1-2. Ngera ngdilu ngike el anghel el mo er tirke el redil el mlei er a debellel a Jesus? E ngera el ulekrael a luluuchais er tir a Jesus?

NG TUTUNGA er a Nisan 16, er a 33 C.E. E a rebebil el redil el kmal mekngit a rengrir a ngar omerollir el mora debull el cheklechel a Rubak el Jesus Kristus a ngar a chelsel el mocha kuk betok er a 36 el sikang. Me sera lebo er tia el basio, e te millatk el mo melecha ochod me a chilt er a bedengel a Jesus, e bai kilebetiekl er a lesa tia el debull el di bechachau! E a ta el anghel a dilu er tirka el redil el kmo a Jesus a mla mekiis er a kodall, e dirrek el dilu el kmo: “Ng oeak uchei er kemiu el mor a Galilea me kom mo mesa er isei!”​—Mt. 28:1-7; Lk. 23:56; 24:10.

² Me a uriul er a lorael tirka el redil, e a Jesus a mlo duum er tir e dirrek el milsterir a ulekrael el dilu el kmo: “Morael el mo subedeterir a re tar ngak me le bor a Galilea, e te mo mesekak er isei.” (Mt. 28:10) A Jesus a locha mla er ngii a kmal meklou a ultutelel el tekoi el mle kirel louchais er a redisaiplo er ngii, e le tiaikid a mle kot el miting er ngii lobengterir er sera lebekiis er a kodall!

3-4. Ngera uchul me ngsebeched el melekoi el kmo a ulekrael el medung er a Mateus 28:19, 20, a diak di lebo er a rechapostol e lemerekong? (Momes er a siasing er a medal tia el babier.)

³ Monguiu er a Mateus 28:16-20. Ngar sel miting el lekiltmeklii a Jesus, e ngmilsaod el kirel a klou a ultutelel lureor el redisaiplo er ngii a kirir el mo meruul er ngii er seikid el taem, e tiang a osisiu el lureor el doruul er ngii er chelechang. A Jesus a dilu el kmo: “Morael el mor a bek el bedengir a re chad er ker me ker e moruul er tir el mo obengkek, . . . e molisechakl er tir me bo loltirakl a ikel rokui el bla kdu er kemiu.”

⁴ A Jesus a mle soal a rokui el oltirakl er ngii a bo lomerk er a klumech. Ngdimlak di longelechel er tirke el 11 el apostol er ngii e lemerekong. Kede mekerang e mo medengelii tiang? Sel taem el  Jesus a milengelechel er a rechapostol er ngii, e ngdimlak di el tir el tang a mla er isei. Kede mekerang e mo medengei? Ka molatk aike el tekingel a anghel el mo er tirke el redil el kmo: “Kom  mo mesa er [a Galilea].” Me tirke el blak a rengrir el redil a ulterekokl el mla er sel basio er seikid el taem. Engdi ngdiak di el tir el tang e merekong. A apostol Paulus a milsaod el kmo a Jesus a mlo “duum er a re betok er a 500 er a rubengkel.” (1 Ko. 15:6) Tirka te mla er ker?

5. Ngera uchul me kede oumerang el kmo a 1 Korinth 15:6, a mesaod el kirel sel miting er a Galilea el medung er a 28 el bliongel er a Mateus?

⁵ Ngar ngii a ungil luchul me kede oumerang el kmo ngar a bades er a 1 Korinth 15:6, e a Paulus a milsaod el kirel a tekoi el medung er a 28 el bliongel er a Mateus. E ngera uchul? A kot, e a ruumesingd el disaiplo er a Jesus a mle chad er a Galilea. Me ngmle beot er a Jesus el rullii a miting er ngii lobengterir a rebetok el ngar a rois er a Galilea er a bai loruul er ngii er a blil a ta el chad el ngar a Jerusalem. E a ongerung, ngika el milekiis er a kodall el Jesus a milengedecheduch er tirke el 11 el apostol er ngii er a blai el ngar a Jerusalem. Me a lsekum ngmle soal el di mengelechel er a rechapostol er ngii me bo lomerk er a klumech e loruul er a remo disaiplo, e ngmle sebechel rullii tia el tekoi er a lengar a Jerusalem er a bai lomekedong er tir me tirke el redil me a relmuut el bebil el mo omes er ngii er a Galilea.​—Lk. 24:33, 36.

6. Ngoeak a ngera el rolel, e a Mateus 28:20 a ochotii el kmo a omengelechel el mo meruul er a remo disaiplo a dirk oureor er chelechang? E mekera rechad er chelechang e oltirakl er tia el tekoi?

⁶ Ka molatk er a klou a ultutelel el uchul. A omengelechel er a Jesus el mo meruul er a remo disaiplo a dimlak di lebora Rekristiano el kiliei er sel taem. Kede mekera e mo medengei? Ngar a ulebengelel a tekingel a Jesus el mora rultirakl er ngii e ngdilu el kmo: “E ngak a mo obengkemiu el di blechoel el mo lmuut er a ulebongel er a beluulchad.” (Mt. 28:20) Me ngokiu a tekingel, e chelecha el taem e a rebetok el chad a meruul er a remo disaiplo. Ka momtab er tiang! Te bekord el 300,000 el chad a mo metecholb er a bek el rak el mo Sioning er a Jehovah, e dirrek el mo disaiplo er a Jesus Kristus!

7. Ngera kede mo mesaod er chelechang, e ngera uchul?

⁷ A rebetok el mesuub a Biblia a olengeriakl el mo metecholb. Me nguaisei, engdi a rebebil el mesuub lobengked a kora bekikl el mo disaiplo er a Jesus. Ngungil a rengrir el mesuub, engdi ngdiak lolengeriakl el mo metecholb. Me a lsekum ke mesuub lobengkel a chad, e ngulterekokl a rengmam el kmo ngsoam el ngosuir el mo oltaut aike el losuub er a klengar er ngii e dirrek el mo ta er a disaiplo er a Kristus. Tia el suobel a mo mesaod a bebil rolel e kede ocheuir a rengul a chad el dosuub lobengkel, e ngosuir el mo omekeroul er a klereng er ngii. Ngera uchul me ngkired el mesaod er tia el tekoi? E le ngmo er ngii a taem, e ngmo kired el melilt el kmo kede melemolem el mesuub lobengterir me a lechub e ngdiak.

8. Ngera uchul me a lebebil e ngmo meringel er kid el ngosuterir el mo betik a rengrir er a Jehovah?

⁸ A Jehovah a soal a rechad a bo losiou er ngii e le ngbetik a rengrir er ngii. Me a moktek er kid a soad el ngosuterir tirke el mesuub el mo medengei el kmo a Jehovah a omekerreu er a derta er tir, e dirrek el kmal betik a rengul er tir. Ngsoad el ngosuterir el mo omes er a Jehovah el ua “demerir a re diak a demerir e osebecheklir a re melakl dil.” (Psa. 68:5) Me a cherengel a taem el loleketek a omereng el saul er tir el kirel a bltkil a rengul a Dios, e te omuchel el mo betik a rengrir er ngii. A rebebil el mesuub a metik er ngii el kmo ngmeringel er tir lomes er a Jehovah el ua betik a rengul el Chedam, e le redemerir a dimlak lolecholt er a bltikerreng me a ungil lomeruul el mo er tir. (2 Ti. 3:1, 3) Me sel mosuub lobengterir e molisiich aike el mengasireng el blekerdelel a Jehovah. Mngesuterir el mo medengei el  kmo ngika el betik a rengul el Dios a soal a bo lenguu a diak a ulebengelel klengar, e ngii a kltmokl el ngosuterir el mo nguu. Ngera lmuut el sebeched el remuul?

9-10. Ngera el babier a kired el lousbech sel dosuub a Biblia lobengkel a chad? E ngera uchul me kede ousbech ngii el babier?

⁹ Mousbech a babier el “Ngerang Mera el Lolisechakl a Biblia?” me a “Molemolem el Ngar a Bltikerreng er a Dios.” Aika el babier a kltmokl el ngosukid el mo olechau a rengrir tirke el dosuub lobengterir. El ua tiang, ngar a 1 el bliongel er a Biblia Olisechakl e ngonger aika el ker el kmo: A Dios, ngdiak el omekerreu er kid? Ngua ngera osengel a Dios el kirel a chelebirukel el dechelebangel?, me a dirrek el Ngsebechem el mo kmeed er a Jehovah? E kuk mekerang el kirel a Bltikerreng er a Dios el babier? Tia el babier a mo ngosuterir a remesuub el mo medengelii a rolel e sel loltaut a omellach er a Biblia e ngrullii a klengar er tir el lmuut el mo ungil, e dirrek el olekes a deleuill er tir me a Jehovah. Me alta e ke mla mesuub aika el babier lobengterir a rebebil, engdi mluut el mo ungil kutmeklau el kirel a bek el temel a omesuub, me bo lsebechem lungil loltaut el mora ike el lousbech a chad el mosuub lobengkel.

 ¹⁰ Oleko ngike el mesuub a semeriar er a tekoi el losaod er ngii a babier el diak el ngar a Blil a Dongu el Kirel a Osisechakl. Nglocha sebechem el melisiich er ngii el mo menguiu er ngii el babier el di ngii el tang, me bo lsebechem el melemolem el mesuub lousbech a Biblia Olisechakl me a lechub e ng Bltikerreng er a Dios el babier.

11. Ngoingerang e ngungil domuchel el meluluuch er a temel a omesubel a Biblia? E mekera dengesuir ngike el mesuub el mo medengelii a uchul me tiang a klou a ultutelel?

¹¹ Momuchel er a omesubel a Biblia loba nglunguuch. Ngblechoel el ungil a domuchel el meluluuch er a temel a omesubel a Biblia er sel kot el mereched el temel. Ngkired el ngosuir a chad el mesuub el mo medengei el kmo ngdi okiu a chedaol reng er a Dios e ngsebeched el mo ungil medengei a Tekingel a Dios. A rebebil lolisechakl a smodii er a chad el mesuub sel uchul me ngkired el meluluuch lokiu sel longuiu er a Jakobus 1:5 el kmo: “A le ngar ngii er kemiu olengesonges er a llomeserreng, e lolengit er a Dios.” E seikid e ngike lolisechakl a oker er ngike el mesuub el kmo, “Ngmekera dolengit er a Dios el kirel a llomeserreng?” Ngulterekokl ngike el mesuub el kongei el kmo ngkired el meluluuch el mora Dios.

12. Ngoeak a ngera el rolel e ngsebechem lousbech er a Psalm 139:2-4 el ngosuir a chad el mesuub el mo beot er ngii el mengedecheduch er a Jehovah?

¹² Mosisecheklii a chad el mosuub lobengkel el mo meduch el meluluuch. Msodii el kmo a Jehovah a soal lorrenges er a nglunguchel el mera el ngar a rengul. Beketeklii el kmo ngar a nglunguched el di kid el tang e ngsebeched el mekengii a rengud e ouchais er a Jehovah aike el rokui el tekoi el meringel er kid louchais er a ngii di el chad. E lak dobes, a Jehovah a ungil medengei aike el ngar a chelsel a rengud me a uldesued. (Monguiu er a Psalm 139:2-4.) Ngdirrek el sebeched el melisiich er ngii me lolengit a ngeso er a Dios el mo sumechokl a mekngit luldesuel, e dirrek el mo mengoit a mekngit el blekerdelel. El ua tiang, oleko a chad a mla mesuub el telkib el taem, engdi ngdirk kongei el mengull a bebil el chedaol sils. Ngmedengei el kmo ngmekngit, engdi a mera er ngii, ngsoal a bebil lomeruul el lolisiich aika el sils. A leuaisei, e molisiich er ngii me louchais er a Jehovah aike el uldesuel, e lolengit er Ngii me lengesuir el mo betik a rengul er aike el tekoi el soal a Dios.​—Psa. 97:10.

13. (a) Ngera uchul me ngkired el mengemedaol er tirke el dosuub lobengterir el mei er a miting er sel kot el mereched el taem? (b) Kede mekerang e rullii el mo diak lemerur el mei er a Blil a Ongdibel?

¹³ Mongemedaol er ngike el mosuub lobengkel el mei er a miting er sel kot el mereched el taem. A tekoi el lerenges me a omeruul el leues er a chelsel a miting er a Rekristiano, a sebechel locheuir a rengul el mo soal mesiou er a Jehovah. Mochotii er ngii a video el Ngera Meketmokl er a Blil a Ongdibel? e molengit er ngii me lobengkem el mei. Motekir a lsekum ngdiak a mlil. Ngungil tekoi a lsekum ke obengterir a rekakerous el publisher el mo mesuub lobengkel. Tiaikid el rolel a ngosuir ngika el mesuub el mo medengelterir a rebebil el ngar a ongdibel, e dirrek el rullii me ngmo diak el merur el mei er a miting er kid.

14. Ngera sebechel rullii a chad el mesuub el mo soal lolengeriakl er a klereng?

¹⁴ A moktek er kid a soad el ngosuterir tirke el dosuub lobengterir el mo olengeriakl er a klereng. (Efe. 4:13) A chad el kongei el mesuub a Biblia lobengked a ulterekokl el semeriar er sel rolel e tia el omesuub a mo uchul a klungiolel. Engdi sel lemukeroul a bltkil a rengul el mora Jehovah, e nglocha mo omuchel el melatk er a rolel e ngsebechel ngosuterir a rebebil, el uldimukl er tirke el mla mo chedal a ongdibel. (Mt. 22:37-39) Me sel lebo er ngii a ungil techall, e di mereched el ouchais er ngii el kmo kede rokui el ngar ngii a ngerecheled el kired el olengeseu er tia el ureor er a Renged lokiu a tenget.

15. Kede mekera e ngosuir a chad el dosuub lobengkel el mo ungil kltmokl sel lebo er ngii a mondai er ngii?

 ¹⁵ Mosisecheklii ngike el mosuub lobengkel el mo meduch el mesmechokl a mondai er ngii. El ua tiang, oleko ngika el mesuub lobengkem el mla mo ta er a dirkak lemetecholb el publisher, a subedau el kmo ngmla mesibas er a omerellel a tang er a chelsel ongdibel. Lak mosaod el kmo ngtecha ungil e techa mekngit, bai msodii el mo er ngii el kmo ngera ngdmu Biblia el kirel ngii el chad el meruul. Ngsebechel el ousubes er ngike el tilemellii a rengul, engdi a lsekum ngmeringel er ngii lousubes, e ngkirel mo er ngii el chad e mengedecheduch er ngii loba bltikerreng me a ungil lomeruul, e le moktek er ngii a kirel el ‘nguu a chodam er ngii.’ (Momekesiu er a Mateus 18:15, BT.) Mngesuir ngika el mosuub lobengkel me leketmokl a tekoi el bo lolekoi. Mochotii er ngii a rolel e ngousbech er a JW Library^® app, me a Research Guide for Jehovah’s Witnesses, me a jw.org^® el mesuub aike el rolel a dosmechokl chouaika el tekoi. Me a cherengel a taem el loruul el uaisei er a uchei er a bo lemetecholb, e ngmengal mo meduch el teloi er a rechad er a ongdibel.

16. Ngera el klungiaol a mo er ngii sel dolengit er a ta er a publisher el me obengked el mesuub a Biblia?

¹⁶ Molengit er a rebebil el ngar a ongdibel me a dirrek el sel leme loldingel ngike el odam loldingel a ongdibel el mo obengkem el mesuub. E ngera uchul? Me bo lsebechem el ngosuir ngika el mosuub lobengkel er aike el tekoi el kau a kuk diak lsebechem el remuul. El ua tiang, oleko ngika el mesuub a mla melasem el mengoit er a omelamech el dekool el betok el taem e dirkak bo lsebechel. Molengit er a ta er a Sioning el locha mle betok el taem el lolasem el mengoit er a omelamech el dekool e chelechang e ngmla choitii, me lobengkem el mo mesuub lobengkel. Ngika el kldemem el Sioning a locha sebechel msa ngika el mesuub, a ungil lulekrael. A lsekum ngkora meringel er kau el olisechakl lobengkel a odam el klou a klemedengei er ngii, e ngsebechem lolengit er ngii el mo oungerachel er a omesuub er seikid el taem. Ngoeak tiang, e ngika el mesuub a mo sebechel nguu a klungiolel er aike el tekoi el dilubech er a klengar er tirka el kldemem el Sioning. E lak mobes, a moktek er kid a soad el ngosuir ngike el mesuub el mo olengeriakl er a klereng.

17-18. Ngkirem el melatk a ngerang er sel taem el bo lsoam el merrob er a omesubem lobengkel a chad?

¹⁷ A lsekum a chad el mosuub lobengkel a diak lolengeriakl, e nglocha mo er ngii a taem el molatk el kmo, ‘Ngak, ak bai torebengii tia el omesubam?’ A uchei er a omoruul a ngii di el omelilt, e molatk er a klemedengei er ngika el chad. A rebebil a ousbech er a kemanget el taem el mo olengeriakl. Me ngungil el molatk el kmo: ‘Ngika el chad, ngolengeriakl el ngar sel ungil temel?’ ‘Ng mla omuchel el ‘oltirakl’ me a lechub e ngoltaut a tekoi el losuub?’ (Mt. 28:20) A chad el mesuub a locha mo meoud el olengeriakl, engdi cherengel a taem e ngkirel meruul a omelodech er a klengar er ngii.

¹⁸ Engdi kede mo mekerang a lsekum a chad el dosuub lobengkel el kemanget el taem a diak lochotii el kmo ngolengeriakl er a omesubel? Ka  molatk er tiang: Ngika el mesuub a mla suubii a Biblia Olisechakl el babier, e locha dirrek el mla suubii a Bltikerreng er a Dios el babier, engdi ngdirkak a ta el lemei er a miting er a ongdibel, e dirrek el dirkak a ta el lemei er a Chedaol Belsoil! E di blechoel mesngerekl er a omesubel a Biblia el di diak a ungil luchul. Ngar chouaitia el blekeradel, e ngungil obo bleketakl el subedii er a uldesuem el kirel a omesubiu. *

19. Ngera sebechem el dmu er a chad el diak lolecholt er a omereng el saul el kirel a omesubel a Biblia? E ngera el tekoi a kirem el mo melatk?

¹⁹ Ngungil omomuchel el dmu el kmo, ‘Ngera el tekoi a rullii el mo meringel er kau el mo ta er a Sioning er a Jehovah?’ Nglocha mo onger el kmo, ‘Ngsoak el mesuub er a Biblia, engdi ngkmal diak lsebechek el mo ta er a Sioning er a Jehovah!’ Me tia el uldesuel, alta e ngmla mesuub el kemanget el taem, a locha mo oterekeklii el kmo ngungil a lemeterob a omesubiu. Me a lechub, ngika el mesuub a mocha ketengel el subedau er sel mera el uldesuel. El ua tiang, nglocha omdasu el kmo ngkmal diak lsebechel el mo oldingel a obliil. Me chelechang, e ke mocha medengelii a uldesuel, me ngmocha sebechem el olengeseu er ngii.

20. Ngoeak a ngera el rolel e a Rellir 13:48 a sebechel ngosukid el melilt el kmo kede melemolem el mesuub lobengkel a chad me a lechub e ngdiak?

²⁰ Ngklengiterreng, e le rebebil mesuub a Biblia, a di ua rechad er a Israel er a taem er a Esekiel. Ka molatk a tekingel a Jehovah el mora Esekiel el kmo: “Tomdasu er kau el di ua tar a chad er ongelaod a longitakl a chelitakl er a ultoir ma lechub e loutumetum er a harp. Te remenges a rokui el tekingem e diak a ta er ngii el lolengesenges er ngii.” (Ese. 33:32) Nglocha mo meringel er kid el mesubed er a chad el kmo kede mereko el mesuub lobengkel. Me nguaisei, engdi “ngmla mo kosekodel a taem.” (1 Ko. 7:29, BT) Ngbai ungil a deterebengii a omesubed lobengkel a chad el diak lolengeriakl er a klereng, e bai dolasem losiik er a chad el ochotii el kmo ngii a “rredemelel a diak a ulebengelel el klengar.”​—Monguiu er a Rellir 13:48, NW. *

21. Ngera bades er kid er a rak er a 2020, e tiang ngmo ngosukid er a ngerang?

²¹ Me ngar er a rak er a 2020, e a bades er kid a mo ngosukid el melatk er a rolel e kede lmuut el mo ungil meruul er a remo disaiplo. Tiang a uldimukl er a bebil el tekingel a Jesus el ledilung er sel klou a ultutelel el miting el mla er ngii er a rois er a Galilea. Ngdilu el kmo: “Morael el mor a bek el bedengir a re chad er ker me ker e moruul er tir el mo obengkek, e molecholb er tir.”​—Mt. 28:19.