooneiye, munahaala okhala oorehererya omukhaviherya.

20. Wiiwexexa yoorepa ya Saweriwa T’arummwa 13:48, eni enikhaviherye hai osuwela waakhanle wi ninnaphwanela otitelela ni yoohuserya, naari hooye?

²⁰ Ti yoothananiha oloca wi, oohuserya akina analikana ni Aisarayeli a mmahiku a Esekiyeli. Wa yaawo, Yehova aahimuleela Esekiyeli ariki: “Wa yaawo, weyo ori ntoko mulipa a wiipa macipo oochunana ni nsu nooreera oopaka phaama. Anniiwa masu aa, nto haneerano.” (Ezek. 33:32) Akhweya onamukhala woovila wa hiyo omuleela muchu wi nnahaala ohiyererya ohuserya ni yoowo. Mwawiihiiha, “Elukuluku ehanle yoovukuliwa.” (1 Kor. 7:29) Tahi yaphaama otitelela omuhusiha muchu yoowo ohinapaka matorokelo. Nnaphwanela weererya waaphwanya yaale “yaalakhanyeryiwe waakhela okumi woohimala.” —Mwaalakhanye Saweriwa T’arummwa 13:48.

21. Teevi eri yoorepa ahu ya eyaakha ya 2020, nave eni enikhaviherye opaka eheeni?

²¹ Variyari va eyaakha yeela ya 2020, yoorepa ahu ya eyaakha enamunikhaviherya wuupuwelela mukhalelo wa okhumelela phaama, mmuteko ahu wa waapaka oohuserya. Ela enaphitaanyerya masu yaawo Yesu aalonceiye va muthukumano awe woochuneya o mwaako wo Kalileya ariki: “Haweni . . . mwaapakeke oohuserya aka munaapatisa.”—Mat. 28:19.