1-2. Kiko un angel a bisa e hende muhénan na Hesus su graf, i kiko Hesus mes a bisa nan pa hasi?

MAINTA a habri; tabata 16 di nisan di aña 33. Ku kurason kibrá, algun hende muhé deboto na Dios a kana bai na e graf di Hesukristu. Nan kier a hunta yerba di holó dushi i zeta perfumá riba e kurpa di nan Señor, ya ku e tin mas ku 36 ora den e graf. Pero ora nan a yega nan a haña un sorpresa: e graf tabata bashí! Un angel a bisa nan ku Hesus a ser lantá for di morto, i a agregá: “E ta bayendo Galilea boso dilanti; einan boso lo mir’é.”—Mat. 28:1-7; Luk. 23:56; 24:10.

² Ora e hende muhénan a bai for di e graf, Hesus mes a aserka nan i a bisa nan pa hasi lo siguiente: “Bai konta mi rumannan i bisa nan ku nan mester bai Galilea, i aya nan lo mira mi.” (Mat. 28:10) E promé kos ku Hesus a hasi despues di su resurekshon ta di organisá un reunion ku su disipelnan. Na e reunion ei, el a duna nan algun instrukshon masha importante.

3-4. Dikon nos por bisa ku e mandamentu na Mateo 28:19 i 20 no tabata pa e apòstelnan so? (Wak e plachi riba portada.)

³ Lesa Mateo 28:16-20. Na e reunion ku Hesus a organisá, el a splika su disipelnan kiko ta e trabou importante ku nan lo a kumpli kuné durante promé siglo. Esei ta e mes trabou ku nos ta hasi awe. El a bisa: “Bai, i hasi hende  di tur nashon mi disipel, . . . siña nan kumpli ku tur loke mi a manda boso.”

⁴ Hesus ke pa tur su siguidónan prediká. E mandamentu ei no tabata pa su 11 fiel apòstelnan so. Kon nos por ta sigur di esei? Wèl, ora el a duna e mandamentu pa hasi hende disipel, no ta e apòstelnan so tabata riba e seru na Galilea. Kòrda ku e angel a bisa e hende muhénan: “Boso lo mir’é [na Galilea].” Pues, hende muhé fiel tambe lo tabata na e reunion ei. Ademas, apòstel Pablo a bisa ku Hesus “a aparesé na mas ku 500 ruman pareu.” (1 Kor. 15:6) Pero, na unda?

5. Kiko nos ta siña for di 1 Korintionan 15:6?

⁵ Nos tin bon motibu pa kere ku Pablo tabata pensa riba e reunion na Galilea deskribí na Mateo kapítulo 28. Kiko ta e motibunan? Di promé, mayoria di Hesus su disipelnan tabata di Galilea. Pues, un seru na Galilea, i no un kas na Herúsalèm, lo tabata e mihó lugá pa reuní ku un grupo asina grandi di hende. Di dos, despues ku Hesus a resusitá, ya el a topa ku su 11 apòstelnan den un kas na Herúsalèm. Si ta su apòstelnan so e kier a instruí pa prediká i pa hasi hende disipel, e por a hasi esei na Herúsalèm en bes di pidi nan, e hende muhénan i e otro disipelnan pa reuní kuné na Galilea.—Luk. 24:33, 36.

6. Kon Mateo 28:20 ta mustra ku e mandamentu di hasi hende disipel ta konta pa nos tambe, i kon nos ta sigui e mandamentu ei awe?

⁶ Un di tres motibu importante ta ku Hesus no a duna e mandamentu di hasi hende disipel solamente na e kristiannan di promé siglo. Kon nos sa esei? E último kos ku Hesus a bisa su disipelnan tabata esaki: “Mi ta ku boso tur e dianan, te na konklushon di e era akí.” (Mat. 28:20) I manera Hesus a bisa, awe hopi di nos ta partisipá den e trabou di hasi hende disipel. Tur aña, kasi 300.000 hende ta batisá komo Testigu di Yehova i ta bira disipel di Hesukristu!

7. Kiko nos lo analisá den e artíkulo akí, i dikon?

⁷ Hopi studiante di Beibel ta progresá i yega na boutismo. Pero, tin algun ku ta vasilá pa bira disipel. Nan ta gusta nan estudio, pero nan no ta progresá pa yega na boutismo. Si bo ta dirigí un estudio di Beibel, nos tin sigur ku bo ke yuda bo studiante apliká loke e ta siña i bira un disipel di Kristu. E artíkulo akí lo analisá kon nos por purba di yuda e studiantenan stima Yehova i krese spiritualmente. Dikon nos mester papia tokante esei? Pasobra por sosodé ku na dado momento nos lo mester disidí si nos lo sigui ku un estudio òf nò.

8. Dikon kisas ta difísil pa purba di yuda un studiante stima Yehova?

⁸ Yehova ke pa hende sirbié pasobra nan ta stim’é. Pues, nos meta ta pa yuda nos studiantenan komprondé ku Yehova ta masha interesá den kada un di nan i ku e ta stima nan masha hopi mes. Nos ke yuda nan komprondé ku Yehova “ta sostené huérfano i biuda.” (Sal. 146:9) Segun ku e studiantenan ta realisá kuantu Yehova ta stima nan, kisas nan tambe lo kuminsá stim’é. Pa algun studiante, ta difísil pa nan mira Yehova komo un Tata ku ta stima nan pasobra nan mes tata no a stima nan. (2 Tim. 3:1, 3) Segun ku bo ta studia ku nan, hala nan atenshon na Yehova su bunita kualidatnan. Yuda nan  komprondé ku nos Dios amoroso ke pa nan gana bida eterno, i e ta kla pa yuda nan alkansá e meta ei. Kiko mas nos por hasi?

9-10. Ki publikashon nos mester usa pa dirigí estudio di Beibel, i dikon?

⁹ Usa e bukinan “Kiko Beibel Ta Siña Realmente?” i “Keda den e Amor di Dios.” E publikashonnan ei a ser skirbí spesialmente pa purba di yuda nos studiantenan stima Yehova. Por ehèmpel, kapítulo 1 di e buki Beibel Ta Siña ta kontestá e siguiente preguntanan: Akaso Dios no tin kunes i ta sin sintimentu?, Kiko Dios ta pensa di e inhustisianan ku nos ta konfrontá? i Abo por tin un amistat será ku Yehova? E buki Amor di Dios lo yuda e studiante komprondé ku aplikando prinsipio di Beibel lo yud’é mehorá su bida i lo hal’é mas serka di Yehova. Asta si bo a yega di studia e publikashonnan ei ku otro hende kaba, bo mester prepará bon pa kada estudio i tene nesesidat di e studiante na mente.

 ¹⁰ Pero, suponé ku e studiante ke sa mas tokante un tópiko ku ta ser spliká den un publikashon ku no ta Beibel Ta Siña ni Amor di Dios. Den e kaso ei, bo por anim’é pa e mes lesa e publikashon ei i sigui ku e estudio den un di e bukinan ya menshoná.

11. Na ki momento nos mester kuminsá un seshon di estudio ku orashon, i kon nos por bini ku e tema ei padilanti?

¹¹ Kuminsá kada seshon di estudio ku orashon. Generalmente, ta bon pa mas pronto ku ta posibel kuminsá e seshon di estudio ku orashon, kisas denter di e promé simannan ku por papia di un estudio regular. Nos mester yuda e studiante realisá ku nos por komprondé e Palabra di Dios solamente ku yudansa di spiritu santu. Algun publikadó ta bini ku e tema di hasi orashon padilanti usando Santiago 1:5, ku ta bisa: “Si un di boso falta sabiduria, lag’é sigui pidi Dios.” Despues, nan ta puntra e studiante: “Kon nos por pidi Dios pa sabiduria?” Probablemente, e studiante mes lo bisa ku nos mester resa na Dios.

12. Kon nos por usa Salmo 139:2-4 pa yuda un studiante ekspresá su sintimentunan na Yehova den orashon?

¹² Siña bo studiante hasi orashon. Sigur’é ku Yehova ke skucha su orashonnan sinsero. Yud’é komprondé ku nos por deshogá nos mes na Yehova i kont’é kon nos ta sinti nos i papia kuné di kos ku normalmente nos lo no kompartí ku niun hende. Al fin i al kabo, Yehova sa kaba kiko ta nos pensamentunan di mas privá. (Lesa Salmo 139:2-4.) Nos por animá nos studiante tambe pa pidi Yehova yud’é kambia pensamentu robes i stòp ku mal hábito. Por ehèmpel, suponé ku un hende ku ya ta studia pa algun tempu kaba gusta selebrá Pasku. E sa ku esei ta robes, pasobra e fiesta ei tin orígen pagano. Anim’é pa e konta Yehova presis kon e ta sinti i roga Yehova pa yud’é stima solamente loke Dios ta stima.—Sal. 97:10.

13. (a) Dikon nos mester invitá nos studiante pa asistí na reunion mas pronto ku ta posibel? (b) Kiko nos por hasi pa e studiante sintié na kas na Salòn di Reino?

¹³ Invitá bo studiante pa asistí na reunion mas pronto ku ta posibel. Dikon? Pasobra loke e skucha i mira na reunion por motiv’é i yud’é krese spiritualmente. Pues, mustr’é e vidio Kiko Ta Sosodé na un Salòn di Reino? i invit’é p’e bai e reunionnan. Si ta posibel, ofresé pa pasa busk’é. Ta un bon idea pa bai ku diferente ruman na e estudio. Asina ei, e studiante lo konosé otro ruman di e kongregashon, i lo e sintié mas na kas ora e bai reunion.

14. Kiko amor pa Yehova lo motivá un studiante pa hasi?

¹⁴ Nos meta ta pa yuda nos studiante krese spiritualmente. (Efe. 4:13) Ora un hende kuminsá studia Beibel ku nos, kisas e ta mas interesá den kon e estudio lo benefisi’é. Pero segun ku su amor pa Yehova ta krese, kisas lo e kuminsá pensa kon e por yuda otro hende, inkluso e rumannan den kongregashon. (Mat. 22:37-39) Ora ta apropiá, no keda sin menshoná e privilegio ku nos tin di apoyá e obra mundial di e Reino finansieramente.

15. Kon nos por yuda un studiante sa kiko pa hasi ora di trata ku problema?

¹⁵ Siña bo studiante kon pa trata ku problema. Por ehèmpel, suponé ku bo  studiante, ku ta un publikadó no batisá, bisa bo ku un ruman den kongregashon a ofend’é. Kiko lo bo hasi? En bes di tuma parti pa kualke un di nan, analisá ku bo studiante loke Beibel ta bisa. Yud’é komprondé ku e tin dos opshon: pordoná e ruman òf, si e no por pasa por alto di e asuntu, papia ku e ruman na un manera bondadoso ku e meta pa hasi pas. (Kompará ku Mateo 18:15.) Yud’é prepará loke e ta bai bisa. Siñ’é kon pa usa JW Library^® app, Guia pa Buska Informashon den Publikashonnan di Testigunan di Yehova i jw.org^® pa mira kon pa resolvé e problema. Mas prepará e ta pa trata ku e situashonnan ei promé ku e batisá, mas mihó lo e bai ku e rumannan despues ku e batisá.

16. Dikon ta bon pa otro ruman kompañá bo na e estudio?

¹⁶ Invitá otro ruman di kongregashon—i e superintendente di sirkuito ora e bishitá e kongregashon—pa kompañá bo na e estudio. Dikon? Aparte di e motibunan ku nos a menshoná den paragraf 13, kisas otro publikadó por yuda bo studiante den sierto área mihó ku bo. Suponé ku bo studiante a purba vários biaha pa pone sigaria un banda, pero e no a logra. Den e kaso ei, bo por invitá un ruman ku a vense e bisio ei, kisas despues di vários rekaida. Kisas e por duna e studiante algun bon konseho. Si bo no ta sinti bo kómodo pa dirigí e estudio den presensia di un ruman ku mas eksperensia, pidié dirigí e estudio. Sea kual sea e kaso, no laga bo studiante pèrdè e oportunidat di siña for di e eksperensianan di otro ruman. Kòrda, nos meta ta pa yuda e studiante krese spiritualmente.

17-18. Kiko bo tin ku tene kuenta kuné promé ku bo disidí si bo tin ku para un estudio?

¹⁷ Si bo studiante no ta progresá, lo bo tin ku puntra bo mes si bo mester para e estudio. Algu ku bo tin ku tene kuenta kuné ta e kapasidat i abilidat di e studiante. Tin hende ta tuma mas tempu pa progresá kompará ku otro. P’esei, puntra bo mes: ‘Mi studiante ta hasi progreso rasonabel segun su situashon?’ ‘El a kuminsá “kumpli ku,” òf apliká, loke e ta siñando?’ (Mat. 28:20) Aunke un studiante kisas ta progresá pokopoko, bo mester por wak ku e ta hasi kambio den su bida.

¹⁸ Pero, kiko si e studiante no ta demostrá ku e ta balorá e estudio? Imaginá esaki: Bo studiante a kaba e buki Beibel Ta Siña i kisas te asta a kuminsá e buki Amor di Dios, pero nunka el a asistí na un reunion—ni sikiera Memorial! Ademas, e tin kustumber di kanselá e estudio sin motibu bálido. Den e kaso ei, lo  ta bon pa bo tin un kòmbersashon franko kuné. *

19. Kiko bo por bisa un hende ku ta parse di no ta balorá su estudio di Beibel, i kon su kontesta por yuda bo?

¹⁹ Bo por kuminsá e kòmbersashon puntrando e: ‘Kiko bo ta kere ta e kos ku mas ta stroba bo di bira un Testigu di Yehova?’ Kisas e por kontestá: ‘Mi gusta e estudio, pero nunka lo mi bira un Testigu di Yehova!’ Si ta asina e ta pensa despues ku el a studia pa algun tempu, lo tin sentido pa sigui ku e estudio? Di otro banda, kisas pa promé biaha bo studiante lo bisa bo kiko ta strob’é. Por ehèmpel, kisas e ta pensa ku e no por prediká di kas pa kas. Awor ku bo sa kon e ta sinti, lo ta mas fásil pa bo yud’é.

20. Kon Echonan 13:48 por yuda nos sa si nos tin ku sigui dirigí un estudio òf nò?

²⁰ Ta tristu pa bisa ku algun studiante ta manera e israelitanan den tempu di Ezekiel. Tuma nota kiko Yehova a bisa Ezekiel tokante nan: “Mira, pa nan bo ta manera un kantika sensual, kantá dor di un hende ku tin bunita bos i ku sa di toka instrumènt bon; pasobra nan ta tende bo palabranan, ma no ta pone nan na práktika.” (Eze. 33:32) Kisas no ta fásil pa bisa un hende ku bo ta para e estudio. Pero, “no a sobra muchu tempu mas.” (1 Kor. 7:29) P’esei, na lugá di pèrdè tempu ku studiante ku no ta progresá, lo ta mihó pa nos buska hende ku ta demostrá di ta “dispuesto pa aseptá e bèrdat ku ta hiba na bida eterno.”—Lesa Echonan 13:48.

21. Kiko nos teksto di aña pa 2020 ta, i dikon e ta na su lugá?

²¹ Durante 2020, e teksto di aña lo yuda nos enfoká riba kon pa mehorá nos trabou di hasi hende disipel. E tin e palabranan ku Hesus a papia durante e reunion importante riba un seru na Galilea: “Bai, i hasi hende . . . disipel, i batisá nan.”—Mat. 28:19.