1-2. Hadia niwaʼö malaʼika khö ndra alawe si möi ba lewatö Yesu, ba hadia fareta nibeʼe Yesu khöra?

ME LUO daʼö si hulö wongi 16 Nisana, 33 M. Si fao faʼabu dödö, so ösa ndra alawe sangataʼufi Lowalangi zi möi ba lewatö, ba no saʼae töra 36 za me no mufadölö mboto Zoʼaya yaʼira Yesu Keriso. Me no larugi lewatö, edöna menaʼö lafagule wangomuhua hegöi fanikha ba mbotonia, hizaʼi tokea ira börö me lö hadöi ösi lewatö andrö! Ifatunö khöra malaʼika, wa no tesusugi Yesu moroi ba waʼamate, imane, ”No mofanö ia ba Galilaia, ba daʼö dania falukha ami.”​—Mat. 28:1-7; Luk. 23:56; 24:10.

² Me no aefa mofanö ira moroi ba lewatö, ifalukhaisi ira Yesu ba ibeʼe khöra fareta imane, ”Miʼae mifatunö khö ndra talifusögu enaʼö möi ira ba Galilaia. Ba daʼö dania falukha ndraʼaga.” (Mat. 28:10) Halöwö si oföna nifalua Yesu me no aefa tesusugi ia, yaʼia daʼö itatugöi enaʼö tola falukha ia khö ndra nifahaʼönia. Me falukha ira, so ösa wanuturu lala si tohude nibeʼenia khöra!

3-4. Hana wa tola tawaʼö wa tenga ha khö ndra sinenge mubeʼe fareta nisura ba Mataiʼo 28:19, 20? (Faigi gambara ba guli majalah.)

³ Baso Mataiʼo 28:16-20. Ba waʼowulora andrö, ifatunö Yesu khö ndra soloʼö khönia sanandrösa ba halöwö si tohude sedöna lafalua ba abad siföföna. Halöwö andrö fagölö simane nifaluada iadaʼa. Imane Yesu, ”Börö daʼö, miʼae mibaliʼö nifahaʼögu fefu niha moroi ba ngawalö soi, . . . mifahaʼö ira ba woloʼö fefu niwaʼögu khömi.”

⁴ Omasi Yesu na manuriaigö fefu ndra soloʼö khönia. Tenga ha khö ndra sinengenia si-11 ibeʼe fareta daʼö. Hadia so dandra zangoromaʼö daʼö? Me ibeʼe Yesu fareta ba ’wombaliʼö nifahaʼö’, ato niha si möi ba hili si so ba Galilaia andrö, tenga ha ira sinenge. Hezo tola taʼila daʼö? Nehegö hadia niwaʼö malaʼika khö ndra alawe no mege, ”Ba daʼö dania falukha ami ba [Galilaia]”. Te fao ndra alawe si lö faröi andrö ba gangowuloa daʼö. Hizaʼi,  so dandra tanö böʼö sangoromaʼö wa ibeʼe fareta daʼö Yesu khö ndra soloʼö khönia maʼafefu.

5. Hana wa faduhu dödöda wa fehede Waulo si so ba 1 Korindro 15:6 manandrösa daʼö ba gangowuloa nitutunö ba Mataiʼo faza 28?

⁵ Itutunö sinenge sotöi Faulo wa ’isamuzaigö Yesu ba wamalukhaisi ira talifusö si töra 500 niha’. (1 Kor. 15:6) Tola manö, eluaha niwaʼö Waulo andrö manandrösa ia ba gangowuloa nifalua ba Galilaia, nitutunö ba Mataiʼo faza 28 no mege. So dombua dane-dane wa tola faduhu dödöda ba daʼö. Si oföna, me no aefa tesusugi Yesu, no falukha ia khö ndra sinengenia si-11 ba zi sambua omo ba Yeruzalema. Na ha khöra ibeʼe Yesu fareta ba wanuriaigö hegöi ’wombaliʼö nifahaʼö’, tola ifalua samösa ba nomo daʼö. Lö moguna iʼandrö khö ndra sinengenia, khö ndra alawe no mege, hegöi khö ndra nifahaʼönia tanö böʼö ba wamalukhaisi yaʼia ba Galilaia. Si dua, ato ndra soloʼö Yesu si otarai ba Galilaia. Andrö, itugu aoha na mufalua gangowuloa daʼö ba hili si so ba Galilaia, tenga ba zi sambua omo si so ba Yeruzalema.​—Luk. 24:33, 36.

6. Hewisa Mataiʼo 28:20 ba wangoromaʼö wa moguna irugi iadaʼa fareta ba ’wombaliʼö nifahaʼö’, ba hewisa niha ba woloʼö fareta daʼö?

⁶ So dane-dane tanö böʼö zangoromaʼö wa tenga ha khö ndra sinenge Yesu si-11 mubeʼe fareta ba ’wombaliʼö nifahaʼö’. Me no aefa iʼombakhaʼö fareta daʼö, imane Yesu, ”Fao khömi ndraʼo ero maʼökhö irugi gamozua götö daʼa.” (Mat. 28:20) Tobali, tenga ha khö ndra soloʼö khönia ba abad siföföna moguna fareta nibeʼe Yesu andrö. Simane niwaʼö Yesu, ato niha samorege ba ’wombaliʼö nifahaʼö’. Angeragö atö daʼa: Ero röfi, arakhagö 300.000 niha nibayagö idanö tobali Samaduhuʼö Yehowa ba tobali nifahaʼö Keriso. No sahöli-höli dödö daʼa!

7. Hadia nitutunöda, ba hadia mbörö?

⁷ Ato niha nifahaʼö ba Zura Niʼamoniʼö sombulöʼö faʼaurira ba lahalö gangetula enaʼö tebayagö ira idanö. Hizaʼi, so ösa niha si lö omasi tobali nifahaʼö Keriso, hewaʼae na no asese lafahaʼö ira ba Zura Niʼamoniʼö. Omasi ira na lafahaʼö, hizaʼi lö omasi ira tedou ba wamati ba tebayagö idanö. Na so niha nifahaʼömö ba Zura Niʼamoniʼö, faduhu dödöma wa omasi ötolo ia ba wamalua fefu zi no ifahaʼö yaʼia enaʼö tobali nifahaʼö Keriso. Ba wamahaʼö daʼa, tatutunö hewisa lalada enaʼö tofakha ba dödönia wamahaʼö si no itema, ba tatolo göi ia enaʼö itugu iʼomasiʼö Yehowa ba tedou ia ba wamati. Hana wa moguna tatutunö duho daʼa? Börö me alio ara, hasambalö öhalö gangetula hadia ötohugö mazui öbatogö wamahaʼö yaʼia.

8. Hana wa itaria abua khöda ba wanolo niha nifahaʼöda ba Zura Niʼamoniʼö ba wangomasiʼö Yehowa?

⁸ Omasi Yehowa na tafosumange ia börö waʼomasida khönia. Andrö, omasi ita tatolo niha nifahaʼöda ba Zura Niʼamoniʼö enaʼö sindruhu-ndruhu aboto ba dödönia, wa iʼomasiʼö ba iʼameʼegö tödö ia Yehowa. Omasi ita enaʼö aboto ba dödönia wa Yehowa no ”ama ba zi lö satua ba si tobali folumöʼö khö ndra lakha mbanua”. (Zin. 68:5, Terjemahan Dunia Baru) Na no irasoi samösa wa sindruhu-ndruhu iʼomasiʼö ia Yehowa, tola manö adöni dödönia ba wamahaʼö yaʼia ba ibörögö iʼomasiʼö Yehowa. Te so niha nifahaʼö ba Zura Niʼamoniʼö, abua khönia ba wokhalaigö wa Yehowa andrö no Ama sebua faʼomasi, börö me lö irai iʼameʼegö tödö ba iʼomasiʼö ia amania. (2 Tim. 3:1, 3) Börö daʼö, ba ginötö öfalua wamahaʼö ba Zura Niʼamoniʼö, fatunö khönia gamuata Yehowa si sökhi ba sadöni dödö niha. Tolo ia ba wangokhögö faʼaboto ba dödö wa omasi Lowalangida sebua faʼomasi enaʼö itema waʼauri si lö aetu, ba hasambalö itolo ia ba wanöndra daʼö. Hadia nasa zi tola öfalua?

9-10. Hadia manö mbuku sinangea taʼogunaʼö ba wamahaʼö niha ba Zura Niʼamoniʼö, ba hadia mbörö?

 ⁹ Ogunaʼö mbuku ”Hadia Nifahaʼö Zura Niʼamoniʼö Khöda?” hegöi ”Lala Enaʼö Lö Tebulö Iʼomasiʼö Ita Lowalangi”. Mufazökhi mbuku andrö ba wanolo niha nifahaʼöda ba Zura Niʼamoniʼö enaʼö tofakha ba dödöra wamahaʼö nitemara. Duma-dumania, ba faza 1 moroi ba mbuku Nifahaʼö Khöda ibeʼe wanema li moroi ba wanofu-nofu daʼa: Hadia iʼosinangegö ita Lowalangi? Hewisa dödö Lowalangi na tefakao niha? Hadia tola tobali ndraʼugö si fahuwu khö Yehowa? Ba mbuku Lö Tebulö Iʼomasiʼö Ita Lowalangi, itolo niha nifahaʼöda ba Zura Niʼamoniʼö enaʼö aboto ba dödönia wa so mbuania na mufalua mene-mene Zura Niʼamoniʼö. Duma-dumania, tola itugu ahatö ia khö Yehowa ba iʼokhögö waʼauri sabölö sökhi. Tola manö no asese öʼogunaʼö mbuku daʼö, ba wamalua famahaʼö ba Zura Niʼamoniʼö. Hewaʼae simanö, moguna lö tebulö öhaogö öfaʼanö ndraʼugö, fatua lö öfahaʼö niha ba Zura Niʼamoniʼö. Na öfalua daʼö, tola öfaudugö wamahaʼö andrö ba zoguna khöra ero zamösana.

 ¹⁰ Tola manö, omasi nasa iʼila niha nifahaʼömö ba Zura Niʼamoniʼö duho si so ba publikasi tanö böʼö, hizaʼi lö mututunö ia ba mbuku si dombua no mege. Tola öfarou dödönia enaʼö ibaso samösa publikasi daʼö, enaʼö tola mitohugö wamahaʼö ba mbuku Nifahaʼö Khöda mazui Lö Tebulö Iʼomasiʼö Ita Lowalangi.

11. Hawaʼara moguna tabörögö ba taʼasiwai wamahaʼö ba Zura Niʼamoniʼö faoma fangandrö, ba hewisa wanoloda niha nifahaʼöda ba Zura Niʼamoniʼö enaʼö aboto ba dödönia hawaʼamoguna wangandrö?

¹¹ Börögö wamahaʼö faoma fangandrö. Na no mibörögö ba wamalua famahaʼö ba Zura Niʼamoniʼö, moguna sibai ba wamörögö hegöi ba wangasiwai yaʼia faoma fangandrö. Moguna muʼalioʼö ba wamalua daʼö. Tatolo niha nifahaʼöda ba Zura Niʼamoniʼö enaʼö aboto ba dödönia, wa tola aboto ba dödöda Daromali Lowalangi na taʼandrö wanolo moroi ba geheha Lowalangi. So ösa zamahaʼö ba Zura Niʼamoniʼö zangogunaʼö Yakobo 1:5, ba wanutunö hawaʼamoguna wangandrö. Imane ayati daʼö, ”Na so zambö faʼatua-tua, böi miböhöli wangandrö khö Lowalangi.” Aefa daʼö, manofu zamahaʼö ba niha nifahaʼönia ba Zura Niʼamoniʼö, ”Hewisa lala ba wangandrö faʼatua-tua moroi khö Lowalangi?” Tola manö fao dödö niha nifahaʼö ba Zura Niʼamoniʼö wa moguna mangandrö ita khö Lowalangi.

12. Hewisa wangogunaʼöda Zinunö 139:2-4 ba wanolo niha nifahaʼöda ba Zura Niʼamoniʼö enaʼö itutunö nösi dödönia khö Yehowa?

¹² Fatunö ba niha nifahaʼömö ba Zura Niʼamoniʼö hewisa lala ba wamalua fangandrö. Tolo ia enaʼö faduhu dödönia wa hasambalö ifondrondrongo Yehowa wangandrönia soroi ba dödö. Na mangandrö ia, fatunö khönia wa tola itutunö gofu hadia ia khö Yehowa, hewaʼae na tebai itutunö ba niha böʼö daʼö. Törö tödömö wa sindruhunia no aboto ba dödö Yehowa hadia zi so ba wangera-ngerada. (Baso Zinunö 139:2-4.) Tola göi öfarou dödö niha nifahaʼömö ba Zura Niʼamoniʼö ba wangandrö fanolo moroi khö Yehowa, ba ginötö iforege ba wombulöʼö lala wangera-ngerania si fasala mazui amuatania si lö sökhi. Duma-dumania, te omasi nasa niha nifahaʼömö ba Zura Niʼamoniʼö ba wamalua fanunu fandru. Aboto ba dödönia wa fasala wamalua daʼö, börö me no si toʼölö lafalua agama sofaya daʼö. Farou dödönia enaʼö itutunö fefu nösi dödönia ba wangandrö, ba iʼandrö wanolo moroi khö Yehowa ba wanimbagö zi lö tefaudu ba zomasi ia.​—Zin. 97:10.

13. (a) Hana wa moguna öʼalioʼö ba wogaoni niha nifahaʼömö ba Zura Niʼamoniʼö weʼamöi ba gangowuloa? (b) Hadia zi tola tafalua ba wanolo niha nifahaʼöda ba Zura Niʼamoniʼö, enaʼö ohahau dödönia na möi ia ba gangowuloa?

¹³ Enaʼö ba waʼalio kaoni ia weʼamöi ba gangowuloa. Ba gangowuloa, tola ifondrondrongo ba iʼila ngawalö zi möi famarou dödönia enaʼö tedou ia ba wamati. Foromaʼö video Hadia Manö Nifalua ba Nahia Gorahua Mbanua Lowalangi? Ba kaoni ia enaʼö fao ami weʼamöi ba gangowuloa. Na tola, fatunö khönia wa möi ndraʼugö ba wamaondragö yaʼia. Na öfalua wamahaʼö ba Zura Niʼamoniʼö, ohe ndra talifusöda si faböʼö-böʼö. Na öfalua daʼö, tola itugu aboto ba dödönia ndra talifusöda si so ba gangowuloa, ba tola manö ohahau dödönia weʼamöi ba gangowuloa.

14. Hadia nifalua niha nifahaʼöda ba Zura Niʼamoniʼö, na sindruhu-ndruhu iʼomasiʼö Yehowa?

¹⁴ Ba ginötö tafalua wamahaʼö ba Zura Niʼamoniʼö, ohitö dödöda yaʼia daʼö tatolo ia enaʼö tedou ba wamati. (Ef. 4:13) Na ibörögö ifahaʼö ia si samösa niha ba Zura Niʼamoniʼö, tola manö ha famahaʼö khönia samösa zabölö iʼangeragö. Hizaʼi, me no itugu tedou waʼomasinia khö Yehowa, tola manö ibörögö iʼangeragö hewisa lalania ba wanolo niha böʼö, simane ira talifusöda ba gangowuloa. (Mat. 22:37-39) Na tefaudu ginötö, böi lawösi ba wangombakha khönia, wa fefu ita taʼokhögö  döi si sökhi ba wameʼe dolo-tolo ba wotuhini halöwö ba Wamatörö Lowalangi.

15. Hewisa wanoloda niha nifahaʼöda ba Zura Niʼamoniʼö enaʼö tola iʼasiwai gabula dödönia ba lala si tefaudu?

¹⁵ Fatunö ba niha nifahaʼömö ba Zura Niʼamoniʼö, hadia zinangea ifalua na so gabula dödö. Duma-dumania, te ifatunö khömö niha nifahaʼömö ba Zura Niʼamoniʼö si no tobali sanuriaigö si lö mubayagö idanö, wa so dalifusöda ba gangowuloa si no mangafökhöiʼö tödönia. Abölö sökhi na lö öfatunö khönia haniha zatulö ba haniha zi sala. Hizaʼi, fasugi ba dödönia wa moloʼö Sura Niʼamoniʼö, so dombua zi tola ifili. Tola ifili ba wangolifugö zala nifalua niha daʼö, mazui na irasoi nasa waʼafökhö dödö, tola fahuhuo ia ba niha daʼö enaʼö so waʼatulö ba gotaluara. (Fatimbaisi Mataiʼo 18:15.) Tolo ia enaʼö ifaʼanö hadia zinangea iwaʼö. Foromaʼö khönia hewisa lala wangogunaʼö JW Library^®, Fanuturu Lala ba Wamalua Riset khö Ndra Samaduhuʼö Yehowa hegöi jw.org^®, enaʼö tola iʼalui hewisa lala ba wanaögö abula dödönia. Na no ifahaʼö ia hewisa lala ba wangasiwai abula dödö ba niha böʼö fatua lö tebayagö ia idanö, tola itugu aoha khönia ba wangokhögö fahuwusa si sökhi khö ndra talifusöda ba gangowuloa na no aefa tebayagö ia idanö.

16. Hadia mbuania na taʼohe zanuriaigö tanö böʼö na tafalua wamahaʼö ba Zura Niʼamoniʼö?

¹⁶ Ohe ndra sanuriaigö tanö böʼö si so ba gangowuloa na öfalua wamahaʼö ba Zura Niʼamoniʼö, ba ohe göi zatua samasui na tohare ia. No tatutunö ösa mege hana wa moguna taʼohe ndra sanuriaigö tanö böʼö. Hizaʼi so nasa mbörö tanö böʼö. Sanuriaigö tanö böʼö si so ba gangowuloa, tola labeʼe wanolo si tebai öbeʼe ba niha nifahaʼömö ba Zura Niʼamoniʼö. Duma-dumania, te iforege niha nifahaʼömö ba Zura Niʼamoniʼö enaʼö iböhöli woroko, hizaʼi lö irai mofozu ia. Ohe samösa zanuriaigö si lö irai mofozu ba wamöhöli foroko ba zi hauga kali, hizaʼi ba gafuriatania mofozu ia. Tola manö ibeʼe mene-mene si sökhi sanuriaigö andrö, soguna ba niha nifahaʼömö ba Zura Niʼamoniʼö. Na lö ahono-hono dödömö ba wamalua famahaʼö ba Zura Niʼamoniʼö föna ndra talifusöda si no asese mamalua famahaʼö, andrö khö dalifusöda andrö enaʼö yaʼia zondröniaʼö famahaʼö ba ginötö daʼö. Na öʼohe zanuriaigö tanö böʼö na öfalua wamahaʼö, itugu teʼabölöʼö niha nifahaʼömö ba Zura Niʼamoniʼö na irongo zi no irai alua ba waʼauri dalifusöda si fao khömö. Törö tödömö, ohitö dödöda yaʼia daʼö ba wanolo yaʼia enaʼö tedou ba wamati.

17-18. Ba ginötö öhalö gangetula ba wombatogö famahaʼö ba Zura Niʼamoniʼö, hadia zinangea öfatimbaisi?

¹⁷ Na lö manö ibulöʼö waʼaurinia niha nifahaʼömö ba Zura Niʼamoniʼö, moguna öʼangeragö hadia öbatogö wamahaʼö andrö. Fatua lö öhalö gangetula, moguna öfatimbaisi waʼonekhe niha nifahaʼömö ba wanemaʼö famahaʼö. So ösa niha, ara iʼogunaʼö ginötö enaʼö tedou ia ba wamati. Angeragö daʼa, ’Hadia iforomaʼö waʼatedou, tefaudu ba zi sagu khönia?’  ’Hadia ibörögö ifalua hadia zi no ifahaʼö yaʼia?’ (Mat. 28:20) Hewaʼae na ara iʼogunaʼö ginötö, moguna iforomaʼö waʼatedou ba wamati niha nifahaʼömö ba Zura Niʼamoniʼö.

¹⁸ Hewisa na no ara ifahaʼö ia ba Zura Niʼamoniʼö, hizaʼi lö hadöi dandra sangoromaʼö wa iʼameʼegö tödö hadia zi no ifahaʼö yaʼia? Khalaigö zalua andre: No iʼasiwai ba wamahaʼö yaʼia ba mbuku Nifahaʼö Khöda, ba tola manö no ibörögö wamahaʼö yaʼia ba mbuku Lö Tebulö Iʼomasiʼö Ita Lowalangi. Hizaʼi, lö irai möi ia ba gangowuloa ba lö göi irai iʼondrasi Wanörö Tödö. Asese lö aʼozu ifahaʼö ia ha börö daha-taha side-ide. Na simane daʼö niha nifahaʼömö ba Zura Niʼamoniʼö, moguna öhaogö ba wamatunöisi khönia. *

19. Hadia zi tola öwaʼö ba niha nifahaʼömö ba Zura Niʼamoniʼö na lö iʼameʼegö tödö hadia zi no ifahaʼö yaʼia, ba hewisa wa tola tobali fanolo khömö wanema li nibeʼenia?

¹⁹ Tola öbörögö ba wanofu khönia, ”Hadia sibai daha-tahamö irege tebai öhalö gangetula tobali Samaduhuʼö Yehowa?” Te imane niha nifahaʼömö, ”Sindruhunia lö omasido tobali Samaduhuʼö Yehowa, hizaʼi omasido na ha tafahaʼö manö ita ba Zura Niʼamoniʼö.” Na simane daʼö wangera-ngerania, abölö sökhi na lö ötohugö wamahaʼö daʼö, hewaʼae na no ara ifahaʼö ia. Hizaʼi tanö böʼönia, tola manö möi fanolonia wanofu nibeʼemö irege ifatunö hadia mbörö wa lö nasa ibulöʼö waʼaurinia. Duma-dumania, te so ba dödönia wangumaʼö wa tebai manuriaigö ia ba nomo-omo. Na no öʼila hadia nösi dödönia, tola itugu aoha khömö ba wanolo yaʼia.

20. Hewisa Halöwö Zinenge 13:48 möi fanoloda ba ginötö tahalö gangetula, hadia tatohugö wamalua famahaʼö ba Zura Niʼamoniʼö khö zi samösa niha mazui löʼö?

²⁰ So ösa niha nifahaʼö ba Zura Niʼamoniʼö, fagölö ira ba niha Gizaraʼeli ba götö Hezekieli. Nehegö hadia niwaʼö Yehowa khö Hezekieli sanandrösa khöra, ”Ba hiza, ba amaedola wanunö omasiö ndraʼugö khöra, si sökhi li ba si no onekhe folau biola, ba larongo limö, ba lö laʼoʼö.” (Hez. 33:32) Tola manö abua khöda ba wombatogö famahaʼö ba Zura Niʼamoniʼö ba zi samösa niha. Hizaʼi, törö tödömö wa ”lö aratö ginötö”. (1 Kor. 7:29) Böi tahorigö ginötöda ba wanolo niha nifahaʼöda ba Zura Niʼamoniʼö si lö tedou ba wamati. Omasi ita ba wangalui niha sangoromaʼö ”amuata somasi manöndra faʼauri si lö aetu”.​—Baso Halöwö Zinenge 13:48.

21. Hadia ayati ba ndröfi 2020, ba hana wa tefaudu sibai daʼö?

²¹ Ayati ba ndröfi 2020 zanolo yaʼita ba woʼangerönusi hewisa enaʼö itugu sökhi lalada ba ’wombaliʼö nifahaʼö’. Andrö, böi taʼolifugö hadia zi no iwaʼö Yesu ba gangowuloa si tohude nifaluania ba hili si so ba Galilaia: ”Börö daʼö, miʼae mibaliʼö nifahaʼögu . . . , mibayagö ira idanö”.​—Mat. 28:19.