1-2. E na ziī ɛnjɛl bee kɔ nɛ pya nɛɛwa a bee lu kɛ̄ a bee lu eli Jizɔs a, e amunu zuurabahtɔ̄ na Jizɔs bee nɛ pya a wee ye nyɔɔnɛ dumɛ a?

A BEE le bagara lɔɔrɛ 16 biradee bu enɔɔ̄ Nisan, 33 C.E. Pya nɛɛwa ba ɛrɛ bɔɔ loo Bari bee le bu gbɛnɛ ekiɛ̄nu sɔ̄ ba bee lu ina kpaɛ̄ kpoli Jizɔs sɔ̄ nu alu 36 awa etɛ̄na aā sɔ̄ a bee lu eli ye. Sɔ̄ ba ina kɛ̄ a bee lu eli ye, sa bee gbī esu nɔɔ̄ le nu a wee si le le nuloo ye ɔgɛrɛ, a bee wa lu nyɛŋia loo sɔ̄ ba muɛ̄ lo kpo li a le ekobu. Ziī nɛɛ ɛnjɛl bee kɔ nɛ pya a wee nyɔɔnɛ dumɛ Jizɔs kɔ a e’aara kɛ̄ bu luh, sa kɔ yereloo kɔ: “A eda i sī kii Galili. Kɛ̄ a na bui muɛ̄ ye a.”—Mat 28:1-7; Luk 23:56; 24:10.

² Sɔ̄ pya lo nɛɛwa e’aara kpaɛ̄ kpo li a, Jizɔs bee wa sira loo sa wa kɔ nɛ kɔ: “Kiraa sa kɔ nɛ pya na wuga kɔ ba a kii Galili, e kɛ̄ a na ba emuɛ̄ mɛ a.” (Mat 28:10) Jizɔs bee dap ɛrɛ kaāna zuurabahtɔ̄ a bee gbī enɛ pya a wee ye nyɔɔnɛ dumɛ, nyɔnɛbee zɔ̄zɔ̄ŋia ama na tuatua zɔ̄zɔ̄ŋia a bee nɔɔ̄ sɔ̄ a bee aakɛ̄ bu luh a.

3-4. E na anua i dap kɔ tam a lu ekɔ nu kumaloo bu kpa Matiu 28:19, 20 naa bee le nɛ aba pya nɛɛ lɛɛratam a? (Ɛp foto a le nyɔɔ eko.)

³ Buū Matiu 28:16-20. Bie zɔ̄zɔ̄ŋia Jizɔs bee nɔɔ a, a bee kɔ nu akiiloo ziī gbɛnɛ tam lo pya a wee ye nyɔɔnɛ dumɛ gaa le si bu tua sɔ̄ o’oo tup zua, lo a lunage tam ili gaa si anii’ee. Jizɔs bee kɔ: “Nyɔɔwo kiraa sa doo kɔ dɛ̄dɛɛ̄ edonyɔɔ a lu pya a mɛ nyɔɔnɛ dumɛ, . . . wa tɔgɛ kɔ  ba a sere dɛ̄dɛɛ̄ nu m bee i nɛ bu lok.”

⁴ Jizɔs gbī kɔ dɛ̄dɛɛ̄ pya a wee ye nyɔɔnɛ dumɛ a zue ue. Lo lok naa bee le nɛ aba 11 pya ye nɛɛ lɛɛratam. I tɛɛ̄ doodoo wa suā lo ama? Kɛādoo, bee lege aba pya ye nɛɛ lɛɛratam na a bee le kɛ̄ sɔ̄ a bee nɛ lok kɔ ba a doo kɔ pya nɛɛ a nyɔɔnɛe ye dumɛ bie nyɔɔ kpokɛ̄ Galili ani? Nyɛŋiabu kɔ ɛnjɛl bee kɔ nɛ pya lo nɛɛwa kɔ: “[Galili] na bui muɛ̄ ye a.” Nyɔɔwo dap lu kɔ pya nɛɛwa ba yira agɛrɛ bee lenage lo zɔ̄zɔ̄ŋia. Mɛ a naale aba nu a bee sira lo. Nɛɛ lɛɛratam Pɔɔl bee kɔ siā kɔ Jizɔs bee “siraloo eenyɔɔ boo le o’oo tup wuga aba etɛɛ̄nɛ sɔ̄.” (1 Kɔr 15:6) Bie mɛ kɛ̄?

5. E na i nɔ aābu 1 Pya Kɔrint 15:6 ani?

⁵ I ɛrɛ kaāna nu anua i yiga kɔ Pɔɔl gaa bee kɔ nu kumaloo zɔ̄zɔ̄ŋia li Galili alu ebaatɛ̄ bu kpa Matiu 28 a. E na anua a? Tuatua, gbɛnɛ-edo pya a wee nyɔɔnɛ dumɛ Jizɔs bee le pya Galili. Nyɔɔwo, ewaɛ kɔ gbɛnɛ-edo nɛɛ a dap bɔŋia bie nyɔɔ kpokɛ̄ li Galili ee bie be pya nɛɛ li Jerusalɛm. Eree baɛ, Jizɔs ebee nyɔɔnɛ 11 pya a wee ye nyɔɔnɛ dumɛ zɔ̄ŋia bie tɔ nɛɛ li Jerusalɛm sɔ̄ a bee aakɛ̄ bu luh. Lo Jizɔs bee gbī ezuurabahtɔ̄ aba pya a wee ye nyɔɔnɛ dumɛ kɔ ba a zue ue sa doo kɔ pya nɛɛ a nyɔɔnɛe ye dumɛ, ebee dap doo wo bie Jerusalɛm sa a naale ebee kɔ alaba le pya lo nɛɛwa le pya dɔɔ̄na alu Galili loo lo zɔ̄zɔ̄ŋia.—Luk 24:33, 36

6. Bu mɛ sīdee na ue a le bu kpa Matiu 28:20 tɔgɛ kɔ lok lo edoo kɔ pya nɛɛ a nyɔɔnɛ dumɛ Jizɔs gaa kiisī anii’ee a, e pya nɛɛ gaa gbaɛ̄tɔ̄loo lo lok doodoo wa?

⁶ Eree taa nu anua na ama. Lok Jizɔs kɔ alu edoo kɔ pya nɛɛ a nyɔɔnɛe ye dumɛ naa bee le nɛ aba pya Nɛɛ Kraist bu tua sɔ̄ o’oo tup zua. I tɛɛ̄ doodoo wa suā ni? Jizɔs bee yere kuma loo ue a bee kɔ nɛ pya a wee ye nyɔɔnɛ dumɛ sɔ̄ a kɔ: “M le i loo dɛ̄dɛɛ̄ dee mmɛ kuma lo sɔ̄ ama.” (Mat 28:20) Dookɛ̄ Jizɔs bee kɔ doo, tam doo kɔ pya nɛɛ a nyɔɔnɛ ye dumɛ gaa kiisī kaāna anii’ee. Naa kɛɛrɛ. Bu ziī ziī zua, nu a waɛloo 300,000 pya nɛɛ gaa liamaā sa lu Pya Ekeebee Jɛhova le pya a gaa nyɔɔnɛ dumɛ Jizɔs Kraist.

7. E na i gaa le kɔ ue nyɔɔ anyaawo a, e e na anua a?

⁷ Gbɛnɛ-edo pya ba nɔ Baibol nyim kiisī mmɛ sɔ̄ ba liamaā. Kerewo, bee kɔ pio nɛɛ a i nyɔɔnɛ nɔ Baibol naa gbī elu nɛɛ a nyɔɔnɛ dumɛ Kraist. Nɔ nu kpe wa loo, mɛ ba naa gbī enyim kiisī sa liamaā. Lo o gaa nyɔɔnɛ nɛɛ nɔ Baibol, i suā leere kɔ o gbī eyerebah ye nɛ kɔ a su nu a gaa nɔ yere bu dogo le kɔ a lu nɛɛ a nyɔɔnɛ dumɛ Jizɔs. Ekobee ue ama ekɔ nu akiiloo sīdee i dap ina bu beenyiɛ pya nɛɛ i gaa nyɔɔnɛ nɔnu sa wa yerebah nɛ kɔ ba a nyim kiisī bu edɔɔ̄. E na anua a lu ebɛɛ̄ kɔ i kɔ ue nyɔɔ ekobee ue ama a? Nyɔnɛbee a ɛrɛ kɛ̄ lo enɔānu e’ina i biaɛfii lo a le i kiige sī loo lo enɔānu ale i ɔbɛ.

8. E na anua a dap aga e’ina beenyiɛ pya i gaa nyɔɔnɛ nɔ Baibol a?

⁸ Jɛhova gbī kɔ pya nɛɛ a taāŋa ye bah nyɔɔbee ba were ye loo. Nyɔɔwo, nu i seea sī na yerebah nɛ pya nɛɛ i gaa nɔɛ̄nu kɔ ba a dābeeloo kɔ Jɛhova kuū wa dɛɛ̄loo sa wa wereloo kaāna. I gbī eyerebah wa nɛ kɔ ba a ɛp Jɛhova nua “tɛ loo pya a naa ɛrɛ tɛ, le nɛɛ kpega pya wa dam e’ua.” (Yɔɔ 68:5) Kuma sɔ̄ nɛɛ o gaa nyɔɔnɛ nɔnu bɔātɛ̄ etɔgɛ nia loo  wereloo Bari ye ɛrɛ kumaloo, etɔa ye loo sa lo ama edoo kɔ wereloo a ɛrɛ loo Bari a nyim. Dap agabah pio pya i gaa nyɔɔnɛ nɔ Baibol e’ɛp Jɛhova nua Tɛ a ɛrɛ wereloo nyɔnɛbee wa tɛ naa were wa loo ale lu wa fɛgɛ loo. (2 Tim 3:1, 3) Sɔ̄ o gaa wa nyɔɔnɛ nɔnu baatɛ̄ pya lele elap dogo Jɛhova. Yerebah wa nɛ kɔ ba a dābeeloo kɔ i Bari a ɛrɛ wereloo gbī kɔ ba a ɛrɛ dum a naa tah, e a kpɛ̄naloo eyerebah wa nɛ lokwa ba doo wo. Dɔɔ̄na e na i dap doo a?

9-10. Pya amunu kpa na i dap su nɔɛ̄ Baibol nɛɛ a, e e na anua pya lo kpa lu ebɛɛ̄ a?

⁹ Su pya kpa a kura “Ena Baibol I Dap Tɔgɛ Ani?” le “Sīdee Etɔɔ̄ Bia Bu Wereloo Bari” nɔɛ̄nu pya nɛɛ. Lu ekwa pya kpa ama lokwa a i yerebah nɛ kɔ i dap ina beenyiɛ pya i gaa nyɔɔnɛ nɔnu. Bu edoba, 1 ekobee loo kpa a kura I Tɔgɛ agara pya ebip a kɔ: Ekɔ Bari kuūge i dɛɛ̄loo, sɛh a ɛrɛ i pɔrɔ nyiɛ loo ni?, Sɔ̄ pya nɛɛ tɔga, tɔɔ̄ loo Bari doodoo wa ni?, le O dapge lu gbo Jɛhova ni? E kiiloo lo kpa a  kura Bia Bu Wereloo Bari a? Kpa ama eyerebah nɛ nɛɛ i gaa nɔɛ̄nu kɔ a dābeeloo kɛ̄ susu zuurabahtɔ̄ a le bu Baibol yere bu ye dogo edap nyimɛ ye sīdee tɔɔ̄dum sa doo kɔ a tɔɔ̄ waɛloo Jɛhova doo. Kere o enyɔɔnɛ pya dɔɔ̄na nɔ kpa ama, kpɛ̄naloo leere loo ziī ziī enɔānu, sa kɛɛrɛbu nu a bɛɛ̄ nɛɛ o gaa nɔɛ̄nu.

¹⁰ E na o doo lo a le nɛɛ o gaa nɔɛ̄nu gbī esuā ziī ekobee ue a naa le bu lɔgɔ kpa a le bu i Ekpotam Tɔgɛnu a? O dap ye kɔ nɛ kɔ a buū kpa a aara lo ekobee ue nyɔɔ ye loo lokwa o dap kiisī lo enyɔɔnɛ ye nɔ Baibol tɛ̄maloo pya kpa i ebee kue bee a.

11. Mɛ sɔ̄ na i bɔātɛ̄ yere kara sɔ̄ i gaa nyɔɔnɛ nɛɛ nɔ Baibol a, e i bɔātɛ̄ kɔ nu akiiloo yere kara doodoo wa?

¹¹ Bɔātɛ̄ ziī ziī lo enɔānu tɛ̄maloo yere kara. Bu kaka, a bɔloo kɔ i bɔātɛ̄ ziī ziī enɔānu tɛ̄maloo kara sa kpaɛ̄ nage tɛ̄maloo kara, e a naa lee ebiɛ̄loo lɛɛ i gae yere kara. I ɛrɛ eyerebah nɛ nɛɛ i gaa nyɔɔnɛ nɔnu a kɔ a suā kɔ aba kaɛ edɔɔ̄ Bari na edap i yerebah nɛ lo edābeeloo Muɛ̄ Ue Bari a. Pio nɛɛ a gaa nyɔɔnɛ nɛɛ nɔ Baibol wee kɔ ue akiiloo kara tɛ̄maloo ebuū kpa Jemes 1:5, lo a kɔ: “Lo a le ɛrɛgeba bui naa ɛrɛ suānu, doolo a bara bah Bari.” Lɛɛ nɛɛ a gaa nɔɛ̄nu nɛɛ a bip nɛɛ a gaa nyɔɔnɛ nɔnu a kɔ, “Bu mɛ sīdee na i dap bara suānu aābah Bari a?” Nɛɛ a gaa nɔnu a dap agara kɔ ɛɛ tɛ̄maloo eyere kara nɛ Bari.

12. O dap su nu a le bu kpa Leyɔɔ 139:2-4 yeābah nɛ nɛɛ o gaa nɔɛ̄nu kɔ a kiisī leere bu yere kara doodoo wa?

¹² Tɔgɛ nɛɛ o gaa nɔɛ̄nu kɛ̄ eyere kara doo. Doo kɔ a suā leere kɔ Jɛhova gbī edā kara a ye aabu beenyiɛ. Baatɛ̄ ye nɛ kɔ sɔ̄ i yere kara nyɔɔ i loo, i dap kɔ ɛrɛgeba nu a i le bu beenyiɛ nɛ Jɛhova, lo a le kɔ pya nu ii le edap kɔ nɛ lɔgɔ dɔɔ̄na nɛɛ. Kerewo, Jɛhova suā taɛ nu a i le bu beenyiɛ. (Buū Le-yɔɔ 139:2-4.) I dap nage yere mɛm loo pya i gaa nyɔɔnɛ nɔnu kɔ ba a bara Jɛhova kɔ a yerebah wa nɛ lo edap nyaana wa ekwɔ ekɛɛrɛ sa be eeba wa pɔrɔ elap dogo. Bu edoba, naa su kɔ o enyɔɔnɛ ziī nɛɛ nɔnu bu pio sɔ̄ mɛ a lege gaa ɛrɛ bah bu doonu a naa gbaaloo nu a le bu Baibol. A suā kɔ lo doonu bee piya, mɛ a lege gaa doo nyɔɔbee a nia ye. Yere ye mɛm loo kɔ a kɔ ye ekɛɛrɛ nɛ Jɛhova bu kara sa ye bara kɔ a yerebah ye nɛ lo ewereloo aba nu alɛ wereloo.—Yɔɔ 97:10.

13. (a) E na anua i nwaabah kue nɛɛ i gaa nyɔɔnɛ nɔnu nua enɔānu a? (b) Bu mɛ sīdee na i dap doo kɔ loo nɛɛ i gaa nɔɛ̄nu a sukɛ̄ bie Tɔ Nɔnu Buɛ̄-mɛnɛ a?

¹³ Waa pee sɔ̄ lo ekue nɛɛ o gaa nyɔɔnɛ nɔ Baibol nua enɔānu. Nu nɛɛ o gaa nyɔɔnɛ nɔnu dā sa muɛ̄ bie enɔānu pya Nɛɛ Kraist dap doo kɔ a taāŋabah Jɛhova. Tɔgɛ ye vidio a kura Ena a wee lu Edoo bie i Tɔ Nɔ̄nu Buɛ̄-mɛnɛ Ani? lɛɛ o kue ye kɔ a nyɔɔnɛ a si. Lo a waɛ o dap ye kpɛ kpugi bee nua enɔānu. E lee lo a le o aara keekee pya wuga siā loo nɛɛ o wee nyɔɔnɛ nɔnu. Wo edoo kɔ a suāloo pya nɛɛ a le bu bɔŋanaloo leere, sa edoo nage kɔ loo ye a sukɛ̄ sɔ̄ esi pya i enɔānu.

14. E na eyerebah nɛ nɛɛ i gaa nɔɛ̄nu kɔ a nyim kiisī bu edɔɔ̄ a?

¹⁴ Nu i seea sī na yerebah nɛ nɛɛ i gaa nɔɛ̄nu kɔ a nyim kiisī bu edɔɔ̄. (Ɛfɛs 4:13) Sɔ̄ ziī nɛɛ yiga lo enɔ Baibol, nu a dap lu ye taɛ na kɛ̄ lo enɔānu edɔbiī  ye nɛ doo. Kuma sɔ̄ wereloo a ɛrɛ loo Jɛhova kiisī lo enyim, e bɔātɛ̄ ekɛɛrɛ kɛ̄ eyerebah nɛ pya dɔɔ̄na doo, gbaā nage loo pya a le bu bɔŋanaloo. (Mat 22:37-39) Sɔ̄ sɔ̄ gaa kiisī, o dap ye kɔ nɛ kɔ alu dee a kpaā nɛ ziī ziī nɛɛ lo esu kpugi yeākpotɛ̄ tam Buɛ̄-mɛnɛ.

15. Bu mɛ sīdee na i yerebah nɛ nɛɛ i gaa nyɔɔnɛ nɔ Baibol kɔ a kwa taāŋa a?

¹⁵ Yerebah nɛ nɛɛ o gaa nyɔɔnɛ nɔ Baibol kɔ a suā nu edoo sɔ̄ taāŋa sira. Bu edoba, lo nɛɛ o gaa nyɔɔnɛ nɔnu, lo alu nɛɛ zue ue a sii liamaā kɔ a nɛ kɔ ziī nɛɛ a le bu bɔŋanaloo yere ye saŋ bu. Taā o kɔ nɛɛ a doo leere le nɛɛ a naa doo leere, e na anua oo ye baatɛ̄ nu edoo nɛ aābu Kpa Kaɛ a? A dap aaloo nɛ lo wuga, ale lo a naa dap aaloo, a si loo lo nɛɛ sa ye nyɔɔnɛ kɔnia lo ue bu fɛgɛ le wereloo lokwa a dap ‘sikɛ̄ obia ɛrɛ ye wuga.’ (Dooreloo Matiu 18:15.) Yerebah nɛ nɛɛ o gaa nɔɛ̄nu kɔ a suā pya nu a gaa le kɔ. Tɔgɛ ye kɛ̄ esu JW Library^® app, Research Guide for Jehovah’s Witnesses, le jw.org^® nɔā pya sīdee a dap aābaloo lo taāŋa. Lo a suā kɛ̄ ekwabaloo taāŋa doo lɛɛ a gae liamaā, e waɛ ye bah enyɔɔnɛ pya a le bu bɔŋanaloo tɔɔ̄ bu efɛɛloo sɔ̄ eliamaā sah.

16. Amunu le nu na a dap sira aabu kɔ nɛ pya dɔɔ̄na kɔ ba a nyɔɔnɛ a si wee sere enɔānu Baibol a?

¹⁶ Kɔ nɛ pya dɔɔ̄na nɛɛ a le bu bɔŋanaloo, le nɛɛ kuūdɛɛ̄loo sɛkiut sɔ̄ alu bui bɔŋanaloo kɔ ba a nyɔɔnɛ a siloo nɛɛ o wee nyɔɔnɛ nɔnu. E na anua a? Pya dɔɔ̄na nɛɛ a le bu bɔŋanaloo dap yerebah nɛ nɛɛ o gaa nɔɛ̄nu bu pya dɔɔ̄na sīdee olo oo dap doo, gbaāloo kɛ̄ i bee kɔ doo tua sɔ̄ a. Bu edoba, naa su kɔ nɛɛ o gaa nɔɛ̄nu epiiga gbɛnɛkpo sɔ̄ lo e’ɔbɛ ɔ̄ sɔɔ̄ mɛ a naa waɛ. Kue ziī nɛɛ Ekeebee lo a bee ye agaloo e’ɔbɛ lo elap gbɛnɛkpo sɔ̄, kerewo, a bee dap ɔbɛ bu kpɛdumɛ, kɔ a nyɔɔnɛ a si wee sere lo enɔānu. O wuga bu yira ama dap nɛ zuurabahtɔ̄ edɔbiī nɛ nɛɛ o wee nyɔɔnɛ nɔnu ama. Lo oo le edap sere lo enɔānu Baibol kɛ̄ wuga nɛɛdam e agaloo le, kɔ ye nɛ kɔ a yerebah a nɛ sere lo enɔānu lo sɔ̄. Wo edoo kɔ nɛɛ o gaa nyɔɔnɛ nɔ Baibol a nɔ nu aāloo pya dɔɔ̄na. Nyɛŋiabu kɔ nu i seea sī na lo eyerebah nɛ pya i gaa nyɔɔnɛ nɔnu kɔ ba a nyim kiisī bu edɔɔ̄.

17-18. Pya e na o kɛɛrɛbu lɛɛ o gae biaɛfii lo e’ɔbɛ ziī enɔānu Baibol a?

¹⁷ Lo nɛɛ o gaa nyɔɔnɛ nɔnu naa gaa nyim kiisī leere, o dap bip aba ɔɔ kɔ, ‘M ɔbɛge lo enɔānu ni?’ Lɛɛ o gae biaɛfii lo edoo wo, lee kɔ o suā kɛ̄ lo nɛɛ dābeeloo nu doo. Nyim kiisī ziī ziī nɛɛ lu keekee. Bip aba ɔɔ kɔ: ‘Nɛɛ m gaa nyɔɔnɛ nɔnu gaa nyimge kiisī dookɛ̄ ye kɛ̄tɔɔ̄ le doo ni?’ ‘Ekɔ ebɔāgetɛ̄ gaa “sere,” pya nu a  nɔ aābu Baibol sa su pya lo nu yere bu dogo ni?’ Dap su sɔ̄ bah nɛɛ o gaa nɔɛ̄nu lo elu Nɛɛ Kraist, mɛ elee lo a gaa kwabaloo ye sīdee tɔɔ̄dum.

¹⁸ E na i doo lo a le i enyɔɔnɛ ziī nɛɛ nɔnu bu pio sɔ̄ sa a naa tɔgɛ nia loo lo enɔānu ale nyim kiisī leere a? Naa kɛɛrɛbu kɛ̄tɔɔ̄ ama: Nɛɛ o gaa nyɔɔnɛ nɔnu enɔā kpa a kura I Tɔgɛ lɛɛ, sa ebɔā nagetɛ̄ enɔ kpa a kura Bia Bu Wereloo Bari, mɛ a sii si enɔānu bu bɔŋanaloo lɔgɔ dee, ale si Doonu Nyɛŋiabu loo Luh Jizɔs. E a wee bialoo lɛɛ enɔānu kɛ̄ nyɔɔ nu a naa bɔloo. Bu dua kɛ̄tɔɔ̄ ama, o doo leere lo enyɔɔnɛ ye kɔnia taɛ nu a le kɛ̄. *

19. E na o dap kɔ nɛ nɛɛ a bee kɔ a naa tɔgɛ nia loo nɔ Baibol a, e e na o gaa le kɛɛrɛbu loo a?

¹⁹ O dap bɔātɛ̄ tɛ̄maloo ebip ye kɔ, ‘E na alu nu finiabah o ɛrɛ lo elu ziī nɛɛ Ekeebee ani?’ Nɛɛ o wee nɔɛ̄nu dap agara kɔ, ‘A nia mɛ enɔ Baibol, mɛ mm le edap lu ziī yɛɛ Pya Ekeebee Jɛhova!’ Lo a le doowo sa ebee nɔnu bu nyɔɔnyɔɔ sɔ̄, a bɔgeloo ekiisī lo ewee ye nyɔɔnɛ nɔnu ni? Kɛadoo, nɛɛ o wee nyɔɔnɛ nɔnu dap kɔ a ɛrɛ nu a gaa doo kɔ aa kiie sī. Bu edoba, a dap kɔ a naa kɛɛrɛe kɔ edabe zue ue aā ziī tɔ yii ziī. Nyaawo sɔ̄ o esuā nu a lu ye taāŋa a, o dap ye yerebah nɛ.

20. Dābeeloo kpa Doonu pya Nɛɛ lɛɛratam 13:48 eyerebah i nɛ lo esuā lo a le i ɔbɛ ziī enɔānu Baibol ale i kiisī doodoo wa?

²⁰ Lu ekiɛ̄nu kɔ pio pya i gaa nyɔɔnɛ nɔ Baibol bee pya Izrɛl ba bee le bu dee Ezekiel. Jɛhova bee kɔ nu a wa kiiloo nɛ Ezekiel kɔ: “E ɛp, olo le wa loo doodoo nɛɛ a uɛ ekpetɔ̄ yɔɔ wereloo bu gbɛnɛ le muɛ̄ sa kpa gamma leere, nyɔnɛbee ba dā nu o kɔ mɛ ba naale edoo ye.” (Ezek 33:32) Dap i agabah ekɔ nɛ ziī nɛɛ kɔ i gaa le ɔbɛ enyɔɔnɛ ye nɔnu. Kerewo, “sɔ̄ a bee lu esere lu ekpuru.” (1 Kɔr 7:29) Taā i pee sɔ̄ wee nyɔɔnɛ nɛɛ a naa gaa kiisī leere nɔnu, i gbī pya a tɔgɛ kɔ a “lu esere wa loo dum a naa tah.”—Buū Doonu pya Nɛɛ lɛɛratam 13:48.

21. E na alu i ekobee ue zua 2020 a, e e na anua lo ama bɔloo a?

²¹ I ekobee ue zua 2020 eyerebah i nɛ kɔ i sere ekɛɛrɛ nyɔɔ kɛ̄ i dap si tam doo kɔ pya nɛɛ a nyɔɔnɛ dumɛ Jizɔs leere doo. A kɔnage ue kumaloo pya ue Jizɔs bee kɔ bie zɔ̄zɔ̄ŋia a bee lu e’ɛrɛ bie nyɔɔ kpokɛ̄ li Galili lo a kɔ: “Kiraa sa doo kɔ dɛ̄dɛɛ̄ edonyɔɔ a lu pya a mɛ nyɔɔnɛ dumɛ, sa wa doo baptism.”—Mat 28:19.