1, 2. Киристе ӕвӕрд кӕми адтӕй, еци дзӕппазӕмӕ ци силгоймӕгтӕ ӕрбацудӕнцӕ, уонӕн изӕд ци загъта, удта син Йесо ӕхуӕдӕг дӕр ци баихӕс кодта?

НӔ ЭРИ 33 анзи 16 нисани сӕумӕцъӕхӕй еузӕрдон силгоймӕгти къуар уӕззау зӕрдӕй цудӕнцӕ, дууӕ бони раздӕр Хецау Йесо Киристей кӕми байвардтонцӕ, еци дзӕппазӕмӕ. Етӕ уордӕмӕ цудӕнцӕ, цӕмӕй Йесой мардмӕ хуӕрздӕф сойнӕй ӕма кӕрдӕгутӕй базилдайуонцӕ. Фал дзӕппазӕ ревӕдӕй ку ’рбаййафтонцӕ, уӕд сӕ десӕн кӕрон нӕбал адтӕй. Изӕд син фегъосун кодта, Киристе ке райгас ӕй, уой, ӕма син загъта: «Галилейӕмӕ уӕ разӕй фӕццӕуй, уоми ӕй фӕууиндзиайтӕ» (Матф. 28:1–7; Лук. 23:56; 24:10).

² Силгоймӕгтӕ дзӕппазӕй ку рацудӕнцӕ, уӕд сӕбӕл Йесо ӕхуӕдӕг рамбалдӕй ӕма син загъта: «Цотӕ ӕма ме ’нсувӕртӕн зӕгъетӕ, цӕмӕй Галилейӕмӕ рацӕуонцӕ. Уоми мӕ фӕууиндзӕнцӕ» (Матф. 28:10). Йесо ку райгас ӕй, уӕд алцӕй разӕй дӕр бал ӕ ахуркӕнуйнӕгти фембӕлдмӕ ӕрӕмбурд кодта. Еци бон син гъӕуама еу ӕхсидзгӕ гъуддаг баихӕс кодтайдӕ.

3, 4. Уотӕ зӕгъӕн цӕмӕн ес, ӕма Матфеййи 28:19, 20 финст фӕдзӕхст айдагъ апостолтӕмӕ нӕ хаудтӕй? (Кӕсӕ хузӕмӕ ӕндаг цъарӕбӕл.)

³ Бакӕсӕ Матфеййи 28:16–20. Еци фембӕлди Йесо ӕ ахуркӕнуйнӕгтӕн баихӕс кодта, фиццаг ӕноси ке гъӕуама исӕнхӕст кодтайуонцӕ, уӕхӕн ӕхсидзгӕ гъуддаг. Ӕма мах дӕр абони еци куст кӕнӕн. Йесо загъта: «Цотӕ ӕма мин ӕгас адӕнихӕттитӕй дӕр цӕттӕ кӕнтӕ ахуркӕнуйнӕгтӕ... ӕма сӕ ахур кӕнтӕ, ӕз уин цидӕриддӕр ниффӕдзахстон, уой ӕнхӕст кӕнун».

 ⁴ Йесой уотӕ фӕндадтӕй, цӕмӕй ӕ фӕдбӕлдзӕугутӕ еугурӕйдӕр игъосун кодтайуонцӕ. Еци гъуддаг айдагъ 11 апостолемӕн нӕ баихӕс кодта. Кӕцӕй ӕй зонӕн? Йесо Галилейи хонхбӕл ахуркӕнуйнӕгтӕ цӕттӕ кӕнун ку баихӕс кодта, уӕд си айдагъ апостолтӕ н’ адтӕнцӕ. Цӕмӕн ес уотӕ зӕгъӕн? Ӕргъуди кӕнӕн, изӕд силгоймӕгтӕн ци загъта, уой. Уоми, дан, ӕй «фӕууиндзиайтӕ». Е уобӕл дзорӕг ӕй, ӕма еци еузӕрдон силгоймӕгтӕ дӕр еци фембӕлди адтӕнцӕ. Удта ма апостол Павел дӕр дзурдта, «еци еу рӕстӕг фӕззиндтӕй фондзсӕдӕ ӕнсувӕрӕй фулдӕрмӕ», зӕгъгӕ (1 Кор. 15:6). Цума е дӕр еци фембӕлди кой кодта?

5. Уотӕ зӕгъӕн цӕмӕн ес, ӕма 1 Коринфӕгтӕмӕ 15:6 ци фондзсӕдӕ ӕнсувӕрей кой цӕуй, етӕ Галилейи ӕрӕмбурд ӕнцӕ?

⁵ Нӕ бон ӕй федарӕй зӕгъун, Павел 1 Коринфӕгтӕмӕ 15:6 ци фондзсӕдӕ ӕнсувӕрей кой кодта, етӕ Галилейи ке ӕрӕмбурд ӕнцӕ. Цӕмӕн ес уотӕ зӕгъӕн? Фиццаг: Йесой ахуркӕнуйнӕгтӕн сӕ фулдӕр галилейӕгтӕ адтӕнцӕ. Удта уойбӕрцӕ адӕн Галилейи хонхбӕл ӕрӕмбурд кӕнун ӕнцондӕр адтӕй. Йерусалими ӕнӕуой хӕдзари нӕ бацудайуонцӕ. Дуккаг: Киристе ку райгас ӕй, уӕд ӕ 11 апостолемӕ хецӕнӕй дӕр Йерусалими хӕдзари фӕззиндтӕй. Айдагъ ӕ апостолтӕн ӕй ку фӕндадтайдӕ ахуркӕнуйнӕгтӕ цӕттӕ кӕнуни гъуддаг баихӕс кӕнун, уӕд син ӕй уоми загътайдӕ ӕма уони, удта силгоймӕгти ӕма иннети дӕр Галилейӕмӕ нӕ цӕун кодтайдӕ (Лук. 24:33, 36).

6. Матфеййи 28:20 финст дзурдтӕй куд зиннуй, ахуркӕнуйнӕгтӕ цӕттӕ кӕнуни гъуддаг махмӕ дӕр ке хауй, ӕма ’й куд ӕнхӕст кӕнӕн?

⁶ Дӕ гъос ӕрдарай ӕртиккаг ӕхсидзгӕ гъуддагмӕ дӕр. Киристей фӕдзӕхст айдагъ фиццаг ӕноси киристӕнттӕмӕ нӕ хаудтӕй. Кӕцӕй ӕй зонӕн? Йесо син фӕстагмӕ уӕхӕн дзурдтӕ загъта: «Цалинмӕ аци цардӕвӕрди кӕрон не ’рцӕуа, уӕдмӕ ӕз алли бон дӕр уодзӕн уӕ хӕццӕ» (Матф. 28:20). Ӕма ӕцӕгӕйдӕр, ахуркӕнуйнӕгтӕ цӕттӕ кӕнуни гъуддаг абони хъӕбӕр берӕ адӕн ӕнхӕст кӕнунцӕ. Расагъӕс кӕнӕ, алли анз дӕр нӕмӕ донаргъуд райсунцӕ еу 300 000 адӕймаги ӕма исунцӕ Йесо Киристей ахуркӕнуйнӕгтӕ!

7. Аци статьяй цӕмӕ ӕркӕсдзиан ӕма цӕмӕн?

⁷ Библи ка ахур кӕнуй, уонӕй беретӕ къахдзӕфтӕ кӕнун райдайунцӕ ӕма донаргъуд райсунцӕ. Фал си кадӕртӕ ба Йесой ахуркӕнуйнӕгтӕ исунмӕ сӕ нифс нӕ фӕххӕссунцӕ. Библи ахур кӕнун уарзунцӕ, фал донаргъуд райсунмӕ ба тагъд нӕ фӕккӕнунцӕ. Ка ’й зонуй, ду дӕр уӕхӕн адӕймаги хӕццӕ ахур кӕнис Библи. Дзурд дӕр ибӕл нӕййес, фӕндуй дӕ еци адӕймагӕн банхус кӕнун, цӕмӕй ци базудта, уомӕ гӕсгӕ цӕра ӕма Киристей ахуркӕнуйнаг исуа. Аци статьяй ӕркӕсдзиан, нӕ бон куд ӕй, Библи ке хӕццӕ ахур кӕнӕн, уонӕн банхус кӕнун, цӕмӕй Йегови бауарзонцӕ ӕма къахдзӕфтӕ кӕнун райдайонцӕ. Аци темӕмӕ ӕркӕсун цӕмӕн гъӕуй? Уомӕн ӕма нӕ еуӕй-еу хатт ниллух кӕнун фӕгъгъӕуй, адӕймаги хӕццӕ ма идарддӕр ахур кӕнгӕ ’й ӕви нӕ, уой.

8. Хатгай зин цӕмӕн фӕууй адӕймагӕн банхус кӕнун, цӕмӕй Йегови бауарза?

⁸ Йегови фӕндуй, цӕмӕй ин адӕн лӕггадӕ кӕнонцӕ, уарзгӕ ’й ке кӕнунцӕ, уой туххӕй. Мадта нӕ нисан ӕй, Библи ке хӕццӕ ахур кӕнӕн, уонӕн банхус кӕнун, цӕмӕй ӕй балӕдӕронцӕ, Йеговӕ си алкӕбӕлдӕр зӕрдиагӕй ке тухсуй ӕма сӕ берӕ ке уарзуй, уой. Фӕндуй нӕ, цӕмӕй ӕй фӕууинонцӕ Йеговӕ «седзӕрти фидӕ ӕма идӕдзти тӕрхонгӕнӕг» ке ӕй (Пс. 68:5). Библи ке хӕццӕ ахур кӕнис, е Хуцауи уарзт ӕхебӕл ку балӕдӕра, уӕд ӕй е дӕр бауарздзӕй. Еуӕй-еуетӕн зин фӕууй Йегови уарзӕгой Фидӕбӕл нимайун, уомӕн ӕма сӕхе фидтӕлтӕй фӕлмӕн загъд  некӕд фегъустонцӕ (2 Тим. 3:1, 3). Кӕд ду дӕр уӕхӕн адӕймаги хӕццӕ ахур кӕнис Библи, уӕд ин Йегови дессаги менеугутӕбӕл фулдӕр дзорӕ. Ба ин ӕнхус кӕнӕ, цӕмӕй ӕй балӕдӕра, нӕ уарзӕгой Хуцауи ин ӕносон цард раттун ке фӕндуй ӕма ин банхус кӕнунмӕ дӕр цӕттӕ ке ӕй. Никкидӕр ма нӕ бон ци ӕй кӕнун?

9, 10. Адӕймаги хӕццӕ Библи ахур кӕнгӕй цӕхуӕн киунугутӕй нӕ бон ӕй пайда кӕнун ӕма еци киунугутӕй пайда кӕнун цӕмӕн гъӕуй?

⁹ Пайда кӕнӕ киунугутӕй «Чему нас учит Библия?» ӕма «Оставайся в любви Бога». Аци киунугутӕ уой туххӕй уагъд ӕрцудӕнцӕ, цӕмӕй Библи ке хӕццӕ ахур кӕнӕн, уонӕн Йегови бауарзунмӕ банхус кӕнӕн. Зӕгъӕн, «Чему нас учит Библия?» киунуги фиццаг сӕри дзуапп ес уӕхӕн фарстатӕбӕл: цума нӕбӕл Хуцау ӕцӕгӕйдӕр тухсуй ӕви ӕнӕхатир ӕй? Адӕни гъезӕмӕрттӕмӕ цӕхуӕн цӕстӕй кӕсуй? Дӕ бон ӕй Йегови ӕмбал исун? «Оставайся в любви Бога» киунугӕй ба ци ес зӕгъӕн? Еци киунуги фӕрци ба адӕймаг балӕдӕруй, Библий уагӕвӕрдтӕй царди пайда кӕнун куд гъӕуй, уой, удта Йеговӕмӕ хӕстӕг кӕнун ӕ бон куд ӕй, уой дӕр. Кӕд аци киунугути  фӕрци Библи еске хӕццӕ ахур кӕнис, уӕддӕр алли ахурмӕ дӕр дӕхе цӕттӕ кӕнӕ, цӕмӕй дӕ бон уа адӕймагӕн хуӕздӕр банхус кӕнун.

¹⁰ Фал Библи ке хӕццӕ ахур кӕнис, уомӕ, киунуги дзурд кӕбӕл нӕ цӕуй, уӕхӕн фарста ку фӕззинна, уӕдта куд кӕнгӕ ’й? Дӕ бон ӕй адӕймаги баразӕнгард кӕнун, цӕмӕй ӕхуӕдӕг бакӕса, ӕ фарстабӕл дзуапп кӕми ес, еци публикаци ӕма Библий ахур идарддӕр рауадзун.

11. Адӕймаги хӕццӕ Библи ахур кӕнгӕй ковун кӕд гъӕуама райдайӕн ӕма ин нӕ бон куд ӕй балӕдӕрун кӕнун, е ӕхсидзгӕ цӕмӕн ӕй, уой?

¹¹ Библий ахур кувдӕй райдайисӕ. Хуарз уайдӕ Библий ахур кувдӕй райдайун ӕма кувдӕй фӕуун. Уотӕ кӕнун куд раздӕр райдайай, уотӕ хуӕздӕр. Уотемӕй ахуркӕнуйнаг уиндзӕй, Хуцауи Дзурд ӕрмӕстдӕр ӕ сугъдӕг хъаури фӕрци нӕ бон ке ӕй балӕдӕрун, уой. Еуӕй-еу игъосунгӕнгутӕ Библи ке хӕццӕ фӕййахур кӕнунцӕ, уонӕн, ковун цӕмӕн гъӕуй, уой балӕдӕрун кӕнумӕ бакӕсунцӕ Иакови 1:5 финст дзурдтӕ: «Кӕд ескӕмӕ зунд фагӕ нӕййес, уӕд корӕд Хуцауӕй». Уой фӕсте ба адӕймаги бафӕрсунцӕ: «Нӕ бон куд ӕй Хуцауӕй зунд корун?» Уотемӕй ӕй адӕймаг ӕхуӕдӕг фӕззӕгъуй Хуцаумӕ ковун ке гъӕуй.

12. Дӕ бон куд ӕй Псаломи 139:2–4 финст дзурдти фӕрци, адӕймагӕн банхус кӕнун, цӕмӕй Йеговӕн ӕ зӕрди ци ес, уой дзора?

¹² Адӕймагӕн амонӕ, ковун куд гъӕуй, уой. Ба ин лӕдӕрун кӕнӕ, Йеговӕ ин ӕ зӕрдиаг кувдтитӕмӕ ке ӕнгъӕлмӕ кӕсуй. Зӕгъӕ ин, ӕ бон алцидӕр ке ӕй Йеговӕн дзорун, ӕндӕр ескӕмӕн ке нӕ радзурдтайдӕ, уӕхӕн хабӕрттӕ дӕр, уомӕн ӕма Йеговӕ ӕной дӕр мах туххӕй алцидӕр зонуй. (Бакӕсӕ Псалом 139:2–4.) Нӕ бон ма ӕй адӕймаги разӕнгард кӕнун, цӕмӕй Хуцауӕй ӕнхус кора, лӕгъуз сагъӕсти хӕццӕ тох кӕнунмӕ ӕма лӕгъуз миутӕ ниууадзунмӕ. Зӕгъӕн, цӕйбӕрцӕдӕр рӕстӕг Библи ахур кӕнуй, фал ма ӕ зӕрдӕмӕ цӕуй мӕнгӕ дини хӕццӕ баст бӕрӕгбӕнттӕй кӕцидӕр. Лӕдӕруй ӕй, еци бӕрӕгбон бӕрӕг кӕнун раст ке нӕй, уой, фал уӕддӕр ӕ зӕрдӕмӕ цӕуй. Ба ин лӕдӕрун кӕнӕ, ӕ бон ке ӕй е ’гас сагъӕстӕ дӕр Йеговӕн радзорун ӕма си ӕнхус ракорун, цӕмӕй исахур уа Йеговӕ ци уарзуй, ӕрмӕстдӕр уой уарзун? (Пс. 97:10).

13. а) Библи ке хӕццӕ ахур кӕнӕн, уони ӕбурдтӕмӕ цӕунмӕ цӕмӕн гъӕуама разӕнгард кӕнӕн? б) Нӕ бон ци ӕй кӕнун, цӕмӕй адӕймаг ӕмбурдмӕ ку ’рбацӕуа уӕд, минкъийдӕр ӕфсӕрми кӕна?

¹³ Библи ке хӕццӕ ахур кӕнис, уой ӕмбурдтӕмӕ цӕун разӕнгард кӕнӕ ӕма куд тагъддӕр, уотӕ хуӕздӕр. Адӕймаг ӕмбурди ци фегъоса кенӕ ци фӕууина, е ӕй, гӕнӕн ес, ӕма къахдзӕфтӕ кӕнунмӕ баразӕнгард кӕна. Ба ин ӕвдесӕ видеоролик «Йегови Ӕвдесӕнти зали ци фӕууй?», уой фӕсте ба ин зӕгъӕ, гъӕйдӕ еумӕ фӕццӕуӕн, зӕгъгӕ. Кӕд машинӕбӕл дӕ, уӕд ӕй дӕ хӕццӕ фӕлласӕ. Хуарз уайдӕ Библий ахурмӕ аллихузи игъосунгӕнгути хӕццӕ цӕун. Уой фӕрци адӕймагӕн ӕмбурди зонгитӕ фӕззиндзӕй ӕма ку ’рбацӕуа, уӕд уотӕ не ’фсӕрми кӕндзӕй.

14. Адӕймаги къахдзӕфтӕ кӕнунмӕ ци баразӕнгард кӕнуй?

¹⁴ Нӕ нисан ӕй адӕймагӕн банхус кӕнун, цӕмӕй Хуцауи надбӕл къахдзӕфтӕ кӕнун райдайа (Еф. 4:13). Еске Библи ахур кӕнунбӕл ку исарази уй, уӕд ӕй фиццагидӕр фӕффӕндуй базонун, еци ахур ин ци пайда ӕрхӕсдзӕй, уой. Фал Йегови уарзун ку райдайуй, уӕдта фулдӕр фӕссагъӕс кӕнуй, иннетӕн ӕ бон банхус кӕнун куд ӕй, уобӕл, сауӕнгӕ ма ӕмбурди ка ӕй, уонӕн дӕр (Матф. 22:37–39). Уавӕртӕ ку амононцӕ, уӕд ма бафсӕрми кӕнӕ, Паддзахади гъуддаги ӕнхус кӕнунмӕ нин цӕхуӕн фадуат ес, уой зӕгъунмӕ, гъома нисайнӕгти туххӕй.

15. Библи ке хӕццӕ ахур кӕнӕн, уомӕн нӕ бон куд ӕй банхус кӕнун, цӕмӕй зин уавӕрти раст архайа?

 ¹⁵ Адӕймагӕн ӕнхус кӕнӕ, цӕмӕй зин уавӕрти раст архайа. Зӕгъӕн, Библи ке хӕццӕ ахур кӕнис, е ӕнаргъуд игъосунгӕнӕг иссӕй ӕма дин дзоруй ӕмбурди кӕбӕлдӕр ӕ зӕрдӕ ке рахудтӕй. Уӕхӕн уавӕри, раст ка ӕй ӕма ка нӕй, уобӕл дзоруни бӕсти адӕймагӕн Библий фӕрци балӕдӕрун кӕнӕ, куд ин архайгӕ ’й, уой. Кӕд ӕ бон ӕй, уӕд ӕнсувӕрӕн ниххатир кӕндзӕй ӕма ин ӕ рӕдуд байронх уодзӕй. Кӕд нӕ, уӕдта ӕ бон ӕй еци ӕнсувӕри хӕццӕ фӕлмӕнӕй ӕма уӕзданӕй радзорун, цӕмӕй бафедауонцӕ. (Рабарӕ Матфеййи 18:15.) Адӕймагӕн банхус кӕнӕ ци зӕгъдзӕй, уой бацӕттӕ кӕнунмӕ. Бавдесӕ ин, ӕ бон куд ӕй испайда кӕнун приложенийӕй JW Library^®, публикацийӕй «Путеводитель по публикациям Свидетелей Иеговы» ӕма сайтӕй jw.org^®. Уой фӕрци базондзӕй, ӕ уавӕри куд хуӕздӕр уодзӕй бакӕнун, уой. Цалинмӕ донаргъуд нӕ райста, уӕдмӕ ӕмбурди хуӕртӕ ӕма ӕнсувӕрти хӕццӕ федаунбӕл ку исахур уа, уӕд донаргъуди фӕсте дӕр сӕ хӕццӕ федаудзӕй.

16. Библий ахурмӕ ӕмбурди хуӕртӕ ӕма ӕнсувӕрти хонун хуарз цӕмӕн ӕй?

¹⁶ Ӕмбурди хуӕртӕ ӕма ӕнсувӕрти Библий ахурмӕ хонӕ, удта районон цӕстӕдӕрӕги дӕр. Цӕмӕн? Библи ке хӕццӕ ахур кӕнис, уомӕн цӕхуӕндӕр гъуддӕгти иннӕ хуӕртӕ ӕма ӕнсувӕртӕ куд банхус кӕндзӕнцӕ, уотӕ ду нӕ банхус кӕндзӕнӕ. Зӕгъӕн, ахуркӕнуйнаг архайуй ӕ тамаку ниууадзунбӕл, фал еу хаттӕй иннӕ хатмӕ нӕ ниббухсуй ӕма исдумуй. Дӕ бон имӕ ӕй, раздӕр тамаку ка думдта ӕма ’й зинтӕй ка ниууагъта, уӕхӕн Ӕвдесӕни хӕццӕ ӕрбацӕун. Гӕнӕн ес, ӕма ин ратта, ка ин банхус кӕндзӕй, уӕхӕн унаффитӕ. Кӕд фӕлтӕрдгун ӕнсувӕри хӕццӕ Библий ахур уадзунмӕ ӕфсӕрми кӕнис, уӕд ин зӕгъӕ, цӕмӕй ӕй ӕхуӕдӕг рауадза. Библий ахурмӕ иннӕ хуӕртӕ ӕма ӕнсувӕрти дӕр дӕ хӕццӕ ку хонай, уӕд е адӕймагӕн устур пайда ӕрхӕсдзӕй. Дӕ сӕйраг нисан ӕй ахуркӕнуйнагӕн банхус кӕнун, цӕмӕй Хуцауи гъуддаги размӕ цӕуа.

17, 18. Библи ке хӕццӕ ахур кӕнис, еци адӕймаг дин уадзгӕ ’й ӕви нӕ, уой ниллух кӕнуни разӕй бал дӕ цӕбӕл расагъӕс кӕнун гъӕуй?

¹⁷ Кӕд, Библи ке хӕццӕ ахур кӕнис, е ӕ царди неци ӕййивддзийнӕдтӕ кӕнуй, уӕд расагъӕс кӕнӕ, гъӕуй ма ӕ хӕццӕ идарддӕр ахур кӕнун ӕви нӕ. Фал унаффӕ рахӕссуни разӕй бал расагъӕс кӕнӕ, адӕймаги бон цӕйбӕрцӕ ӕй, уобӕл. Кедӕр фулдӕр рӕстӕг фӕгъгъӕуй, цӕмӕй къахдзӕфтӕ кӕнун райдайа. Мадта дӕхе бафӕрсӕ: «Адӕймаг, ӕ уавӕртӕ куд амонунцӕ, уомӕ гӕсгӕ размӕ къахдзӕфтӕ кӕнуй? Ци базонуй, уомӕй ӕ царди пайда кӕнуй?» (Матф. 28:20). Ка ’й зонуй, Киристей фӕдбӕлдзӕуӕг исунмӕ ма ’й берӕ гъӕуй, фал уӕддӕр цидӕртӕ архайуй.

¹⁸ Фал цӕйбӕрцӕдӕр рӕстӕг Библи ке хӕццӕ ахур кӕнис, еци адӕймаг Библий ахурмӕ  цийфӕнди цӕстӕй ку кӕса, уӕдта куд кӕнгӕ ’й? Зӕгъӕн, адӕймаги хӕццӕ «Чему нас учит Библия?» киунугӕ рацудтӕ, ка ’й зонуй ма «Оставайся в любви Бога» киунугӕ дӕр, фал ӕмбурдмӕ ба еунӕг хатт дӕр не ’рбацуӕй, сауӕнгӕ ма Имисӕн изӕрмӕ дӕр. Уомӕй уӕлдай ма зӕгъӕн ес, ӕма нецӕй туххӕй Библий ахур ӕндӕр хаттмӕ рахӕссуй. Уӕхӕн уавӕри хуӕздӕр уодзӕй адӕймаги хӕццӕ фӕлмӕнӕй радзубанди кӕнун *.

19. Дӕ гъудимӕ гӕсгӕ Библий ахурмӕ цийфӕнди цӕстӕй ка кӕсуй, уӕхӕн адӕймаги хӕццӕ дӕ бон куд ӕй радзорун, фал цӕбӕл гъӕуй расагъӕс кӕнун?

¹⁹ Дӕ бон ӕй дзубанди уотӕ райдайун: «Куд дӕмӕ кӕсуй, Йегови Ӕвдесӕн исунмӕ дӕ ци хъор кӕнуй?» Гӕнӕн ес, ӕма дин адӕймаг зӕгъа: «Библи ахур кӕнун мӕ зӕрдӕмӕ цӕуй, фал Йегови Ӕвдесӕн ба некӕд исуодзӕн». Кӕд ӕ хӕццӕ рагӕй ахур кӕнис ӕма ма нур дӕр уотӕ сагъӕс кӕнуй, уӕд ма идарддӕр ахур кӕнунӕй ести пайда уодзӕй? Фал дин иннердиги ба, ӕвӕдзи, фиццаг хатт радзурдта нурмӕти ’й ци хъор кодта, уой. Зӕгъӕн, хӕдзарӕй-хӕдзарӕмӕ игъосун кӕнун ӕй ке гъӕудзӕй, уомӕй ке тӕрсуй, е. Ӕма нур, гъуддаг цӕй медӕги ӕй, уой кӕми базудтай, уоми дин, ка ’й зонуй, ӕнцондӕр уодзӕй адӕймагӕн банхус кӕнун.

20. Гъуддӕгти 13:48 финст дзурдтӕ нин куд банхус кӕндзӕнцӕ балӕдӕрун, адӕймаги хӕццӕ идарддӕр Библи ахур кӕнгӕ ’й ӕви нӕ, уой?

²⁰ Гъигагӕн, еуӕй-еуетӕ Езекили рӕстӕг ка цардӕй, еци израилӕгти хузӕн разиннунцӕ. Уони кой кӕнгӕй Йеговӕ Езекилӕн загъта: «Ду син ӕдӕ, уарзондзийнади зартӕ ка кӕнуй, рӕсугъд гъӕлӕс кӕбӕл ес ӕма гъесинфӕндурбӕл хуарз ка цӕгъдуй, уӕхӕн адӕймаги хузӕн. Етӕ дин дӕ дзурдтӕ игъосдзӕнцӕ, фал дин сӕ ӕнхӕст ба еу дӕр нӕ кӕндзӕй» (Йез. 33:32). Ка ’й зонуй нин зин уодзӕй адӕймагӕн зӕгъун ке имӕ нӕбал цӕудзиан. Фал «рӕстӕг берӕ нӕбал байзадӕй» (1 Кор. 7:29). Ӕма къахдзӕфтӕ кӕнун ке нӕ фӕндуй, уӕхӕн адӕймагбӕл нӕ рӕстӕг исафуни бӕсти агордзиан, «ӕносон царди надбӕл цӕун ке фӕндуй», уӕхӕн адӕни. (Бакӕсӕ Гъуддӕгтӕ 13:48.)

21. 2020 анзи стих цӕхуӕн ӕй ӕма нӕ цӕмӕ разӕнгард кӕнуй?

²¹ 2020 анзи стих нӕ разӕнгард кӕндзӕй ахуркӕнуйнӕгтӕ цӕттӕ кӕнуни гъуддаги ӕнтӕстгундӕр кӕнунмӕ. Йесо ӕ фӕдбӕлдзӕугути хӕццӕ Галилейи ку фембалдӕй, уӕд загъта: «Цотӕ ӕма... цӕттӕ кӕнтӕ ахуркӕнуйнӕгтӕ. Дӕттетӕ син донаргъуд» (Матф. 28:19).